Xana U Tshikilelekile?

EMISAVENI hinkwayo, vanhu swa va tikela swinene ku ringanisela nkarhi lowu va wu hetaka entirhweni ni le kaya. Hilaha buku yin’wana yi vulaka hakona, ‘ku tirhisana ka tikhampani ematikweni yo hambana-hambana, switirhisiwa leswintshwa swa thekinoloji ni tikhampani leti lavaka ku bindzula tiawara ta 24 vhiki na vhiki, swi endle leswaku vanhu va nga ha swi koti ku hambanisa exikarhi ka nkarhi lowu va faneleke va wu heta entirhweni ni le makaya.’ Ku cinca koloko ku endle leswaku ku va ni rifuwo leri nga si tshamaka ri va kona emisaveni. Kambe rifuwo rero ri tisele vanhu swiphiqo. Mutsari un’wana u te: “Vo tala va hina hi tirha ku tlula mpimo naswona hi ni mintirho yo tala leyi hi faneleke hi yi endla. Hi tshikilelekile.”

Handle ka swiphiqo sweswo, vanhu va hele matimba hikwalaho ka vuyelo bya ku wa ka ikhonomi ka sweswinyana. Emisaveni hinkwayo, vatirhi lava endlaka ntirho wa mavoko ni lava tirhaka etihofisini, va lahlekeriwe hi mintirho ni hi makaya ya vona. Swi nga ha endleka leswaku va tisola leswaku a va fanele va tirhe hi matimba swinene.

A hi kambisiseni ndlela leyi swiphiqo leswi swi andzeke ha yona:

▶ Vatirhi va tsevu eka va khume va le Yuropa va tshikilelekile entirhweni.

▶ Mutirhi un’we eka vanharhu wa le United States wa vabya hikwalaho ko tirha ku tlula mpimo.

▶ Vanhu vambirhi eka vanharhu va le Canada swa va tikela ku ringanisela nkarhi lowu va wu hetaka emindyangwini ya vona ni le ntirhweni.

▶ Ku ringanyetiwe leswaku vatirhi lava tlulaka 600 wa timiliyoni, kumbe 22 wa tiphesente ta vatirhi emisaveni hinkwayo, va tirha tiawara to tlula 48 hi vhiki.

Tinhlayo leti ti kombisa khombo lerikulu leri welaka vanhu. Minkambisiso yin’wana yi kume leswaku loko vanhu va tirha tiawara to tala ni leti nga tolovelekangiki va nga khomiwa hi mavabyi man’wana, vuxaka bya vona ni van’wana byi nga onhaka, a va nge vi vatswari lavanene, va nga thalana naswona va nga dlaya vukati.

Ku vuriwa yini hi wena? Xana u tirha ku vava? Xana na wena u un’wana wa vanhu va timiliyoni lava sweswi va nga tirhiki? Xana u navela ku ringanisela nkarhi lowu u wu hetaka entirhweni ni le kaya? Loko u swi navela, u nga swi kotisa ku yini?

[Bokisi/Xifaniso lexi nga eka tluka 3]

“NTIRHO WA VUMBIRHI”

Wansati un’wana la tirhaka u ri: “Loko ndzi vuya ekaya, ndzi fanele ndzi lunghiselela swakudya swo lalela, ndzi basisa yindlu, ndzi hlantswa swiambalo, ndzi landza vana laha va tlangaka kona siku ni siku, ndzi va pfuna ku endla ntirho wa xikolo, ndzi va hlambisa ni ku va yisa eku etleleni. Loko ndzi heta ku endla sweswo ndzi va ndzi karhele ngopfu.” Ku ringanyetiwa leswaku ku ni vavasati va 1,2 wa tibiliyoni lava tirhaka, kambe eka nhlayo yoleyo ku ni va timiliyoni lava endlaka ‘ntirho lowu wa vumbirhi,’ ku fana ni vavanuna vo tala. Hambiswiritano, minkambisiso yi komba leswaku vavanuna va ala ku endla mintirho ya le kaya. Vavasati hakanyingi va endla yo tala ya mintirho leyi, ku nga khathariseki leswaku va tirha kumbe a va tirhi.