Loko Ku Lamala Hinkwako Ku Ta Va Ku Nga Ha Ri Kona

XIGONO xin’wana xi tshame xi vula leswaku vanhu vo tala va ni “mimiri leyi hanyeke kahle swa xinkarhana.” Kunene xi vurisile, hikuva hi ku famba ka nkarhi, hinkwerhu ha tsana emirini! Hikwalaho ka sweswo, vanhu vo tala va lava mafasitere ya mahlo, swifasiterana swa mahlo, meno lama nga lo endliwa, swipfuneta-ku-twa, swo pfuneta ku ba ka mbilu ni ku hoxiwa ka matsolo lama nga lo endliwa. Hilaha Varhoma 8:22 yi vulaka hakona, “ntumbuluko hinkwawo wu hambeta wu konya ni ku vaviseka swin’we ku ta fika sweswi.”

Hikwalaho, hinkwerhu ka hina hi nga chaveleriwa hi xitshembiso xa Xikwembu xa ku tlherisela vanhu lava yingisaka erihanyweni leri heleleke ‘emisaveni leyintshwa’ ya ku lulama. (2 Petro 3:13; Nhlavutelo 21:3, 4) Esaya 35:5, 6 yi ri: “Hi laha mahlo ya v̌o-fe-mahlo ma nga ta hanyanya, ni tindlev̌e le’ti siv̌ekeke ti nga ta pfuleka; ŝilema ŝi ta tlula kukota tinhlangu, kutani ririmi ra mbev̌ev̌e ri ta yimbelela hi ku ṭaka.”

Bibele yi vula ka ha ri emahlweni leswaku “ntshungu lowukulu” wu ta pona eku lovisiweni ka fambiselo leri ro homboloka ra sweswi. (Nhlavutelo 7:9, 14; Pisalema 37:10, 11, 29) Handle ko kanakana, hi ku hatlisa endzhaku ka ndzoviso wolowo, lava va lamaleke swinene ni lava va nga ni swiphiqo leswikulu swa rihanyo va ta tshunguriwa hi ku hatlisa emavabyini ya vona! (Esaya 33:24) Yesu u kombise ku tshungula loku nga ta va kona emisaveni leyintshwa ya Xikwembu, loko a tshungula hi ndlela leyi fanaka loko a ha ri emisaveni. (Ringanisa Marka 5:25-29; 7:33-35.) Munhu a nge swi koti ku hlamusela nyanyuko lowu vanhu va nga ta va na wona ni mihloti ya ntsako leyi nga ta halaka loko lava va tsemiweke swirho va cukumeta swirho swa vona leswi nga lo endliwa, minxongotelo ni switulu swa swigono! Tanihi leswi va nga ta va va hanye kahle emirini, va ta swi kota ku hetisisa xiavelo xa vona lexi va xi nyikiweke hi Xikwembu xo hoxa xandla eku hundzuleni ka misava yi va kaya leri nga paradeyisi.—Luka 23:43.

Enkarhini lowu, lava lamaleke namuntlha va ha nonon’hweriwa. Nelson, la lamaleke wa le Canada, u ri: “Loko ndzi sungula ku titwela vusiwana, ndzi ehleketa marito ya Yesu lama nga eka Matewu 24:13: ‘Loyi a tiyiseleke ku fika emakumu hi yena la nga ta ponisiwa.’” Ku nga khathariseki swipimelo leswi va nga na swona, vanhu lava lamaleke va nga helela ni ku hanya hi ndlela ya nkoka ngopfu—emoyeni—hi ku tiyisela eripfumelweni ra Vukreste.—Yakobo 1:3, 4.

Timbhoni ta Yehovha ti pfune vanhu va timiliyoni leswaku va va ni ripfumelo leri. Dell, wanuna la lamaleke la tshahiweke exihlokweni lexi hundzeke, u ri: “A ndzi swi koti ku phofula ndlela leyi ndzi titweke ha yona endzhaku ka loko ndzi dyondze leswaku swiphiqo swa rihanyo swo fana ni swa mina i swa xinkarhana hakunene.” Ina, leswi a kumeke matimba hikwalaho ka ntshembo wolowo—ni van’wana vo tala lava fanaka na yena—u nge vuli leswaku Dell i xigono.

[Xifaniso lexi nga eka tluka 10]

Lava va nga ta pona ndzoviso lowu taka va ta tshunguriwa hi ndlela leyi hlamarisaka eku lamaleni ka vona