Nkhawuko Wa Switlhandla—Ku Paluxa Swihundla Swa Wona

LOKO vavasati va ri karhi va kula, nkhawuko wa switlhandla wa fika evuton’wini bya vona. Kambe a wu twisisiwi swinene. Hi ku ya hi buku leyi nge The Silent Passage—Menopause, vadokodela va ta vuntswedyana va lembe-xidzana ra vu-19 a va tshemba leswaku nkhawuko wa switlhandla “wu hakulula fambiselo ra tinsinya ra wansati, naswona ri tekela vavasati vumbhurhi bya vona.”

Mianakanyo yoleyo leyi hoxeke yi hambeta yi ya emahlweni. Hikwalaho ka sweswo, vavasati vo tala loko va anakanya hi nkhawuko wa switlhandla va chava naswona a va dyi byi rhelela. Ku tlhantlha swiphiqo leswi vangiwaka hi ku anakanya ha wona, swi boxiwe tanihi “xin’wana xa swilo leswi nonon’hwaka swinene evuton’wini bya wansati,” ebukwini leyi nge Natural Menopause—The Complete Guide to a Woman’s Most Misunderstood Passage.

Exikarhi ka vanhu lava va rhangisaka vuntshwa ni ku languteka u ri muntshwa, ku sungula ka swikombiso swa nkhawuko wa switlhandla ku nga vula leswi: ku hela ka vuntshwa xikan’we-kan’we ni ku sungula ka vudyuhari. Hikwalaho ka sweswo, vavasati van’wana va wu chava nkhawuko wa switlhandla hikuva wu tikomba wu vula masungulo ya xiphemu lexintshwa, ni lexi nga tsakisiki. Van’wana va wu languta tanihi “ku fa hi mpimo wo karhi.”

Vavasati va manguva lawa a va fanelanga va xaniseka hikwalaho ka ku nga tivi, loko va langutane ni nkarhi lowu evuton’wini. Swihundla swa nkhawuko wa switlhandla swa karhi swa paluxiwa. Ku karhi ku endliwa vukambisisi byo tala, naswona vutshunguri byo olovisa ku ncica loku bya karhi bya endliwa. Timagazini, maphepha-hungu ni tibuku, swi vulavula hi mhaka leyi, swi nyikela tinhlamuselo ta swivutiso leswi van’wana enkarhini wun’wana a va chava ku swi vutisa. Vadokodela na vona va swi tiva ku antswa swiphiqo leswi vavasati va nga ha hlangavetanaka na swona.

Ha yini ku yisiwa nyingiso wonghasi emhakeni leyi? Hikuva ku twisisa nkhawuko wa switlhandla ku nga susa minchavo, vukholwa-hava, ni gome leri vavasati vo tala va nga na rona. Ematikweni yo tala, vavasati va hanya nkarhi wo leha, naswona va lava ku herisa nchumu lowu vonakaka wu ri xikhiri xo tumbeta mhaka leyi naswona va lava ku yi twisisa kahle. Va lava tinhlamulo to olova ku ti twisisa, leti kongomeke. Swi fanerile, tanihi leswi vo tala va vona va hanyaka n’we-xa-nharhu xa vutomi bya vona endzhaku ka nkhawuko wa switlhandla.

Maendlele ya ntivo-nhlayo ya vanhu le United States ma vhumba ku engeteleka ka vavasati lava nga emalembeni ya nkhawuko wa switlhandla hi 50 wa tiphesente, eka khume ra malembe lama taka. Vavasati volavo va lava ku tiva hi ta swiphiqo swa rihanyo leswi nga ha vaka kona, ncindzuko wa nhlonge, ku va ni swipfukelwa, ku nga titwi kahle, ni ku hundzuka ka miri ni ka mintlhaveko. Ha yini swilo leswi swi humelela? Xana wansati a nga ha swi koti ku tirha hi laha ku humelelaka endzhaku ka nkhawuko wa switlhandla? Xana nkhawuko wa switlhandla wu hundzula vumunhu bya wansati? Swihloko leswi landzelaka swi ta kambisisa swivutiso leswi.