Ndzima 12
Leswi Nkhuvulo Wa Wena Wu Vulaka Swona
1, 2. (a) Ha yini nkhuvulo wa mati wu fanele wu khumba un’wana ni un’wana wa hina? (b) Hi ku komisa, xana u nga swi hlamula njhani swivutiso leswi kombisiweke eka ndzimana 2?
HI LEMBE ra 29 C.E., Yesu u nyuperisiwe eNambyeni wa Yordani. Yehovha hi byakwe a a langutile naswona u vule marito ya ku n’wi amukela. (Mt. 3:16, 17) Endzhaku ka malembe manharhu ni hafu, loko a pfuxiwile, Yesu u nyike vadyondzisiwa va yena swiletelo, a ku: “Ndzi nyikiwile vuhosi hinkwabyo etilweni ni la misaveni, hikokwalaho, yanani eka vamatiko hinkwavo, mi va endla vadyondzisiwa va mina, mi va khuvula.” (Mt. 28:18, 19) Xana wena u khuvuriwe hi ku pfumelelana ni leswi Yesu a swi vuleke laha? Kumbe xana u lunghiselela ku endla sweswo?
2 Eka swiyimo leswi haswimbirhi, ku twisisa nkhuvulo kahle i swa nkoka. Swivutiso leswi lavaka ku kambisisiwa swi katsa leswi: Xana nkhuvulo wa Vakreste namuntlha wu fana ni wa Yesu? Xana xin’wana ni xin’wana lexi Bibele yi xi vulaka hi nkhuvulo xa tirha eka wena? Xana ku hanya hi ku pfumelelana ni leswi nkhuvulo wa mati wa Vukreste wu vulaka swona, swi vula yini?
MINKHUVULO LEYI ENDLIWEKE HI YOHANE
3. Xana nkhuvulo wa Yohane a wu tirha eka vamani?
3 Eka tin’hweti ta kwalomu ka tsevu Yesu a nga si khuvuriwa, Yohane Mukhuvuri u ye emananga ya Yudiya, a chumayela a ku: “Hundzukani, hikuva Mfumo wa matilo wu le kusuhi.” (Mt. 3:1, 2) Vanhu lava tshamaka emugangeni wolowo hinkwawo va twe leswi Yohane a nga swi vula, va tivule swidyoho swa vona erivaleni ivi a va khuvula eYordani. Nkhuvulo wolowo a wu ri wa Vayuda.—Mint. 13:23, 24; Lk. 1:13-16.
4. (a) Ha yini Vayuda a va fanele va hundzuka hi ku hatlisa? (b) Xana a ku laveka yini leswaku va papalata ku ‘khuvuriwa hi ndzilo’?
4 Vayuda volavo a va fanele va hundzuka hi ku hatlisa. Elembeni ra 1513 B.C.E. eNtshaveni ya Sinayi, vakokwa wa vona a va endle ntwanano na Yehovha Xikwembu tanihi tiko. Kambe a va byi hlayisanga vutihlamuleri bya vona ehansi ka ntwanano wolowo kutani va vuriwe vadyohi. Xiyimo xa vona a xi bihile. “Siku ra Yehova . . . lerikulu, le’ri tšhav̌isaka” leri vhumbhiweke hi Malakiya a ri ri kusuhi, naswona hi 70 C.E. ri wele Yerusalema, hi ndzoviso wa xihatla. Yohane Mukhuvuri, hi ku hisekela vugandzeri bya ntiyiso ku kotisa Eliya, u rhumiwe emahlweni ka ndzoviso wolowo “leswaku a lunghisela [Yehovha] tiko leri lulameke.” A va fanele ku hundzuka eswidyohweni swa vona malunghana ni ntwanano wa Nawu naswona va tiyimisela embilwini ni le mianakanyweni leswaku va amukela N’wana wa Xikwembu, loyi Yehovha a a va rhumelela yena. (Mal. 4:4-6; Lk. 1:17; Mint. 19:4) Hi laha Yohane a hlamuseleke ha kona, N’wana wa Xikwembu a a ta khuvula hi moya lowo kwetsima (ku nga nkhuvulo lowu vadyondzisiwa vo tshembeka va khuvuriweke ha wona ro sungula hi Pentekosta ya 33 C.E.) ni hi ndzilo (lowu wu weleke vanhu lava nga hundzukiki wu va lovisa, hi 70 C.E.). (Lk. 3:16) Leswaku va nga weriwi hi ‘nkhuvulo wa ndzilo,’ Vayuda volavo va lembe xidzana ro sungula a va fanele va khuvuriwa hi mati va kombisa ku hundzuka ka vona, naswona a va fanele ku va vadyondzisiwa va Yesu Kreste loko va kuma nkarhi wa ku endla sweswo.
5. (a) Loko Yesu a ta a ta khuvuriwa, ha yini Yohane a kanakanile? (b) Ku khuvuriwa ka Yesu ematini a ku fanekisela yini? (c) Xana Yesu a tiyimisele ku fikela kwihi hi ku hetisisa ku rhandza ka Xikwembu?
5 Un’wana wa lava teke eka Yohane leswaku va khuvuriwa a ku ri Yesu hi byakwe. Kambe hikwalaho ka yini? Yohane a a swi tiva leswaku Yesu a nga ri na swona swidyoho leswi a nga ta swi vula, kutani u te: “Hi mina loyi a fanelaka ku khuvuriwa hi wena, kasi wena u ta eka mina!” Kambe nkhuvulo wa Yesu a wu ta kombisa swin’wana leswi hambaneke. Kutani u hlamurile: “Ndzi pfumelele sweswi, hikuva swa fanela leswaku hi hetisisa leswo lulama hinkwaswo hi ndlela leyi.” (Mt. 3:13-15) Nkhuvulo wa Yesu a wu nga ta kombisa ku hundzuka eswidyohweni; naswona a swi nga bohi leswaku a tinyiketela eka Xikwembu, hikuva a a ri xirho xa tiko leri ana se ri nyiketeriweke eka Yehovha. Kambe, nkhuvulo wa yena, loko a fika emalembeni ya 30 ya ku va munhu lonkulu hi Xiyuda, wu kombise ku tinyiketa kakwe eka Tata wa yena wa le tilweni leswaku a ya emahlweni a endla ku rhandza ka Yena. Ku rhandza ka Xikwembu hi “Kriste Yesu munhu wa xiviri,” a ku katsa ntirho wa Mfumo, kun’we ni gandzelo ra vutomi byakwe lebyi hetisekeke bya nyama, tanihi nkutsulo ni xisekelo xa ntwanano lowuntshwa. (Lk. 8:1; 17:20, 21; Hev. 10:5-10; Mt. 20:28; 26:28; 1 Tim. 2:5, 6) Yesu u swi teke swi ri swa nkoka leswi nkhuvulo lowu wa mati a wu kombisa swona. A nga pfumelanga ku hambukisiwa hi swilaveko swin’wana. Ku fikela emakun’wini ya vutomi byakwe u namarhele ku endla ku rhandza ka Xikwembu.—Yoh. 4:34.
NKHUVULO WA RIFU
6. Hi wihi nkhuvulo wun’wana lowu Yesu a wu kumeke naswona wu teke nkarhi wo tanihi kwihi?
6 Hi ku pfumelelana ni leswi a swi fanekiseriwa hi ku khuvuriwa ka Yesu ematini, u tlhele a khuvuriwa hi ndlela yin’wana. A a swi tiva leswaku xiavelo lexi a vekeriweke xona hi Xikwembu a xi ta n’wi vangela leswaku a nyikela vutomi byakwe bya nyama byi va gandzelo kambe a tlhela a pfuxiwa hi ndlela ya moya hi siku ra vunharhu. Leswi u swi hlamusele tanihi nkhuvulo. “Nkhuvulo” lowu wu sungule hi 29 C.E. kambe a wu nga si hela ku fikela loko a fa, a vuya a pfuxiwa. Kutani kwalomu ka malembe manharhu se a khuvuriwile ematini, u vule hi laha ku faneleke a ku: “Ndzi ni nkhuvulo lowu ndzi fanelaka ku khuvuriwa ha wona, kutani ndzi le ku karhatekeni lokukulu, ku kondza loko nkhuvulo lowu wu hetiseka.”—Lk. 12:50.
7. (a) I vamani van’wana lava kumaka nkhuvulo wa rifu? (b) I mani loyi a endlaka nkhuvulo lowu?
7 Lava va nga ta fuma na Kreste eMfun’weni wakwe wa le tilweni na vona va kuma nkhuvulo wa rifu. (Mar. 10:37-40; Kol. 2:12) Eku feni ka vona va siya vutomi bya vona bya nyama hi laha ku nga heriki, ku fana na Yesu. Naswona loko va pfuxiwa va hlangana na yena eku fumeni ka le tilweni. Lowu i nkhuvulo lowu nga endliwiki hi munhu wa nyama, kambe wu endliwa hi Xikwembu hi ku tirhisa N’wana wa xona wa le tilweni.
8. Xana ku ‘khuvuriwa ka vona nakambe eka Kreste Yesu’ ku vula yini?
8 Lava va kumaka nkhuvulo wa rifu wa Yesu na vona va vuriwa lava “khuvuleriweke eka Kriste Yesu.” Hi moya lowo kwetsima lowu taka ha Kreste va hlangana na yena, nhloko ya vona, tanihi swirho swa vandlha ra yena leri totiweke hi moya, “miri” wa yena. Hikwalaho ka leswi moya wolowo wu va pfunaka leswaku va kombisa vumunhu lebyi tlakukeke bya Kreste, ku nga vuriwa leswaku hinkwavo va va “[munhu] un’we eka Kriste Yesu.”—Rhom. 6:3-5; 1 Kor. 12:13; Gal. 3:27, 28; Mint. 2:32, 33.
NKHUVULO WA MATI WA VADYONDZISIWA VA VUKRESTE
9. (a) Xana nkhuvulo wa muxaka lowu kombisiweke eka Matewu 28:19 wu sungule rini? (b) Hi ku tirhisa swivutiso ni matsalwa lama nga eka ndzimana leyi, hlamusela leswi Yesu a a kombisa leswaku swi fanele ku lemukiwa hi lava khuvuriwaka.
9 Vadyondzisiwa va Yesu vo sungula va khuvuriwe ematini hi Yohane naswona endzhaku ka sweswo va yisiwe eka Yesu tanihi lava nga ta va swirho swa mutekiwa wakwe wa moya. (Yoh. 3:25-30) Hi ku kongomisiwa hi Yesu na vona va endle nkhuvulo wo karhi, lowu na wona wu fanaka ni nkhuvulo wa Yohane. (Yoh. 4:1-3) Hambi swi ri tano, ku sukela hi Pentekosta ya 33 C.E., va sungule ku hetisisa xiavelo xa ku khuvula “hi vito ra Tatana, ni ra N’wana, ni ra Moya lowo Kwetsima.” (Mt. 28:19) U ta pfuneka swinene loko wo kambisisa leswi sweswo swi vulaka swona, hi ku ya hi matsalwa lama kombisiweke eka swivutiso leswi landzelaka:
Loko a ta khuvuriwa “hi vito ra Tatana,” xana munhu u fanele a lemuka yini malunghana na Tatana? (2 Tih. 19:15; Ps. 3:8; 73:28; Esa. 6:3; Rhom. 15:6; Hev. 12:9; Yak. 1:17)
Ku khuvuriwa hi vito “ra N’wana” swi lava ku pfumela yini? (Mt. 16:16, 24; Flp. 2:9-11; Hev. 5:9, 10)
Xana munhu u fanele a pfumela yini leswaku a khuvuriwa hi vito ra “moya lowo Kwetsima”? (Lk. 11:13; Yoh. 14:16, 17; Mint. 1:8; 10:38; Gal. 5:22, 23; 2 Pet. 1:21)
10. (a) I yini lexi fanekiseriwaka hi nkhuvulo wa mati wa Vukreste namuntlha? (b) Xana wu hambana njhani ni nkhuvulo wa Yesu? (c) Loko vanhu lava fanelekaka hi ku ya hi Matsalwa va khuvuriwa, xana va hundzuka yini?
10 Vanhu vo rhanga lava khuvuriweke hi ku fambisana ni swiletelo sweswo leswi nyikeriweke hi Yesu a a ku ri Vayuda (ni vaproselita va Vayuda), lava tanihi tiko se a va tinyiketele eka Xikwembu, lava xi va khathaleleke hi ndlela yo hlawuleka ku fikela hi 36 C.E. Hambi swi ri tano, loko lunghelo ra ku va mudyondzisiwa wa Mukreste ri hundziseriwe eka Vasamariya ni Vamatiko, vona hi voxe va nga si khuvuriwa a va fanele ku tinyiketela hi ku helela eka Yehovha leswaku va n’wi tirhela tanihi vadyondzisiwa va N’wana wa yena. Eka vanhu hinkwavo, ku katsa ni Vayuda, leswi hi swona leswi nkhuvulo wa mati wa Vukreste wu vulaka swona, ku ta fikela namuntlha. ‘Nkhuvulo lowu wun’we’ wu tirha eka hinkwavo lava vaka Vakreste va ntiyiso. Xisweswo va hundzuka Timbhoni ta Yehovha ta Vakreste, vatirheli lava vekiweke hi Xikwembu.—Ef. 4:5; 2 Kor. 6:3, 4.
11. (a) Xana nkhuvulo wa mati wa Vukreste wu fana na yini, naswona njhani? (b) Xana Mukreste u ponisiwa eka yini hi ku endla sweswo?
11 Nkhuvulo wo tano i wa nkoka swinene emahlweni ka Xikwembu. Endzhaku ko hlamusela ku aka ka Nowa ngalava leyi yena ni ndyangu wakwe va hlayisiweke eka yona hi nkarhi wa Ndhambhi, muapostola Petro u yi hlamuserile mhaka leyi. U tsarile: “Nkhuvulo wu yelana ni mhaka leyi; sweswi wa mi ponisa, ku nga ri hi ku susa thyaka emirini, kambe hi ku endla leswaku mi kombela ripfalo leri tengeke eka Xikwembu. Nkhuvulo wa mi ponisa hi mhaka ya ku pfuka ka Yesu Kriste eku feni.” (1 Pet. 3:21) Ngalava a yi ri vumbhoni lebyi tiyeke bya leswaku Nowa a a tinyiketele ku endla ku rhandza ka Xikwembu naswona enkarhini wolowo, hi ku tshembeka u endle ntirho lowu a a averiwe wona hi Xikwembu. Leswi swi endle leswaku a hlayiseka. Hi ndlela leyi fanaka, lava va tinyiketelaka eka Yehovha hi ku pfumela eka Kreste la pfuxiweke, lava khuvuriweke hi ku kombisa ku pfumela ka vona ni lava yaka emahlweni va endla ku rhandza ka Xikwembu eka malandza ya xona namuntlha va pona misava leyi yo biha. (Gal. 1:3, 4) A va ha yi eku loveni kun’we ni misava hinkwayo. Va humesiwile eka yona naswona Xikwembu xi va nyike ripfalo leri tengeke.
KU HETISISA VUTIHLAMULERI BYA HINA
12. Ha yini ku khuvuriwa ku nga ri xona xitiyisekiso xa ku ponisiwa?
12 Ku nga va xihoxo ku vula leswaku ku va la khuvuriweke i xitiyisekiso xa leswaku u ta pona. I swa nkoka loko munhu hakunene a tinyiketele eka Yehovha ha Yesu Kreste ivi a endla ku rhandza ka Xikwembu, hi ku tshembeka ku ya fika emakumu.—Mt. 24:13.
13. (a) Xana hi kwihi ku rhandza ka Xikwembu malunghana ni ndlela leyi Vakreste lava khuvuriweke va tirhisaka vutomi bya vona ha yona? (b) Ku va mudyondzisiwa wa Mukreste ku fanele ku va ka nkoka ku fikela kwihi evuton’wini bya hina?
13 Ku rhandza ka Xikwembu eka Yesu, a ku hlanganisa ndlela leyi a a tirhisa vutomi byakwe ha yona tanihi munhu. A byi fanele byi nyiketeriwa eku feni byi va gandzelo. Eka hina mimiri yerhu yi fanele yi nyiketeriwa eka Xikwembu, hi ku hanya vutomi bya ku tinyiketela. Yi fanele yi tirhiseriwa ku endla ku rhandza ka Xikwembu. (Rhom. 12:1, 2) Entiyisweni a hi nge vuli leswaku hi tinyiketerile, loko nkarhi wun’wana, hi vomu hi tikhoma ku fana ni misava kumbe loko hi hanya hi ku hlongorisa swilo swa hina vini, kambe Xikwembu hi xi tirhela ku hetisisa nawu ntsena. (1 Pet. 4:1-3; 1 Yoh. 2:15-17) Loko Muyuda un’wana a vutise leswi a a fanele ku swi endla leswaku a kuma vutomi lebyi nga heriki, Yesu u n’wi tsundzuxe hi nkoka wa ku hanya vutomi lebyi tengeke, naswona u kombise xilaveko xa ku rhangisa mhaka ya ku va mudyondzisiwa wa Mukreste, ni ku va mulandzeri wa Yesu evuton’wini bya yena. A ku nga fanelanga ku ta endzhaku ka swilo leswi vonakaka.—Mt. 19:16-21.
14. (a) Hi byihi vutihlamuleri lebyi Vakreste hinkwavo va nga na byona mayelana ni Mfumo? (b) Hi laha swi kombisiweke ha kona eka tluka 101, hi tihi tindlela tin’wana letinene to endla ntirho lowu? (c) Loko hi endla ntirho wo tano hi mbilu hinkwayo, xana sweswo swi kombisa yini?
14 Nakambe hi fanele hi tsundzuka leswaku ku rhandza ka Xikwembu eka Yesu a ku katsa ntirho wo hlawuleka malunghana ni Mfumo. Yesu hi byakwe a a totiwe leswaku a va Hosi. Kambe loko a ha ri emisaveni a a ri mbhoni leyi hisekaka ya Mfumo wolowo. Na hina hi fanele ku endla ntirho lowu fanaka wa ku nyikela vumbhoni, naswona hi ni swivangelo swa ku wu endla hi mbilu hinkwayo. Hi ku endla tano hi kombisa ku tlangela ka hina vuhosi bya Yehovha ni ku rhandza vanhu-kulorhi. Nakambe hi kombisa leswaku hi ni vun’we ni vagandzeri-kulorhi emisaveni hinkwayo, lava hinkwavo ka vona va nga timbhoni ta Mfumo, hi ya emahlweni ku ya fika epakanini ya vutomi lebyi nga heriki exivandleni xa Mfumo wolowo.
BULO RO PFUXETA
● Hi kwihi ku fana ni ku hambana loku nga kona exikarhi ka nkhuvulo wa Yesu ni nkhuvulo wa mati namuntlha?
● Nkhuvulo wa Yohane a wu ri wa vamani? I vamani lava kumaka nkhuvulo wa rifu? Naswona i vamani lava ‘khuvuriwaka eka Kreste Yesu’?
● I yini leswi katsekaka eku hetisiseni ka vutihlamuleri bya nkhuvulo wa mati wa Vukreste?
[Bokisi/Swifaniso leswi nga eka tluka 101]
XANA MFUMO U WU HUWELELA HI TINDLELA TIHI?
Hi yindlu na yindlu
Hi ku vuyela u endzela lava tsakelaka
Eka tidyondzo ta le kaya ta Bibele
Eswitarateni
Eka vadyondzi-kuloni
Eka vatirhi-kuloni