Langutelo Ra Bibele

Xana Vukholwa-hava Bya Fambisana Ni Tidyondzo Ta Bibele?

MUTSARI un’wana wa phepha-hungu u hete lembe hinkwaro a nga swi lavi ku famba hi xihaha-mpfhuka hikuva muvhumbhi wa swiendlakalo u n’wi byele leswaku a a ta fa ekhombyeni ra xihaha-mpfhuka. Vanhu va swiyimo swo hambana-hambana, ku katsa van’watipolitiki, van’wamabindzu, vatlangi va switori, switsutsumi ni swichudeni swa le yunivhesiti va tshembela eka vukholwa-hava. Loko va ri ni ku kanakana ko karhi, va tshikilelekile kumbe va karhatekile, va anakanya leswaku vukholwa-hava byi ta va sirhelela eka makhombo yo karhi kumbe byi va pfuna leswaku makungu ya vona ma humelela.

Vanhu va teka vukholwa-hava hinkwabyo byi ri ndhavuko lowu tsakisaka wa khale kumbe byi ri nchumu lowu pfunaka mianakanyo lowu nga riki na khombo. Margaret Mead, mutivi wa ndhavuko wa vanhu loyi se a feke, u te: “Vukholwa-hava byi kombisa ndlela leyi hi swi navelaka ha yona leswaku nchumu wo karhi wu endleka hilaha hi lavaka hakona kumbe ku sivela nchumu wo biha leswaku wu nga humeleli. Ku tirhisa vukholwa-hava hambiloko hi nga pfumeli eka byona swi hi endla hi va ni ntshembo eka vuyelo lebyi vaka kona emianakanyweni bya vukholwa-hava handle ko titwa hi ri mahlonga ya byona.” Kambe, lava tiyimiseleke ku tsakisa Xikwembu va fanele va tivutisa, ‘Xana Vakreste va fanele va pfumela eka vukholwa-hava?’

Masungulo Ya Vukholwa-hava

Vanhu hi ntolovelo va chava swilo swo tala—va chava rifu, va chava swilo leswi va nga swi tiviki va tlhela va chava leswi vuriwaka Vutomi bya le Ndzhaku ka Rifu, loko hi boxa swi nga ri swingani ntsena. Sathana, mukaneti wa Xikwembu la xandzukeke, u tiyimisele ku endla vanhu mahlonga naswona u nyanyise ku chava loku hi ku engetela mavunwa ya rihlaza. (Yohane 8:44; Nhlavutelo 12:9) Sathana a nga tirhi a ri yexe loko a kanganyisa vanhu leswaku va fularhela Xikwembu. EBibeleni Sathana u vuriwa “mufumi wa madimona.” (Matewu 12:24-27) I vamani madimona? Enkarhini wa Nowa tintsumi to tala ti hlanganyele na Sathana eku xandzukeleni ka Xikwembu kutani ti tiendla madimona. Ku sukela hi nkarhi wolowo, ti hambete ti kucetela mianakanyo ya vanhu. Ntlhamu wun’wana lowu ti kucetelaka vanhu ha wona i vukholwa-hava.—Genesa 6:1, 2; Luka 8:2, 30; Yudha 6.

Ku ni mavunwa man’wana lama vuriweke hi Sathana lama veke xisekelo xa vukholwa-hava. I dyondzo ya leswaku ku ni nchumu wo karhi wa munhu lowu hambetaka wu hanya loko miri wa munhu wu file naswona nchumu wolowo wu nga vuya wu ta karhata lava hanyaka. Kambe Bibele yi ri: “Loko ku ri lava feke, a va tivi nchumu nikatsongo.” Yi tlhela yi vula leswaku “a ku na ntirho hambi ku ri kungu, vutivi kumbe vutlhari” loko munhu se a file.—Eklesiasta 9:5, 10.

“Nchumu Lowu Nyenyetsaka Eka Yehovha”

Vanhu vo tala va hlawule ku tshemba mavunwa ya Sathana. Kambe, emalembeni lama hundzeke Xikwembu xi nyike Vaisrayele lava a va ri vanhu va xona nkongomiso lowu twisisekaka malunghana ni mhaka leyi. Rito ra xona ri ri: “Ku nga tshuki ku kumiwa eka wena munhu un’wana ni un’wana la hundzisaka n’wana wakwe wa jaha kumbe wa nhwanyana endzilweni, un’wana ni un’wana la hlahluvaka, la endlaka masalamusi kumbe un’wana ni un’wana la endlaka mihlolo kumbe noyi, kumbe la loyaka van’wana kumbe un’wana ni un’wana la vutisaka mungoma kumbe muvhumbhi lonkulu wa swiendlakalo kumbe un’wana ni un’wana la vutisisaka lava feke. Hikuva vanhu hinkwavo lava endlaka swilo leswi i nchumu lowu nyenyetsaka eka Yehovha.”—Deteronoma 18:10-12.

Khombo ra kona, Vaisrayele a va pfa va nga xi yingisi xitsundzuxo lexi. Hi xikombiso, enkarhini wa muprofeta Esaya, van’wana a va tshemba leswaku loko va ta kuma ntshovelo wo tala a va fanele va tsakisa “xikwembu xa Nkateko”—ku nga dyondzo ya vukholwa-hava leyi vangeke vuyelo lebyi nga ni khombo. Yehovha u va fularherile a tlhela a nga ha va katekisi.—Esaya 65:11, 12.

Ndlela leyi Yehovha a byi langutaka ha yona vukholwa-hava a yi cincanga loko ku sungula Vukreste. Muapostola Pawulo u khongotele vanhu lava a va rhandza vukholwa-hava va le mutini wa Listra leswaku va “hundzuka eka swilo leswi swa hava [“vukholwa-hava,” The Emphatic Diaglott] [va] ya eka Xikwembu lexi hanyaka, lexi endleke tilo ni misava ni lwandle ni swilo hinkwaswo leswi nga eka swona.”—Mintirho 14:15.

Ku Tshika Ku Pfumela Eka Vukholwa-hava

Ku ni mikhuva yo hambana-hambana ya vukholwa-hava naswona hinkwayo ka yona a yi twali. Vukholwa-hava byi endla leswaku loko vanhu va humeleriwa hi khombo va vula leswaku va ni badi ematshan’weni ya leswaku va amukela vuyelo bya swiendlo swa vona.

Lexi tsakisaka, vanhu vo tala va tshikile ku pfumela eka vukholwa-hava. Yesu u te: “Mi ta tiva ntiyiso, kutani ntiyiso wu ta mi ntshunxa.” (Yohane 8:32) Clementina wa le Brazil loyi a vhumbheke swiendlakalo ku ringana malembe ya 25, u te: “Ntirho wa mina wa ku tihanyisa a ku ri ku vhumbha swiendlakalo. Kambe ntiyiso wa le Bibeleni wu ndzi ntshunxile eka vukholwa-hava.” Entiyisweni, dyondzo ya Bibele ya nkarhi na nkarhi ni ku khongela eka Yehovha Xikwembu swi huma embilwini swi nga hi pfuna leswaku hi va ni xivindzi. Leswi swi nga hi pfuna leswaku hi anakanya hi ndlela leyinene ni leyi twalaka, ivi sweswo swi endla leswaku hi endla swiboho swa vutlhari leswi sivelaka khombo swi tlhela swi hunguta ku vilela.—Vafilipiya 4:6, 7, 13.

Bibele ya vutisa: “Ku vonakala ni munyama swi hlangana kwihi? Ku tlula kwalaho, ku ni ntwanano wihi exikarhi ka Kreste na Beliyali [Sathana]?” Hikwalaho, Vakreste va ntiyiso va fanele va papalata vukholwa-hava.—2 Vakorinto 6:14-16.

XANA U TSHAME U TIVUTISA?

◼ Ematshan’weni ya ku tshemba Xikwembu, Vaisrayele lava a va rhandza vukholwa-hava a va tshemba mani enkarhini wa Esaya?—Esaya 65:11, 12.

◼ Muapostola Pawulo u khongotele vanhu va le Listra lava a va rhandza vukholwa-hava leswaku va endla yini?—Mintirho 14:15.

◼ Xana Vakreste va ntiyiso va fanele va pfumela eka vukholwa-hava?—2 Vakorinto 6:14-16.

[Swifaniso eka tluka 10]

Vukholwa-hava byi endla vanhu va titwa va sirhelelekile ematshan’weni ya ku amukela vuyelo bya swiendlo swa vona