Ndzima 10

Ku Nyenya “Swilo Leswi Enteke Swa Sathana”

TIYATIRA

1. Xana muti wa Tiyatira a wu kumeka kwihi loko wu pimanisiwa ni mavandlha man’wana, naswona a wu ri njhani etimhakeni ta vukhongeri?

KWALOMU ka tikhilomitara ta 64 ku ya edzonga-vuxa bya muti wa Bergama (Pergamo), ku ni doroba leri fuweke ra Akhisar le Turkey. Emalembeni ya kwalomu ka 1 900 lama hundzeke, muti lowu a wu vitaniwa Tiyatira. A swi olova leswaku mulanguteri wa xifundzha a fika eTiyatira hi gondzo leri a ri famba ri suka ePergamo kutani a endzela mavandlha laman’wana, lawa ku vulavuriwaka ha wona ebukwini ya Nhlavutelo ndzima 3—ku nga Sarda, Filadelfiya na Lawodikiya. Muti wa Tiyatira a wu nga fani ni wa Pergamo hikuva a wu vonaka wu nga taleriwanga hi vagandzeri vo tala va mufumi, kambe a wu ri ni tindhumbha ni titempele ta swikwembu swa vahedeni. Muti wa Tiyatira a wu dume hi ku va ntsindza wa swa mabindzu.

2, 3. (a) I yini leswi nga tshama swi vuriwa hi wansati wo karhi wa le Tiyatira la veke Mukreste? (b) Xana ku va Yesu a tivula “N’wana wa Xikwembu” ni leswaku u ni ‘mahlo lama fanaka ni langavi leri pfurhaka,’ a swi vula yini eka Vakreste va le Tiyatira?

² Loko Pawulo a ri karhi a chumayela eMakedoniya, u hlangane ni wansati wo huma eTiyatira, ku nga Lidiya, muxavisi wa swilo swa xivunguvungu. Lidiya ni vandyangu wa yena hinkwavo va ri amukele hi ntsako rungula leri Pawulo a va chumayeleke rona, naswona u khome Pawulo hi malwandla swinene. (Mintirho 16:14, 15) Hi ku ya hi matimu, hi yena wo sungula ku va Mukreste eTiyatira. Hi ku famba ka nkarhi, ku simekiwe vandlha ra Vakreste emutini hi wolowo. Yesu u rhumele rungula ra yena ro leha swinene emutini wolowo, a ku: “Kutani tsalela ntsumi ya vandlha ra Tiyatira, u ku: N’wana wa Xikwembu, loyi mahlo yakwe ma fanaka ni langavi leri pfurhaka, ni loyi milenge yakwe yi fanaka ni koporo yo tenga.”—Nhlavutelo 2:18.

³ Handle ka laha, a ku na kun’wana laha ku humelelaka xiga lexi nge “N’wana wa Xikwembu” ebukwini ya Nhlavutelo, hambileswi kun’wana Yesu a vulaka leswaku Yehovha i “Tatana.” (Nhlavutelo 2:27; 3:5, 21) Swi nga endleka leswaku Yesu u tirhise xithopo lexi ku tsundzuxa Vakreste va le Tiyatira hi vuxaka lebyikulu lebyi a nga na byona na Yehovha. N’wana loyi u ni ‘mahlo lama fanaka ni langavi leri pfurhaka’—ku nga xilemukiso eka Vakreste va le Tiyatira leswaku vuavanyisi bya yena byi ta pfurhela un’wana ni un’wana loyi a n’wi vonaka a thyakisa vandlha. Hi ku tlhela a vulavula hi milenge ya yena tanihi leyi fanaka ni koporo yo tenga, leyi vangamaka, u kandziyisa xikombiso xa yena lexi vangamaka xa ku tshembeka ka yena loko a ha ri emisaveni. A swi kanakanisi leswaku Vakreste va le Tiyatira va xi tekele enhlokweni xitsundzuxo xa yena kutani na hina hi fanele hi endla tano namuntlha!—1 Petro 2:21.

4, 5. (a) Ha yini a swi fanerile leswaku Yesu a bumabumela Vakreste va le Tiyatira? (b) Vandlha ra le Tiyatira ri fana njhani ni mavandlha ya Timbhoni ta Yehovha namuntlha?

⁴ Lexi tsakisaka hi leswaku Yesu u va bumabumerile Vakreste va le Tiyatira. U te: “Ndzi tiva swiendlo swa wena, ni rirhandzu ni ripfumelo ni vutirheli ni ku tiyisela ka wena, ni leswaku swiendlo swa wena swa sweswi swi tlula leswo sungula.” (Nhlavutelo 2:19) Vakreste lava nga vatotiwa va muti lowu a va nga fani ni va le Efesa lava a va lahle rirhandzu ra vona ro sungula leri a va rhandza Yehovha ha rona. Ripfumelo ra vona a ri tiyile. Ku tlula kwalaho, swiendlo swa vona a swi tlula leswo sungula, naswona ku fana ni mavandlha lamanharhu lawa ha ha ku vulavulaka ha wona, Vakreste va le Tiyatira a va tiyisela. Leswi swi fana kahle ni mavandlha ya namuntlha ya Timbhoni ta Yehovha emisaveni hinkwayo, lama lavaka ku va 100 000! Ku rhandza Yehovha ka vonaka eka wona hinkwawo loko moya wa ku hisekela ku chumayela wu ri karhi wu vonaka eka nhlengeletano hinkwayo, wu susumeta lavatsongo ni lavakulu. Va ya va andza lava nghenelaka ntirho wa vuphayona, hi ndlela yoleyo va wu tirhisa hi vutlhari nkarhi lowu wa ha seleke, leswaku va chumayela hi ta ntshembo lowu tsakisaka wa Mfumo wa Xikwembu lowu taka!—Matewu 24:14; Marka 13:10.

⁵ Se ku hundze makume ya malembe, malandza ya Xikwembu yo tshembeka ya masalela lama nga vatotiwa ni lava ntshungu lowukulu va ri karhi va ri xikombiso lexinene xa ku tiyisela entirhweni wa Xikwembu, loko misava leyi va hanyaka eka yona yi ri karhi yi mbombomela emunyameni ni ku heleriwa hi ntshembo. Kambe hi fanele hi va ni xivindzi! Buku ya Nhlavutelo yi tiyisekisa leswaku leswi vaprofeta va khale va Xikwembu va swi vuleke i ntiyiso. “Siku lerikulu ra Yehovha ri le kusuhi. Ri le kusuhi, naswona ra hatlisa swinene.”—Sofaniya 1:14; Yuwele 2:1; Habakuku 2:3; Nhlavutelo 7:9; 22:12, 13.

“Wansati Yoloye Yezabele”

6. (a) Hambileswi vandlha ra le Tiyatira ri faneriwaka hi ku bumabumeriwa, i yini leswi Yesu a swi xiyeke leswi a swi lava ku tekeriwa goza hi ku hatlisa? (b) A a ri mani Yezabele naswona xana a swi n’wi fanela ku tivitana muprofeta?

⁶ Yesu u halaharile hi mahlo ya yena lama fanaka ni langavi leri pfurhaka. Hiloko a vona nchumu wun’wana lowu lavaka ku tekeriwa goza hi ku hatlisa. U byele Vakreste va le Tiyatira a ku: “Nilokoswiritano, ndzi ni mhaka na wena, ya leswaku u tshika wansati yoloye Yezabele, loyi a tivulaka muprofeta wa xisati naswona u dyondzisa mahlonga ya mina ni ku ma hambukisa ma endla vumbhisa ni ku dya swilo leswi nyikeriwaka swifaniso swa hava.” (Nhlavutelo 2:20) Hi lembe-xidzana ra vukhume B.C.E., Nkosikazi Yezabele loyi a a gandzela Bali, loyi a a ri nsati wa Hosi Akabu wa le Israyele, a a dume hi ku dlaya, vuoswi ni ku rhandza ku lawula. Yehu, tanihi mutotiwa wa Yehovha u n’wi dlayile. (1 Tihosi 16:31; 18:4; 21:1-16; 2 Tihosi 9:1-7, 22, 30, 33) Yezabele la nga mugandzeri wa swikwembu swa hava a a nga ri na yona mfanelo yo tivitana muprofeta. A a nga tshembekanga ku fana na Meriyamu na Debora, lava veke vaprofeta vo tshembeka eIsrayele. (Eksoda 15:20, 21; Vaavanyisi 4:4; 5:1-31) Naswona moya wa Yehovha a wu n’wi susumetanga leswaku a profeta hilaha wu susumeteke Ana la dyuhaleke ni vana va mune va vanhwanyana va Filipi lowa muvuri wa evhangheli.—Luka 2:36-38; Mintirho 21:9.

7. (a) Hi wihi nkucetelo lowu swi nga erivaleni leswaku Yesu a a vulavula ha wona loko a vulavula hi “wansati yoloye Yezabele”? (b) Swi nga va swi endlekise ku yini leswaku vavasati van’wana evandlheni va yimelela mahanyelo ya vona ya ku tiendlela ku rhandza?

⁷ Kutani swi le rivaleni leswaku “wansati yoloye Yezabele” la tivulaka muprofeta eTiyatira a a ri muprofeta wa mavunwa. A a nga ri na wona moya wa Xikwembu. Xana a a ri mani? Swi nga endleka leswaku a ku ri wansati kumbe ntlawa wa vavasati lava nga ni nkucetelo wo biha evandlheni, lava nga riki na tingana. Kumbexana vavasati vo karhi evandlheni a va hlohlotela swirho swa vandlha leswaku swi tikhoma hi ndlela yo biha naswona va nga ri na tingana to yimelela mahanyelo ya vona hi ku soholota matsalwa. Hakunene a va ri vaprofeta va mavunwa! A va kucetela van’wana leswaku va hlanganyela eka mikhuva ya vona ya “vumbhisa, thyaka, ku navela ka vuxaka bya rimbewu, ku navela loku vavisaka, ni ku tshwa, ku nga ku gandzela swifaniso swa hava.” (Vakolosa 3:5) A va kucetela swirho swa vandlha leswaku swi nghena hi nhloko emahanyelweni yo biha, swi tihanyela ku rhandza hi ndlela leyi amukeriwaka kumbe leyi biwaka hi makatla etikerekeni to tala ta Vujagana namuntlha.

8. (a) Xana Yesu u vule yini hi “Yezabele” wa le Tiyatira? (b) Xana nkucetelo wo biha wa vavasati wu vonaka njhani manguva lawa?

⁸ Yesu u ye emahlweni a byela vakulu va le Tiyatira a ku: “Ndzi n’wi nyike nkarhi wo hundzuka, kambe a nga swi rhandzi ku hundzuka eka vumbhisa byakwe. Waswivo, ku nga ri khale ndzi ta n’wi tlatlalata esangwini ra vavabyi, ni lava endlaka vuoswi na yena ndzi va tlatlalata enhlomulweni lowukulu, handle ka loko vo hundzuka eswiendlweni swa yena.” (Nhlavutelo 2:21, 22) Tanihi leswi Yezabele wa xiviri a a lawula Akabu naswona a a delela Yehu, loyi Xikwembu xi n’wi tirhiseke ku n’wi dlaya, swi nga endleka leswaku vavasati lava na vona va ringete ku lawula vanuna va vona ni vakulu. Swi vonaka onge vakulu va le Tiyatira a va nga wu tekeli goza nkucetelo wo biha wa mahanyelo ya Yezabele. Kutani Yesu u va lemukise hi matimba swin’we ni mavandlha ya namuntlha ya vanhu va Yehovha emisaveni hinkwayo. Manguva lawa, vavasati vo tano lava nga ni nkucetelo wo biha, va yenge vanuna va vona leswaku va gwineha va tlhela va va kucetela ku yisa malandza yo tshembeka ya Yehovha etihubyeni.—Ringanisa na Yudha 5-8.

9. (a) Ha yini marito lawa Yesu a ma vuleke hi Yezabele ma nga soli vavasati hinkwavo evandlheni? (b) Xana nkucetelo wa Yezabele wu sungula loko swi te yini?

⁹ Leswi a swi vuli leswaku vavasati vo tshembeka evandlheni ra Vukreste va soriwa. Masiku lawa ntirho lowukulu wo chumayela wu endliwa hi vamakwerhu va xisati lava tshembekaka; hikwalaho ka tidyondzo ta Bibele leti va ti fambisaka, va tisa mintshungu ya vanhu evandlheni. Xikwembu hi xoxe xa ri katekisa lunghiselelo leri, hilaha Pisalema 68:11 yi vulaka hakona loko yi ku: “Yehovha u vula marito lawa; vavasati lava vulaka mahungu lamanene i vuthu lerikulu.” Vavanuna va nga susumetiwa ku endla leswinene hi vasati va vona lava nga ni moya wo rhula ni lava xiximaka, lava “nga ni risima lerikulu emahlweni ka Xikwembu.” (1 Petro 3:1-4) Hosi Lemuwele u dzunise wansati la nga ni vuswikoti ni la gingiritekaka. (Swivuriso 31:10-31) Nkucetelo wa Yezabele wu va kona loko vavasati va huma endleleni hi ku yenga vanuna va vona kumbe hi ku tlhontlha vunhloko bya vona kumbe hi ku byi tekela ehansi.—Vaefesa 5:22, 23; 1 Vakorinto 11:3.

10. (a) Ha yini Yezabele ni vana va yena va avanyisiwa? (b) Xana lava va hundzukaka vana va Yezabele va tiveka eka xiyimo xihi xa khombo, naswona va fanele va endla yini?

¹⁰ Loko Yesu a vulavula hi “wansati yoloye Yezabele” u ye emahlweni a ku: “Naswona vana vakwe ndzi ta va dlaya hi ntungu lowu dlayaka, leswaku mavandlha hinkwawo ma ta tiva leswaku hi mina loyi a lavisisaka tinso ni timbilu, naswona ndzi ta mi nyika ha un’we-un’we hi ku ya hi swiendlo swa n’wina.” (Nhlavutelo 2:23) Yesu u nyike Yezabele ni vana va yena nkarhi wa leswaku va hundzuka, kambe va ye emahlweni ni mahanyelo ya vona yo biha kutani a va fanele va avanyisiwa. Lexi i xilemukiso lexikulu eka Vakreste namuntlha. Lava va tekelelaka Yezabele, ku nga ha va vavanuna kumbe vavasati, kutani va hundzuka vana va yena hi ku tlula misinya ya milawu ya Bibele ya vunhloko ni ya mahanyelo, kumbe va tiomisa tinhloko leswaku va ta honisa malunghiselelo ya Xikwembu, va tiveka ekhombyeni ra ku vabya hi tlhelo ra moya. I ntiyiso leswaku loko munhu wo tano a kombela vakulu evandlheni leswaku va n’wi khongelela, “xikhongelo xa ripfumelo xi ta hanyisa la nga pfukiki swinene, naswona Yehovha u ta n’wi pfuxa”—ntsena loko a titsongahata, a hanya hi ku pfumelelana ni swikhongelo sweswo. Kambe, ku nga tshuki ku va ni loyi a ehleketaka leswaku a nga xisa Xikwembu kumbe Kreste hi ku ringeta ku tumbeta mahanyelo ya yena yo biha kumbe hi ku tiendla la hisekaka.—Yakobo 5:14, 15.

11. Xana mavandlha ma pfuniwa njhani namuntlha leswaku ma tshama ma xalamukile leswaku ma nga ngheniwi hi moya wo biha wa vavasati lava nga lawulekiki?

¹¹ Lexi tsakisaka, mavandlha yo tala ya Timbhoni ta Yehovha namuntlha ma ri tiva khombo leri. Vakulu va tshama va pfule mahlo leswaku va xiya lava va honisaka malunghiselelo ya Xikwembu ni lava dyohaka. Va ringeta ku pfuna vavanuna ni vavasati lava nga ekhombyeni, leswaku va aka vumoya bya vona ni ku ololoxa mahanyelo ya vona va nga si tikuma va ri ekhombyeni. (Vagalatiya 5:16; 6:1) Valanguteri lava, lava nga Vakreste va alela munhu un’wana ni un’wana hi rirhandzu ni ku tiyisa voko, ku nga khathariseki leswaku i wanuna kumbe i wansati, leswaku a nga vumbi mintlawa leyi kucetelaka mikhuva leyi fanaka ni ya mavandla ya ntshunxeko wa vavasati. Tlhandlakambirhi, nkarhi na nkarhi minkandziyiso ya Timbhoni ta Yehovha yi nyika ndzayo leyi nga le nkarhini.a

12. Hi yihi ndlela leyi lava ntlawa wa Yohane va kombisaka ha yona namuntlha leswaku va hiseka ku fana na Yehu?

¹² Hambiswiritano, vadyohi lava va endlaka swidyoho leswikulu, ngopfu-ngopfu loko se swi hundzuke mukhuva, loko va nga hundzuki va fanele va susiwa eku hlanganyeleni. Ha tsundzuka leswaku Yehu u hisekele ku herisa nkucetelo hinkwawo wa Yezabele eIsrayele. Hilaha ku fanaka, lava ntlawa wa Yohane namuntlha va teka magoza lama tiyeke, va vekela vanghana va vona va ntlawa wa “Yonadabu” xikombiso lexinene, va tlhela va kombisa leswaku a va fani nikatsongo ni vafundhisi va Vujagana lava tshikaka vanhu va tilawula.—2 Tihosi 9:22, 30-37; 10:12-17.

13. Xana ku ta endleka yini hi lava va pfumelaka ku ngheniwa hi moya wo biha wa vavasati lava yimelaka Yezabele?

¹³ Tanihi leswi N’wana wa Xikwembu a nga Murhumiwa wa Yehovha ni Muavanyisi, swi fanerile leswi a humesaka lava yimelaka Yezabele namuntlha a va tshika esangwini ra lava vabyaka hikuva hakunene vuvabyi bya vona bya moya a byi tshunguleki. (Malakiya 3:1, 5) Lava va pfumelaka ku ngheniwa hi moya lowu wo biha wa vavasati lava, va ta va ni nhlomulo lowukulu—ku nga gome ra ku susiwa eku hlanganyeleni, va tsemiwa evandlheni ra Vukreste onge hiloko va file. Handle ka loko vo hundzuka, va hundzuluka kutani va amukeriwa evandlheni, na vona va langutane ni rifu ra xiviri, va ta dlayiwa hi “ntungu lowu dlayaka”—eku heteleleni hi nhlomulo lowukulu. Kambe va nga ri papalata khombo leri loko va swi lava, hi ku va va hundzuka hi ku helela eka swiendlo swa vona leswo homboloka.—Matewu 24:21, 22; 2 Vakorinto 7:10.

14. (a) Xana Yesu u va tirhisa njhani vakulu leswaku va tlhantlha swiphiqo swin’wana swo kota nkucetelo wun’wana ni wun’wana wa Yezabele? (b) Xana vandlha ri fanele ri va seketela njhani vakulu lava tlhantlhaka swiphiqo swo tano?

¹⁴ “Mavandlha hinkwawo” ma fanele ma swi tiva leswaku Yesu u kambisisa “tinso,” leti yimelaka ndlela leyi munhu a titwaka ha yona, ni ‘mbilu,’ leyi yimelaka munhu wa le ndzeni ku katsa ni leswi n’wi susumetaka ku endla swo karhi. Sweswo u swi endla hi ku tirhisa tinyeleti leti a ti byarhiseke ntirho wolowo kumbe vakulu, leswaku ti tlhantlha swiphiqo swo karhi swo kota nkucetelo wun’wana ni wun’wana wa Yezabele lowu vaka kona. (Nhlavutelo 1:20) Endzhaku ka loko vakulu lava va yi tshamele hansi mhaka ya muxaka lowu, va yi kambisisa kutani va fikelela xiboho, a nga kona ni un’we la nga ni mfanelo yo lava ku tiva leswaku ha yini va fikelele xiboho xexo. Hinkwerhu hi fanele hi amukela xiboho lexi vakulu va xi endlaka naswona hi hambeta hi seketela tinyeleti leti ta mavandlha. Loko hi tshembeka eka Yehovha ni le ka malunghiselelo ya nhlengeletano ya yena hi ta kuma mikateko. (Pisalema 37:27-29; Vaheveru 13:7, 17) Onge na wena hi xiviri, ndlela leyi u seketelaka malunghiselelo lawa ha yona yi nga endla leswaku u katekisiwa loko Yesu a nyika un’wana ni un’wana hi ku ya hi swiendlo swa yena.—Vagalatiya 5:19-24; 6:7-9.

‘Swi Khome Swi Tiya Leswi U Nga Na Swona’

15. (a) Xana Yesu u te yini eka lava a va nga si ngheniwa hi moya wa Yezabele? (b) I yini lexi kombisaka leswaku a hi hinkwavo lava a va tivula Vakreste hi 1918 lava a va thyakisiwe hi vugwinehi bya Vujagana?

¹⁵ Marito lama landzelaka ya Yesu ma chavelela, u te: “Hambiswiritano, n’wina hinkwenu lava nga eTiyatira, hinkwenu lava nga riki na yona dyondzo leyi, n’wina lava nga swi tivangiki ‘swilo leswi enteke swa Sathana,’ hilaha va vulaka hakona, ndza mi byela, ndzi ri: A ndza ha mi rhwexi ndzhwalo wun’wanyana. Kambe, leswi mi nga na swona swi khomeni swi tiya kukondza ndzi fika.” (Nhlavutelo 2:24, 25) A ku ri ni vanhu vo tshembeka evandlheni ra le Tiyatira lava nga kuceteriwangiki hi Yezabele. Hilaha ku fanaka, emalembeni ya 40 ku nga si fika lembe ra 1918 ni ku sukela enkarhini wolowo ku ta fikela sweswi, a hi hinkwavo lava tivulaka Vakreste lava tiyiseleleke mahanyelo yo biha ku nga tindlela leto homboloka leti nga tala eka Vujagana namuntlha. Ntlawa lowutsongo wa Swichudeni swa Bibele, lowu sweswi wu tivekaka tanihi Timbhoni ta Yehovha, lowu ringeteke ku pfuna swirho swa tikereke leswaku swi vona leswaku tidyondzo to tala ta Vujagana a hi ta Vukreste, wu tikulule hi ku helela etidyondzweni ta Babilona Lonkulu ni le ka mahanyelo lama humaka eka vagwinehi va Vujagana. Sweswo swi katsa ni tidyondzo ta ku tilawula ta “wansati yoloye Yezabele.”

16. Hambileswi Yesu ni huvo leyi fumaka ya Vakreste va lembe-xidzana ro sungula va nga rhwexangiki munhu ndzhwalo wun’wana, hi swihi swilo leswi hi faneleke hi swi papalata?

¹⁶ Lava ntlawa wa Yohane namuntlha va khutaze vanghana va vona lava ntshungu lowukulu leswaku va tivonela eka nkucetelo wa mahanyelo yo biha, yo fana ni ya vuhungasi lebyi thyakeke. A swi kali swi lava hi va va Tomasi makholwa-hi-ku-vona ku ri kona hi nga ta papalata nchumu wo karhi. I vutlhari ku fambela ekule ni “swilo leswi enteke swa Sathana.” Hilaha Yesu a vuleke hakona: “A ndza ha mi rhwexi ndzhwalo wun’wanyana.” Leswi swi hi tsundzuxa xileriso lexi vuriweke hi huvo leyi fumaka ya Vakreste va lembe-xidzana ro sungula loko yi ku: “Moya lowo kwetsima swin’we na hina hi tsakele ku ka hi nga mi engeteleli ndzhwalo wun’wana, handle ka swilo leswi, leswi fanelaka, ku papalata swilo leswi nyikeriwaka swifaniso swa hava ni ngati ni swilo leswi dlayiweke hi ku tlimbiwa nkolo ni vumbhisa. Loko mi tihlayisa hi vukheta eka swilo leswi, mi ta fuwa.” (Mintirho 15:28, 29) Leswaku hi fuwa hi tlhelo ra moya, hi fanele hi papalata vukhongeri bya mavunwa, ku tirhisa ngati hi ndlela yo biha (ku fana ni ku pomperiwa ngati) ni mahanyelo yo biha! A swi kanakanisi leswaku ni rihanyo ra hina ri ta sirheleleka.

17. (a) Xana Sathana u va ringe njhani vanhu namuntlha hi “swilo leswi enteke”? (b) Langutelo ra hina ri fanele ri va rihi hi “swilo leswi enteke” swa misava ya Sathana leyi pfilunganeke?

¹⁷ Sathana u ni ‘swilo swin’wana leswi enteke’ namuntlha, swo tanihi hi ku mbambela swilo hi ndlela leyi rharhanganeke ni tifilosofi leti phuntisaka vanhu lava tlhariheke. Handle ka ku tilawula ni mahanyelo yo biha, ku ni vungoma ni dyondzo ya hundzuluko. Xana Muvumbi la nga ni vutlhari hinkwabyo u swi languta njhani “swilo leswi enteke”? Loko muapostola Pawulo a n’wi tshaha, u ri: “Ndzi ta herisa vutlhari bya tintlhari.” Ku hambana ni sweswo, “swilo leswi enteke swa Xikwembu” a swi rharhangananga, swi le rivaleni naswona swa tsakisa. Vakreste lava tlhariheke va papalata “swilo leswi enteke” swa misava ya Sathana leyi pfilunganeke. Tsundzuka leswaku “misava ya hundza ni ku navela ka yona, kambe loyi a endlaka ku rhandza ka Xikwembu u tshama hi masiku.”—1 Vakorinto 1:19; 2:10; 1 Yohane 2:17.

18. Hi yihi mikateko leyi Yesu a yi tshembiseke Vakreste lava totiweke lava tshamaka va tshembekile ku ya fika emakumu, naswona hi rihi lunghelo leri lava pfuxiweke va nga ta va na rona hi nkarhi wa Armagedoni?

¹⁸ Yesu u byele Vakreste volavo va le Tiyatira marito lama tsakisaka. Nakambe ma khutaza Vakreste lava totiweke namuntlha, u te: “Kutani loyi a hlulaka naswona a hlayisaka swiendlo swa mina ku fika emakumu ndzi ta n’wi nyika vulawuri ehenhla ka matiko, vulawuri byo fana ni lebyi ndzi byi amukeleke eka Tatana, u ta risa vanhu hi nhonga ya nsimbi lerova va ta fayeleriwa va va swipetlu ku fana ni xibya xa vumba.” (Nhlavutelo 2:26, 27) Mawaku lunghelo ra risima swonghasi! Vulawuri lebyi vahluri lava totiweke va byi kumaka loko va pfuxiwa eku feni i lunghelo ro hlanganyela na Yesu loko a faya matiko lama xandzukeke hi “nhonga ya nsimbi” hi nkarhi wa Armagedoni. Matlhari ya matimba ya nyutliya ya matiko wolawo a ma nge pfuni nchumu loko Kreste a lovisa valala vakwe ku fana ni swibya swa vumba.—Pisalema 2:8, 9; Nhlavutelo 16:14, 16; 19:11-13, 15.

19. (a) Xana i mani “nyeleti ya nimixo” naswona u ta tinyiketa hi ndlela yihi eka lava nga ta hlula? (b) Ntshungu lowukulu wu khutaziwa hi yini?

¹⁹ Yesu u engete a ku: “Kutani ndzi ta n’wi nyika nyeleti ya nimixo.” (Nhlavutelo 2:28) Hi ku famba ka nkarhi Yesu hi byakwe u hlamuserile leswaku “nyeleti” leyi i yini, u te: “Ndzi rimitsu ni ntukulu wa Davhida, naswona ndzi nyeleti ya mixo leyi vangamaka.” (Nhlavutelo 22:16) Ina, i Yesu la hetisisaka vuprofeta lebyi Yehovha a sindziseke Balama ku byi vula a ku: “Entiyisweni nyeleti yi ta huma eka Yakobe, kunene ni nhonga ya vuhosi yi ta pfuka yi huma eIsrayele.” (Tinhlayo 24:17) Xana Yesu u ta va nyika njhani “nyeleti ya nimixo” lava hlulaka? Swi le rivaleni leswaku u ta endla tano hi ku tinyiketa eka vona, a va ekusuhi na vona, na vona va va ni vuxaka lebyikulu na yena. (Yohane 14:2, 3) Xolexo i xivangelo lexikulu xa leswaku va tiyisela! Ntshungu lowukulu na wona wa khutazeka ku tiva leswaku “nyeleti ya mixo leyi vangamaka” yi ta sungula ku fuma eMfun’weni wa yona ku nga ri khale hi ku hundzula misava yi va Paradeyisi!

Tshama U Tshembekile

20. I yini leswi endlekaka eka Vujagana leswi hi tsundzuxaka ku tsana loku a ku ri kona evandlheni ra le Tiyatira?

²⁰ Rungula leri ri fanele ri va khutaze ngopfu Vakreste va le Tiyatira. Hi mahlo ya mianakanyo, vona N’wana la kwetsimaka wa Xikwembu etilweni a ri karhi a vulavula ni Vakreste va le Tiyatira hi swin’wana swa swiphiqo swa vona! Hakunene van’wana va ri amukele hi mandla mambirhi rungula rero ra rirhandzu. Rungula leri ro leha ku tlula hinkwawo lama tsaleriweke mavandlha ya nkombo, ri tlhela ri hi pfuna ku vona vandlha ra Vakreste lava nga va ntiyiso namuntlha. Hi 1918 loko Yesu a fika etempeleni ya Yehovha a ta avanyisa, tinhlengeletano to tala leti a ti vula leswaku i ta Vakreste u tikume ti thyakisiwe hi vugandzeri bya swikwembu swa hava ni mahanyelo yo biha hi tlhelo ra moya. (Yakobo 4:4) Tin’wana a ti sekele tidyondzo ta tona eka vavasati lava tilawulaka va lembe-xidzana ra vu-19, vo kota Ellen White wa kereke ya Seventh-Day Adventists na Mary Baker Eddy wa kereke ya Christian Scientists ni van’wana vo tala va sweswinyana lava nga vafundhisi. (Ringanisa na 1 Timotiya 2:11, 12.) Eka tikereke to hambana-hambana ta Khatoliki, Mariya wa ha xiximiwa ku tlula Xikwembu na Kreste. Yesu a nga n’wi xiximanga hi ndlela yoleyo. (Yohane 2:4; 19:26) Xana tinhlengeletano to tano leti pfumelelaka nkucetelo wo tano wa vavasati wo kala nawu, ti nga amukeleka tanihi Vakreste?

21. Hi yihi dyondzo leyi munhu ha un’we a nga yi dyondzaka eka rungula ra Yesu leri a ri tsaleleke vandlha ra le Tiyatira?

²¹ Mukreste ha un’we, swi nga khathariseki leswaku i wa ntlawa wa Yohane kumbe i wa tinyimpfu tin’wana, u fanele a ri dyela marhambu ya nhloko rungula leri. (Yohane 10:16) Van’wana va nga ha ringeka leswaku va landzela mahanyelo yo tilawula lawa vadyondzisiwa va Yezabele wa le Tiyatira va ma landzeleke. Kasi ndzingo wun’wana i wa ku landzula ripfumelo. Namuntlha hi fanele hi endla swiboho etimhakeni to tanihi ku dya swilo leswi endliweke hi ngati kumbe ku pfumela ku pomperiwa ngati. Van’wana va nga ha ehleketa leswaku ku hiseka ensin’wini kumbe ku nyikela tinkulumo swi va nyika mpfumelelo wo tlula milawu yin’wana yo tanihi ku hlalela tifilimi leti nga ni madzolonga kumbe ku nwa byala ku tlula mpimo. Xitsundzuxo lexi Yesu a tsundzuxeke Vakreste va le Tiyatira ha xona xi hi lemukisa leswaku a hi fanelanga hi tinyika ntshunxeko wo tano. Yehovha u lava leswaku hi tshama hi basile, hi n’wi tirhela hi moya-xiviri hinkwawo, hi va ni vun’we hilaha Vakreste vo tala va le Tiyatira a va ri xiswona.

22. Xana Yesu u yi kandziyisa njhani mhaka ya ku rhiya ndleve?

²² Yesu u gimete hi ku: “Loyi a nga ni ndleve a a yingise leswi moya wu swi byelaka mavandlha.” (Nhlavutelo 2:29) Se i ra vumune Yesu a phindha marito lawa lama khumbaka mbilu naswona wa ha ta gimeta ha wona eka marungula manharhu lama ha taka. Xana wa yingisa? Loko swi ri tano, rhiya ndleve loko Xikwembu xi hambeta xi nyika ndzayo hi moya wa xona hi ku tirhisa lunghiselelo ra xona leri xi hi layaka hi rona.

[Nhlamuselo ya le hansi]

[Swifaniso leswi nga eka tluka 51]

Namuntlha, ntirho wo tala wo chumayela wu endliwa hi vamakwerhu va xisati va ri karhi va seketela vulawuri bya le tilweni hi ku titsongahata