Ndlela Leyi Ntiyiso Wu Hi Ntshunxaka Ha Yona
1 Siku rin’wana Yesu u vule leswi landzelaka eka Vayuda lava va kombiseke ripfumelo eka yena: “Mi ta tiva ntiyiso, kutani ntiyiso wu ta mi ntshunxa.” (Yoh. 8:32) A a vulavula hi ntshunxeko lowu antswaka ku tlula wa vanhu, lowu nga ta kumiwa hi vanhu hinkwavo—hambi i swigwili kumbe swisiwana, hambi va dyondzekile kumbe a va dyondzekanga. Yesu u dyondzise ntiyiso lowu a wu ta ntshunxa vanhu evuhlongeni bya xidyoho ni rifu. Hilaha Yesu a hlamuseleke hakona, “muendli un’wana ni un’wana wa xidyoho i hlonga ra xidyoho.” (Yoh. 8:34) Hi wu langutele hi mahlo-ngati nkarhi lowu vanhu hinkwavo lava yingisaka va nga “ta ntshunxiwa evuhlongeni bya ku onhaka kutani [va] va ni ntshunxeko lowu vangamaka wa vana va Xikwembu”!—Rhom. 8:21.
2 Ntiyiso malunghana na Yesu ni xikhundlha xakwe malunghana ni ku hetisisa xikongomelo xa Xikwembu hi wona wu tisaka ntshunxeko wolowo. Ntiyiso lowu wu katsa vutivi malunghana ni gandzelo ra nkutsulo leri a ri nyikeleke leswaku ku pfuneka hina. (Rhom. 3:24) Hambi ku ri sweswi, ku amukela ntiyiso wa Bibele ni ku wu namarhela swi hi pfuna ku ntshunxeka hi ndlela yo karhi eku chaveni, gome ni le ka mikhuva hinkwayo yo biha.
3 Ku Ntshunxeka Eka Ku Chava Ni Gome: A hi fanelanga hi va ni gome hikwalaho ka swiyimo swa misava hikuva ha swi twisisa leswaku ha yini ku ri ni vubihi naswona ha swi tiva leswaku ku nga ri khale byi ta herisiwa emisaveni. (Ps. 37:10, 11; 2 Tim. 3:1; Nhlav. 12:12) Ku tlula kwalaho, ntiyiso wu hi ntshunxa eka tidyondzo ta mavunwa, malunghana ni xiyimo xa vafi. Ha swi tiva leswaku vafi a va nge hi vavisi, a va xaniseki hilaha ku nga heriki naswona Xikwembu a xi endli leswaku vanhu va fa leswaku va va na xona exivandleni xa moya.—Ekl. 9:5; Mint. 24:15.
4 Ntiyiso wolowo wu endle leswaku mpatswa wun’wana wu nga vileli ngopfu endzhaku ka loko wu feriwe hi n’wana emhangwini. Manana u te: “A ku na nchumu lexi nga sivaka ku lahlekeriwa ka hina ku kondza hi vona jaha ra hina nakambe loko ku pfuxiwa vafi. Ha swi tiva leswaku ku karhateka ka hina i ka nkarhinyana ntsena.”
5 Ku Ntshunxeka eMikhuveni Yo Biha: Ntiyiso wa Bibele wu nga cinca mianakanyo ya munhu ni vumunhu bya yena, wu endla leswaku a papalata swiphiqo leswi papalatekaka. (Efe. 4:20-24) Ku tshembeka ni ku gingiriteka swi nga hunguta vusweti. (Swiv. 13:4) Ku kombisa rirhandzu ra xiviri swi antswisa vuxaka bya hina ni van’wana. (Kol. 3:13, 14) Ku xixima vunhloko bya Vukreste swi hunguta swiphiqo endyangwini. (Efe. 5:33–6:1) Ku papalata vudakwa, ku tikhoma loko biha ka rimbewu, fole ni swidzidzirisi leswi godzombelaka swi pfuna leswaku hi va ni rihanyo lerinene.—Swiv. 7:21-23; 23:29, 30; 2 Kor. 7:1.
6 Jaha rin’wana ri tsandzeke ku tshika ku tirhisa swidzidzirisi leswi ri godzombeleke malembe ya kaye. Siku rin’wana ri hlangane ni muhuweleri a ri karhi a nyikela vumbhoni exitarateni. Ri amukele nkandziyiso naswona ku endliwe malunghiselelo yo ri endzela ekaya. Ku sunguriwe dyondzo ya Bibele. Endzhaku ka tin’hweti timbirhi jaha leri ri tshike ku tirhisa swidzidzirisi hilaha ku heleleke naswona endzhaku ko dyondza tin’hweti ta nhungu, ri khuvuriwile. Loko makwavo wa rona wa xinuna ni nsati wakwe va vona leswaku ri tshike ku godzomberiwa hi swidzidzirisi, na vona va sungule ku dyondza Bibele.
7 Pfuna Van’wana Leswaku Va Kuma Ntshunxeko: Lava va nga ni nkarhi wo leha va ri mahlonga ya tidyondzo ta mavunwa swi nga ha va nonon’hwela ku twisisa ntshunxeko lowu nyikeriwaka hi Rito ra Xikwembu. Ku fikelela timbilu ta vona swi nga lava leswaku mudyondzisi a endla matshalatshala yo hlawuleka a tlhela a lunghiselela kahle. (2 Tim. 4:2, 5) Lowu a hi wona nkarhi wo debyisa mavoko eku ‘huweleleni ka ntshunxeko eka lava endliweke makhumbi.’ (Esa. 61:1) Ntshunxeko wa Vukreste i wa risima. Ku kuma wona swi vula vutomi lebyi nga heriki.—1 Tim. 4:16.