Xana Switukulwana Swa Nkarhi Lowu Taka Swa Ha Ta Swi Kota Ku Hanya eMisaveni?

HI MUTSARI WA XALAMUKA! LE CANADA

◼ Ntlawa wa vativi va mbango ni varhangeri lava a va katseka eku endleni ka nkambisiso lowu khumbaka fambiselo ra ikholoji ra misava hinkwayo, va humese xiviko xa vona xo sungula endzhaku ka loko va hete malembe ya mune va ri karhi va endla nkambisiso lowu hetisekeke lowu vitaniwaka Nkambisiso wa Fambiselo ra Ikholoji ra Gidi ra Malembe (Millennium Ecosystem Assessment [MA]). Va gimete hi ku vika leswi landzelaka: Eka malembe ya 50 lama hundzeke, ku laviwa ngopfu ka swakudya, mati yo tenga, tihunyi, swilo swo endla swiambalo ni mafurha swi ri kavanyete swinene fambiselo ra misava ra ikholoji, swi endla leswaku switukulwana swa nkarhi lowu taka swi nga swi koti ku hanya emisaveni. Misava a ya ha swi koti ku tleketla vuluva bya swimilana hi ntumbuluko, nhova a ya ha swi koti ku basisa moya ni lwandle a ra ha humesi swiaka-miri swa ntumbuluko. Swilo swo tala leswi hanyaka eka pulanete leyi swi nga ha hela ku nga ri khale.

Phepha-hungu ra le Canada leri vuriwaka Globe and Mail ri te: “Vanhu va le ku onheni ka misava swinene, lerova leswi swi ta endla leswaku swilo swin’wana swa ntumbuluko swi hatla swi onhaka, ivi sweswo swi vanga mavabyi, ku herisiwa ka makhwati kumbe tindhawu leti nga riki ni swivumbiwa leswi hanyaka elwandle.” Phepha-hungu leri ri tlhele ri ku: “Nhlangasi, makhwati, mananga, laha milambu yi hlanganaka kona ni lwandle, timbuwa leti nga vuphaselo bya tinhlampfi ni swilo swin’wana leswi hanyaka leswi basisaka moya, mati ni swiaka-miri swa swivumbiwa hinkwaswo swi onhiwa swinene lerova a swi nge he hlakarheli.” Hambileswi huvo liya ya vakambisisi va mbango yi pfumelaka leswaku vanhu hi vona va faneleke va tshika ku onha fambiselo ra ikholoji, yi vule leswaku “vanhu va fanele va yi cinca swinene ndlela leyi va khomaka ntumbuluko ha yona.”

Xana pulanete ya Misava yi nga sirheleriwa? Ina yi nga sirheleriwa! Leswi hi nga vahlayisi va ntumbuluko wa Xikwembu, hi fanele hi endla leswi nga ematimbeni ya hina leswaku hi xixima mbango. (Pisalema 115:16) Hambiswiritano, Xikwembu hi xona ntsena xi nga ta endla leswaku fambiselo ra ikholoji ri tlhelela exiyin’weni xa rona. “Muendli wa [hina] Lonkulu” u tshembisa leswaku u ta nyikela nyingiso wa yena emisaveni kutani ‘a yi nyika hi vutalo.’ (Yobo 35:10; Pisalema 65:9-13) Leswi swi katsa malwandle ni hinkwaswo leswi nga eka wona hikuva Yehovha Xikwembu loyi a nga Muvumbi u ni matimba ehenhla ka malwandle. (Pisalema 95:5; 104:24-31) Naswona leswi a swi tshembisaka, swi ta endleka hakunene hikuva Xikwembu ‘a xi hembi.’—Tito 1:2.

Ku tiva leswaku misava yi ta hlayisa switukulwana swa nkarhi lowu taka swa chavelela hakunene. Leswi swi khutaza vanhu hinkwavo lava chavaka Xikwembu leswaku va xi dzunisa hikwalaho ka vutlhari bya xona lebyi nga pimekiki, matimba ni vunene bya xona ni ku xi vangamisa hikwalaho ka ndlela leyi xi rhandzaka ntumbuluko wa xona ha yona.—Pisalema 150:1-6.

[Laha Xifaniso Xi Humaka Kona eka tluka 12]

Globe: NASA photo