Rirhandzu I Xilotlelo Xo Va Ni Mihandzu eNsin’wini

¹ “Tanani eka mina, . . . ndzi ta mi phyuphyisa.” (Mat. 11:28) Marito wolawo lama rhurisaka mbilu ma swi veka erivaleni leswaku Yesu a a rhandza vanhu hi mbilu ya yena hinkwayo. Tanihi vachumayeri va mahungu lamanene, hi navela ku tekelela Yesu hi ku rhandza vanhu lava se va karheleke hi ku hanya emisaveni leyi nga riki na rirhandzu. Xana hi nga swi endlisa ku yini sweswo loko hi ri karhi hi chumayela mahungu lamanene?

² Hi Ku Vulavula Ni Vanhu: Leswi Yesu a a rhandza vanhu a a tirhisa nkarhi wun’wana ni wun’wana lowu a a wu kuma leswaku a chumayela mahungu lamanene. (Yoh. 4:7-14) Rirhandzu ri ta hi susumeta leswaku hi nga kanakani ku chumayela vanhu hi xitshuketa. Xinhwanyetana xa malembe ya tsevu hi vukhale xi chumayele wansati loyi a a tshame etlhelo ka xona loko va ha rindze ku vona dokodela. Xi susumetiwe hi yini? Xi ri, “Manana loyi a a languteka a lava ku twa hi ta Yehovha.”

³ Vanhu va ta swi vona leswaku ha va tsakela loko hi n’wayitela niloko hi vulavula na vona hi ndlela ya musa. Nakambe rirhandzu ra hina ri ta vonaka loko hi rhiya ndleve loko vanhu va vulavula, loko hi tshandzisana na vona eka leswi swi va vilerisaka niloko hi khathala ha vona. (Swiv. 15:23) Hi fanele hi tekelela Yesu hi ku kandziyisa ndlela leyi rungula ra Mfumo ri khutazaka ha yona ni ndlela leyi Yehovha a rhandzaka vanhu ha yona.—Mat. 24:14; Luka 4:18.

⁴ Hi Swiendlo: Yesu a a hatlisela ku pfuna vanhu lava pfumalaka. (Mat. 15:32) Na hina hi nga ha pfulekeriwa hi nkarhi wo pfuna van’wana loko hi ri eku chumayeleni. Makwerhu un’wana wa xisati u vone wansati un’wana loyi a a nga swi twisisi kahle leswi a swi vuriwa hi munhu un’wana eriqinghweni. Hiloko a n’wi pfuna hi ku n’wi tolokela leswi vuriwaka. Xiendlo lexi xa rirhandzu xi pfule ndlela ya leswaku va burisana hi Matsalwa lerova wansati yoloye a pfumela ni ku dyondzeriwa Bibele. Siku rin’wana, loko makwerhu a endla riendzo ro vuyela, u kume n’wini wa muti a hlundzukile hikwalaho ka sofa leyi a yi nga koti ku nghena enyangweni. Hiloko makwerhu a n’wi pfuna ku yi nghenisa kutani a tshama esofeni yoleyo, a sungula dyondzo ya Bibele ni n’wini wa muti loyi, se a tsakile.

⁵ Loko hi ri karhi hi hlanganyela entirhweni wo chumayela, hi kombisa leswaku hi rhandza Xikwembu ni warikwerhu. (Mat. 22:36-40) Rirhandzu ro tano leri vonakaka hi rito ni hi xiendlo ri pfuna vanhu va timbilu letinene va vona leswaku hi ni ntiyiso.