Vanhu Lava Dyondzisiwaka Ku Rhandza Van’wana

RIRHANDZU i nsusumeto lowu vangiwaka hi ku xixima, tintswalo kumbe ku tsakela swilo leswi fanaka. Rirhandzu i vuxaka lebyikulu. A ri na vutianakanyi, ra tshembeka naswona ri kombisa nkhathalelo wa tintswalo hi xikongomelo xo pfuna van’wana. Rirhandzu ri hambane hi ku helela ni rivengo. Munhu la susumetiwaka hi rivengo u karhatiwa hi vutianakanyi; la susumetiwaka hi rirhandzu u anakanyela van’wana.

Rirhandzu kumbe rivengo—hi xihi lexi lawulaka vutomi bya wena? Lexi a hi xivutiso lexi nga pfuniki nchumu hikuva vumundzuku bya wena lebyi nga riki na makumu byi titshege hi nhlamulo ya kona. Hambiloko va hanya emisaveni leyi dyondzisiwaka ku vengana, vanhu va timiliyoni va dyondza ku rhandza van’wana. Leswi va swi endla hi ku ambala vumunhu lebyintshwa. A va vulavuli hi rirhandzu ntsena; va ringeta hi matimba leswaku va hanya ha rona.

Loko u tshame u va kona enhlanganweni wa Timbhoni ta Yehovha, u nga ha va u tsakisiwe hi leswi u swi voneke. Ku nga khathariseki leswaku munhu u huma etikweni rihi, Timbhoni ta Yehovha ti ni vun’we evugandzerini. Ti vumba vumakwerhu bya xiviri emisaveni hinkwayo. Leswi u nga ha swi xiya emavandlheni ya vona ni le mintsombanweni ya vona, kambe ngopfu-ngopfu u nga ha swi xiya laha va ku vitanaka mindyangu ya Bethele. Leyi i mintlawa ya vatirhi va ku tirhandzela lava tshamaka ni ku tirha swin’we tanihi ndyangu eku humeseni ni le ku hangalaseni ka tibuku ta Bibele. Eka tiko rin’wana ni rin’wana, van’wana va vona va langutela ntirho lowu endliwaka hi Timbhoni ta Yehovha endhawini yoleyo. Lowu a hi ntirho wutsongo tanihi leswi wu katsaka—hi 1997—mavandlha lama tlulaka 82 000 ematikweni ya 233. Leswaku ku fikeleriwa xilaveko lexi, vanhu vo tlula 16 000 va tirha emindyangwini ya Bethele emisaveni hinkwayo, ku katsa ni le yindlu-nkulu ya misava ni le ka miako leyitsongo ya marhavi yo hambana-hambana lama nga ematikweni ya 103.

Mindyangu yo tala ya Bethele yi vumbiwa hi vanhu lava vunyingi bya vona va nga vaaki va tiko leri hofisi ya rhavi yi kumekaka eka rona. Kambe a hi hinkwayo. Mindyangu yin’wana ya Bethele yi vumbiwa hi Timbhoni ta matiko kumbe ta tinxaka to hambana kun’we ni lava khale a va ri va vukhongeri byo hambana. Hi xikombiso, endyangwini wa Bethele lowu nga ni vanhu va kwalomu ka 1200 lowu nga eSelters, le Jarimani, ku ni vanhu lava humaka ematikweni ya kwalomu ka 30. I yini lexi va pfunaka leswaku va tshama swin’we, va tirha ni ku gandzela hi ku rhula ni vun’we, ehansi ka xiyimo lexi nga hava ku vengana? Va landzela ndzayo ya Bibele leyi nga eka Vakolosa 3:14 leyi nge:

‘Ambalani Rirhandzu’

Ku hava munhu la velekiwaka a ambarile hi ku helela, naswona ku hava la tikumaka a ambarile ntsena hi ku vulavula ha swona. Ku va munhu a ambala swi katsa ku endla swiboho leswi tiyeke ni ku endla matshalatshala yo swi namarhela. Hilaha ku fanaka, ku hava munhu la velekiwaka a ambale rirhandzu. Ku vulavula ha rona ntsena a swi enelanga. Ku laveka matshalatshala.

Swiambalo swi ni mintirho yo hambana-hambana. Swi sirheleta miri, swi funengeta swirho swa miri leswi nga langutekiki kumbe vulema, naswona hi mpimo wo karhi swi paluxa vumunhu bya munhu. Rirhandzu na rona ri tano. Ra sirhelela, hikuva ku rhandza misinya ya milawu ya ku lulama ni ku va ni vanghana lavanene swi susumetela munhu ku papalata vanghana kumbe tindhawu leti nga vaka ni khombo. Ri tirha ku sirheleta vuxaka bya hina, lebyi fanelaka ku va bya risima eka hina. Munhu la rhandzaka van’wana hakanyingi wa rhandziwa hilaha ku fanaka, naswona la papalataka ku twisa van’wana ku vava hakanyingi a nga twisiwi ku vava.

Nakambe rirhandzu ri funengeta swirho leswi nga langutekiki kahle swa vumunhu bya hina, leswi kumbexana swi nga ha khunguvanyisaka vanhu-kulobye. Xana a hi na wona mboyamelo wo honisa swihoxo leswi nga nyawuriki swa vanhu lava nga ni rirhandzu ku tlula swa vanhu lava tikurisaka, lava titivaka, va vutianakanyi ni lava nga riki na rirhandzu?

Vanhu lava ambalaka rirhandzu va paluxa vuxongi bya vumunhu lebyi fanaka ni bya Kreste. Hambileswi vuxongi bya miri byi nga bya le handle ntsena, vuxongi bya moya byi nghena eka munhu hi ku helela. Handle ko kanakana wa va tiva vanhu lava u va vonaka va sasekile, ku nga ri hikwalaho ka ku languteka ka vona ka miri, kambe hikwalaho ka vumunhu bya vona bya rirhandzu ra xiviri. Hi tlhelo lerin’wana, vo tala va hina hi hlangane ni vavasati kumbe vavanuna vo saseka lava eka hina va lahlekeriweke hi vumbhurhi hinkwabyo hi ku hatlisa loko vumunhu bya vona bya xiviri byi ve erivaleni. Swa tsakisa swonghasi ku tshama ni vanhu lava ambaleke rirhandzu!

Ku Siva Rivengo Hi Rirhandzu

Leswaku rivengo ri nga siviwa hi rirhandzu swi kombisiwa hi nkambisiso lowu endliweke hi 1994 eka Timbhoni ta Yehovha ta 145 958 le Jarimani.

Ku nwa ku tlula mpimo, ku tirhisa swidzidzirisi hi ndlela yo biha, vugevenga, ku gembula ni ku onha kumbe madzolonga, hi ndlela yo karhi hinkwaswo ka swona i swikombiso swa vutianakanyi, lebyi hi ku olova byi nga vangaka rivengo. Kambe 38,7 wa tiphesente ta lava ku vulavurisaniweke na vona va vule leswaku ku endlela leswaku va fikelela mimpimanyeto leyi tlakukeke ya Bibele leyi bumabumeriwaka hi Timbhoni, va hlule xiphiqo xin’we kumbe ku tlula. Ku rhandza Xikwembu ni mimpimanyeto ya xona ya ku lulama ya mahanyelo ku va susumetele ku endla tano. Mpfuno wa rirhandzu wu nyikeriwe hi Timbhoni ta Yehovha, hakanyingi ti va pfuna ha un’we-un’we. Emalembeni ya ntlhanu lama hundzeke (1992-1996), vanhu va 1616 894 ematikweni ya 233 va pfuniwile leswaku va endla mindzulamiso, va hlula rivengo hi rirhandzu leri hlulaka hinkwaswo.

Hi ku tirhisa rirhandzu leri nga riki na vutianakanyi evukatini bya tona, Timbhoni ta Yehovha ti fikelela vuxaka lebyi tiyeke. Ematikweni man’wana vukati byin’we eka byin’wana ni byin’wana byimbirhi kumbe byinharhu byi hetelela byi dlayiwile. Kambe nkambisiso lowu boxiweke laha henhla wu kombise leswaku sweswi ko va 4,9 wa tiphesente ntsena eka Timbhoni leti dlayeke vukati kumbe leti hambaneke ni vanghana va tona va vukati. Hambiswiritano, hi nga rivaleni leswaku vunyingi bya vona va dlaye vukati va nga si va Timbhoni ta Yehovha.

Tanihi leswi Xikwembu xa rirhandzu xi nga Muleteri Lonkulu la dyondzisaka lava rhandzaka tindlela ta yena, xo sungula Timbhoni ta Yehovha, ti rhandza yena. Ku hambana ni vanhu van’wana lava kumbexana va “rhandzaka ku tiphina ku tlula ku rhandza Xikwembu,” Timbhoni ta Yehovha ti rhangisa Xikwembu ku sungula. (2 Timotiya 3:4) Ku hambana ni tindlela ta misava leyi leyi nga hava mahanyelo, Mbhoni leyi tolovelekeke yi heta 17,5 wa tiawara hi vhiki emintirhweni ya vukhongeri. Swi le rivaleni leswaku Timbhoni ti khathala hi swa moya. Leswi hi swona leswi va endlaka va tsaka. Yesu u te: “Ku katekile swisiwana emoyeni, hikuva Mfumo wa matilo i wa swona.”—Matewu 5:3.

Nandza wa xiviri wa Xikwembu a nga fanelanga a chava vanhu, ku vula mutsari wa Pisalema 118. “Yehova o nḍi yimele, a nḍi nga tšhav̌i ntšhumu. Munhu a nga nḍi endla yini?” (Ndzimana 6) Ku tshemba Xikwembu hi ku helela ku susa xin’wana xa swivangelo swa rivengo ni ku chava vanhu van’wana.

Mukreste la tivaka leswaku Xikwembu xi ‘hlwela ku kariha, xi tele tintswalo ni vunene,’ u ta lwela ku herisa vukarhi evuton’wini bya yena, tanihi leswi byi nga ha vaka xivangelo xin’wana xa rivengo. Ku hlakulela mihandzu ya moya wa Xikwembu, ku katsa ni vunene ni ku tikhoma, swi ta n’wi pfuna leswaku a fikelela leswi.—Pisalema 86:15; Vagalatiya 5:22, 23.

Mukreste wa ntiyiso wa titsongahata naswona a nga tivoni a ri wa nkoka ku tlula leswi a faneleke a va swona. (Varhoma 12:3) U hlakulela rirhandzu eku tirhisaneni ka yena ni van’wana. Ku hambana ni rivengo, rirhandzu “a ri na ximbilwa-mbilwana; rirhandzu a ri na xiveketela xa leswo biha.”—1 Vakorinto 13:5.

Ina, nchavo, vukarhi kumbe ku tivona u nga hlayisekanga ku nga vangela vanhu ku venga van’wana. Kambe rirhandzu, hi ku lwisana ni rivengo, ra hlula. Entiyisweni, rirhandzu i mfanelo ya matimba evuakweni hinkwabyo hikuva “Xikwembu i rirhandzu.”—1 Yohane 4:8.

Rivengo Ku Nga Ri Khale Ri Ta Nyamalala Hi Ku Helela

Tanihi leswi vutianakanyi ni ku venga van’wana swi nga riki xiphemu xa vumunhu bya Yehovha Xikwembu, a swi nge vi kona hilaha ku nga heriki. Swa fanela leswaku swi herisiwa, swi siviwa hi rirhandzu leri nga ta tshama hilaha ku nga heriki. Loko misava leyi nga hava ku vengana leyi teleke rirhandzu, ku ri wona muxaka lowu u wu lavaka, pfumelela Timbhoni ta Yehovha ti ku hlamusela swilaveko leswi nga endlaka leswaku u hanya eka yona, hi ku tirhisa Bibele.

Ina un’wana ni un’wana wa hina u ta va a endla kahle loko a tivutisa, ‘Hi yihi mfanelo leyi lawulaka vutomi bya mina, i rirhandzu kumbe i rivengo?’ Lexi a hi xivutiso lexi nga pfuniki nchumu. Munhu la landzelaka nala wa Xikwembu, xikwembu xa rivengo, a nge tlhaveriwi hi dyambu. Munhu la landzelaka Yehovha, Xikwembu xa rirhandzu, u ta hanya hilaha ku nga heriki!—1 Yohane 2:15-17.

[Xifaniso lexi nga eka tluka 10]

Hambi ku ri namuntlha vanhu va nga ri ambala rirhandzu