Ndlela Yo Sungula Dyondzo Ya Bibele Ni Lava U Va Siyeleke Timagazini
1. Hi yihi pakani ya wena hi n’hweti ya April na May?
1 Hi April na May, hi ta fambisa Xihondzo xo Rindza ni Xalamuka! hi ri ni pakani yo sungula tidyondzo ta Bibele hi buku leyi nge Leswi Bibele Yi Swi Dyondzisaka loko hi vuyela eka lava amukeleke timagazini. La hansi ku ni swiringanyeto leswi nga ha ku pfunaka. Tsundzuka leswaku leswi swi fanele swi pfumelelanisiwa ni nsimu ya n’wina naswona u swi veka hi marito ya wena n’wini. Titwe u ntshunxekile ku tirhisa xingheniso xin’wana loko xi tirha.
2. Xana hi nga ma tirhisa njhani matluka yo sungula ya buku leyi nge Leswi Bibele Yi Swi Dyondzisaka loko hi sungula dyondzo ya Bibele?
2 Tirhisa Swihloko Swo Sungula: Loko u tlhelela u nga ha vula swin’wana swo kota leswi: “Timagazini leti ndzi ku siyeleke tona ti ku kongomisa eBibeleni. Xiya leswaku ha yini swi ri swa nkoka ku hlaya Bibele.” Hlaya Esaya 48:17, 18; Yohane 17:3; kumbe tsalwa rin’wana leri faneleke. Kutani endzhaku ko n’wi komba buku leyi nge Leswi Bibele Yi Swi Dyondzisaka ni ku n’wi nyika ya yena, u nga ha ya emahlweni u ku:
◼ “Bibele yi hi nyika ntshembo wa xiviri wa nkarhi lowu taka.” Komba n’wini wa muti matluka 4-5 kutani u n’wi vutisa leswi, “Eka switshembiso leswi, hi xihi lexi u nga tsakelaka ku xi vona xi hetiseka?” Komba n’wini wa muti ndzima leyi vulavulaka hi leswi Matsalwa ma swi tshembisaka emhakeni leyi a yi hlawuleke kutani mi bula hi ku komisa hi ndzimana yin’we kumbe timbirhi loko n’wini wa muti a pfumela.
◼ Kumbe u nga ha ku, “Bibele yi hlamula swivutiso swa nkoka swinene evuton’wini.” Komba n’wini wa muti tluka 6, kutani u n’wi vutisa loko a tshame a tivutisa swivutiso swin’wana leswi nga ehansi ka tluka rero. Pfula eka ndzima leyi hlamulaka swivutiso swa kona, kutani mi bula hi ku komisa hi ndzimana yin’we kumbe timbirhi.
◼ Kumbe u nga ha kombetela eka tinhloko-mhaka tin’wana leti nga eka tluka ra leswi nga endzeni kutani u n’wi vutisa leswaku hi tihi leti a ti tsakelaka. Pfula eka ndzima yoleyo kutani u n’wi komba hi ku komisa ndlela leyi dyondzo ya Bibele yi fambisaka xiswona.
3. Xana hi nga yi sungula njhani dyondzo ya Bibele endzhaku ka loko hi fambise timagazini leti vulavulaka (a) hi swiyimo swa misava leswi yaka swi biha ngopfu? (b) hi ndyangu? (c) hi ku tshembeka ka Bibele?
3 Eka Riendzo Ro Sungula N’wi Siye Ni Xivutiso: Ndlela yin’wana i ku basisa tindlela ta riendzo ro vuyela loko ma ha ku hlangana ro sungula. Endzhaku ka loko n’wini wa muti a amukele timagazini, n’wi vutise xivutiso kutani u n’wi tshembisa leswaku u ta xi hlamula loko u vuya. N’wi tiyisekise leswaku u ta vuya, naswona u tshembeka. (Mat. 5:37) Loko u vuyela, tsundzuxa n’wini wa muti hi ta xivutiso lexiya u n’wi siyeke na xona, kutani u hlaya ndzimana yin’we kumbe timbirhi mi tlhela mi bula ha tona hi ku komisa ebukwini leyi nge Leswi Bibele Yi Swi Dyondzisaka leti nga ta hlamula xivutiso xa kona. N’wi nyike buku ya yena leswaku a ta fambisana na wena. Hi leswi swikombiso swi nga ri swingani.
◼ Loko ku ri leswaku magazini lowu u n’wi fambiseleke wona wu vulavula hi swiyimo swa misava leswi yaka swi tika, u nga ha ku, “Enkarhini lowu taka hi ta bula hi nhlamulo ya Bibele ya xivutiso lexi nge, Hi swihi swilo leswi Xikwembu xi nga ta swi herisa emisaveni?” Loko u vuyela eka yena tirhisa matluka 4-5. Kumbe u nga ha n’wi vutisa xivutiso lexi nge, “Xana makhombo lama nga kona i ku rhandza ka Xikwembu?” Loko u vuyela eka yena, n’wi kombe tindzimana 7-8 ta ndzima 1.
◼ Loko ku ri leswaku magazini lowu u wu fambiseke wu vulavula hi ndyangu, u nga si suka u nga ha n’wi vutisa xivutiso lexi nge, “Xana xirho xin’wana ni xin’wana xa ndyangu xi nga endla yini leswaku ku va ni ntsako endyangwini?” Loko u tlhelela bulani hi ndzimana 4 ya ndzima 14.
◼ Loko ku ri leswaku magazini lowu u wu fambiseke wu vulavula hi ku tshembeka ka Bibele, u nga ha n’wi siya ni xivutiso lexi mi nga ta bula ha xona enkarhini lowu taka, lexi nge, “Xana Bibele ya pakanisa etimhakeni ta sayense?” Loko u tlhelela, bulani hi ndzimana 8 ya ndzima 2.
4. I yini lexi hi nga xi endlaka loko n’wini wa muti a nga yi amukeli buku leyi nge Leswi Bibele Yi Swi Dyondzisaka?
4 Loko mi gimeta bulo rin’wana ni rin’wana, vutisa xivutiso xin’wana lexi u nga ta xi hlamula eka riendzo leri landzelaka. Loko dyondzo ya nkarhi na nkarhi se yi simekiwile, dyondzani buku ku sukela eku sunguleni ku ya fika emakumu. I yini lexi u nga xi endlaka loko n’wini wa muti a nga yi amukeli buku leyi nge Leswi Bibele Yi Swi Dyondzisaka? U nga ha ya emahlweni u n’wi tisela timagazini u tlhela u bula na yena hi Matsalwa. Loko u ri karhi u n’wi pfuna leswaku a tsakela, a nga ha amukela dyondzo ya Bibele hi ku famba ka nkarhi.
5. Ha yini hi fanele hi tiyimisela ku sungula dyondzo endzhaku ka loko hi siyele vanhu timagazini?
5 Yesu u hi letele leswaku hi ‘endla vadyondzisiwa, hi va dyondzisa.’ (Mat. 28:19, 20) Hikwalaho, pakani-nkulu ya hina yo fambisa timagazini i ku dyondzisa ntiyiso eka vanhu va timbilu letinene. Hi April na hi May, endla matshalatshala yo hlawuleka yo sungula dyondzo ya Bibele endzhaku ka loko u fambise Xihondzo xo Rindza ni Xalamuka!