Yehovha U Rhandza La Nyikelaka A Tsakile
1. (a) Ha yini swi fanerile leswaku Yehovha a vuriwa munyiki la tsakeke? (b) Ha yini hi fanele ku tekelela Yehovha hi ku va vanyiki lava tsakeke?
1 Yehovha u hlamuseriwa tanihi “Xikwembu lexi tsakeke.” (1 Tim. 1:11) I yini lexi endlaka leswaku a va la tsakeke? Xin’wana xa swona hi leswi a hananaka naswona u tshama a lunghekele ku nyika, ‘u pfula voko ra yena a enerisa ku navela ka xin’wana ni xin’wana lexi hanyaka.’ (Ps. 145:16) Nyiko ya yena leyikulu i N’wana wa yena la nyikeleke ha yena leswaku a hi kutsula. (Yoh. 3:16) Nakambe, anakanya hi mikateko hinkwayo ya moya ni ya nyama leyi a hi nyikaka yona siku ni siku! Hakunene, Yehovha i xikombiso lexikulu xa ku va “munyiki la tsakeke.” (2 Kor. 9:7) Bibele yi hi khutaza yi ku: “Vanani vatekeleri va Xikwembu.” (Efe. 5:1) A hi voneni lomu hi nga tekelelaka Yehovha kona loko hi ri karhi hi tiphina hi ku hanana.—Mint. 20:35.
2. Hi yihi ndlela leyi hi nyikaka van’wana ha yona naswona hi vuyeriwa hi ndlela yihi?
2 Hi tiphina hi ku nyika loko hi ri karhi hi chumayela mahungu lamanene ya Mfumo eka vanhu va le nsin’wini ya hina niloko hi chumayela hi xitshuketa. Loko hi hlanganyela hi ku hiseka entirhweni lowu wo chumayela ni ku dyondzisa, hi kuma ntsako lowukulu. Vanhu va Yehovha va heta tiawara to tlula biliyoni lembe ni lembe, va ri karhi va byela vanhu mahungu lamanene. Loko hi ri entirhweni wa hina wo chumayela hi nyika vanhu timagazini, tibroxara ni tibuku ta madzana ya timiliyoni, hi nga va hakerisi nchumu.
3. (a) Xana nhlengeletano ya Yehovha yi hanane hi ndlela yihi ematikweni lama nga le vuswetini? (b) I yini leswi ku languteriweke leswaku swi endliwa hi mavandlha lama akeriweke tindhawu teto to gandzela eka tona?
3 Ku tlula kwalaho, ematikweni lama nga le vuswetini, nhlengeletano ya Yehovha yi pfune mavandlha yo tala leswaku ma aka Tiholo ta Mfumo. Leswi swi endla leswaku vamakwerhu va le matikweni lawa va va ni tindhawu letinene to khoma minhlangano eka tona. Ku ta fikela sweswi, se ku akiwe Tiholo ta Mfumo to tlula 6 000 ematikweni lama nga le vuswetini laha Afrika ntsena. Ku languteriwe leswaku mavandlha lawa ma khathalela ku lunghisiwa ka tiholo leti naswona ma humesa munyikelo wo hakela mali leyi holo yi akiweke ha yona, hilaha ma nga kotaka hakona. Minyikelo yoleyo yi endla leswaku mavandlha man’wana ma kota ku akeriwa tiholo na wona hi nkarhi lowu faneleke.
4. Hlamusela leswi Yehovha a swi endlaka emarhavini yo tlula dzana leswaku ntirho wo chumayela wu ya emahlweni.
4 Huvo leyi Fumaka yi kongomisa ntirho wa Mfumo emisaveni hinkwayo, hi ku tirhisa marhavi lama tlulaka dzana. Ku ni vamakwerhu vo tlula 20 000 lava tirhaka emarhavini lawa. Man’wana ya wona ma kandziyisa tibuku naswona ma ni michini yo gandlisa ni yo hlanganisa tibuku leswaku ma ta kota ku khathalela swilaveko swa nsimu. Sweswinyana, nhlengeletano ya ha ku xava michini yo gandlisa ya nkombo, leyi vuriwaka MAN, leyi gandlisaka hi rivilo lerikulu naswona ha wun’we wu kotaka ku gandlisa timagazini ta 90 000 hi awara. A swi kanakanisi leswaku michini leyi yi endla ntirho wo tala wo gandlisa. Ku laveka miako leyikulu yo rhurhela michini leyi leyikulu yo gandlisa. Ku laveka ni maphepha yo tala ni swilo swin’wana swo durha leswaku ku kandziyisiwa timagazini ni tibuku. Ku laveka tikhompyuta ni michini yin’wana leswaku ku endliwa ntirho hinkwawo wo hundzuluxela ni mintirho yin’wana. Nakambe, ku laveka byetlelo bya vatirhi va le Bethele. Leswi hinkwaswo swi endliwa hi xikongomelo xa leswaku ntirho wo chumayela wu ya emahlweni.
5. Hi swihi swilo swin’wana leswi lavaka mali, leswi nhlengeletano yi swi endlaka leswaku ntirho wa Mfumo wu ya emahlweni?
5 Mali yin’wana yi tirhisiwa ku khathalela makume ya magidi ya varhumiwa ni maphayona yo hlawuleka lama rhumeriwaka emasin’wini lama lavaka vahuweleri lava engetelekeke. Nakambe ku ni magidi ya valanguteri lava endzelaka mavandlha ni swifundzha leswaku va aka vamakwerhu eripfumelweni ni ku va khutaza leswaku va hambeta va chumayela. Ri nga kala ri pela ha ha ringeta ku hlayela leswi Yehovha a swi endleke hi ku tirhisa malandza ya yena, hambileswi swi lavaka mali yo tala.
6. Xana mali yo seketela ntirho wo chumayela wa misava hinkwayo yi huma kwihi?
6 Loko u languta ntirho lowukulu lowu endliwaka emisaveni hinkwayo, u nga ha tivutisa leswaku yi huma kwihi mali yo hakelela swilo leswi hinkwaswo. A yi humi eka vamakwerhu vo karhi lava fuweke kumbe matiko yo karhi lama fuweke. Minyikelo yi huma eka timiliyoni ta vamakwerhu ni vanhu lava tsakelaka, lava vonaka nkoka wa ntirho lowu lowukulu, lowu Yesu a hi leriseke leswaku hi wu endla. (Mat. 24:14; 28:19, 20) Minyikelo leyi hinkwayo yi fana ni mathonsi ya mpfula lama hetelelaka ma endle xinambyana lexi na xona xi hetelelaka xi ri nambu. Nambu wolowo wu khulukela eka wun’wana lowukulu kutani wu hetelela wu endla maboboma lamakulu. Timbhoni ta Yehovha a ti fambisi puleti ya minhlengo eminhlanganweni ya tona kumbe ti famba ti kombela minhlengo. Hinkwavo lava seketelaka ntirho lowu lowukulu hi timali va wu seketela hikwalaho ka leswi va rhandzaka Yehovha.
7. Nyika swikombiso swa malandza ya Yehovha ya le nkarhini lowu hundzeke, lama humeseke minyikelo yo tala leswaku ma seketela vugandzeri bya Yehovha hi tinyiko ta wona.
7 Ku sukela khale ka khaleni, vagandzeri va ntiyiso va tiveka hi ku nyikela hi swilo leswi vonakaka evugandzerini bya Yehovha lebyi tengeke. Loko Abrahama a heta ku hlula valala va yena lava a va teke Lota ntukulu wa yena, u nyike muprista Melkisedeke nyiko. (Gen. 14:18-20) Hosi Davhida u nyike n’wana wa yena Solomoni, nsuku wo tala, silivhere, koporo ni timhandzi ni swilo swin’wana swa risima, leswi hi ku famba ka nkarhi a swi tirhiseke ku aka tempele. (1 Tikr. 29:1-5) Loko Yehovha a lerise Muxe leswaku a aka tabernakela emananga, vanhu va humese minyikelo yo tala. Rungula leri nga eka Eksoda 35:21 ri ri: “Kutani va ta, un’wana ni un’wana loyi mbilu yakwe yi n’wi susumeteke, ni un’wana ni un’wana loyi moya wakwe wu n’wi hlohloteleke, va tisa munyikelo wa Yehovha wa ntirho.” Ina, ‘timbilu ta vona ti va susumetile’ naswona ‘moya wa vona wu va hlohloterile’ leswaku va humesa munyikelo wa ku tirhandzela wa swin’wetsin’wetsi swo durha ni nhundzu yin’wana, leswi a swi ta va teka nkarhi wo leha ku tlhela va swi kuma. A va swi navela hi timbilu ta vona hinkwato ku yisa vugandzeri bya ntiyiso emahlweni.
8. Xana vo tala namuntlha va xi tekelela njhani xikombiso xa noni leyi Yesu a vulavuleke ha yona eka Luka 21, naswona i yini lexi va susumetelaka ku endla tano?
8 Swi tano ninamuntlha. Minyikelo ya ntirho wa Mfumo wa misava hinkwayo yi huma eka lava timbilu ta vona ti va susumetelaka ku nyikela. Vo tala va vona i swisiwana kambe va seketela ntirho wo chumayela hi timali ta vona, hakanyingi va humesa hinkwaswo leswi va nga na swona, ku fana ni noni ya le nkarhini wa Yesu. Rungula ra Luka 21 ri hlamusela leswaku Yesu ni vadyondzisiwa va yena a va hlalele vanhu va ri karhi va hoxa minyikelo ebokisini ra munyikelo etempeleni. Hiloko ku ta noni yi fika yi hoxa swimalana swimbirhi swa ntikelo wa le hansi swinene. Loko Yesu a yi vona, u byele vaapostola va yena a ku: “Ndzi mi byela ntiyiso, Noni leyi, hambileswi yi nga xisiwana, yi hoxe swo tlula leswi hoxiweke hi lavan’wana hinkwavo. Hikuva lava hinkwavo va hoxe tinyiko leti va ti pambuleke eka leswi swi va taleleke, kambe wansati loyi hambileswi a a pfumala u hoxe hinkwaswo leswi a a ri na swona swa ku tihanyisa.” (Luka 21:2-4) Noni leyi yi bumabumeriwile hileswi yi humeseke hinkwaswo leswi a yi ri na swona. Rungula leri ri kombisa leswaku hambi ku ri minyikelo leyitsongo leyi humaka eka vamakwerhu lava nga swisiwana i ya nkoka naswona ya amukeleka eka Yehovha ni N’wana wa yena, Yesu Kreste.
9. (a) Ku endleke yini loko Vaisrayele va nga ha ri na mhaka ni vugandzeri bya ntiyiso? (b) Xana timbilu ta hina ti fanele ti hi susumeta ku endla yini?
9 Munhu u fanele a susumetiwa hi mbilu leyinene loko a nyikela evugandzerini bya ntiyiso bya Yehovha. Loko Vaisrayele va sungula ku nga ha vi na mhaka ni tempele ya Yehovha, va tise switlhavelo leswi hambi vona vini a va nga swi lavi, ku nga swifuwo leswi vabyaka, leswi feke mahlo ni leswi khutaka, kasi a va fanele va tisa leswi hanyeke kahle. Xana Yehovha a a ta swi tsakela switlhavelo swo tano? Nikatsongo! U vule leswaku loko va tisa switlhavelo swo tano a va n’wi delela. (Lev. 1:10; Mal. 1:13) Leswi vulaka leswaku loko hi humesa munyikelo wo seketela vugandzeri bya ntiyiso, a hi fanelanga hi wu humesa ntsena onge ho sindzisiwa. Hi fanele hi susumetiwa hi ku navela ku yisa vugandzeri bya ntiyiso emahlweni; kunene timbilu ta hina ti fanele ti hi susumetela ku yi humesa hi mbilu hinkwayo hilaha noni liya yi endleke hakona. Yehovha u ta hi katekisa hilaha a tshembiseke ha kona leswaku u ta katekisa Vaisrayele loko va seketela vugandzeri bya yena hi mbilu hinkwayo.—Mal. 3:10.
10. (a) Xana lunghiselelo ra munyikelo ri tirha njhani eka vahuweleri? (b) Leswi hi nga va hakerisiki vanhu loko va amukela minkandziyiso ya hina, i yini leswi hi nga va byelaka swona loko hi va fambisela minkandziyiso?
10 Swi vonaka onge vahuweleri van’wana a va si swi twisisa leswaku ri tirha njhani lunghiselelo ra munyikelo loko ku fambisiwa tibuku ni timagazini. Loko hi teka tibuku kumbe timagazini eHolweni ya Mfumo, hi ni lunghelo ro humesa munyikelo wa leswi hi swi tekeke. Hi ndlela yoleyo hi pfuneta ku hakela yin’wana ya mali leyi tirhisiweke loko ku endliwa minkandziyiso yoleyo. Loko hi fambisela vanhu minkandziyiso ensin’wini, hi va byela leswaku tibuku ta hina a hi ti xavisi. Hambiswiritano, swi fanerile ku va byela leswaku loko va swi tsakela ku humesa mali yo karhi va nyikela entirhweni wa misava hinkwayo, minyikelo ya vona ya amukeleka. Kutani hi nga va komba mvhilopho leyi tsariweke “Contributions for the Worldwide Work—Matthew 24:14.” Vo tala va titwa va ntshunxekile ku hoxa munyikelo emvhilopheni leyi, loko va twisisa ndlela leyi ntirho wa hina wu endliwaka ha yona emisaveni hinkwayo. Minyikelo ya hina leyi nga le timvhilopheni hi yi hoxa ebokisini leri faneleke, eHolweni ya Mfumo, leri tsariweke leswaku “Contributions for the Worldwide Work—Matthew 24:14” leswaku yi ta rhumeriwa erhavini.
11. (a) Xana hi fanele hi va ni langutelo rihi hi minyikelo leyi hi yi humesaka entirhweni wa Yehovha? (b) I yini leswi un’wana ni un’wana wa hina a khutaziwaka leswaku a swi endla?
11 Loko hi anakanyisisa kahle hi ku tinyiketela ka hina eka Yehovha, kahle-kahle ku katsa hinkwaswo leswi hi nga na swona. Misava ni leswi nga eka yona i swa Yehovha. (Ps. 24:1) Leswi vulaka leswaku loko hi humesa munyikelo wa ntirho wa misava hinkwayo, hi va hi tlherisela Yehovha leswi ana a hi nyikeke swona. Hosi Davhida u yi veke kahle mhaka leyi hi nkarhi lowu Vaisrayele va humeseke minyikelo yo tala loko tempele yi ri karhi yi akiwa. U khongele Yehovha a ku: “Mina ndzi yini, ni vanhu va mina i yini, leswaku hi va ni matimba yo endla magandzelo ya ku tirhandzela yo fana ni lawa? Hikuva hinkwaswo swi huma eka wena, naswona hi ku nyike swona swi huma evokweni ra wena.” (1 Tikr. 29:14) Un’wana ni un’wana u fanele a endla xiboho embilwini ya yena leswaku u lava ku humesa yini, hi ku ya hi leswi a nga swi kotaka. Loko minyikelo yo tano yi huma embilwini leyi tsakeke, Yehovha u ta hi katekisa. I swinene leswaku un’wana ni un’wana wa hina a kambisisa ndlela leyi a wu seketelaka ha yona ntirho wa Mfumo.
12. Hi yihi ndlela leyi un’wana ni un’wana wa hina a nga yi tirhisaka ha yona ndzayo ya Pawulo leyi kumekaka eka 1 Vakorinto 16:2?
12 Muapostola Pawulo u va nyike ndzayo leyi pfunaka hinkwavo lava rhandzaka Yehovha naswona va lavaka ku seketela ntirho wa Mfumo hi tlhelo ra timali. U te: “Siku rin’wana ni rin’wana ro sungula evhikini, un’wana ni un’wana wa n’wina a a veke swo karhi etlhelo endlwini ya yena a swi hlayisa, hi ku ya hilaha a fuweke hakona.” (1 Kor. 16:2) Swi nga ha endleka leswaku van’wana a ku na muholo wo karhi lowu va wu kumaka hi vhiki kumbe hi n’hweti. Va nga ha va va ri varimi kutani va nga swi koti ku vekela mali yo karhi etlhelo vhiki ni vhiki kumbe n’hweti ni n’hweti. Kambe yinhla ya muapostola Pawulo hi leswaku hi fanele ku titoloveta ku veka swo karhi etlhelo leswaku hi ta seketela ntirho wa Yehovha.
13. Xana ku fanele ku endliwa yini hi mali leyi nga emabokisini ya munyikelo naswona minyikelo ya ntirho wa misava hinkwayo yi fanele yi rhumeriwa kwihi?
13 Minyikelo yoleyo yi nga rhumeriwa hi ku kongoma erhavini ra le tikweni ra rikwenu kumbe yi hoxiwa ebokisini ra munyikelo wa ntirho wa misava hinkwayo eHolweni ya Mfumo. Loko nhlangano wun’wana ni wun’wana wu hela, ku fanele ku va ni vamakwerhu vambirhi, ku nga ha va vakulu kumbe malandza ya vutirheli, lava nga ta hlaya mali yoleyo ya munyikelo kutani va yi tsala eka rhisiti. Loko vakulu va tshembeka emhakeni leyi yo tamela minyikelo leyi, vamakwerhu a va nge kanakani ku hoxa minyikelo ya vona emabokisini ya munyikelo eHolweni ya Mfumo. (1 Kor. 4:2) Minyikelo hinkwayo ya ntirho wa misava hinkwayo yi fanele yi rhumeriwa erhavini eku heleni ka n’hweti yin’wana ni yin’wana.
14. Hi ta vuyeriwa hi yini loko hi nyikela hi tsakile evugandzerini lebyi tengeke?
14 Yehovha u tshembise tiko ra Israyele leswaku loko ri seketela vugandzeri bya yena hi vutshembeki hi swilo swa rona leswi vonakaka, u ta ri katekisa. (Mal. 3:10) Swi le rivaleni leswaku na hina u ta hi katekisa loko hi wu seketela hi ku tshembeka ntirho wo chumayela hi Mfumo naswona hi ‘xixima Yehovha hi swilo swa hina swa nkoka.’—Swiv. 3:9.
[Xifaniso lexi nga eka tluka 6]
Muchini wo gandlisa wa MAN
[Xifaniso lexi nga eka tluka 6]
Muako lowuntshwa lowu engeteriweke wa vugandliselo
[Xifaniso lexi nga eka tluka 6]
Matluka ya tibuku ma ri karhi ma hlanganisiwa emuchinini lowu endlaka tibuku ta swifunengeto swo olova
[Xifaniso lexi nga eka tluka 6]
Ku hlanganisiwa ka Tibibele to sungula ta xifunengeto xo olova