Vakreste Va Kombisana Rirhandzu Hi Minkarhi Ya Mhangu

HAKANYINGI, ku tsekatseka ka misava, titsunami swin’we ni tivholkheno swi endla leswaku vutomi byi tika eIndonesia. Loko ku va ni timhangu leti, vanhu va Yehovha va hatla va teka goza leswaku va pfuna vanhu lava ti va hlaseleke, ngopfungopfu vamakwerhu va vona. Hi xikombiso, hi 2005 ku tsekatseka lokukulu ka misava ku hlasele ndhawu ya Gunungsitoli, ku nga doroba lerikulu leri nga eXihlaleni xa Nias, le North Sumatra. Mavandlha lama nga ekusuhi ni xihlala xa Sumatra swin’we ni rhavi, hi ku hatlisa ma rhumele swilo swo phalala ha swona leswaku swi ya endhawini leyi hlaseriweke. Mulanguteri wa muganga wa kwalaho swin’we ni muyimeri wa rhavi va ye exihlaleni xexo hi xihahampfhuka leswaku va ya khutaza vamakwerhu. Yuniman Harefa, nkulu wa le Nias u ri: “Vanhu lava a va ri ekusuhi na hina a va chuhile. Kambe goza ra xihatla leri tekiweke hi nhlengeletano ya Xikwembu ri hi tiyisekisile leswaku a hi nga ri hexe.”