Papila Ro Hlawuleka Leri Yaka Eka Vatswari Va Vona

Vanhwanyana vambirhi va malembe ya kondlo-a-ndzi-dyi va le Spain va ha ku tsala papila ro tlangela ri ya eka vatswari va vona. Hi leswi swin’wana leswi tshahiweke:

Eka vatswari va hina lava rhandzekaka, Pepe na Vicenta:

Xana hi sungula kwihi? Ku ni swilo swo tala swinene leswi hi lavaka ku swi vula, kambe swa tika ku swi katsakanya. Hi lava ku mi nkhensa hi malembe ya hina ya 17 ni ya 15 yo hanya, malembe lawa a hi khathaleriwa ni ku rhandziwa swinene.

Minkarhi hinkwayo a hi tiva mavonelo ya n’wina ni milawu ya n’wina. Minkarhi yin’wana a hi tivutisa leswaku ha yini hi fanele hi vuya ekaya hi nkarhi lowu vekiweke, kambe sweswi, endzhaku ko xiyisisa ndlela leyi swilo swi va fambeleke ha yona vantshwa van’wana lava a va nga vekeriwi nkarhi wo vuya ekaya, ha swi xiya leswaku milawu yoleyo yi hi sirhelerile.

Xikombiso xa n’wina xa ku nga xwi eminhlanganweni ya Vukreste eHolweni ya Mfumo, handle ka loko ku ri ni swivangelo leswi twalaka, xi hi pfune ngopfu, hilaha ku hlanganyela eku chumayeleni na n’wina hi Tisonto swi hi pfuneke hakona. Hi Sonto nimixo a swi kali swi lava hi vutisa leswaku ha ya entirhweni wa nsimu kumbe e-e. Hi swi tiva kahle swinene leswaku ha ya!

Ndlela leyi hi kurisiweke ha yona yi tlhele yi katsa ku dyondza ku va ni malwandla. Vanhu vo tala swinene a va endzela ekaya, naswona minkarhi hinkwayo a mi va khoma kahle ngopfu. Leswi hi swi vone hi mahlo ya hina loko ha ha ri vatsongo, kutani hi swi twisisile leswaku hi ni vatswari lava hlawulekeke.

Ku hava munhu un’wana loyi a hi tivaka kumbe a hi twisisaka ku antswa ku tlula n’wina. Mi vanghana va hina lavakulu, lava hi va tshembaka hi ku helela.

Xo hetelela, hi lava ku mi byela leswaku ha mi rhandza. Mi vatswari va hina, naswona a hi nge mi fanisi na munhu. Loko a swo endleka leswaku hi tlhela hi tihlawulela vatswari ni ndlela ya hina yo hanya, handle ko kanakana a hi ta hlawula n’wina, naswona a hi ta tlhela hi hanya vutomi lebyi fanaka.

Hi ku ntswontswa ka rirhandzu, vana va n’wina,

ESMERALDA na YOLANDA