Xana Va Ta Chumayela Hi Yindlu Na Yindlu?

“MUPAPA U Rhumela Vachumayeri eSwitarateni Swa Rhoma.” Yoleyo a ku ri nhloko-mhaka ya xiviko xa mahungu hi Greg Burke. U tsarile: “Mupapa John Paul u khutaze Makhatoliki eItaly ku landzela xikombiso xa mimpambukwa yo fana ni Timbhoni ta Yehovha, leyi yi hundzulaka vanhu etikweni, leswaku va sungula ku chumayela hi yindlu na yindlu.

“‘A hi nkarhi wo va ni tingana hi Evhangeli, i nkarhi wo yi chumayela erivaleni,’ Mupapa u swi vule hi Musumbunuku eka vachumayeri lava famba-fambaka ni vadyondzisi va vukhongeri va 350. . . .

“‘Onge ntirho wa n’wina wo huwelela Evhangeli eswitarateni . . . wu nga va ni mihandzu yo tala,’ a va byela. ‘Mi tlhele mi kuma muxaka wo chumayela lowu fikelelaka hambi ku ri lava va lahlekeriweke hi ripfumelo ra vona.’”

Muviki Burke u te: “Nhlayo ya lava vaka kona eKerekeni ya Khatoliki yi hunguteke swinene eItaly hi malembe-khume mambirhi lama hundzeke, naswona ku hisekela ka Mupapa ntirho wo chumayela hi yindlu na yindlu ku vonaka ku ri xikombiso xa ku tsana ka nkucetelo wa yona eka vanhu.”

Xikhutazo xo tano xo “sungula ku chumayela hi yindlu na yindlu” a hi xintshwa hi laha ku heleleke. Mupapa wa nkarhi lowu hundzeke, Paul VI, u vule leswaku Kereke ya Khatoliki “yi kona leswaku yi ta vula evhangeli.” Naswona mupapa la nga kona sweswi, John Paul II, hi 1991 u kandziyise papila ra yena leri rhumeriwaka etikerekeni leri nge Redemptoris Missio, ku xalamukisa kereke ya yena eka xilaveko xo yisa emahlweni xileriso xa Yesu xo chumayela erivaleni.

Mutsari wa Khatoliki wa Murhoma, Peter Hernon, u vutise xivutiso lexi eka Catholic Herald ya le London: “Xana ku nga va ku humelele yini hi ku chumayeriwa ka evhangeli?” A a khumbeke ngopfu mayelana ni ku dzunisiwa ngopfu ka “lembe-khume ra ku vula evhangeli” leri sweswi ri nga ni malembe yo talanyana hi vukhale. Loko a vutise bixopo malunghana ni ku pfumaleka ka nhluvuko, bixopo u te: “Tshika ku va ni magugu. Kereke yo va ni malembe ya 2000 ntsena yi ri kona.”

A swi hlamarisi leswi Hernon a vutiseke a ku: “Xi kwihi xihatla lexi kombisiweke hi Yesu loko a rhuma vadyondzisiwa va Yena ku vula evhangeli emitini ya ndhawu yoleyo ke? Kumbe xa St Paul: ‘Ndzi ta va ni khombo loko ndzi nga twarisi Mahungu Lamanene! (1 Kor 9:16).’” Entiyisweni, xana Makhatoliki ma nga va tekelela Vakreste vo sungula lava chumayeleke erivaleni “na hi yindlu na yindlu ke”?—Mintirho 5:42; 20:20, Douay Version.

Hernon u pfumerile leswaku loko swi ta eka ku vula evhangeli hi yindlu na yindlu, u “twa va n’unun’uta va ku ‘swo vuriwa ntsena, kambe swi nge tirhi.’ Swa tirha,” ku angula Hernon. “Leswaku ndzi seketela leswi ndzi swi vulaka, ndzi ta boxa vito leri nga rhandziwiki. Ndza swi tiva leswaku a ri rhandziwi hikuva hi nkarhi wo hetelela lowu ndzi ri tirhiseke ha wona exihlokweni xa Khatoliki, xiyenge xa kona hinkwaxo xi susiwile (hambi leswi a ku ri hava swin’wana leswi cinciweke). Vito ra kona i Timbhoni ta Yehovha. . . . Mbhoni yin’wana ni yin’wana yi dyondzisiwile leswaku loko yi tinyiketela, xikan’we-kan’we yi va murhumiwa.”

Hambi leswi Hernon a nga pfumelelaniki ni tidyondzo ta Timbhoni ta Yehovha, wa pfumela leswaku loko munhu a xiya ndlela ya vona yo chumayela, “a swi nonon’hwi ku tsundzuka Kereke yo sungula tanihi laha swi kombisiweke ha kona hi mintirho ya Vaapostola.”

Timbhoni ta Yehovha ti ya emahlweni ni vutirheli bya tona bya yindlu na yindlu hi ku hiseka, xisweswo ti hetisisa xileriso xa Yesu Kreste, eminkarhini ya manguva lawa, lexi nge: “Mi ta va timbhoni ta mina . . . ni ku ya fika emakun’wini ya misava.”—Mintirho 1:8.