Ndlela Leyi Phaphatana Ri Tivaka Lomu Ri Yaka Kona Ha Yona

Xana Yi Lo Tiendlekela?

◼ Hi ku tirhisa byongo lebyi ringanaka ni nomu wa xitsalo, phaphatana lerikulu ri kota ku haha tikhilomitara ta 3 000 ku suka eCanada ri ya exikhwatanini xa le Mexico. Xana xitsotswana lexi xi yi tiva njhani ndlela?

Xiya: Maphaphatana ma ni xikomba ndhawu lexi tirhisaka miseve ya dyambu lexi kombaka ndhawu hi ku ya hi leswaku dyambu ri le kwihi. Kambe ku ni nchumu wun’wana. Nakambe maphaphatana lawa ma tswariwa ma ri ni nchumu wun’wana lowu endlaka leswaku ma kota ku endla mindzulamiso eka ndlela leyi miseve ya dyambu yi fambaka ha yona. Dok. Steven Reppert, mutivi wa ta miri wa vanhu ni wa swiharhi u vula leswaku maphaphatana lamakulu “ma ni ndlela yo hambana swinene yo vona nkarhi ku tlula switsotswana leswin’wana ni swiharhi leswi ku endliweke nkambisiso eka swona.”

Ku dyondza swo tala hi ta ndlela leyi phaphatana leri ri tivaka nkarhi ha yona swi nga ha pfuna van’wasayense ku dyondza swo tala hi ta ndlela leyi vanhu va wu tivaka ha yona nkarhi ku katsa ni swiharhi. Swi nga tlhela swi endla leswaku ku kumiwa tindlela letintshwa to tshungula mavabyi ya byongo ni longo. Reppert u ri: “Ndzi lava ku twisisa ndlela leyi byongo byi amukelaka ni ku tirhisa rungula malunghana ni nkarhi ni ndhawu ha yona naswona phaphatana lerikulu i xikombiso lexi hlamarisaka.”

U anakanya yini? Xana ndlela leyi phaphatana lerikulu ri tivaka ha yona lomu ri yaka kona yi lo tiendlekela? Kumbe i vumbhoni bya leswaku yi endliwe hi Muvumbi wo tlhariha?

[Dayagramu/Mepe lowu nga eka tluka 10]

(Leswaku u vona rungula leri hleriweke hi ku helela, vona nkandziyiso wa kona)

Phaphatana lerikulu ri kota ku haha tikhilomitara ta 3 000 ku suka eCanada ri ya exikhwatanini xa le Mexico

[Mepe]

CANADA

UNITED STATES OF AMERICA

MEXICO

DOROBA RA MEXICO

[Laha Xifaniso Xi Humaka Kona eka tluka 10]

Background: © Fritz Poelking/age fotostock