“Xana Wa Ri Tlangela Siku Ra Vakokwana?”

A KU ri hi xixika nimixo, naswona xirhami a xi vuyisa ni n’wana evukatini. Natalia, xinhwanyatana lexi nga ni malembe ya 16 xa le Poland, a a yimele xitimela loko vateki va mahungu vambirhi va phepha-hungu ra kwalaho va ta eka yena va ta n’wi vutisa va ku, “Xana wa ri tlangela Siku ra Vakokwana?”

Le Poland, Siku ra Vakokwana, Siku ra Vakhalabye, Siku ra Vamanana, Siku ra Vavasati ni Siku ra Vadyondzisi i masiku yo hlawuleka hinkwawo. Hi ntolovelo vana lavatsongo va tlangela Siku ra Vakokwana hi ku va endlela makhadi ya ku va losa, kasi vana lava kuleke va nyika vakokwa wa vona tinyiko kumbe swiluva.

Eku sunguleni, Natalia a a nga ri na nhlamulo loko a vutisiwa xivutiso lexi nga laha henhla. Kambe endzhaku ko khongela hi mbilu, u byele vateki lava va mahungu a ku, “Ndzi Mbhoni ya Yehovha, naswona a ndzi ri tlangeli Siku ra Vakokwana.” Vateki volavo va mahungu va hlamarile. Hiloko Natalia a n’wayitela kutani a engetela a ku: “Ndzi tshama na kokwana, kutani ndzi nga n’wi tisela swiluva, ndzi vulavula na yena ni ku n’wi nkhensa hikwalaho ka musa wakwe siku ni siku. Ha yini ndzi fanele ndzi n’wi fundzha kan’we ntsena hi lembe?”

Marito wolawo lamanene ma tsakise vateki va mahungu, hilaha ma nga ha ku tsakisaka hakona na wena. Hi siku leri landzelaka phepha-hungu ra nimixo a ri kandziyise marito ya Natalia ni xifaniso xakwe.

Xana xikombiso lexi xi endla leswaku na wena u tivutisa loko u lungheleke ku hlamusela swivangelo swa ripfumelo ni ku tikhoma ka wena, ngopfu-ngopfu loko u vutisiwa u nga swi rindzelanga? Vagandzeri va ntiyiso va Xikwembu va ta rhandza ku xi dzunisa hi ku tshama va lunghekele ku nyikela swivangelo swa leswi va swi kholwaka ni ku endla tano hi ku tirhandzela loko swi koteka.—1 Petro 3:15.