Ndzima 24
Rungula Ro Tsokombela Ni Ku Bava
Xivono 6—Nhlavutelo 10:1–11:19
Nhloko-mhaka: Xivono xa buku-nsongwa leyitsongo; leswi endlekaka etempeleni; ku yimbiwa ka mhalamhala ya vunkombo
Nkarhi wa ku hetiseka: Ku sukela eku vekiweni ka Yesu exiluvelweni hi 1914 ku ya eka nhlomulo lowukulu
1, 2. (a) Xana khombo ra vumbirhi ri vange yini, naswona khombo leri ku ta vuriwa leswaku ri herile loko swi te yini? (b) I mani loyi Yohane a n’wi voneke a xika hi le tilweni?
KHOMBO ra vumbirhi ri ve leri onhaka. Ri hlasele Vujagana ni varhangeri va byona swin’we ni “n’we-xa-nharhu xa vanhu,” lava va hlamuseriweke tanihi lava feke hi tlhelo ra moya. (Nhlavutelo 9:15) Yohane u fanele a lave ku tiva leswi khombo ra vunharhu a ri ta swi tisa endzhaku ka leri. Kambe yimanyana! Khombo ra vumbirhi a ri si hela—ku kondza hi fika enkarhini wa leswi tsariweke eka Nhlavutelo 11:14. Emahlweni ka sweswo, Yohane a a fanele a vona ku cinca ka swiendlakalo leswi eka swona yena hi byakwe a endlaka swo karhi. Swi sungule hi xivono lexi chavisaka:
2 “Kutani ndzi vona ntsumi yin’wana ya matimba yi xika hi le tilweni, yi ambale papa, naswona yi ri ni nkwangulatilo enhlokweni ya yona, xikandza xa yona a xi fana ni dyambu, naswona milenge ya yona a yi fana ni tiphuphu leti pfurhaka.”—Nhlavutelo 10:1.
3. (a) I mani “ntsumi ya matimba”? (b) Xana wu vula yini nkwangulatilo lowu nga ehenhla ka nhloko ya yona?
3 I mani ‘ntsumi leyi ya matimba’? Swi le rivaleni leswaku i Yesu Kreste la kwetsimisiweke loko a ri entirhweni wun’wana. U funengetiwe hi papa leswaku a nga vonaki, leswi swi hi tsundzuxaka marito ya Yohane lama a ma vuleke ha Yesu a ku: “Maswivo! Wa ta hi mapapa, naswona tihlo rin’wana ni rin’wana ri ta n’wi vona, swin’we ni lava va n’wi tlhaveke.” (Nhlavutelo 1:7; ringanisa na Matewu 17:2-5.) Nkwangulatilo lowu nga ehenhla ka nhloko ya yena wu hi tsundzuxa xivono xo sungula xa Yohane xa xiluvelo xa Yehovha, ni “nkwangulatilo . . . lowu langutekaka ku fana ni emeralda.” (Nhlavutelo 4:3; ringanisa na Ezekiyele 1:28.) Nkwangulatilo wolowo wu vula ku tshamiseka ni ku rhula loku rhendzeleke xiluvelo xa Xikwembu. Hi ndlela leyi fanaka, nkwangulatilo lowu nga enhlokweni ya ntsumi a wu ta yi kombisa yi ri murhumiwa wo hlawuleka wa ku rhula, “Hosana ya Ku Rhula” leyi Yehovha a vulavuleke ha yona ka ha ri emahlweni.—Esaya 9:6, 7.
4. I yini lexi kombisiwaka (a) hi ku va nghohe ya ntsumi ya matimba yi “kotisa dyambu”? (b) hi ku va milenge ya ntsumi yi “fana ni tiphuphu leti pfurhaka”?
4 Nghohe ya ntsumi ya matimba a yi “kotisa dyambu.” Eku sunguleni, exivonweni xakwe loko a vona Yesu a ri etempeleni ya Xikwembu, Yohane u vule leswaku nghohe ya Yesu a yi “kotisa dyambu loko ri voninga hi matimba ya rona.” (Nhlavutelo 1:16) Yesu, tanihi “dyambu ra ku lulama,” u humelela a ri ni ku voninga loku hanyisaka etimpapeni ta yena leswaku a vuyerisa lava chavaka vito ra Yehovha. (Malakiya 4:2) A ku vangami nghohe ya ntsumi leyi ntsena kambe ni milenge ya yona, yi “fana ni tiphuphu leti pfurhaka.” Xivandla xakwe lexi tiyeke i xa Loyi Yehovha a n’wi nyikeke “vulawuri hinkwabyo etilweni ni le misaveni.”—Matewu 28:18; Nhlavutelo 1:14, 15.
5. Xana Yohane u vone yini evokweni ra ntsumi ya matimba?
5 Yohane u ye emahlweni a vona leswi: “Kutani evokweni ra yona a yi tamele buku-nsongwa leyitsongo leyi pfulekeke. Hiloko yi veka nenge wa yona wa xinene elwandle, kambe lowa ximatsi yi wu veka emisaveni.” (Nhlavutelo 10:2) Xana leyi i buku-nsongwa yin’wana? Ina, kambe leya sweswi a yi pfariwanga. Sweswinyana hina swin’we na Yohane hi nga rindzela ku vona ku paluxiwa kun’wana loku tsakisaka. Kambe, xo sungula hi nyikiwa nhlamuselo ya leswi nga ta landzela.
6. (a) Hikwalaho ka yini swi fanela leswaku milenge ya Yesu yi va emisaveni ni le lwandle? (b) Xana Pisalema 8:5-8 yi hetiseke rini hilaha ku heleleke?
6 A hi tlheleleni eka nhlamuselo ya Yesu. Leswi sweswi a tirhisaka vulawuri bya yena hilaha ku heleleke, milenge ya yena leyi fanaka ni ndzilo yi kandziye emisaveni ni le lwandle. Swi hilaha swi vuriweke hakona eka pisalema ya vuprofeta, leyi nge: “[Wena Yehovha] u tlhele u n’wi [Yesu] endla lontsongo eka lava fanaka ni Xikwembu, kutani u n’wi tlhandleka harhi ya ku vangama ni ku hatima. U n’wi endle a fuma mintirho ya mavoko ya wena; hinkwaswo u swi veke ehansi ka milenge yakwe: tinyimpfu ni timbuti ni tinkunzi, hinkwaswo ka swona, ni swiharhi swa nhova, tinyenyana ta tilo ni tinhlampfi ta lwandle, xin’wana ni xin’wana lexi hundzaka emintileni ya malwandle.” (Pisalema 8:5-8; nakambe vona Vaheveru 2:5-9.) Pisalema leyi yi hetiseke hilaha ku heleleke hi 1914, loko Yesu a vekiwa tanihi Hosi ya Mfumo wa Xikwembu ni loko nkarhi wa makumu wu sungula. Xisweswo, leswi Yohane a swi voneke exivonweni lexi swi endleke ku sukela elembeni rero.—Pisalema 110:1-6; Mintirho 2:34-36; Daniyele 12:4.
Ku Dzindza Ka Tilo Ka Vunkombo
7. Xana ntsumi ya matimba yi huwelela ku fana na yini, naswona sweswo swi kombisa yini?
7 Leswi Yohane a swi anakanyaka hi mhaka ya ntsumi leyi ya matimba swi kavanyetiwa hi ntsumi yoleyo hi yoxe, u te: “Kutani [ntsumi] yi huwelela hi rito lerikulu ku fana ni nghala loko yi vomba. Kuteloko yi huwelela, ku dzindza ka tilo ka vunkombo ku humesa marito ya kona.” (Nhlavutelo 10:3) Ku huwelela koloko hi matimba a ku ta koka mianakanyo ya Yohane, ku tiyisekisa leswaku hakunene Yesu i “Nghala leyi nga ya nyimba ya Yuda.” (Nhlavutelo 5:5) Nakambe Yohane a a swi xiya leswaku minkarhi yin’wana Yehovha na yena, u vuriwa loyi a ‘vombaka.’ Ku vomba ka Yehovha hi tlhelo ra vuprofeta swi twarisa ku hlengeletiwa ka Israyele wa moya ni ku ta ka “siku ra Yehovha” ro lovisa. (Hosiya 11:10; Yuwele 3:14, 16; Amosi 1:2; 3:7, 8) Swi le rivaleni leswaku ku vomba ka ntsumi leya matimba loku fanaka ni ka nghala ku fanekisela swiendlakalo leswikulu elwandle ni le misaveni. Ku endla leswaku ku dzindza ka tilo ka vunkombo ku vulavula.
8. Xana ‘marito ya ku dzindza ka tilo ka vunkombo’ i yini?
8 A hi ro sungula Yohane a twa ku dzindza ka tilo loku humaka exiluvelweni xa Yehovha. (Nhlavutelo 4:5) Le ndzhaku emasikwini ya Davhida, ku dzindza ka tilo ra xiviri minkarhi yin’wana a ku vuriwa leswaku i “rito ra Yehovha.” (Pisalema 29:3) Loko Yehovha a huwelele xikongomelo xakwe xo kwetsimisa vito ra yena n’wini emasikwini ya ntirho wa Yesu wa laha misaveni, eka vo tala a a pfuma tanihi ku dzindza ka tilo. (Yohane 12:28, 29) Hikwalaho, swa twala ku gimeta hi leswaku ‘mimpfumawulo ya ku dzindza ka tilo ka vunkombo’ i marito ya Yehovha hi yexe loko a vula swikongomelo swakwe. Mhaka ya leswaku a ku ri ni ku dzindza ka tilo ka “vunkombo” yi komba leswaku Yohane u twe mpfumawulo lowu heleleke.
9. Xana rito leri humaka etilweni ri lerise yini?
9 Kambe, yingisela! Ku ni rito rin’wana leri huwelelaka. Ri tisa xileriso lexi xi vonakaka xi nga tolovelekanga eka Yohane, ri te: “Loko ku dzindza ka matilo ka vunkombo ku vulavula, a ndzi lava ku tsala; kambe ndzi twa rito ri huma etilweni ri ku: ‘Lemela swilo leswi vuriweke hi ku dzindza ka matilo ka vunkombo, u nga swi tsali.’” (Nhlavutelo 10:4) Yohane u fanele a karhatekile a lava ku twa ni ku tsala marungula wolawo ya ku dzindza ka tilo, tanihi leswi ntlawa wa Yohane namuntlha wu swi rindzeleke hi mahlo-ngati leswaku Yehovha a paluxa swikongomelo swakwe leswo kwetsima leswi faneleke swi twarisiwa. Tinhlavutelo to tano ti ta ntsena hi nkarhi lowu vekiweke wa Yehovha.—Luka 12:42; nakambe vona Daniyele 12:8, 9.
Ku Hetiseka Ka Xihundla Xo Kwetsima
10. Ntsumi ya matimba yi hlambanya hi mani, naswona yi hlambanya yi ku yini?
10 Hambiswiritano, ka ha ri ni ntirho wun’wana lowu Yehovha a a ta wu nyika Yohane. Endzhaku ka ku dzindza ka tilo ka vunkombo, ntsumi ya matimba yi tlhele yi vulavula yi ku: “Hiloko ntsumi leyi ndzi yi voneke yi yime elwandle ni le misaveni yi tlakusela voko ra yona ra xinene etilweni, kutani yi hlambanya hi Loyi a hanyaka hi masiku ni masiku, loyi a tumbuluxeke tilo ni swilo leswi nga eka rona ni misava ni swilo leswi nga eka yona ni lwandle ni swilo leswi nga eka rona, yi ku: ‘A ku nge he hlweriwi.’” (Nhlavutelo 10:5, 6) Xana ntsumi ya matimba yi hlambanya hi mani? Yesu la kwetsimisiweke wa hlambanya, ku nga ri ha yena n’wini, kambe hi Mufumi la tlakukeke wa hinkwaswo, Yehovha, Muvumbi la nga fiki wa matilo ni misava. (Esaya 45:12, 18) Hi ku hlambanya loku, ntsumi yi tiyisekise Yohane leswaku Xikwembu a xi nga ha ta hlwela.
11, 12. (a) Xana ku vuriwa yini hi leswaku “a ku nge he hlweriwi”? (b) I yini lexi hetisisiwaka?
11 Rito ra Xigriki leri hundzuluxeriweke laha va ku ‘hlwela’ i khroʹnos, leri hi ku kongoma ri vulaka “nkarhi.” Xisweswo van’wana va vone onge xiviko lexi xa ntsumi a xi fanele xi hundzuluxeriwe hi ndlela leyi: “A ku nge he vi na nkarhi,” onge hiloko nkarhi wu ta hela hilaha hi swi tivaka ha kona. Kambe rito khroʹnos laha ri tirhisiwe handle ka xirhangi xo tiyisekisa. Hikwalaho a ri vuli nkarhi lowu tolovelekeke kambe, ri vula “nkarhi wo karhi” kumbe “mpimo wa nkarhi wo karhi.” Hi marito man’wana, a ku nge he vi na mpimo wa nkarhi wo karhi (kumbe, ku hlwela) eka Yehovha. Nakambe ku tirhisiwe riendli ra Xigriki leri humaka eka rito khroʹnos eka Vaheveru 10:37, laha Pawulo, loko a tshaha Habakuku 2:3, 4, a tsaleke leswaku “la taka u ta fika naswona a nga ka a nga hlweli.”
12 “A ku nge he hlweriwi”—marito wolawo ma tsakisa ngopfu eka lava ntlawa wa Yohane lava dyuhalaka namuntlha! Xana hi le mhakeni yihi laha ku nga ha riki na ku hlwela? Yohane u te: “Kambe emasikwini ya ku pfuma ka ntsumi ya vunkombo, loko yi ri kusuhi ni ku yimba mhalamhala ya yona, xihundla xo kwetsima xa Xikwembu hi ku ya hi mahungu lamanene lawa xi ma vuleke eka mahlonga ya xona va nga vaprofeta xi ta hetisisiwa hakunene.” (Nhlavutelo 10:7) Nkarhi wa Yehovha wu tshinele leswaku a tisa xihundla xakwe lexo hlawuleka eku chaputeni ka xona loku tsakisaka, xi humelela hi ndlela leyi vangamaka!
13. I yini xihundla xo kwetsima xa Xikwembu?
13 Xana xihundla lexi xo kwetsima i yini? Xi katsa mbewu leyi eku sunguleni yi tshembisiweke aEdeni, leyi vonakeke yi ri Yesu Kreste. (Genesa 3:15; 1 Timotiya 3:16) Nakambe xi fambisana ni wansati loyi Mbewu yi humaka eka yena. (Esaya 54:1; Vagalatiya 4:26-28) Ku tlula kwalaho, xi hlanganisa swirho swa vumbirhi swa ntlawa wa mbewu ni Mfumo lowu Mbewu yi fumaka eka wona. (Luka 8:10; Vaefesa 3:3-9; Vakolosa 1:26, 27; 2:2; Nhlavutelo 1:5, 6) Mahungu lamanene ya Mfumo lowu wa le tilweni wo hlawuleka ma fanele ma chumayeriwa emisaveni hinkwayo hi nkarhi lowu wa makumu.—Matewu 24:14.
14. Ha yini khombo ra vunharhu ri fambisana ni Mfumo wa Xikwembu?
14 Kunene, lawa i mahungu lamanene ngopfu. Kambe, eka Nhlavutelo 11:14, 15, khombo ra vunharhu ri fambisana ni Mfumo. Ha yini? Hikuva eka vanhu lava rhandzaka mafambiselo ya swilo ya Sathana, ku twarisiwa ka mahungu lamanene ya leswaku xihundla lexo kwetsima xa Xikwembu xa hetiseka—ku nga leswaku Mfumo wa Xikwembu wa Mesiya wu tshinele—i mahungu ya khombo. (Ringanisa na 2 Vakorinto 2:16.) Swi vula leswaku fambiselo ra misava leri va ri lavaka swinene ri le kusuhi ni ku lovisiwa. Marito ya ku dzindza ka tilo ka vunkombo, lama tameleke switsundzuxo swo tano swa bubutsa leri chavisaka, ma va lama twakalaka naswona ma pfuma ku antswa loko ku tshinela siku lerikulu ra ku tirihisela ka Yehovha.—Sofaniya 1:14-18.
Buku-nsongwa Leyi Pfulekeke
15. Xana rito leri humaka etilweni ni ntsumi ya matimba va n’wi byele yini Yohane, naswona a ku ta endleka yini eka yena?
15 Loko Yohane a ha yimele ku yimbiwa ka mhalamhala leyi ya vunkombo ni ku hetisisiwa ka xihundla xo kwetsima xa Xikwembu, u nyikiwe xiavelo xin’wana, u te: “Kutani rito leri ndzi ri tweke ri huma etilweni ri tlhela ri vulavula na mina, ri ku: ‘Famba, u ya teka buku-nsongwa leyi pfulekeke leyi nga evokweni ra ntsumi leyi yimeke elwandle ni le misaveni.’ Hiloko ndzi ya eka ntsumi ndzi yi byela leswaku yi ndzi nyika buku-nsongwa leyitsongo. Kutani yi ku eka mina: ‘Yi teke u yi dya hinkwayo, yi ta endla khwiri ra wena ri bava, kambe enon’wini wa wena yi ta tsokombela ku fana ni vulombe.’ Hiloko ndzi teka buku-nsongwa leyitsongo evokweni ra ntsumi ndzi yi dya hinkwayo, enon’wini wa mina a yi tsokombela ku fana ni vulombe; kambe loko ndzi yi dyile hinkwayo, khwiri ra mina ri bava. Kutani va ku eka mina: ‘U fanele ku tlhela u profeta malunghana ni vanhu ni matiko ni tindzimi ni tihosi to tala.’”—Nhlavutelo 10:8-11.
16. (a) Xana muprofeta Ezekiyele u ve ni ntokoto lowu fanaka ni wa Yohane hi ndlela yihi? (b) Ha yini buku-nsongwa leyitsongo a yi twala yi tsokombela eka Yohane, kambe ha yini a yi bava ku yi gayela?
16 Ntokoto wa Yohane wu fananyana ni lowuya wa muprofeta Ezekiyele enkarhini wa vuhlonga bya yena etikweni ra Babilona. Na yena u lerisiwe ku dya buku leyi a yi tsokombela enon’wini wakwe. Kambe loko yi tate khwiri ra yena, yi n’wi endle leswaku a va ni vutihlamuleri byo profeta swilo swo bava eka yindlu ya Israyele leyi xandzukeke. (Ezekiyele 2:8–3:15) Buku-songwa leyi phendliweke leyi Yesu Kreste la kwetsimisiweke a yi nyikaka Yohane na yona i rungula ra Xikwembu. Yohane u fanele a chumayela malunghana ni “vanhu ni matiko ni tindzimi ni tihosi to tala.” Loko a yi dya buku-songwa leyi ya tsokombela, hikuva yi huma eka xihlovo xo kwetsima. (Ringanisa na Pisalema 119:103; Yeremiya 15:15, 16.) Kambe ya bava ku yi gayela hikuva—tanihi le ka Ezekiyele—yi profeta swilo swo biha swa vanhu lava xandzukeke.—Pisalema 145:20.
17. (a) I vamani lava byeleke Yohane leswaku a “tlhela” a profeta, naswona leswi swi vula yini? (b) Xana xivono lexi hlamarisaka lexi Yohane a xi voneke xi fanele xi hetiseka rini?
17 Handle ko tipfinyinga lava byelaka Yohane leswaku a tlhela a profeta, i Yehovha Xikwembu na Yesu Kreste. Hambileswi Yohane a yisiweke exihlaleni xa Patmosi, ana se u profetile malunghana ni vanhu, matiko, tindzimi ni tihosi, hi ku tirhisa rungula leri tsariweke ebukwini ya Nhlavutelo. Rito leri nge “tlhela,” ri vula leswaku u fanele ku tsala ni ku twarisa mahungu hinkwawo lama tsariweke ebukwini ya Nhlavutelo. Kambe tsundzuka, laha kahle-kahle Yohane a a ta hlanganyela exivonweni xa vuprofeta. Entiyisweni leswi a swi tsalaka, i vuprofeta lebyi a byi fanele byi hetiseka endzhaku ka 1914, loko ntsumi ya matimba yi teka xikhundlha xa yona yi kandziya emisaveni ni le lwandle. Hikwalaho, xana xivumbeko lexi xo hlamarisa xi vula yini eka ntlawa wa Yohane namuntlha?
Buku-nsongwa Leyitsongo Namuntlha
18. Eku sunguleni ka siku ra Hosi, xana lava ntlawa wa Yohane va swi kombise njhani leswaku va yi tsakela buku ya Nhlavutelo?
18 Leswi Yohane a swi voneke swi wu fanekisela hi ndlela yo hlamarisa ntokoto wa lava ntlawa wa Yohane eku sunguleni ka siku ra Hosi. Ku twisisa ka vona swikongomelo swa Yehovha, swin’we ni nhlamuselo ya ku dzindza ka tilo ka vunkombo, a ku nga helelanga enkarhini wolowo. Hambiswiritano, va yi tsakele swinene buku ya Nhlavutelo, naswona Charles Taze Russell enkarhini wa yena u hlamusele swiyenge swa yona swo tala. Endzhaku ka rifu ra yena hi 1916, vunyingi bya marungula lawa a ma tsaleke ma hlengeletiwile ivi ma kandziyisiwa ma va buku leyi nge The Finished Mystery. Kambe hi ku famba ka nkarhi, swi ve erivaleni leswaku buku leyi a yi na nhlamuselo leyi heleleke ya buku ya Nhlavutelo. Masalela ya vamakwavo va Kreste a ma fanele ku rindza kukondza loko swivono swi sungula ku hetiseka, leswaku ma ta ya twisisa kahle matsalwa wolawo lama huhuteriweke.
19. (a) Xana Yehovha Xikwembu u va tirhise njhani lava ntlawa wa Yohane niloko marito ya ku dzindza ka tilo ka vunkombo ma nga si kandziyisiwa hi xitalo? (b) Lava ntlawa wa Yohane va nyikiwe rini buku-nsongwa leyitsongo leyi phendliweke, naswona leswi a swi vula yini eka vona?
19 Hambiswiritano, tanihi Yohane va tirhisiwe hi Yehovha niloko marito ya ku dzindza ka tilo ka vunkombo ma nga si kandziyisiwa hi xitalo. Va chumayele hi ku gingiriteka ku ringana malembe ya 40 emahlweni ka 1914, naswona va tikarhatele ku tshama va ri karhi va hiteka hi nkarhi wa nyimpi yo sungula ya misava. Va tikombise va ri vona lava, loko n’wini wa vona a fika, va nga kumeka va ri karhi va nyika va yindlu yakwe swakudya hi nkarhi lowu faneleke. (Matewu 24:45-47) Xisweswo, hi 1919 hi vona lava nyikiweke buku-nsongwa leyitsongo leyi pfulekeke—ku nga rungula leri pfulekeke leri a va fanele va ri chumayela vanhu. Ku fana na Ezekiyele a va ri ni rungula leri yaka eka nhlengeletano leyi nga tshembekiki—ku nga Vujagana—leyi tivuleke leyi tirhelaka Xikwembu kambe, entiyisweni, a yi nga xi tirheli. Ku fana na Yohane a va fanele va chumayela swinene eka “vanhu ni matiko ni tindzimi ni tihosi to tala.”
20. Xana ku dya ka Yohane buku-nsongwa a swi fanekisela yini?
20 Ku dya ka Yohane buku a swi fanekisela leswaku vamakwavo va Yesu va xi amukela xiavelo lexi. Xi ve xiphemu xa vona ku fikela laha se a va voniwa va ri xiyenge xa Rito ra Xikwembu leri huhuteriweke, leri va tiwundlaka hi rona. Kambe leswi a va fanele va swi chumayela a swi tamele marito ya ku avanyisa ka Yehovha lawa a ma nga nandzihi eka vanhu vo tala. Hakunene, swi katse makhombo lama profetiweke eka Nhlavutelo ndzima 8. Hambiswiritano, a swi tsokombela eka Vakreste lava va xiviri ku tiva vuavanyisi byebyo ni ku xiya leswaku i Yehovha loyi a va tirhisa leswaku va byi huwelela.—Pisalema 19:9, 10.
21. (a) Xana rungula ra buku-nsongwa leyitsongo ri ve leri tsokombelaka ni le ka lava ntshungu lowukulu hi ndlela yihi? (b) Ha yini mahungu lamanene ma ri yo biha eka vanhu lava kanetaka?
21 Hi ku famba ka nkarhi, rungula ra buku leyi ri tlhele ri tsokombela eka lava ‘ntshungu lowukulu, lava humaka eka matiko hinkwawo ni tinyimba hinkwato ni vanhu hinkwavo ni tindzimi hinkwato,’ lava a va ri ni nhlomulo hikwalaho ka swilo leswi nyenyetsaka leswi va swi voneke swi endliwa eVujaganini. (Nhlavutelo 7:9; Ezekiyele 9:4) Na vona va huwelela mahungu lamanene hi ku hiseka, va tirhisa marito yo tsokombela, ya musa ku hlamusela lunghiselelo leri hlamarisaka ra Yehovha eka Vakreste lava fanaka ni tinyimpfu. (Pisalema 37:11, 29; Vakolosa 4:6) Kambe eka vanhu lava kanetaka, lawa i mahungu yo biha. Ha yini? Ma vula leswaku mafambiselo lawa va ma tshembaka—ni lawa ma nga ha vaka ma va tisele ku eneriseka swa xinkarhana—ma fanele ku hundza. Eka vona, mahungu lamanene ma vula khombo.—Vafilipiya 1:27, 28; ringanisa na Deteronoma 28:15; 2 Vakorinto 2:15, 16.
[Swifaniso leswi nga eka tluka 160]
Lava ntlawa wa Yohane ni vanakulobye va huwelela rungula ro tsokombela ni ku bava eka vanhu hinkwavo