Rirhandzu Leri Nga Ni Matimba Swinene Ku Tlula Xidzedze!
Loko Xidzedze lexi vuriwaka Katrina ni lexi vuriwaka Rita swi hlasele le Gulf Coast, eUnited States hi 2005, swi onhe ngopfu naswona ku fe vanhu vo tala. Timbhoni ta Yehovha ta magidi na tona ti hlaseriwile hi swidzedze leswi.
Tikomiti to phalala leti kongomisiwaka hi hofisi ya Timbhoni ta Yehovha ya le United States a ta ha yimayimanga, ti pfune vanhu hi xihatla. Le Louisiana, ku simekiwe tindhawu ta 13 to hlela mphalalo, ni tindhawu ta kaye to veka nhundzu ni ta mune to veka petirolo. Ndhawu leyi a va yi phalala a yi hlanganisa 80 000 wa swikwere-khilomitara. Timbhoni ta kwalomu ka 17 000 leti humaka eswifundzheni hinkwaswo swa United States ni le matikweni man’wana ya 13 ti tile ti ta pfuneta eka ntirho wa xilamulela-mhangu ni le ku pfuxeni ka tindlu leti hahlukeke. Sweswo swi kombise leswaku rirhandzu ra Vukreste ri ni matimba ku tlula swidzedze.—1 Vakorinto 13:1-8.
Vatirhi vo tirhandzela va pfuxe tindlu to tlula 5 600 ta vapfumeri-kulobye ni Tiholo ta Mfumo ta 90, ku nga tindhawu leti Timbhoni ta Yehovha ti hlanganyelaka eka tona. Tinhlayo leti ti komba leswaku ku pfuxiwe miako hinkwayo leyi a yi onhakile. Hi ku pfumelelana na Vagalatiya 6:10, leyi khutazaka Vakreste leswaku ‘va endlela hinkwavo leswi nga swinene,’ Timbhoni ta Yehovha ti pfune ni vanhu vo tala lava nga riki Timbhoni.
KU HLANGANYELA entirhweni wo phalala a swi lava leswaku munhu a titsona swo karhi; nilokoswiritano vuyelo bya kona a byi tele. Xiya leswi vuriweke hi Timbhoni ta nkombo leti a ti langutela mintirho yo hambana-hambana yo phalala.
“Nchumu Wo Tsakisa Swinene eVuton’wini Bya Mina”
Robert: Ku tirha eka komiti ya mphalalo ku ve nchumu wo tsakisa swinene evuton’wini bya mina. Ndzi ni malembe ya 67, naswona hi mina lonkulu hi vukhale eka swirho swa komiti. A ndzi tirha ni ntlawa wa vatirhi vo tirhandzela lava a va katsa ni vana vo tala lava nga Timbhoni lava hisekaka evandlheni. Swa khutaza swinene ku vona vana va kombisa leswaku va rhandza Yehovha ni Vakreste-kulobye ku nga ri timhaka ta vona vini!
Nkatanga, Veronica na yena u ndzi pfune ngopfu. Leswaku hi ta kota ku ya pfuna entirhweni wo phalala u pfumelelane ni xiboho xa mina xo tshika ntirho lowu se a ndzi ri ni malembe yo tlula 40 ndzi wu endla. Sweswi hi tirha ku basisa tihofisi kan’we hi vhiki nivusiku. Hi dyondze ku hanya hi swimalana leswaku hi hanya vutomi byo olova. Ku tirha ni vanhu lava lavaka ku tsakisa Yehovha swi hi pfunile leswaku hi swi twisisa hi ku helela leswi swi vulaka swona ku rhangisa Mfumo wa Xikwembu evuton’wini. (Matewu 6:33) Hi swi vone hi ku phindha-phindha leswaku Yehovha wa va khathalela vanhu vakwe.
Frank: Ndzi langutela ndzawulo leyi swekaka swakudya endhawini yo hlela mphalalo edorobeni ra le Baton Rouge. Eku sunguleni, a hi tirha tiawara ta khume ku ya eka 12 hi siku, masiku ya nkombo hi vhiki leswaku hi phamela vatirhi vo tirhandzela. Mikateko ya kona a yi tele, ku katsa ni ku tivonela hi mahlo ya mina ndlela leyi Vakreste va rhandzanaka ha yona.
Vatirhi vo tala lava pfuneke eka ndzawulo ya swakudya ku ringana vhiki kumbe ku tlula, va kombele ku tlhela va vuya va ta pfuna, naswona van’wana va tsale tiposkarata ni ku ba tinqingho va phofula ndlela leyi va ri tlangelaka ha yona lunghelo ro hoxa xandla. Mina ni nkatanga Veronica, swi hi tsakise ngopfu loko va navela ku ta pfuna hi timbilu ta vona hinkwato.
A Ndzi Nga Si Tshama Ndzi Vona Swo Fana Ni Leswi
Gregory: Mina ni nkatanga Kathy, hi xavise yindlu ya hina leyi a yi ri eLas Vegas le Nevada, kutani hi xava xilorana swin’we ni kharavhani, leyi veke kaya ra hina. Ku hanya vutomi byo olova swi hi pfune leswaku hi endla ntirho wo phalala eLouisiana ku tlula malembe mambirhi. Ku tlula rini na rini evuton’wini bya hina, hi vona ku hetiseka ka marito lama kumekaka eBibeleni eka Malakiya 3:10 leyi nge: “‘Ndzi kombela mi ndzi ringa, . . . ’ Yehovha wa mavuthu u vurile, ‘mi vona loko ndzi ta ka ndzi nga mi pfuleli tinyangwa ta ndhambhi ya matilo kutani ndzi mi chululela nkateko, kukondza ku nga ha pfumaleki nchumu.’”
Minkarhi hinkwayo ha tsaka loko vanhu va ku, “Lowu hi wona moya wo tinyiketela!” Eka malembe ya 30 lama hundzeke, mina ni nkatanga Kathy a hi lava ku ya tirha ehofisini ya Timbhoni ta Yehovha le United States, kambe a hi ri ni vana lava a hi fanele hi va kurisa. Ku tirha entirhweni wo phalala swi enerise ku navela ka hina ku endla swo tala entirhweni wa Xikwembu. Lunghelo rin’wana a ku ri ku tirha ni Vakreste-kulorhi lava van’wana va vona va nga ni vutshila. Hi xikombiso, un’wana wa lava tirhaka ku sweka swakudya a a tirha exitolo lexinene lexi xavisaka swakudya swo swekiwa, kasi un’wana wa vona u tshame a swekela vaungameri vambirhi va le United States.
Eka vatirhi vo tala vo tirhandzela, ku tirha entirhweni wo phalala swi va pfune leswaku va cinca vutomi bya vona. Wanuna un’wana wa malembe ya 57, a a twa ni miri wakwe wu chava loko a hlamusela leswi a swi endleke loko a ri karhi a pfuna vanhu lava hlaseriweke hi xidzedze. Timbhoni tin’wana leti nga swi kotangiki ku ta pfuna na tona ti hi khutazile swinene. Hi xikombiso, vatirhi vambirhi vo tirhandzela lava a va tirha ku basisa miako loko yi ngheniwe hi mati va hi nyike lapi lerikulu leri vamakwerhu ku katsa ni vana va le mavandlheni manharhu ya le Nebraska lomu vatirhi volavo a va huma kona a va tsale mavito ya vona eka rona.
‘Hi Vone Nkhathalelo Wa Xikwembu Eka Vanhu Lava Xanisekaka’
Wendell: Hi xa mundzuku xa kona endzhaku ka loko xidzedze xa Katrina xi hlaserile, hofisi ya le United States yi ndzi kombele leswaku ndzi ya kambela Tiholo ta Mfumo ta Timbhoni ta Yehovha ni makaya lama onhakeke eLouisiana ni le Mississippi. Ntirho lowu veke xiavelo xa mina ni riendzo ra mina swi sungurise xisweswo. Leswi mina ni nkatanga Janine hi nga tshama malembe ya 32 endhawini leyi a yi ri ni xilaveko lexikulu xa vahuweleri va Mfumo, hi vone ndlela leyi Yehovha a va khathalelaka ha yona vanhu vakwe. Kambe sweswi hi yi vone hi ndlela leyikulu ndlela leyi Xikwembu xi va khathalelaka ha yona.
Ndzi ni lunghelo ro va mutshama-xitulu eka komiti ya mphalalo eBaton Rouge. Hambileswi xiavelo lexi xi tikaka, xa ndzi tsakisa. Minkarhi yo tala komiti ya hina yi swi vonile loko Xikwembu xi tlhantlha swiphiqo, xi pfula tindlela ni ku khathalela vanhu lava xanisekaka, ku nga leswi nga endliwaka ntsena hi Tatana wa Matimba Hinkwawo.
Vo tala va hi vutisile va ku, “Wena ni nsati wa wena se mi ni malembe yo tlula mambirhi mi tirha entirhweni wo phalala, xana mi swi kotisa ku yini sweswo?” A swi nga olovi minkarhi hinkwayo. Hi boheke ku cinca swo tala evuton’wini bya hina. Kambe hi vone vuyelo lebyinene bya ku va ni ‘tihlo ro olova.’—Matewu 6:22.
Loko hi endla tsima ra hina ro sungula ro ya lavana ni vanhu lava poneke xidzedze eNew Orleans, a hi nga etleli. Leswi a swi tikisa timhaka hileswi doroba rero a ri rindziwa hi masocha hikwalaho ka mpfilumpfilu lowu a wu ri kona lomu tindleleni. Munhu a a ta pfilunganyeka hi ku olova hi ntirho lowukulu lowu a hi langutane na wona.
Hi hlangane ni Timbhoni ta magidi leti hlaseriweke hi xidzedze. Hi khongele na tona hi tlhela hi ringeta ku ti chavelela. Kutani, hi ku pfuniwa hi Yehovha hi sungule ku tirha. Malembe wolawo mambirhi a ma tika swinene.
Nkarhi hinkwawo loko ndzi ehleketa leswaku ndzi karhale ku tlula na mpimo lerova a ndzi nge he swi koti ku ya emahlweni ni ntirho, a ku ta vatirhi van’wana vo tirhandzela, van’wana a va fika va tirha tin’hweti to hlayanyana van’wana va tirha nkarhi wo leha. A hi kuma matimba yo ya emahlweni ni ntirho loko hi vona vanhu vo tala, lava katsaka ni vantshwa vo tala, lava tsakeke ni lava tiyimiseleke ku hi pfuna.
Minkarhi yo tala Yehovha a a hi pfuna. Hi xikombiso, loko ha ha ku fika hi kume leswaku ku ni tiyindlu to tlula 1 000 ta vamakwerhu leti weriweke hi mirhi. Leswi a hi nga ri na lexi hi nga yi susaka ha xona ni vatirhi lava nga endlaka ntirho wolowo lowu nga ni khombo, komiti ya hina yi khongele hi mhaka leyi. Hi siku leri landzelaka, makwerhu la nga ni lori ni switirho leswi lavekaka u tile a ta hi pfuna. Siku rin’wana xikhongelo xa hina xi hlamuriwe endzhaku ka timinete ta 15, kasi siku rin’wana hi te loko ha ha khongela hi kombela xitirho xo karhi, hiloko xi fika hi nga si heta ni ku khongela! Hakunene, Yehovha u tikombise a ri “Mutwi wa xikhongelo.”—Pisalema 65:2.
“Ndza Tinyungubyisa Hi Ku Va Mbhoni Ya Yehovha”
Matthew: Eka siku leri landzeleke xidzedze xa Katrina, ndzi kote ku pfuneta eku hleleni ka swakudya leswi nyikeriweke, mati ni swin’wana leswi lavekaka swa tithani ta 15 leswaku swi yisiwa endhawini leyi hlaseriweke. Vanhu va Yehovha va swi kombisile leswaku va hanana swinene!
Mina ni nkatanga Darline hi rhurhele ekusuhi ni ndhawu leyi hlaseriweke leswaku hi ta kota ku pfuna swinene. Mbhoni yin’wana ya kwalaho yi hi nyike ntirho wo tihanyisa wa nkarhinyana leswaku hi kota ku heta nkarhi wa hina wo tala hi ri entirhweni wo phalala. Mbhoni yin’wanyana yi hi nyike ndhawu yo tshama eka yona. Ndza tinyungubyisa hi ku va Mbhoni ya Yehovha ni leswi ndzi nga xiphemu xa vamakwerhu lava rhandzanaka swinene.
Ted: Endzhakunyana ka Xidzedze xa Katrina, mina ni nkatanga Debbie hi tinyiketele ku ya pfuna entirhweni wo phalala. Endzhaku ka masiku ma nga ri mangani, ndzi kume kharavhani yo leha timitara ta kaye leyi movha wa hina a wu ta kota ku yi koka naswona a yi chipisiwile—a hi ta kota ku yi xava naswona leswi a ku ri nhlamulo ya swikhongelo swa hina. Se hi ni malembe yo tlula mambirhi hi tshama eka kharavhani leyi.
Loko ha ha yimilenyana entirhweni lowu hi xavise yindlu ya hina ni swilo swo tala swa hina, naswona leswi swi endle leswaku hi kota ku endla ntirho wo tala le New Orleans, laha ndzi tirhaka tanihi muungameri wa tsima ro phalala. Nchumu wa nkoka swinene ku ve ku vona ndlela leyi Yehovha a veke “Xikwembu xa nchavelelo hinkwawo” eka vagandzeri va yena ha yona. Vo tala va lahlekeriwe hi makaya ya vona ni Tiholo ta Mfumo, naswona hikwalaho ko rhurhisiwa endhawini leyi hlaseriweke, va lahlekeriwe ni hi mavandlha ya vona ni nsimu leyi a va chumayela mahungu lamanene eka yona.—2 Vakorinto 1:3.
‘Ripfumelo Ra Vona Ri Hi Tsakisile’
Justin: Hi October 2005 ku rhambiwe vatirhi vo tirhandzela leswaku va ta pfuna entirhweni wo phalala le Gulf Coast. Mina ni nkatanga Tiffany, hi hatlise hi nghenisa tifomo ta hina naswona hi February 2006, hi vitaniwile leswaku hi ya pfuna ntlawa lowu fulelaka lowu a wu ri endhawini yo hlela mphalalo eKenner ekusuhi ni le New Orleans.
Siku rin’wana ni rin’wana a hi tirha eka yindlu yo karhi naswona a hi hlangana ni Timbhoni ta kwalaho leti ripfumelo ra tona ni ku tshembela ka tona eka Xikwembu swi hi tsakiseke. Siku ni siku sweswo a swi hi dyondzisa leswaku i vuphukuphuku ku tshemba rifuwo. Ntsako lowu veke kona hikwalaho ko vona leswi Yehovha a pfuneke vanhu vakwe leswaku va swi endla ni ku pfuna Vakreste-kulobye a wu hlamuseleki.
[Bokisi/Xifaniso lexi nga eka tluka 18]
Leswi Siku Ra Vaphalari Ri Fambisaka Xiswona
Lava tirhaka exitangeni xa laha ku hleriwaka kona mphalalo, va sungula ntirho hi 4:30 nimixo. Hi 7:00 nimixo vatirhi hinkwavo va hlengeletana laha ku dyeriwaka kona kutani ku kambisisiwa ndzimana ya le Bibeleni ku ringana timinete ta khume ku nga si fihluriwa. Mutshama-xitulu a nga ha tlhela a amukela lava ha ku sungulaka ku tirha kwalaho ni ku rungula ntokoto lowu khutazaka lowu wa ha ku humelelaka.
Endzhaku ka xikhongelo, hinkwavo va tiphina hi swakudya swo xawula swo fihlula ivi va famba va ya endla mintirho leyi va averiweke yona. Van’wana va tshama endhawini yo hlela mphalalo, kumbexana va tirha etihofisini, evuhlantswelweni kumbe exitangeni. Vasweki va lunghiselela swakudya swa ninhlikanhi leswi landziwaka hi vayimeri va ntlawa ha wun’we wa vatirhi.
Madyambu man’wana ni man’wana hi Musumbhunuku, vatirhi va hlengeletana va va ni dyondzo ya “ndyangu” leyi sekeriweke eBibeleni leyi kumekaka eka magazini wa Xihondzo xo Rindza, lexi kandziyisiwaka hi Timbhoni ta Yehovha. Tidyondzo toleto ti pfuna hinkwavo leswaku va aka vuxaka bya vona ni Xikwembu—xolexo hi xona xihundla xo tiyisela hi ntsako ni ku va munhu a teka ntirho wa yena hi ndlela leyinene.—Matewu 4:4; 5:3.
[Bokisi leri nga eka tluka 19]
“A Ndzi Mi Teka Mi Ri Vanhu Vo Biha”
Wansati un’wana le New Orleans a a veke mfungho enyangweni ya yindlu ya yena lowu nge: “Timbhoni ta Yehovha—Mi Nga Ngheni.” Hiloko siku rin’wana vaphalari va sungula ku lunghisa yindlu leyi hahluriweke hi xidzedze ekusuhi ni kaya rakwe. Siku ni siku u xiye ndlela leyi vatirhi volavo va nga ni rirhandzu ni xinghana ha yona. Leswi a a navela ku tiva leswaku ku humelela yini u tirhwarile a ya tivonela hi yexe. Loko a kuma leswaku vatirhi volavo i Timbhoni ta Yehovha, u vule leswaku ku hava ni un’we wa kereke ya yena la nga tikarhata a n’wi bela riqingho endzhaku ka xidzedze. U te: “A ndzi mi teka mi ri vanhu vo biha.” Byi ve byihi vuyelo bya kona? U suse mfungho lowu a a wu vekile ekaya rakwe, kutani a kombela Timbhoni leswaku ti n’wi endzela.
[Xifaniso lexi nga eka tluka 16, 17]
Robert na Veronica
[Xifaniso lexi nga eka tluka 16, 17]
Frank na Veronica
[Xifaniso lexi nga eka tluka 17]
Gregory na Kathy
[Xifaniso lexi nga eka tluka 17]
Wendell na Janine
[Xifaniso lexi nga eka tluka 18]
Matthew na Darline
[Xifaniso lexi nga eka tluka 18]
Ted na Debbie
[Xifaniso lexi nga eka tluka 18]
Justin na Tiffany