Hi Nga Wu Kuma Kwihi Nkongomiso Lowunene?
I MANI loyi a nga hi kongomisaka leswaku vutomi byi hi fambela kahle—kambe ku nga ri leswaku byi hi fambela kahle loko hi fuwile? Hilaha swi hlamuseriweke hakona exihlokweni lexi hundzeke, leswaku vutomi byi ku fambela kahle, swi lava leswaku u landzela milawu ya mahanyelo leyi kongomisaka ku nga ri swilo leswi titshegeke hi ndhuma, rifuwo kumbe vulawuri byo karhi.
Xana hi nga yi kuma kwihi milawu leyinene leyi kongomisaka ni tinhlamulo ta swivutiso swa xikongomelo xa vutomi? Xana hi nga ti kuma eka hina vini? Ntiyiso wa mhaka hileswaku hina vanhu lava nga hetisekangiki hi ni ku navela ko biha loku nga hi vangelaka ku endla swiboho leswi mundzuku hi nga ta tisola ha swona. (Genesa 8:21) Hikwalaho timiliyoni ta vanhu ta ha ya emahlweni ti hlotana ni swilo leswi nga pfuniki nchumu, leswi Bibele yi swi vitanaka “ku navela ka nyama ni ku navela ka mahlo ni ku bombisa rifuwo ra munhu ra vutomi.” (1 Yohane 2:16) Swilo sweswo swi endla leswaku vanhu va anakanya leswaku swilo swi va fambela kahle ivi swi hetelela swi va khomise tingana ni ku va tekela ntsakonyana lowu a va ri na wona. A swi hlamarisi leswi vanhu vo tala va lavaka nkongomiso eka Muvumbi wa hina leswaku va kuma tinhlamulo ta swivutiso swa nkoka evuton’wini.a
Xana Hi Fanele Hi Lava Nkongomiso Eka Xikwembu?
Ha yini swi ri swinene ku lava nkongomiso eka Muvumbi wa hina? Wa swi tiva leswaku ha yini a hi vumbile nileswaku xikongomelo xa vutomi bya hina xi fanele xi va xihi. Wa yi tiva ni ndlela leyi a nga hi vumba ha yona, u tiva xivumbeko, mianakanyo ni ndlela leyi hi titwaka ha yona. Kutani Xikwembu xi yi tiva kahle milawu leyi kongomisaka leyi vanhu va faneleke va hanya ha yona. Ku tlula kwalaho, Xikwembu i xikombiso lexikulu xa rirhandzu, kutani xi lava leswaku na hina hi tsaka naswona vutomi byi hi fambela kahle. (1 Yohane 4:8) Hi nga wu kuma kwihi nkongomiso wa xona wa rirhandzu? Hi nga wu kuma eBibeleni yo Kwetsima leyi Xikwembu xi nga hi lunghiselela yona hi ku tirhisa vavanuna kumbe vamatsalana va 40.b (2 Timotiya 3:16, 17) Kambe, hi nga wu tshemba njhani nkongomiso lowu kumekaka ebukwini yoleyo?
Yesu Kreste, muyimeri lonkulu wa Xikwembu u vule leswaku “vutlhari byi kombisiwa byi ri lebyi lulameke hi mintirho ya byona” kumbe hi vuyelo bya byona. (Matewu 11:19; Yohane 7:29) Vutlhari lebyi sekeriweke eka milawu ya Xikwembu leyi kongomisaka byi hi pfuna leswaku swilo swi hi fambela kahle naswona hi va ni ntsako lowu nga heriki, ku nga “ndlela hinkwayo ya leswinene,” kasi vutlhari bya vanhu lebyi honisaka Xikwembu byi endla leswaku swilo swi nga fambi kahle naswona a byi tisi ntsako.—Swivuriso 2:8, 9; Yeremiya 8:9.
Ehleketa hi nguva ya vanhu lava a va tivitana mahipi emalembeni ya va-1960. Leswi a ma nga wu landzeli nkongomiso wa mahanyelo ni vulawuri bya vanhu lavakulu, mahipi yo tala a ma kucetela vanhu ku tirhisa swidzidziharisi, ku hanyela siku ra namuntlha ntsena ni ku va ni vuxaka bya rimbewu ni munhu wihi na wihi loyi u lavaka ku etlela na yena. Kambe xana a ku ri vutlhari ku hanya hi ndlela yoleyo? Xana mahanyelo yo tano a ma nyika vanhu xikongomelo xa vutomi ni milawu leyi a va fanele va hanya ha yona leyi a yi ta va nyika ku rhula ni ntsako lowu nga heriki? Matimu ma kombisa leswaku ndlela yoleyo a yi va pfunanga leswaku vutomi byi va fambela kahle, kambe yi lo ya yi nyanyisa manyala lawa ma endliwaka hi vanhu.—2 Timotiya 3:1-5.
Minkarhi hinkwayo vutlhari bya le Bibeleni byi tikombe byi pfuna, ku hambana ni tifilosofi ta vanhu. (Esaya 40:8) Loko u hlaya xihloko lexi landzelaka, u ta swi vona leswaku ha yini byi pfuna, hikuva xi vulavula hi milawu ya tsevu ya Bibele leyi kongomisaka leyi pfuneke vanhu va timiliyoni lava humaka ematikweni hinkwawo leswaku va tsaka hakunene naswona vutomi byi va fambela kahle, ku nga khathariseki xiyimo xa vona xa timali kumbe xikhundlha xa vona.
[Tinhlamuselo ta le hansi]
a Vona bokisi leri nge “Mavunwa Ya Leswaku Vutomi A Byi Na Xikongomelo.”
b Vona magazini wo hlawuleka wa Xalamuka! wa November 2007 lowu nga ni nhloko-mhaka leyi nge “Xana Leswi Bibele Yi Swi Vulaka I Ntiyiso?” Swihloko leswi nga enkandziyisweni wolowo swi hlamusela leswi vayimburi, matimu, sayense ni vumbhoni byin’wana byi swi kombisaka leswaku hakunene Bibele yi huhuteriwe hi Xikwembu.
[Bokisi leri nga eka tluka 5]
MAVUNWA YA LESWAKU VUTOMI A BYI NA XIKONGOMELO
Vanhu vo tala va vula leswaku a ku na Xikwembu ni leswaku hi ve kona hikwalaho ka hundzuluko. Loko lowu a wu ri ntiyiso, vutomi a byi ta va byi nga ri na xikongomelo, naswona ku lavisisa ka hina xikongomelo xa vutomi ni milawu ya Bibele leyi kongomisaka a swi nga ta hi pfuna nchumu.
Van’wana va anakanya leswaku Xikwembu xi hi vumbile ivi xi hi lan’wa. Hi marito man’wana va vula leswaku a hi na vuxaka ni Xikwembu, naswona hambi ho lava ku va ni xikongomelo evuton’wini a swi nge hi oloveli. Xiya mhaka leyi: Xikwembu xi nyike swiharhi vutlhari bya ntumbuluko leswaku swi hetisisa xikongomelo lexi swi tumbuluxeriweke xona. Hikwalaho ntumbuluko hinkwawo wu kombisa vutlhari bya Xikwembu lebyikulu. Xana Muvumbi yoloye a a ta hi vumba ivi a hi tshika hi nga ri na nkongomiso? Nikatsongo!—Varhoma 1:19, 20.
Loko tifilosofi ta vanhu lava nga pfumeriki leswaku Xikwembu xi kona ti vula leswaku ku lavisisa ka hina xikongomelo xa vutomi a swi pfuni nchumu, ti vula leswaku munhu swi nga n’wi fambela kahle evuton’wini loko a ri ni rifuwo kumbe a fikelela tipakani ta yena ta swilo swa misava leyi.
[Xifaniso lexi nga eka tluka 5]
Vutlhari Bya Le Bibeleni Byi Tikombise Byi Ri Lebyi Pfunaka Hikwalaho Ka Vuyelo Bya Byona