Paradeyisi Leyi Nga Hava Maxangu—Yi Ta Va Kona Ku Nga Ri Khale

“U TA va na mina eParadeyisini.” Mayana ndlela leyi marito lawa ma n’wi tiyiseke nhlana ha yona wanuna loyi a a ri xigevenga! E-e, ku nga ri leswaku a a ta papalata ku ya etiheleni ta ndzilo ivi a ya etilweni loko a fa. Ematshan’weni ya sweswo khamba leri a ri ri etlhelo ka Yesu ri kume nchavelelo hi ku tiva leswaku ri ta pfuxiwa eku feni kutani ri tlheriseriwa evuton’wini loko Paradeyisi yi kondleteriwa eka pulanete leyi. Hi kombela u xiya leswaku loyi a vuleke marito wolawo ya risima mayelana ni Paradeyisi—i N’wana wa Xikwembu, Yesu Kreste.—Luka 23:43.

I yini lexi susumeteleke Kreste leswaku a tshembisa Paradeyisi? Khamba leri a ri endle xikombelo lexi nge: “Yesu, ndzi anakanye, loko u nghena eMfun’weni wa wena.” (Luka 23:42) Xana hi wihi Mfumo lowu, naswona wu hlangana njhani ni paradeyisi ya laha misaveni? Xana leswi swi kombisa njhani leswaku Paradeyisi yi ta va yi ri hava maxangu?

Lexi Nga Ta Tisa Paradeyisi

Wa swi xiya leswaku paradeyisi ya xiviri yi ta va kona emisaveni ntsena loko maxangu hinkwawo lama nga kona namuntlha ma herile. Matshalatshala ya munhu yo ringeta ku ma herisa ku ta fika sweswi ma tsandzekile, hilaha vumbhoni bya matimu byi tiyisaka hakona. Yeremiya, muprofeta wa Muheveru u te: “Oho Yehova, nḍa ŝi tiv̌a, . . . munhu l’a fambaka a nga ka a nga lulamisi renḍo ra yena.” (Yeremiya 10:23) Kutani ke, i mani la nga ta herisa maxangu hinkwawo lama nga kona namuntlha?

Maxelo Yo Biha Ni Nthyakiso. Loko moya lowu kariheke eLwandle ra Galeliya wu pfuxe magandlati lamakulu lerova a ma xungeta ku tshova xikwekwetsu, vatluti va pfuxe nakulobye loyi a va famba na yena evurhongweni. U byele lwandle a ku: “Miyela, u ku ntse!” Evhangeli ya Marka yi hlamusela leswi humeleleke: “Mheho yi va yi miyela, ku va ni ku rhula lokukulu.” (Marka 4:39) Nakulobye loyi a va famba na yena a ku na un’wana handle ka Yesu. A a ri ni matimba yo lawula maxelo.

Ka ha ri yena Yesu la vhumbheke hi ku tirhisa muapostola Yohane leswaku nkarhi wa ta lowu Xikwembu xi nga ta “herisa lava herisaka misava.” (Nhlavutelo 1:1; 11:18) Leyi a hi mhaka leyi nga kotekiki eka Loyi a heriseke misava hinkwayo ya vanhu lava nga chaviki Xikwembu hi Ndhambhi ya siku ra Nowa.—2 Petro 3:5, 6.

Vugevenga Ni Madzolonga. Bibele ya tshembisa: “La’v̌o biha v̌a ta susiwa, kambe la’v̌a ṭhembaka Yehova v̌a ta fuma misav̌a. V̌a musa v̌a ta fuma misav̌a, v̌a ta tiṭakela e ku ruleni lo’kukulu ka v̌ona.” (Pisalema 37:9, 11) Naswona, i Xikwembu, Yehovha, lexi tshembisaka ku susa vugevenga ni madzolonga hinkwawo, kutani Paradeyisi xi ta yi hlayisela vanhu lavo lulama.

Vusweti Ni Ndlala. Mafambiselo ya namuntlha ya vuhomboloki ma pfumelela tihulumendhe exiphen’wini xin’wana xa misava leswaku ti hlayisa swakudya “swo tala” leswi salaka, loko hi hala tlhelo matiko lama pfumalaka ma kayakaya evuswetini. Minhlangano yo phalala leyi seketeriwaka hi vanhu lava khumbekaka emisaveni hinkwayo, yi ringeta ku rhumela swilaveko swa xisekelo, kambe hakanyingi ya tsandzeka loko swikimi swa mphakelo swi nga fambi kahle hikwalaho ka ku pfumaleka ka nawu ni nhleleko. Ringanisa xiyimo lexi ni leswi tsariweke hi muprofeta Esaya: “Yehova wa tinyimpi o ta lunghisela matiko hikwawo e nṭhav̌eni leyi, e ŝakudya ŝa tinyama le’ti noneke, ni ŝakunwa ŝa tivinyo le’ti tengeke, le’ti kumiwaka henhla ka šisese; ti ri tinyama le’ti noneke, le’ti teleke, ni mafura, ni tivinyo ta khale le’ti tengisiweke.” (Esaya 25:6) Xana sweswo a swi kombisi swona leswaku ndlala ni nsiko swi ta va swi nga ha ri kona? Hakunene, swi ta va swi nga ha ri kona.

Nyimpi. Matshalatshala yo ringeta ku fuma misava leyi hi ku tirhisa ndlela yo lawula matiko hinkwawo a ma humelelanga. Ntwanano wa Matiko lowu simekiweke hi 1920, wu tsandzeke ku sivela ku tlhekeka ka Nyimpi ya Vumbirhi ya Misava naswona wu wile. Nhlangano wa Matiko lowu hakanyingi wu dzunisiwaka tanihi ntshembo lowunene wa ku rhula, wu lwa ni ku hambanisa mintlawa leyi lawulaka etindhawini ta nyimpi. Ku nga khathariseki matshalatshala ya wona lama tivekaka yo hlayisa ku rhula, tinyimpi ta andza, ku nga ha va ku ri nyimpi ya xin’wana-manana, ya tinxaka kumbe ya tiko. Hulumendhe ya Mfumo wa Xikwembu yi tshembisa ku susa mintlawa ya namuntlha leyi lwaka ni ku dyondzisa vafumiwa va yona tindlela ta ku rhula.—Esaya 2:2-4; Daniyele 2:44.

Ku Hohloka Ka Ndyangu Ni Mahanyelo. Ku hohloka ka mindyangu ku tinyike matimba. Vana lava tsemeke mibya va andza. Mahanyelo yo biha ma nghenelela etimhakeni hinkwato ta vanhu. Kambe, mimpimanyeto ya Xikwembu a yi cincanga ku sukela eku sunguleni. Yesu u kandziyise leswaku “wanuna ú ta sukela tata wa yena ni mana wa yena, a namarhela nsati wa yena; kutani lavambirhi va ta va nyama yin’we . . . Hikwalaho ke leswi Xikwembu xi swi hlanganiseke, swi nga tshuki swi hambanisiwa hi munhu.” (Matewu 19:5, 6) Yehovha Xikwembu u ye emahlweni a lerisa a ku: “U va ni xichavo eka tata wa wena ni ka mana wa wena . . . leswaku u kateka, ni leswaku u hanya masiku layo tala emisaveni leyi.” (Vaefesa 6:2, 3) Mimpimanyeto yo tano yi ta hambeta yi va kona emisaveni ehansi ka Mfumo wa Xikwembu.

Vuvabyi Ni Rifu. Muprofeta Esaya u tshembisile a ku: “Yehova . . . o ta hi hlayisa! A ku nga v̌i na munhu . . . l’a nga ta ku: nḍa v̌abya!” (Esaya 33:22, 24) Pawulo muapostola wa Mukreste u te: “Ku dyoha ka hakela, hakelo ya kona i rifu, kambe nyiko leyi . . . humaka eka Xikwembu, i vutomi lebyi nga heriki, ha Kriste Yesu.”—Varhoma 6:23.

Yehovha Xikwembu u ta susa maxangu lawa hinkwawo hi ku tirhisa hulumendhe ya yena ya le tilweni leyi rhangeriweke hi N’wana wakwe, Kreste Yesu. Hambiswiritano, u nga ha ku, ‘Nhlamuselo leyi yi tikomba yi nga fani ni norho wa Utopia. Entiyisweni, a swi ta tsakisa loko yi hetiseka, kambe, xana yi ta hetiseka?’

Nchumu Wa Xiviri Lowu Nga Kona Sweswi

Eka vanhu vo tala, ku tshama eparadeyisini leyi nga hava maxangu kona laha emisaveni swi tikomba ku ri ku tixisa. Loko leyi ku ri ndlela leyi u titwaka ha yona, kambisisa vumbhoni lebyi kombisaka leswaku leswi swi ta humelela hakunene.

Timbhoni ta Yehovha i vanhu lava namuntlha va kumekaka ematikweni hinkwawo, lava tlulaka timiliyoni ta ntlhanu lava nga riki ni maxangu yo tala emavandlheni ya vona ya 82 000 lama nga ematikweni ya 233. U nga ha va kona eka yin’wana ya tinhlengeletano ta vona, letikulu kumbe letitsongo, kutani i yini lexi u nga ta xi vona?

(1) Moya Wo Tsakisa Lowu Tengeke. Loko a vulavula hi wun’wana wa mintsombano ya Timbhoni ta Yehovha eNorwich, le Nghilandhi, mulanguteri wa xitediyamu xa bolo ya milenge, u te: “Moya wa ku rhula lowu a wu ri kona emasikwini ya mune . . . a wu tsakisa. U kuma ku rhula loku hambaneke swinene ni ka masiku walawo ya mune emisaveni leyi khomekeke swinene swin’we ni le ka vutomi bya siku na siku. Hakunene Timbhoni ti ni nchumu wun’wana lowu ti endlaka ti hambana ni van’wana naswona a swi olovi ku wu hlamusela.”

Muleteri un’wana wa ndhawu ya vumaki bya mintirho yo aka loyi a endzeleke tihofisi ta le London ta Timbhoni ta Yehovha u te: “Ndzi tsakisiwe ngopfu hi leswi ndzi swi voneke ni ku swi twa naswona ndzi nyanyuriwe ngopfu hi moya wa ku rhula ni ntsako wa xiviri lowu nga kona, ku nga ri emiakweni ya n’wina ntsena, kambe ni le xikarhi ka [vavanuna ni vavasati]. Ndzi vona onge mahanyelo ni ntsako wa n’wina swi nga yi dyondzisa swo tala misava leyi hinkwayo leyi nga ni maxangu.”

(2) Nsirhelelo Ni Ku Rhula. Mutsari wa mahungu eka Journal de Montréal ya le Canada u tsarile a ku: “A ndzi Mbhoni. Kambe ndzi mbhoni emhakeni ya leswaku Timbhoni ti nyikela vumbhoni malunghana ni ku humelela swin’we ni mahanyelo lamanene. . . . Loko a ko va tona ntsena vanhu lava nga emisaveni, nivusiku a hi nga ta boheka ku goga timbati ta hina ni ku veka bele yo sivela vukhamba.”

(3) Ku Tshembeka Eka Hulumendhe Ya Mfumo Wa Xikwembu hi leswi Timbhoni ti nga xiswona. Xiyimo xa tona xa vukala-tlhelo xi hlundzukisa van’wana, hambileswi a swi nga fanelanga swi va tano. Ku nga katseki ka tona emakungwini ya tipolitiki ya namuntlha a ku vangiwi hi ku tsandzeka ku tiboha eku antswiseni ka vutomi bya vanhu. Ematshan’weni ya sweswo ti ringeta ku hanya hi ndlela leyi tsakisaka loyi a fumaka hi ku tirhisa hulumendhe ya le tilweni, ku nga Yehovha Xikwembu, Muvumbi wa misava.

Tidyondzo ta Timbhoni leti sekeriweke hi ku helela eRitweni ra Xikwembu ku nga Bibele, ti ti sivela ku wela entlhan’wini wa ku hundzuka mpambukwa. Ti rhandza vanhu hinkwavo ku nga khathariseki leswaku i va vukhongeri byihi. A ti va sindzisi vanhu lava ku cinca malangutelo ya vona. Ti ringeta ku tekelela Murhangeri wa tona, Kreste Yesu, hi ku nyikela vumbhoni bya Matsalwa mayelana ni Paradeyisi leyi nga hava maxangu leyi nga ta va kona emisaveni ku nga ri khale.—Matewu 28:19, 20; 1 Petro 2:21.

(4) Rihanyo Ra Moya Ni Ntsako. Entiyisweni, Timbhoni ta Yehovha a ti vuli swona leswaku ti hava maxangu hi ku helela eminkarhini ya sweswi. Leswi a swi koteki exikarhi ka vanhu lava nga ni mfungho wa xidyoho xa Adamu. Kambe hi ku pfuniwa hi moya lowo kwetsima wa Xikwembu, ti tikarhatela ku hlakulela timfanelo letinene to tanihi “rirhandzu, ni ku tsaka, ni ku rhula, ni ku leha mbilu, ni vunene, ni ku hanana, ni ku tshembeka, ni musa, ni ku tikhoma.” (Vagalatiya 5:22, 23) I vugandzeri bya tona eka Yehovha ha Kreste Yesu lebyi ti hlanganisaka ni ku hlayisa mintshembo ya tona yi tiyile.

Ha tshemba leswaku ku endzela endhawini ya nhlangano wa Timbhoni endhawini ya ka n’wini, swi ta ku khorwisa leswaku Xikwembu xi ta hundzula misava yi va paradeyisi ya xiviri.

Maxangu ya namuntlha ma ta va ma herile. Hambi ku ri ku nga hetiseki loku nga kona hakatsongo-tsongo ku ta nyamalala tanihi leswi mimpfuno ya gandzelo ra nkutsulo wa Kreste yi nga ta tirhisiwa eka vanhu lava yingisaka. Ina, u nga kuma rihanyo leri hetisekeke ni ntsako.

Malunghiselelo yo olova ma ta ku pfuna leswaku u va ni ntshembo wo tano. Kombela kopi ya wena ya buku leyi nge Vutivi Lebyi Yisaka eVuton’wini Lebyi Nga Heriki eka Timbhoni.a Hi ku tirhisa yona u nga swi kota ku dyondza hi nkarhinyana wutsongo leswi Xikwembu xi swi lavaka eka wena leswaku u hanya hilaha ku nga heriki eparadeyisini leyi nga hava maxangu.

[Tinhlamuselo ta le hansi]

[Blurb on page 10]

Tidyondzo ta Timbhoni leti sekeriweke hi ku helela eBibeleni, ti ti sivela ku hundzuka mpambukwa

[Swifaniso leswi nga eka tluka 8, 9]

Sweswi ku andlariwa masungulo ya paradeyisi leyi nga hava maxangu

[Xifaniso lexi nga eka tluka 9]

Ku nga ri khale, paradeyisi ya xiviri yi ta va kona emisaveni hinkwayo