Vantshwa Va Vutisa . . .

Xana Xikwembu Xi Ta Tshama Xi Ri Munghana Wa Mina?

HOSI DAVHIDA a a ri munhu loyi a a ri ni xinghana na Xikwembu. Kambe siku rin’wana u te: “Mahlomulo ya mbilu ya mina ma engetelekile.” Davhida a a nga karhateki hi ku xanisiwa hi vanhu van’wana ntsena, kambe a a karhateka ni hi swihoxo swakwe. U sungule ku vona onge ni Xikwembu xi n’wi tshikile, kutani a khongela a ku: “Renḍelekela ka mina, u nḍi ṭeṭelela, hikuv̌a nḍi ri ŝanga, nḍi le khombyeni.”—Pisalema 25:11, 16-19.

Na wena u nga ha va u ri ni gome. Kumbexana ekaya hambi ku ri exikolweni u le xiyin’weni xo biha swinene lexi ku hetaka matimba. Nakambe, u nga va u ri ni vuvabyi lebyikulu kumbe u tikuma u hele matimba hikwalaho ka ku tsana ko karhi loku u nga na kona. Hambi xiyimo xi nga va xihi, a wu wexe; Xikwembu xi tiyimiserile swinene ku va munghana wa wena ni ku ku seketela.a Loko ana se u sungule ku va ni xinghana na xona, u ta chaveleriwa hi ku tiva leswaku a xi va lahli vanghana va xona loko va ri eku tikeriweni. Hambiswiritano, loko u ri emaxangwini, u nga ha vona onge Xikwembu xi ku tshikile. Nakambe eka wena swi nga ha vonaka onge a xi ku pfuni nikatsongo. Kambe xana swi tano hakunene?

“Riphantsu eNyameni”

Xo sungula, hlaya 2 Vakorinto 12:7-10. Kwalaho muapostola Pawulo u hlamusela hi ndlela leyi a xanisiweke ha yona hi nchumu lowu vuriwaka “riphantsu enyameni.” Swi nga endleka “riphantsu” leri ku ve vuvabyi bya muxaka wo karhi, lebyi kumbexana byi katseke mavonelo ya mahlo yakwe. Ku nga khathariseki leswaku a ku ri yini, nchumu wa kona a wu hambeta wu n’wi “himetela” emintlhavekweni. Hambileswi a kombeleke Xikwembu kanharhu hi matimba leswaku xi susa “riphantsu” leri, a ri susiwanga.

Xana Yehovha a a honisa swikhongelo swa Pawulo? Nikatsongo! Xikwembu xi n’wi byele xi ku: “Tintswalo ta mina eka wena ti ringene; hikuva matimba ya mina ma hetiseka laha ku nga ni ku tsana kona.” Hambileswi Yehovha a hlawuleke ku ka a nga ri susi “riphantsu” rero, a nga n’wi tshikanga Pawulo. Hikwalaho ka musa wa Xikwembu lowu nga faneriwiki, Pawulo u ve ni vunghana lebyikulu na xona. Sweswo a swi “ringene” ku pfuna Pawulo leswaku a hlangavetana ni ku tsana kakwe. Loko Pawulo a lwela ku endla tano, nakambe a a ta xiya matimba lama tiyisaka ya Xikwembu hi ndlela leyintshwa eka yena n’wini.

Mpfuno Wo Hlangavetana Ni Swihinga

Ku fana na Pawulo, u nga va u ri ni “riphantsu” ro karhi, kumbe xiphiqo lexi ku karhataka, xi ku vangela ku hundzeleta swilo ni ku hela matimba. Hilaha swi endlekeke hakona eka Pawulo, Xikwembu xi nga ha tshika maxangu ma phikelela. Sweswo a swi vuli leswaku a xa ha ri Munghana wa wena. Xikwembu xi byele muapostola Pawulo xi ku: “Matimba ya mina ma hetiseka laha ku nga ni ku tsana kona.” (Xiitaliki i xerhu.) Loko u titshega hi matimba ya Xikwembu, ku nga ri ya wena, u nga swi kota ku tiyisela. Nakambe u nga kuma leswaku hi mpfuno wa moya wa Xikwembu, u nga swi kota ku endla swilo leswi a wu anakanya leswaku u nge swi koti. Pawulo u te: “Ndzi amukela hi ku tsaka ku tsana, . . . hikuva loko ndzi tsanile, hi kona ndzi nga ni matimba.”

Nhwanyana un’wana la vuriwaka Robinb u kume leswi swi ri ntiyiso. Loko a ri ni malembe ya 14 hi vukhale, u fe mahlo hikwalaho ka leswi a ma gogonya. Hi lembe rero, mana wa yena u fe swi nga languteriwanga. “Se a ndzi sele na Yehovha ntsena,” ku vula Robin loko a sungula ku langutana ni “maphantsu” lama ma vavaka. “Lexi a ndzi xi tiva hi leswaku a ndzi ta humelela ntsena loko ndzi namarhela yena.” Robin u endle sweswo, eku heteleleni a va muevhangeli wa nkarhi hinkwawo. U ri: “Ndzi kombele Yehovha leswaku a ndzi pfuna eka hinkwaswo. U swi endlile hakunene.”

Vantshwa vo tala va kume leswaku miringo leyi va langutanaka na yona kahle-kahle yi endla leswaku va tshinela ekusuhi na Xikwembu. Xiya Jeff lontsongo. Tata wakwe u sukele ndyangu, a siya mana wa Jeff a khathalela vana va nkombo. “Ku pfumala tatana swi ndzi karhate ngopfu,” ku pfumela Jeff, loyi a a ri ni malembe ya 12 ntsena hi nkarhi wolowo. “A ndzi navela leswaku un’wana a pfala mukhandlo lowu a ndzi va na wona siku na siku.” Xana Jeff u endle yini? “Ndzi khongele Yehovha leswaku a ndzi pfuna ku enerisa xilaveko xexo.” Jeff u endle hi ku pfumelelana ni swikhongelo swakwe, kutani a tinyiketela swinene emintirhweni ya swa moya. Hi ku famba ka nkarhi, u swi lemukile leswaku Yehovha wa n’wi seketela—hi ku tirhisa moya wakwe lowo kwetsima lowu tiyisaka, kun’we ni hi vandlha ra Vukreste. (Ringanisa Pisalema 27:10.) Sweswi a nga ni malembe ya 27, Jeff wa anakanya: “A ku nga ri na un’wana loyi a ndzi ta tshemba yena leswaku a ndzi sirhelela, kutani ndzi namarhele Yehovha swinene.” Vuxaka byebyo bya le kusuhi u byi vula “nkateko wa risima lowu tisiweke hi ndzingo lowu.”

Ndlela Yo Kuma Mpfuno Wa Xikwembu

Hi ku fanana Munghana wa wena wa le tilweni u ta ku pfuna loko u ri eku nonon’hweriweni. Kambe, xana wena u fanele u endla yini? Leswaku xinghana xi kula, ku fanele ku va ni ku vulavurisana. Xikhongelo hi yona ndlela ya hina yo vulavula ni Xikwembu. Hi ku tirhisa xona hi xi tivisa leswaku hi lava mpfuno wa xona. Kambe xikhongelo a xi pfuni nchumu loko xi nga nyawuli kumbe xi nhlokohatiwe kunene. Ku fana ni vantshwa lava tshahiweke laha henhla, u fanele u ‘halata mbilu ya wena’ eka Xikwembu! (Pisalema 62:8) Nakambe swi nga lava leswaku u endla swikombelo. (Vafilipiya 4:6) Swikombelo i swikhongelo leswi dzikeke ni swa matimba swinene.

A hi nge u ni xiphiqo xo lawula mianakanyo ya wena kumbe xo hlula mukhuva wo karhi wo biha. Khongela hi matimba eka Yehovha! Kombela mpfuno wa yena hi minkarhi ya ndzingo. Minkarhi yin’wana leswi a swi nge olovi. “Loko ndzi twa ndzi ri ni nsusumeto wa matimba wo endla leswi hoxeke, ndzi tiboha ku khongela,” ku pfumela Gary. “Minkarhi yin’wana ndza tivutisa, ‘Ndzi nga n’wi tshinelela njhani Yehovha?’ Hambiswiritano, ndzi ya emahlweni ndzi n’wi kombela leswaku a ndzi pfuna. U ndzi nyika matimba lawa ndzi ma lavaka leswaku ndzi tiyisela.” Hambiloko swi nonon’hwa eku sunguleni, hambeta u pfulela Xikwembu mbilu ya wena.

Kambe ku vuriwa yini loko swi vonaka onge swikhongelo swa wena a swi hlamuriwi? Hi xikombiso, Lora a a lwela ku hlula mukhuva wo biha wa ku tlanga hi swirho swa rimbewu. Wa hlamusela: “A ndzi vulavula na Yehovha hi ku tshembeka malunghana ni xiphiqo lexi, kambe a swi ndzi tsandza ku swi tshika.” Minkarhi yin’wana Xikwembu xi nga hi tshika hi kombisa leswaku hi tiyimisele ku fikela kwihi hi swikombelo swa hina. (Ringanisa Pisalema 88:13, 14.) Kutani hi fanele hi phikelela eku khongeleni! (Matewu 7:7; Varhoma 12:12) Lora u endle sweswo. Hi nkarhi lowu fanaka, u sungule ku tirhisa swiringanyeto leswi humeleleke eka rungula leri vulavulaka hi mhaka leyi eka tibuku ta Sosayiti ya Watch Tower.c Hi ku famba ka nkarhi, u sungule ku vona vuyelo bya kona. Wa tsundzuka: “Nkarhi wihi ni wihi loko ndzi lwisana ni ndzingo ndzi wu hlula, a ndzi nkhensa Yehovha hi ku tiva leswaku a a ri na mina.” Kavula, minkarhi yin’wana u nga vuyela eka xiendlo lexi fanaka loko u ri karhi u lwela ku hlula xiphiqo xa wena. Kambe ntsendze loko u lwa, naswona u nga pfumeli hi vomu ku hluriwa hi ku tsana ka wena, Xikwembu xi ta tsakisiwa hi ‘matshalatshala ya wena lamakulu’ naswona xi ta tshama xi ri Munghana wa wena.—2 Petro 1:5.

Ku Tirha Ni Xikwembu

Ndlela yin’wana yo kuma mpfuno wa Xikwembu i ku amukela xirhambo xa xona xo va un’wana wa ‘vatirhi-kulobye’ na xona. (1 Vakorinto 3:9) Leswi swi katsa ku hlanganyela eku pfuneni van’wana leswaku va dyondza hi ta Xikwembu. (Matewu 28:19, 20) Loko u ri ni gome naswona u hele matimba, ku ehleketa ku endla ntirho hambi wu nga va wihi swi nga vonaka swi nga tsakisi. Hambiswiritano, ‘ku va ni swo tala swo swi endla entirhweni wa Hosi’ swi nga ku pfuna hakunene. (1 Vakorinto 15:58) Eku heteleleni u ta rivala hi swiphiqo swa wena. (Ringanisa Swivuriso 18:1.) Robin, loyi a tshahiweke eku sunguleni, u vula leswi landzelaka malunghana ni minkarhi yakwe yo nonon’hwa: “Leswi a swi ndzi pfuna ku phikelela a ku ri ntirho lowu ndzi wu endlelaka Yehovha!”

Ku tirha ni Xikwembu nakambe swi nga ku pfuna ku hlula matitwelo wahi ni wahi lama hambetaka ya leswaku Xikwembu xi ku tshikile. Loko vanhu vambirhi va tirha swin’we hi xikongomelo xin’we, xana a hi swona leswaku va tala ku va vanghana lavakulu? Loko u endla ntirho wo chumayela, u langutana ni mintlhontlho nkarhi na nkarhi. U tikuma u ya eka Xikwembu leswaku xi ku pfuna. Naswona loko Xikwembu xi katekisa matshalatshala ya wena, vunghana bya xona byi va bya xiviri swinene. U sungula ku lemuka leswaku Xikwembu xa ku tshemba tanihi mutirhi-kulobye. Leswi swi nga ku pfuna swinene leswaku na wena u tivona u ri munhu.

Hi xikombiso, Carol a a titwa a nga sirhelelekanga nikatsongo. Mana wakwe a a tisungile, naswona tata wakwe wa tihanyi a a tshamela ku n’wi sola sola. Kambe loko a ri ni malembe ya 17 hi vukhale u ve un’wana wa Timbhoni ta Yehovha, kutani a nghenela ntirho wo chumayela. Sweswi, endzhaku ka malembe ya khume a ri mutwarisi wa evhangeli wa nkarhi hinkwawo, u ri: “Ntirho lowu wu ndzi pfune swinene, hikuva Yehovha u ndzi katekisile. Ndza tibyela ndzi ku, ‘Loko Xikwembu xi ndzi rhandza, swi vula leswaku na mina ndzi wa risima.’ Ku tirhisiwa hi Yehovha eku twariseni ka vito ra yena swi ndzi endle ndzi titwa ndzi sirhelelekile swinene.”

“Nantŝani, Mi V̌a Mi V̌ona Leŝaku Yehovha I Lo’nene”

‘Xikwembu xi ndzi kutsurile eku chaveni ka mina hinkwako,’ ku tsala Hosi Davhida loko a pone ri ahlamile ekhombyeni leri a ri lava ku koxa vutomi byakwe. (Pisalema 34:4, 6, nhloko-mhaka; 1 Samuwele 21:10-12) Kutani Davhida a a vulavula hi leswi a tshameke a swi vona evuton’wini loko a ku: “Nantŝani, mi v̌a mi v̌ona leŝaku Yehova i lo’nene ŝonghasi! Ku katekile munhu l’a tšhav̌elaka ka yena.”—Pisalema 34:8.

Hambiloko kumbexana vutomi bya wena byi nga si va ekhombyeni hilaha bya Davhida byi veke hakona, minkarhi yin’wana u nga langutana ni mintshikilelo yo karhi. Loko ‘mahlomulo ma engeteleka embilwini ya wena,’ khongela eka Xikwembu. (Pisalema 25:17) U nga anakanyi leswaku Xikwembu xi ta herisa xinghana xa xona. Loko u tiyisela hi ku lehisa mbilu ni ku tivonela hi wexe leswaku Yehovha wa ku seketela ni ku ku khathalela, u ta ‘nantswa u va u vona’ hi wexe “leŝaku Yehova i lo’nene.” Naswona u ta tshama a ri Munghana wa wena hilaha ku nga heriki.—Yakobo 4:8.

[Tinhlamuselo ta le hansi]

[Xifaniso lexi nga eka tluka 15]

Xana Xikwembu xa va fularhela vanghana va xona hi minkarhi ya khombo?