Bokisi Ra Swivutiso

◼ Hi fanele hi swi endla njhani swiavelo swa hina swa le vandlheni?

Hikwalaho ka matshalatshala lama endliwaka hi vun’we, vandlha ra vanhu va Yehovha ri kota ku tirha hi ku hleleka. (1 Kor. 14:33, 40) Ehleketa hi mintirho leyi endliwaka eka nhlangano wun’we wa vandlha. Handle ka nongonoko hi woxe ku na swo tala leswi endliwaka loko wu nga si sungula ni loko wu herile, hikuva vamakwerhu va endla mintirho yo hambana-hambana. Mintirho yin’wana leyi endliwaka, leyi van’wana va nga yi voniki, na yona i ya nkoka. Xana un’wana ni un’wana wa hina a nga pfuna njhani elunghiselelweni leri?

Tiendle u kumeka. Lava va nga ni moya wa ku tirha hi ku tirhandzela va va ni swo tala swo swi endla. (Ps. 110:3) Khathalela lava vabyaka ni lava dyuhaleke. Pfuneta eku basiseni ka Holo ya Mfumo. Hi nga endla mintirho yo tala leyi pfunaka van’wana hambiloko hi nga komberiwanga hi ku kongoma. Lexi lavekaka eka hina i ku navela ku pfuna.

Tirha u ringanisela. Vanhu lava ringaniselaka va swi tsakela ku pfuna van’wana. (Luka 9:48) Ku ringanisela ku ta hi endla leswaku hi nga pfumeli ku amukela mintirho leyi hi nga taka hi nga swi koti ku yi endla. Ku tlula kwalaho, ku ringanisela ku ta hi endla leswaku hi nga tshikileli van’wana.—Swiv. 11:2.

Tshembeka. Le Israyele wa khale, Muxe u tsundzuxiwe ku hlawula “vavanuna lava tshembekaka” leswaku a ta va byarhisa vutihlamuleri. (Eks. 18:21) Mfanelo yoleyo ya ha laveka ni namuntlha. Xiavelo xin’wana ni xin’wana lexi u nyikiwaka xona xi endle hi rixaladza. (Luka 16:10) Loko u nga swi koti ku endla xiavelo xa wena, tiyiseka leswaku u kombela un’wana leswaku a ku endlela xona loko u nga ri kona.

Endla ntirho wa wena hi mbilu hinkwayo. Vakreste va khutaziwa ku tirha hi mbilu hinkwayo hambi ku ri emintirhweni ya vona ya ku tihanyisa. (Kol. 3:22-24) Hi fanele hi tirha hi mbilu hinkwayo ngopfu-ngopfu loko ntirho wa kona hi wu endlela vugandzeri bya ntiyiso. Hambiloko ntirho wa kona wu vonaka wu nga nyawuli, vandlha ra vuyeriwa loko wu endliwa hi mbilu hinkwayo.

Xiavelo xin’wana ni xin’wana xi hi nyika lunghelo ro kombisa rirhandzu ra hina eka Yehovha swin’we ni le ka vamakwerhu. (Mat. 22:37-39) Onge hi nga yi endla hi ku tshembeka mintirho yihi na yihi leyi hi averiwaka yona.