Mpfuxeto Wa Xikolo Xa Vutirheli Bya Le Tilweni
Swivutiso leswi landzelaka swi ta pfuxetiwa hi ku vulavurisana kunene eXikolweni xa Vutirheli bya le Tilweni hi vhiki leri sungulaka hi August 25, 2003. Mulanguteri wa xikolo u ta fambisa mpfuxeto wa timinete ta 30 lowu seketeriweke eka rungula ra tinkulumo leti nyikeriweke ku sukela eka vhiki ra July 7 ku ya eka August 25, 2003. [Xiya: Laha ku nga riki na swikombo endzhaku ka xivutiso swi ta lava leswaku u tikumela tinhlamulo hi ku tiendlela ndzavisiso.—Vona buku leyi nge Xikolo Xa Vutirheli, matl. 36-7.]
TINHLA TO TIRHELA EKA TONA
1. Hi byihi vuyelo bya ku languta vanhu ematihlweni, loko u vulavula na vona ensin’wini? [2, be-TS tl. 125 tindz. 1-2; tl. 125 bokisi] Mahlo lama kombisaka ku tsaka ni xichavo ma nga kombisa leswaku u munhu wa muxaka muni naswona ma nga endla loyi u vulavulaka na yena a ntshunxeka. Ku languta vanhu hi ndlela leyi faneleke ku nga ku pfuna leswaku u kuma tindlela to langutana ni swiyimo swo hambana-hambana.
2. Loko u chuha ngopfu loko u ri karhi u tilunghiselela ku ya ensin’wini, i yini lexi nga ku tiyisaka nhlana? [4, be-TS tl. 128 tindz. 4-5] I ku lunghiselela hi vukheta ni ku khongela Yehovha hi mbilu hinkwayo, u anakanya hi tintswalo ta Yehovha letikulu, hi ku rhamba ka yena vanhu leswaku va ta tsakela vutomi lebyi nga heriki eParadeyisini; dyondza ku anakanyisisa hi swilaveko swa van’wana. Swa pfuna ku tsundzuka leswaku vanhu va ni mfanelo ya ku tihlawulela, va nga ha ri amukela rungula kumbe va ri ala. Xiavelo xa hina i ku chumayela ntsena. (Mat. 24:14; Mint. 4:29)
3. I yini lexi nga ku pfunaka leswaku u vulavula hi ndlela ya ntumbuluko onge u le ku buleni loko u nyikela nkulumo exitejini? [5, be-TS tl. 129 ndz. 2; tl. 129 bokisi] Ku anakanya hi tinhla ta yona ku nga ri marito lawa u nga ta ma vula, swi nga ku pfuna leswaku u nyikela nkulumo hi ndlela ya ntumbuluko onge u le ku buleni. Loko munhu a nhlokohata nkulumo kumbe loko tinotsi ta yena ti tele, nkulumo yi nga tika.
4. Xana misinya ya milawu leyi kumekaka eka Levhitika 16:4, 24, 26, 28; Yohane 13:10 na Nhlavutelo 19:8 yi yi khumba njhani ndlela leyi hi langutekaka ha yona naswona ha yini leswi swi ri swa nkoka? [7, be-TS tl. 131 ndz. 3; tl. 131 bokisi] Bibele yi hi khutaza leswaku hi basa, emirini ni le ka leswi hi swi ambalaka, ngopfu-ngopfu loko hi ya endhawini ya vugandzeri kumbe hi ya ensin’wini. Ku languteka ka hina ku nga khumba ndlela leyi vanhu va byi langutaka ha yona vukhongeri bya hina naswona ku nga ha kombisa leswaku hi hanya vutomi muni.
5. Hlamusela leswaku munhu la nga ni xichavo ni “mianakanyo yo hluteka” i munhu wa njhani. (1 Tim. 2:9, 10) [8, be-TS tl. 132 ndz. 1] Munhu loyi a nga ni xichavo u papalata ku khunguvanyisa van’wana naswona a nga endli swilo hi ku lava ku voniwa. Munhu la nga ni mianakanyo yo hluteka u va ni vuxiyaxiya naswona u endla swiboho leswinene. U xixima misinya ya milawu ya Xikwembu naswona u tiyimisela ku tirhisa minkongomiso ya Bibele evuton’wini bya yena.
NKULUMO NO. 1
6. Hambileswi Vakreste va faneleke va lehiselana mbilu, xana i yini lexi nga ta ka xi nga tiyiseleriwi exikarhi ka vona? (Kol. 3:13) [3, w01-TS 7/15 tl. 22 tindz. 7-8] Vakreste a va swi pfumeleli swilo swo biha naswona a va tipfali mahlo loko va vona swihoxo. (Gal. 6:1)
7. I Ntiyiso kumbe I Mavunwa: Tinomboro leti landzelelanaka, i tinomboro leti heleleke. Hlamusela. [4, si-TS tl . 282 tindz. 24-5] I Mavunwa. Tinomboro leti landzelelanaka ti kombisa ndhawu ya tona enxaxamelweni, tanihi ndhawu yo sungula, ya vumbirhi kumbe ya vunharhu, kambe a ti kombisi nomboro leyi heleleke. Hi xikombiso, loko ku vulavuriwa hi lembe-xidzana ra vu-21, a swi vuli swona leswaku lembe-xidzana leri se ri hundzile. Hilaha ku hambaneke, tinomboro ta nxaxamelo i tinomboro leti heleleke.
8. Hi wihi nsusumeto lowunene lowu faneleke wu hi endlaka hi hlaya Rito ra Xikwembu naswona hikwalaho ka yini swi ri swa nkoka ku va ni nsusumeto wo tano? [5, be-TS 24 ndz 1] Nsusumeto lowunene lowu faneleke wu hi endla hi hlaya Rito ra Yehovha, i ku n’wi rhandza. Ku rhandza Yehovha hi ‘mbilu ya hina hinkwayo’ ku ta hi susumetela leswaku hi tikarhatela ku nghenisa vutivi bya Xikwembu emianakanyweni ya hina. (Mat. 22:37)
9. Xana munhu wo tlhariha u ‘teka vutivi byi ri bya risima’ hi ndlela yihi? (Swiv. 10:14) [6, w01-TS 7/15 tl. 27 tindz. 4-5] U fanele a tata mianakanyo ya yena hi vutivi lebyi akaka bya Xikwembu, lebyi kumekaka eka “Matsalwa hinkwawo.” (2 Tim. 3:16, 17) Vutivi bya Matsalwa byi fanele byi dzika embilwini ya yena hi ku hambeta a anakanyisisa.
10. Ha yini mikhuva leyinene ya Yobo yi ri leyi xiyekaka? (Yobo 1:1, 8; 2:3) [7, w01-TS 8/1 tl. 20 ndz. 4] Mikhuva leyinene ya Yobo yi n’wi endle a va wanuna ‘la pfumalaka xisandzu ni la lulameke.’ Hi ntolovelo, a a tirha tanihi muprista endyangwini wakwe, a nyikela magandzelo ematshan’weni ya vana vakwe. (Yobo 1:5) A swi kanakanisi leswaku endyangwini wa Yobo, mikhuva leyi a yi katsa vugandzeri bya Yehovha a yi nga tekeriwi ehansi.
KU HLAYA KA BIBELE KA VHIKI NI VHIKI
11. Xana swirho swa huvo leyi fumaka swi yi fikelele njhani “mianakanyo yin’we” ya leswaku vapfumeri lava nga Vamatiko a va fanelanga va yimbisiwa leswaku va ta ponisiwa? (Mint. 15:25) Xo sungula, Petro u hlamusele leswaku Xikwembu xi nyike vapfumeri lava nga Vamatiko, lava nga yimbangiki, moya lowo kwetsima, a kombetela eka ku hundzuka ka Korneliyo ni ndyangu wakwe. (Mint. 15:7-9) Xa vumbirhi, Barnaba na Pawulo va hlamusele mintokoto leyi va veke na yona exikarhi ka vamatiko lava va veke vapfumeri. (Mint. 15:12) Xo hetelela, Yakobo u kombetele eka Amosi 9:11, 12. (Mint. 15:13, 16) Xisweswo, tinhla ni Matsalwa lama huhuteriweke, swi endle leswaku xiboho lexi lexinene xi va erivaleni eka hinkwavo. [1, w90-TS 6/15 tl. 13 tindz. 14-15]
12. Hikwalaho ka yini huvo leyi fumaka yi byele Pawulo leswaku a tirhisa yin’wana ya Milawu ya Muxe kasi Yehovha u ri a ya ha tirhi? (Mint. 21:20-26) [2, it-1 tl. 481 ndz. 3; it-2 tl. 1163 ndz. 6–tl. 1164 ndz. 1] Nawu wa Muxe a wu ri nawu wa tiko ra Yuda. Loko mikhuva yo karhi leyi yelanaka na wona, yi nga lwisani ni misinya ya milawu ya Vukreste kumbe ku honisa tidyondzo ta Vukreste, Vakreste vo sungula a va nga voni xihoxo eka leswi naswona va fambisane ni mikhuva ya Vayuda leswaku va nga khunguvanyisi van’wana swi nga fanelanga.
13. Hi swihi swihehlo swa vunwa leswi muapostola Pawulo a hehliweke ha swona, leswi hi tsundzuxaka swihehlo leswi Timbhoni ta Yehovha ti hehliwaka ha swona emikarhini ya sweswi? (Mint. 24:5, 6) [3, w01-TS 12/15 tl. 22 ndz. 7–tl. 23 ndz. 2] Vakaneti va Pawulo a va n’wi lumbeta va vula leswaku u ni mintirho leyi onhaka, leyi vangaka mpfilumpfilu exikarhi ka vanhu. Va tlhele va vula leswaku i murhangeri wa mpambukwa lowu nga tiviwiki hikuva Vukreste a byi hambanile ni vupfumeri bya Xiyuda. Nakambe, u hehliwe leswaku u tlule milawu leyi a yi vekiwile malunghana ni mindzilakano ya le tempeleni.
14. Xana Pawulo u veke xikombiso xo va mutwarisi wa Mfumo hi ndlela yihi hambileswi a a yirisiwile ku huma endlwini yakwe ku ringana malembe mambirhi? (Mint. 28:30, 31) Hambileswi Pawulo a a vekeriwe swipimelo swo karhi, u endle hilaha a nga kotaka hakona ehansi ka swiyimo sweswo, a chumayela ni ku dyondzisa hi “ntshunxeko lowukulu wo vulavula.” Loko a ri ekhotsweni u tsale mapapila lama huhuteriweke ya ya eka Vaefesa, Vafilipiya, Vakolosa ni Vakreste va Vaheveru ku katsa ni leri yaka eka Filemoni. [4, w90-TS 6/15 tl. 25 ndz. 20; Rbi8 tl. 13 nxaxamelo]
15. “Valawuri lava tlakukeke” i xiphemu xa “lunghiselelo ra Xikwembu” hi ndlela yihi, naswona leswi swi fanele swi va khumba njhani Vakreste? (Rhom. 13:1, 2) [8, w00-TS 8/1 tl. 4 ndz. 5] Mimfumo ya vanhu ya tipolitiki yi nyikiwe xinkarhana leswaku yi va kona ni leswaku yi lawula hi mpimo lowutsongo hi ku pfumelelana ni xikongomelo xa Xikwembu. Vakreste va titsongahatela vulawuri bya yona ntsena loko yi nga tluli mindzilakano leyi Xikwembu xi yi vekeleke yona.