Xana Swi Hoxile Ku Rila? — Watchtower LAYIBURARI YA LE KA WEB SITE

Langutelo Ra Bibele

Xana Swi Hoxile Ku Rila?

“NDZI NI NTSHEMBO LOWU TIYEKE EKU PFUXIWENI KA VAFI, KAMBE A NDZI ANAKANYA LESWAKU SWI HOXILE KU RILA EXIKARHI KA VANHU, NASWONA NDZI VONA ONGE VA NGA EHLEKETA LESWAKU NTSHEMBO WA MINA A WU TIYANGA. A NDZI ANAKANYA LESWAKU LOKO HAKUNENE NDZI RI NI RIPFUMELO EKU PFUXIWENI KA VAFI, A NDZI NGA FANELANGA NDZI KOMBISA KU VAVISEKA KA MINA HI NDLELA YOLEYO.”—CHARLENE, MUKRESTE LA NGA NI MALEMBE YO TLULA 21 A KHUVURIWILE.

LOKO munhu loyi u n’wi rhandzaka a fa, u nga ha va ni mintlhaveko ni malangutelo lawa a wu nga ma rindzelanga—ku chava, ku hlundzuka, ku tivona nandzu ni gome. Eka Mukreste xitshembiso xa Bibele lexi kufumetaka mbilu xa ku pfuxiwa ka vafi va tlhelela evuton’wini emisaveni ya paradeyisi ehansi ka ku fuma ka Mfumo wa Xikwembu, xi nga n’wi pfuna leswaku a tiyisela vuyelo lebyi tsemaka nhlana bya rifu. (Yohane 5:28, 29; Mintirho 24:15; Nhlavutelo 21:1-4) Kambe tanihi laha marito ya Charlene ma kombisaka ha kona, loko la rhandzekaka a fa, Vakreste van’wana va rhwala ndzhwalo lowu nga fanelangiki—matitwelo ya leswaku swi hoxile ku rila, leswaku hi ndlela yo karhi ku rila ku kombisa ku pfumala ripfumelo exitshembisweni xa Bibele xa ku pfuxiwa ka vafi.

Hambi swi ri tano, xana Bibele yi vula yini malunghana ni ku rila? Xana swi hoxile ku rila loko la rhandzekaka a fa?

Va Ririle

Ripfumelo ra Abrahama ri dumile. Loko a ringiwa, Abrahama ‘u lave ku nyiketa Isaka n’wana wakwe egandzelweni.’ (Vaheveru 11:17; Genesa 22:9-13) Swi le rivaleni leswaku a ku nga si tshama ku pfuxiwa munhu emahlweni ka nkarhi wakwe, kambe Abrahama a a ri na ripfumelo ra leswaku loko swi fanela, ‘Xikwembu a xi ta pfuxa n’wana wakwe eku feni.’ (Vaheveru 11:19) Endzhaku ka malembe ya kwalomu ka 12 ripfumelo ra Abrahama ri ringiwile, Sara nsati wakwe u file. Xana wanuna yoloye wa ripfumelo u endlise ku yini? Bibele yi hlamusela leswaku ‘u te a ta ba nkosi wa Sara, a n’wi rila.’a (Genesa 23:2) Ina, wanuna loyi a a ri na ripfumelo ra leswaku Xikwembu xi nga pfuxa vafi u ririle erivaleni. Hambi swi ri tano, Abrahama u kombisiwa a ri xikombiso lexi xiyekaka xa ripfumelo.—Vaheveru 11:8-10.

Xikombiso xin’wana lexi hlomulaka mbilu swinene xo rila murhandziwa la feke a ku ri xa Yesu Kreste hi byakwe. Malunghana ni rifu ra Lazaro, munghana lonkulu wa Yesu, ha hlaya: “Loko Mariya a fika laha Yesu a nga kona ni loko a n’wi vona, a nkhinsama emilengeni ya yena, a ku ka yena: ‘We Hosi, loko onge a wu vile kona, ingi makwerhu a nga fanga.’ Loko Yesu a n’wi vona a ri karhi a ba nkosi a rila, ni loko a vona Vayuda lava n’wi heleketaka na vona va ri karhi va ba nkosi va rila, a tlhaveka swinene emoyeni ni ku twa ku vaviseka lokukulu; kutani a ku: ‘Mi n’wi vekile kwihi xana?’ Va ku ka yena: ‘Hosi, tana u ta vona.’ Yesu a rila.”—Yohane 11:32-35.

Entiyisweni swi kufumeta mbilu ku xiya leswaku N’wana wa Xikwembu la hetisekeke u rile handle ko khomiwa hi tingana. Rito ra ririmi ro sungula leri hundzuluxeriweke ri ku “ku rila” (da·kryʹo) ri vula “ku mpfikula.” Lexi xiyekaka swinene hi leswaku Yesu a ha ku pfuxa vanhu vambirhi eku feni—n’wana wa noni ya le Nayini ni n’wana Yayiro—naswona a a tiyimisele swinene ku pfuxa Lazaro. (Luka 7:11-15; 8:41, 42, 49-55; ringanisa Yohane 11:11.) Eku sunguleni u byele Marta a ku: “Hi mina ku pfuka ni vutomi; la pfumelaka ka mina, hambi a nga fa, ú ta hanya.” (Yohane 11:25) Kambe, ntlhaveko wo tano lowu fikelelaka mbilu wu karhate Yesu lerova mahlo ya yena ma khapa mihloti.

Ku ni nchumu wun’wana lowu nga wa nkoka swinene. Yesu “u tekelele leswi Xikwembu xi nga swona hi xiviri xa xona.” (Vaheveru 1:3) Hikwalaho mintlhaveko ya rirhandzu ni leyi enteke ya Yesu loko a lahlekeriwe hi murhandziwa wakwe eku feni yi kombisa leswi Tata wa hina wa le tilweni Yehovha a nga xiswona. Yi kombisa ndlela leyi mbilu ya Xikwembu yi tlhaviwaka ha yona hi nhlomulo wa swirilo swa malandza ya xona.—Ringanisa Pisalema 56:8.

Hikwalaho, swi le rivaleni leswaku a hi xihoxo ku rila loko un’wana loyi u n’wi rhandzaka a fa. Abrahama u be nkosi wa rifu ra Sara. Yesu u ririle erivaleni loko Lazaro a file. Yehovha Xikwembu u twisisa mahlomulo ya hina, hikuva ‘u tikarhatela hina.’—1 Petro 5:7.

Hambi swi ri tano, ku vuriwa yini hi ntshembo wa Vakreste? Xana ku ni ku hambana?

‘Mi Nga Vaviseki Kukota Lavan’wana’

Loko van’wana evandlheni ra Vukreste ra lembe xidzana ro sungula le Tesalonika va rile vapfumeri-kulobye lava feke, muapostola Pawulo u ringete ku va chavelela. U tsarile: “Vamakwerhu, ndzi lava leswaku mi tiva ntiyiso hi tlhelo ra lava va tietleleleke, mi ta ka mi nga vaviseki kukota van’wana lava nga riki na ku langutela.” (1 Vatesalonika 4:13) Ina, lava tshembaka xitshembiso xa Xikwembu xo pfuxa vafi va titwa ku antswa ku tlula lava nga riki na ntshembo wa ku pfuxiwa ka vafi.b Njhani?

Loko va langutane na rifu, lava nga riki na ntshembo wa ku pfuxiwa ka vafi va tshama va ri ni gome. Hambi loko va vula leswaku va ni ntshembo wa vutomi bya le ndzhaku ka rifu, a hi vangani lava chaveleriwaka hi wona. Nhlomulo wa vo tala a wu vangiwi hi mhaka ya leswi rifu ri va hambaniseke ni varhandziwa va vona kambe hi mhaka ya leswi va nga ta ka va nga ha va voni nakambe. Hikwalaho ko pfumala ku twisisa hi ku pfuxiwa ka vafi, va lahla mintshembo ya vona kun’we ni varhandziwa va vona; hi ku ya hi ku kholwa ka vona, a va nge he tlheli va va vona.—Ringanisa 1 Vakorinto 15:12-19, 32.

Hambi swi ri tano, ku ni ku hambana eka Vakreste va ntiyiso. Pawulo u hlamusele leswaku rifu ri fana ni ku etlela—ku nga ri hikwalaho ka leswi ri nga xiyimo xa ku pfumala ku twa loku fanaka ni vurhongo lebyikulu ntsena kambe ni hikwalaho ka leswi swi kotekaka ku hlakahla munhu hi ku n’wi pfuxa eku feni. (Pisalema 13:3; Eklesiasta 9:5, 10) Ntshembo wolowo lowu sekeriweke eBibeleni wu endla leswaku ku va ni ku hambana.

Loko a lahlekeriwe hi murhandziwa eku feni, Mukreste u titwa a ri ni gome ku fana ni lava nga riki vapfumeri loko va lahlekeriwe hi munghana wa vona, ku lahlekeriwa hi nghohe liya va yi toloveleke, ku pfumaleka ka rito leriya ri rhandzekaka. Ntshembo wa ku pfuxiwa eku feni a wu endli leswaku mbilu yi nga vaviseki. Hambi swi ri tano, wu huhata mapfalo. A hi leswaku ntshembo wu herisa ku rila, kambe wu nga endla leswaku swi olova swinene ku tiyisela gome.

[Tinhlamuselo ta le hansi]

a Malunghana ni rito ra Xiheveru leri hundzuluxeriweke ri ku “ku ba nkosi” Theological Wordbook of the Old Testament yi ri: “Hinkwavo lava nga twa ta rifu ra loyi a nga lova a va ta va ta rila ni swirho swa ndyangu. . . . Hakanyingi ku tlhava mukhosi kumbe ku ba nkalanga a swi fambisana ni ku rila.” Malunghana ni rito ra Xiheveru leri vulaka “ku rila” buku leyi fanaka ya hlamusela: “Tanihi leswi mihloti yi fambisanaka ni mahlo, ni ku rila ku fambisana ni rito; Vasemite a va mpfikuli, kambe va ba nkalanga. . . . Eka [Testamente ya Khale] hinkwayo, ku rila i ku tiphofula ka ntumbuluko ni nsusumeto lowu ngo tiendlekela wa ntlhaveko wa matimba.”

b Vakreste va lembe xidzana ro sungula lava Pawulo a va tsaleleke a va ri na ntshembo wa ku pfuxeriwa etilweni laha a va ta va vafumi kun’we na Kreste. (1 Vatesalonika 4:14-17; ringanisa Luka 22:29, 30.) Xisweswo, Pawulo u va khutaze ku chavelelana hi ntshembo wa leswaku hi nkarhi wa vukona bya Kreste lavo tshembeka exikarhi ka vona lava feke va ta pfuxiwa ivi va hlanganisiwa na Kreste kun’we ni ku hlangana hi xivona. Hambi swi ri tano, malunghana ni vunyingi lebyikulu bya lava faka, Bibele yi tshembisa leswaku va ta pfuxeriwa aparadeyisini leyi kondleteriweke emisaveni.—Yohane 5:28, 29; Nhlavutelo 21:1-4.

[Laha Xifaniso Xi Humaka Kona eka tluka 26]