Ndzima 3

Swilo Leswi Faneleke Ku Endleka Hi Ku Hatlisa

1. I yini lexi u faneleke u xi endla leswaku u pona loko Xikwembu xi tisa vuavanyisi bya xona emisaveni leyi?

U FANELE u karhateka swinene hi swilo leswi endlekaka emisaveni namuntlha. Ha yini? Hikuva misava leyi a yi nge poni loko Xikwembu xi tisa vuavanyisi bya xona. Kambe wena u nga pona. Ku pona ka wena ku titshege hi ku va u nga vi “xiphemu xa misava” leyi nga ta lovisiwa. Sweswo a swi vuli leswaku u fanele u titsona ntsako evuton’wini. Swi vula leswaku loko u ri karhi u tiphina hi vutomi, u nga ngheneli nikatsongo etimhakeni ta tipolitiki leti hombolokeke, u nga hlanganyeli etimhakeni ta mabindzu lama nga ni makwanga ni le ka vukhongeri lebyi onhaka vito ra Xikwembu swin’we ni le ka mahanyelo yo biha lama nga ni madzolonga. Hi nkarhi lowu fanaka u fanele u hanya hi milawu ya Xikwembu leyi tlakukeke, u lava ku endla ku rhandza ka xona. (Yohane 17:14-16; Sofaniya 2:2, 3; Nhlavutelo 21:8) Buku ya Bibele ya Nhlavutelo yi kombisa ndlela leyi swi nga swa nkoka ha yona ku tihambanisa ni swilo leswa ha ku boxiwaka, u teka magoza yo lulamisa lomu swi lavaka u lulamisa kona evuton’wini bya wena.

2. Xana muapostola Yohane u byi sungula hi ndlela yihi vuprofeta lebyi tsakisaka bya buku ya Nhlavutelo naswona Xikwembu xi ri nyike mani rungula leri ra nkoka?

² Muapostola Yohane u sungule vuprofeta bya yena lebyi tsakisaka hi marito lama nge: “Nhlavutelo ya Yesu Kreste, leyi a yi nyikiweke hi Xikwembu, leswaku a komba mahlonga yakwe swilo leswi faneleke ku endleka hi ku hatlisa.” (Nhlavutelo 1:1a) Swi vula leswaku Yesu Kreste hi yena la amukeleke rungula leri ra nkoka leri humaka eka Xikwembu. Ematshan’weni yo hlamuseriwa a ri xiphemu xa Vunharhu-un’we lebyi nga hlamuselekiki, Yesu u hlamuseriwa a ri la nge hansi ka Tata wa yena. Hi ndlela leyi fanaka, “mahlonga” lama vumbaka vandlha ra Vukreste ma le hansi ka Yesu Kreste, kutani ma ‘n’wi landzela ku nga khathariseki leswaku u ya kwihi.’ (Nhlavutelo 14:4; Vaefesa 5:24) Kambe, i vamani namuntlha lava nga “mahlonga” ya xiviri ya Xikwembu naswona rungula ra buku ya Nhlavutelo ri va vuyerisa hi ndlela yihi?

3. (a) I vamani “mahlonga” lama nga ehansi ka Yesu Kreste? (b) Hi wihi ntirho lowu endliwaka hi “mahlonga” yo tshembeka ma ri karhi ma kongomisiwa hi tintsumi?

³ Muapostola Yohane la tsaleke buku ya Nhlavutelo u vula leswaku i un’wana wa mahlonga wolawo. Loko a tsala vuprofeta lebyi, vaapostola lavan’wana vo sungula hinkwavo se a va file naswona a a ri un’wana wa ntlawa wa “mahlonga” lama totiweke hi moya lawa a ma ta hanya hilaha ku nga heriki etilweni. Namuntlha ko va ni magidi ma nga ri mangani ya mahlonga wolawo emisaveni. Xikwembu xi ni mahlonga man’wana, ku nga ntshungu lowukulu wa vavanuna ni vavasati swin’we ni vana, lava sweswi nhlayo ya vona ku nga timiliyoni. Va kongomisiwa hi tintsumi leswaku va hlanganyela ni “mahlonga” ya vatotiwa entirhweni wo chumayela mahungu lamanene ya hilaha ku nga heriki eka vanhu hinkwavo. Mawaku ndlela leyi “mahlonga” lawa hinkwawo ma tirhaka hi matimba ha yona leswaku ma pfuna vanhu lava titsongahataka emisaveni leswaku va kota ku pona! (Matewu 24:14; Nhlavutelo 7:9, 14; 14:6) Buku ya Nhlavutelo yi kombisa leswi u faneleke u swi endla leswaku u vuyeriwa hi mahungu lamanene lama tsakisaka.

4. (a) Tanihi leswi se ku hundzeke malembe yo tlula 1 900 ku sukela loko Yohane a tsale buku ya Nhlavutelo, ha yini a vulavule hi “swilo leswi faneleke ku endleka hi ku hatlisa”? (b) Xana vumbhoni byi komba yini hi swilo leswi profetiweke?

⁴ Kambe, ha yini Yohane a vule leswaku “mahlonga” lawa ma ta kombiwa “swilo leswi faneleke ku endleka hi ku hatlisa”? Xana marito wolawo a ma vuriwanga emalembeni lama tlulaka 1 900 lama hundzeke? Hi ku ya hi langutelo ra Yehovha, loyi eka yena gidi ra malembe ri fanaka ni “siku ra tolo,” malembe ya 1 900 i nkarhi wo koma swinene loko wu pimanisiwa ni malembe ya ntsandza-vahlayi lama a ma heteke a ri karhi a vumba swilo ni ku lunghiselela misava leswaku vanhu va ta tshama eka yona. (Pisalema 90:4) Muapostola Pawulo u tsale hi ta ‘ku langutela ka yena hi mahika ni ku tshemba,’ leswi nga kanakanisiki leswaku hakelo leyi a a yi languterile, a yi ri kwala nyongeni. (Vafilipiya 1:20) Hambiswiritano, namuntlha vumbhoni bya leswaku swilo hinkwaswo leswi profetiweke swi ta endleka hi nkarhi lowu wu vekiweke byi lo dlaa, erivaleni. Ematin’wini hinkwayo ya vanhu, vutomi bya vanhu a byi si tshama byi va ekhombyeni ku fana ninamuntlha. Kambe i Xikwembu ntsena lexi nga hi ponisaka!—Esaya 45:21.

Ndlela Yo Vulavurisana

5. Xana muapostola Yohane u ri kumise ku yini rungula ra buku ya Nhlavutelo naswona ri fikise ku yini emavandlheni?

⁵ Nhlavutelo 1:1b na 2 yi ya emahlweni yi ku: “Kutani [Yesu] u rhume ntsumi yakwe, a yi nyikela [Nhlavutelo] yi ri swikombiso eka hlonga ra yena Yohane, loyi a nyikeleke vumbhoni malunghana ni rito leri Xikwembu xi ri humeseke ni le ka vumbhoni lebyi Yesu Kreste a byi nyikeleke, ku nga eka swilo hinkwaswo leswi a swi voneke.” Leswi vulaka leswaku ntsumi yi nyike Yohane rungula leri huhuteriweke. U ri tsale eka buku-nsongwa kutani a yi yisa emavandlheni ya le nkarhini wa yena. Nkateko wa kona hi leswaku Xikwembu xi hi hlayisele rona leswaku ri ta khutaza mavandlha lama lavaka ku va 100 000, lawa eka wona ku nga ni malandza ya xona lama nga ni vun’we emisaveni namuntlha.

6. Xana Yesu u vule leswaku hi rihi lunghiselelo leri a nga ta ri tirhisa ku phamela swakudya swa moya eka “mahlonga” ya yena namuntlha?

⁶ Xikwembu a xi ri ni lunghiselelo ro yisa rungula ra buku ya Nhlavutelo enkarhini wa Yohane naswona Yohane a a ri xirho xa lunghiselelo rero ra laha misaveni. Hilaha ku fanaka, Xikwembu xi ni ndlela yo nyika “mahlonga” ya xona namuntlha swakudya swa moya. Eka vuprofeta bya Yesu lebyikulu lebyi khumbaka makumu ya mafambiselo lawa ya swilo, u vule leswaku lunghiselelo ra laha misaveni leri a nga ta ri tirhisa i “hlonga ro tshembeka ni ro tlhariha, leri n’wini wa rona a ri vekeke ehenhla ka va yindlu yakwe, ku va nyika swakudya swa vona hi nkarhi lowu faneleke.” (Matewu 24:3, 45-47) U tirhisa ntlawa lowu wa Yohane leswaku wu paluxa leswi vuprofeta lebyi byi vulaka swona.

7. (a) Xana swikombiso leswi kumekaka ebukwini ya Nhlavutelo swi fanele swi hi khumba hi ndlela yihi? (b) Xana van’wana va ntlawa wa Yohane va hete nkarhi wo tanihi kwihi va ri karhi va vona ku hetiseka ka swivono swa buku ya Nhlavutelo?

⁷ Muapostola Yohane u tsale leswaku Yesu u tise rungula ra buku ya Nhlavutelo hi “swikombiso.” Swikombiso leswi swi veka mhaka erivaleni naswona swa tsakisa ku swi kambisisa. Swi hlamusela ntirho lowukulu naswona swi fanele swi hi susumetela ku hisekela ntirho wa hina wo byela van’wana hi ta vuprofeta lebyi ni leswi byi vulaka swona. Buku ya Nhlavutelo yi hi komba swivono swo hlayanyana leswi tsakisaka, leswi ha xin’we Yohane a hlanganyeleke hi xiviri eka xona kumbe a veke muhlaleri wa xona. Lava va ntlawa wa Yohane, lava van’wana va vona va heteke makume ya malembe va ri karhi va vona ku hetiseka ka swivono leswi, va tsaka leswi moya wa Xikwembu wu va paluxeleke leswi swi vulaka swona, leswaku na vona va ta kota ku swi hlamusela van’wana.

8. (a) I yini lexi hlawulekeke hi xivono ha xin’we xa buku ya Nhlavutelo? (b) Xana vuprofeta bya Daniyele byi hi pfuna njhani leswaku hi twisisa swivandzana swa buku ya Nhlavutelo?

⁸ Swivono swa buku leyi ya Nhlavutelo a swi kombiwi hi ku tlhandlamana ka swona. Ha xin’we xi ni nkarhi lowu xi hetisekaka ha wona. Swo tala swa swona swi phindha-phindha marito ya vaprofeta va khale lama pfunaka ku hlamusela swivono leswi. Hi xikombiso, vuprofeta bya Daniyele byi vulavula hi swivandzana swa mune leswi chavisaka, byi hlamusela leswaku swi yimela mimfumo leyikulu ya misava. Hikwalaho hi kota ku twisisa leswaku swivandzana swa buku ya Nhlavutelo swi yimela mimfumo ya tipolitiki ku katsa ni leyi fumaka sweswi.—Daniyele 7:1-8, 17; Nhlavutelo 13:2, 11-13; 17:3.

9. (a) Hi rihi langutelo leri lava ntlawa wa Yohane va veke na rona, leri fanaka ni ra Yohane? (b) Xana Yohane u ri hi nga wu kuma njhani ntsako?

⁹ Yohane u tshembekile loko a vula vumbhoni bya rungula leri Xikwembu xi n’wi nyikeke rona ha Yesu Kreste. “Hinkwaswo leswi a swi voneke” u swi hlamusele hi vuxokoxoko. Hilaha ku fanaka, lava ntlawa wa Yohane na vona va lave nkongomiso wa Xikwembu na Yesu Kreste leswaku va kota ku twisisa vuprofeta lebyi hilaha ku heleleke ni ku twarisa tinhla ta byona letinene eka vanhu va Xikwembu. Leswaku vandlha ra vatotiwa (ni ntshungu lowukulu emisaveni hinkwayo lowu Xikwembu xi nga ta wu ponisa enhlomulweni lowukulu) va ta vuyeriwa, Yohane u tsale a ku: “Wa tsaka loyi a hlayaka swi twakala ni lava twaka marito ya vuprofeta lebyi, kutani va hlayisa swilo leswi tsariweke eka byona; hikuva nkarhi lowu vekiweke wu kusuhi.”—Nhlavutelo 1:3.

10. I yini lexi hi faneleke hi xi endla hi buku ya Nhlavutelo leswaku hi kuma ntsako?

¹⁰ U ta vuyeriwa swinene hi ku hlaya buku ya Nhlavutelo naswona u ta vuyeriwa ngopfu loko u yingisa leswi tsariweke eka yona. Yohane u tsale eka rin’wana ra mapapila ya yena a ku: “Ku rhandza Xikwembu, hi kona ku hlayisa swileriso swa xona; kasi loko swi ri swileriso swa xona a swi tiki, hikuva xin’wana ni xin’wana lexi velekiweke hi Xikwembu xa yi hlula misava. Naswona vuhluri lebyi hluleke misava, hi rona ripfumelo leri ra hina.” (1 Yohane 5:3, 4) Na wena u nga tiphina hi ntsako hi ku va ni ripfumelo ro tano!

11. (a) Ha yini swi ri swa xihatla leswaku hi yingisa marito ya vuprofeta? (b) Hi wihi nkarhi lowu faneleke wu tshinela hi rivilo leri chavisaka?

¹¹ I swa xihatla leswaku hi yingisa marito ya vuprofeta lebyi “hikuva nkarhi lowu vekiweke wu kusuhi.” Xana i wa yini nkarhi lowu vekiweke? I wa ku hetiseka ka vuprofeta bya buku ya Nhlavutelo ku katsa ni vuavanyisi bya Xikwembu. Nkarhi se wu fikile leswaku Xikwembu na Yesu Kreste va tisa vuavanyisi byo hetelela eka mafambiselo ya misava ya Sathana. Loko Yesu a ha ri la misaveni u vule leswaku “siku ra kona ni nkarhi wa kona” swi tiviwa ntsena hi Tata wa yena. Loko Yesu a vulavula hi makhombo lawa a ma ta endleka emisaveni enkarhini lowu hi hanyaka eka wona, u te: “Xitukulwana lexi xi nga ka xi nga hundzi ku nga si endleka swilo leswi hinkwaswo.” Leswi vulaka leswaku nkarhi lowu vekiweke wa leswaku Xikwembu xi tisa vuavanyisi bya xona wu ya wu tshinela hi rivilo leri chavisaka. (Marka 13:8, 30-32) Hilaha Habakuku 2:3 yi vulaka hakona: “Xivono xa ha ri xa nkarhi lowu vekiweke, naswona xi hatlisela emakumu, a xi nge hembi. Hambiloko xo hlwela, tshama u xi languterile; hikuva xi ta hetiseka hakunene. A xi nge hlweli.” Ku pona ka hina enhlomulweni lowukulu ku titshege hi ku yingisa ka hina Rito ra Xikwembu ra vuprofeta.—Matewu 24:20-22.

[Bokisi leri nga eka tluka 15]

Leswaku hi twisisa buku ya Nhlavutelo hi fanele

● Hi kuma mpfuno wa moya wa Yehovha

● Hi tiva leswaku siku ra Hosi ri sungule rini

● Hi tiva hlonga ro tshembeka ni ro tlhariha namuntlha