Goza Ra Vuntlhanu

Hlela Ni Ku Endla Swintirhwana Swa Siku Ni Siku

Ha yini goza leri ri ri ra risima? Mintirho ya siku ni siku i nchumu lowu vanhu lavakulu va wu endlaka evuton’wini bya vona. Ntirho wa ku tihanyisa, vugandzeri, hambi ku ri vuhungasi na swona i mintirho leyi endliwaka hi ku phindha-phindha. Vatswari va lema vana va vona loko va nga va dyondzisi ku hlela nkarhi wa vona vini ni ku namarhela xiyimiso xa vona vini. Kasi, “minkambisiso yi kombisa leswaku ku veka milawu ni ku hlela swintirhwana swi endla leswaku n’wana a titwa a sirhelelekile naswona swi n’wi dyondzisa ku tikhoma ni ku titshemba,” ku vula Dok. Laurence Steinberg, profesa wa ntivo-miehleketo.

Xiphiqo xa kona: Munhu u tshama a khomekile evuton’wini. Vatswari vo tala va tirha tiawara to tala, sweswo swi nga va endla va va ni nkarhi wutsongo wo tshama ni vana va vona. Ku hlela ni ku endla swintirhwana swa siku ni siku swi lava munhu a tikhoma ni ku tiyimisela ku pfuna vana va yena leswaku va tolovela mintirho ya kona.

Ntlhantlho: Tirhisa nawu wa le Bibeleni wa leswaku “swilo hinkwaswo a swi endliwe hi ku tenga ni hi ku hleleka.” (1 Vakorinto 14:40) Hi xikombiso, loko vana va vona va ha ri tincece, vatswari vo tala va veka nkarhi wo ya eku etleleni. Hambiswiritano, nkarhi wo etlela wu fanele wu va nkarhi lowu tsakisaka eka vana. Tatiana loyi a tshamaka eGreece la nga mana wa swinhwanyetana swimbirhi, u ri: “Loko vana va ri emubedweni, ndza va mbuwetela ni ku va byela leswi ndzi swi endleke loko va ri exikolweni. Kutani ndzi va vutisa loko va ri ni swo karhi leswi va tsakelaka ku ndzi byela swona leswi va nga swi endla siku rero. Va va va ntshunxekile. Hakanyingi va ndzi phofulela ta le mbilwini.”

Kostas, nuna wa Tatiana, u hlayela vana va vona va vanhwanyana switori. U ri: “Va hlamusela swo karhi hi ta xitori xa kona, naswona minkarhi yo tala mabulo ma cinca hakatsongo-tsongo kutani va vulavula hi leswi va karhataka. A va tiphofuli loko ndzi va vutisa kunene leswaku va karhatiwa hi yini.” Kutani loko vana va ri karhi va kula, swi fanerile leswaku va cinca nkarhi lowu va etlelaka ha wona. Kambe loko mi namarhela mukhuva lowu, vana va wena va ta tsakela ku hambeta va vulavula na wena.

Ku tlula kwalaho, hi vutlhari mindyangu yi swi endla mukhuva ku fihlula kumbe ku lalela swin’we. Leswaku mi ta kota ku landzela mukhuva lowu, nkarhi wo dya wu fanele wu cinca ku ya hi swiyimo. Charles, tatana wa vana vambirhi va vanhwanyana, u ri: “Minkarhi yin’wana ndzi vuya vusiku entirhweni. Nkatanga u nyika vana swakudya swo khomisa nyoka loko va ha ndzi rindzile kukondza ndzi vuya hi ta lalela swin’we tanihi ndyangu. Hi bula hi ta mintirho ya hina ya siku, hi pfuxeta tsalwa ra Bibele, hi vulavula hi swiphiqo swo karhi ni ku dya mabulo swin’we hi tsakile. Mukhuva lowu wu pfune ndyangu wa hina ku tshama wu tsakile.”

Leswaku goza leri ri humelela, u nga yengiwi hi ku hlongorisa rifuwo kutani sweswo swi ku kavanyeta ku hlela swintirhwana leswi mi faneleke mi swi endla tanihi ndyangu. Tirhisa xitsundzuxo xa Bibele xa ku “tiyiseka hi swilo swa nkoka swinene.”—Vafilipiya 1:10.

Hi swihi swin’wana leswi vatswari va nga swi endlaka leswaku va antswisa ndlela leyi va vulavulaka ha yona ni vana va vona?

[Nkomiso eka tluka 7]

“Swilo hinkwaswo a swi endliwe hi ku tenga ni hi ku hleleka.”—1 Vakorinto 14:40