Ndzima 42

Tilo Lerintshwa Ni Misava Leyintshwa

1. I yini leswi Yohane a swi hlamuselaka loko ntsumi yi n’wi tlherisela eku sunguleni ka Mfumo wa Gidi ra Malembe?

XIVONO lexi xi tsakisaka xi ya emahlweni xi paluxeka loko ntsumi yi tlherisela Yohane eku sunguleni ka Mfumo wa Gidi ra Malembe. Xana u hlamusele yini? U te: “Kavaloko ndzi vona tilo lerintshwa ni misava leyintshwa; hikuva tilo ro sungula ni misava yo sungula a swi hundzile, ni lwandle ri nga ha ri kona.” (Nhlavutelo 21:1) Xolexo i xivono xo saseka hakunene!

2. (a) Vuprofeta bya Esaya lebyi vulavulaka hi matilo lamantshwa ni misava leyintshwa byi hetiseke njhani eka Vayuda lava tlheleleke etikweni ra rikwavo hi 537 B.C.E.? (b) Hi swi tivisa ku yini leswaku vuprofeta bya Esaya byi ta tlhela byi hetiseka, naswona xitshembiso lexi xi ta hetiseka njhani?

² Loko ka ha sale madzana ya malembe leswaku ku fika siku ra Yohane, Yehovha u tshame a byela Esaya a ku: “Hikuva ndzi tumbuluxa matilo lamantshwa ni misava leyintshwa; swilo swo sungula a swi nge tsundzukiwi, hambi embilwini a swi nge ti.” (Esaya 65:17; 66:22) Vuprofeta lebyi byi hetiseke ro sungula loko Vayuda vo tshembeka va tlhelela eYerusalema hi 537 B.C.E. endzhaku ka loko va hete malembe ya 70 va ri evuhlongeni eBabilona. Hi nkarhi wolowo wa ku pfuxetiwa, hi vona lava a va ri rixaka ra vanhu lava baseke, ku nga “misava leyintshwa,” lava lawuriwaka hi hulumendhe leyintshwa, ku nga “matilo lamantshwa.” Hambiswiritano, muapostola Petro u vulavule hi ku hetiseka kun’wana ka vuprofeta lebyi, a ku: “Kambe ku ni matilo lamantshwa ni misava leyintshwa leswi hi swi rindzeleke hi ku ya hi xitshembiso xa yena, naswona ku ta va ni ku lulama eka swona.” (2 Petro 3:13) Yohane sweswi u kombisa leswaku xitshembiso lexi xi hetiseka esikwini ra Hosi. “Tilo ro sungula ni misava yo sungula,” ku nga mafambiselo ya swilo ya Sathana lama hleriweke, swin’we ni tihulumendhe ta wona leti kuceteriwaka hi Sathana ni madimona ya yena, swi ta hundza. “Lwandle” leri kariheke ra lavo homboloka, ku nga vanhu lava xandzukeke, a ri nge he vi kona. Ri ta siviwa hi “tilo lerintshwa ni misava leyintshwa”—ku nga vanhu lava nga ta hanya emisaveni leyintshwa va lawuriwa hi hulumendhe leyintshwa, Mfumo wa Xikwembu.—Ringanisa na Nhlavutelo 20:11.

3. (a) Yohane u hlamusela yini, naswona Yerusalema Lowuntshwa i yini? (b) Yerusalema Lowuntshwa ‘wu xika hi le tilweni’ hi ndlela yihi?

³ Yohane u ye emahlweni a ku: “Ndzi vona ni muti wo kwetsima, Yerusalema Lowuntshwa, wu xika hi le tilweni wu huma eka Xikwembu, wu lunghisiwe wonge i mutekiwa a tisasekisele nuna wa yena.” (Nhlavutelo 21:2) Yerusalema Lowuntshwa i mutekiwa wa Kreste, la vumbiwaka hi Vakreste lava totiweke lava tshamaka va tshembekile va kala va ya fa ivi va pfuxiwa leswaku va ya va tihosi ni vaprista swin’we na Yesu la kwetsimisiweke. (Nhlavutelo 3:12; 20:6) Tanihi leswi Yerusalema wa laha misaveni a veke ntsindza wa hulumendhe ya le Israyele wa khale, Yerusalema Lowuntshwa lowu vangamaka swin’we ni Muteki wa yena va vumba hulumendhe ya mafambiselo lamantshwa ya swilo. Leri i tilo lerintshwa. ‘Mutekiwa loyi u xika hi le tilweni,’ ku nga ri hi xiviri, kambe hi ku teka goza ro kongomisa swilo laha misaveni. Mutekiwa wa Xinyimpfana u ta va mupfuni wa xona la tshembekaka eku lawuleni ka hulumendhe yo lulama eka vanhu hinkwavo. Lowu wu ta va nkateko hakunene eka misava leyintshwa!

4. I xitshembiso xihi lexi Xikwembu xi xi tshembisaka lexi yelanaka ni lexi xi xi endleke eka tiko ra Israyele leri a ra ha ku vumbiwa?

⁴ Yohane u ye emahlweni a ku: “Kutani ndzi twa rito lerikulu ri huma exiluvelweni ri ku: ‘Waswivo! Ntsonga wa Xikwembu wu le vanhwini, xi ta tshama na vona, naswona vona va ta va vanhu va xona. Xikwembu hi xiviri xi ta va na vona.’” (Nhlavutelo 21:3) Loko Yehovha a endla ntwanano wa Nawu ni tiko ra Israyele leri a ri ri rintshwa hi nkarhi wolowo, u tshembisile: “Ndzi ta veka tabernakela ya mina exikarhi ka n’wina, naswona moya-xiviri wa mina a wu nge mi nyenyi. Kunene ndzi ta famba exikarhi ka n’wina ndzi tikombisa ndzi ri Xikwembu xa n’wina, kutani n’wina mi ta tikombisa mi ri vanhu va mina.” (Levhitika 26:11, 12) Sweswi Yehovha u nyika vanhu lava tshembekaka xitshembiso lexi fanaka. Hi Siku ra Vuavanyisi leri nga ta teka gidi ra malembe, va ta va vanhu vo hlawuleka swinene eka yena.

5. (a) Xikwembu xi ta tshama njhani ni vanhu hi nkarhi wa Mfumo wa Gidi ra Malembe? (b) Xikwembu xi ta tshama exikarhi ka vanhu hi ndlela yihi endzhaku ka Mfumo wa Gidi ra Malembe?

⁵ Hi nkarhi wa Mfumo wa Gidi ra Malembe, Yehovha u ta “tshama” exikarhi ka vanhu eka lunghiselelo ra xinkarhana, u ta yimeriwa hi N’wana wa yena la nga hosi, Yesu Kreste. Hambiswiritano, loko ku hela Mfumo wa Gidi ra Malembe, loko Yesu a tlherisela Mfumo eka Tata wa yena, a ku nge he laveki muyimeri kumbe muvulavuleri wa le vuhosini. Yehovha u ta tshama ni “vanhu va [yena]” hi tlhelo ra moya hilaha ku nga heriki. (Ringanisa na Yohane 4:23, 24.) Rolero ri ta va ri ri lunghelo lerikulu hakunene eka vanhu lava pfuxetiweke!

6, 7. (a) I switshembiso swihi leswikulu leswi Yohane a swi paluxaka, naswona swi ta kumiwa hi vamani? (b) Esaya u yi hlamusela njhani paradeyisi ya moya ni ya xiviri?

⁶ Yohane u ye emahlweni a ku: “Kutani xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula swi hundzile.” (Nhlavutelo 21:4) Nakambe hi tsundzuxiwa hi switshembiso leswi huhuteriweke leswi vuriweke enkarhini lowu hundzeke. Esaya na yena a a wu langutele hi mahlo-ngati nkarhi lowu rifu ni ku kolola a swi ta va swi nga ha ri kona kutani nhlomulo a wu ta siviwa hi ntsako. (Esaya 25:8; 35:10; 51:11; 65:19) Yohane u tiyisekisa leswaku switshembiso leswi swi ta hetiseka hi ndlela leyi hlamarisaka hi Siku ra Vuavanyisi leri nga ta teka gidi ra malembe. Lava ntshungu lowukulu hi vona va nga ta rhanga va tiphina hi mikateko leyi. “Xinyimpfana, lexi nga exikarhi ka xiluvelo,” lexi nga ta hambeta xi va risa, “xi [ta] va kongomisa eminseledyaneni ya mati ya vutomi. Kutani Xikwembu xi ta sula mihloti hinkwayo ematihlweni ya vona.” (Nhlavutelo 7:9, 17) Kambe eku heteleleni hinkwavo lava pfuxiweke eku feni, lava va kombisaka ripfumelo eka malunghiselelo ya Yehovha, va ta va swin’we na vona, va tiphina eparadeyisini ya moya ni ya xiviri.

⁷ Esaya u ri: “Hi nkarhi wolowo mahlo ya lava nga voniki ma ta pfuriwa, ni tindleve ta lava nga twiki ti ta pfuriwa.” Ina, “hi nkarhi wolowo la khutaka u ta tlula kukota mhunti, ni ririmi ra la nga vulavuriki ri ta huwelela hi ku tsaka.” (Esaya 35:5, 6) Nakambe, hi nkarhi wolowo, “kunene va ta aka tindlu va tshama eka tona; kunene va ta rima masimu ya vhinya va dya mihandzu ya wona. A va nge aki kutani ku tshama un’wana; a va nge rimi kutani ku dya un’wana. Hikuva masiku ya vanhu va mina ma ta fana ni masiku ya murhi; ni ntirho wa mavoko ya vona, vahlawuriwa va mina va ta wu tirhisa hi xitalo.” (Esaya 65:21, 22) Leswi swi vula leswaku a va nge simuriwi emisaveni.

8. Yehovha u ri yini malunghana ni ku tshembeka ka switshembiso leswi leswikulu?

⁸ Hakunene hi vona swifaniso leswi hlamarisaka emianakanyweni ya hina loko hi ri karhi hi anakanyisisa hi switshembiso leswi! Vanhu lava tshembekaka va ta kuma malunghiselelo lama hlamarisaka ehansi ka hulumendhe ya rirhandzu ya le tilweni. Xana switshembiso swo tano swi twala swi nga tshembeki? Xana swo va milorho ya mukhalabye loyi a a yisiwe exihlaleni xa Patmosi? Yehovha hi byakwe wa hlamula: “Kutani Loyi a tshameke exiluvelweni a ku: ‘Waswivo, ndzi endla swilo hinkwaswo swi va leswintshwa.’ A tlhela a ku: ‘Tsala, hikuva marito lawa ma tshembekile, i ya ntiyiso.’ Kutani a ku eka mina: ‘Se swi endlekile! Hi mina Alfa na Omega, masungulo ni makumu.’”—Nhlavutelo 21:5, 6a.

9. Ha yini mikateko leyi ya nkarhi lowu taka hi fanele hi yi teka yi ri leyi nga ta hetiseka hakunene?

⁹ Swi fana ni loko Yehovha hi yexe a sayina xitiyisekiso xa switshembiso leswi swa le nkarhini lowu taka. I mani loyi a a ta kanya mbilu a kanakana Muhetisisi loyi wa Switshembiso? Phela, switshembiso leswi swa Yehovha swi tshembeke lerova u vulavula onge hiloko se swi hetisekile: Onge hiloko “se swi endlekile!” Xana Yehovha a hi “Alfa na Omega . . . , Loyi a nga kona ni loyi a a ri kona ni loyi a taka, wa Matimba Hinkwawo”? (Nhlavutelo 1:8) Hakunene hi yena! U vula hi byakwe a ku: “Hi mina wo sungula ni wo hetelela, a ku na Xikwembu xin’wana handle ka mina.” (Esaya 44:6) Hikwalaho, u huhutela vuprofeta a tlhela a byi hetisisa hinkwabyo hi ku landza vuxokoxoko bya kona. Sweswo swi tiyisa ripfumelo hakunene! Hikwalaho u tshembisa a ku: “Waswivo, ndzi endla swilo hinkwaswo swi va leswintshwa.” Ematshan’weni yo kanakana loko swihlamariso leswi swi ta humelela hakunene, entiyisweni hi fanele hi tivutisa: ‘Xana ndzi endla yini leswaku ndzi ta kuma mikateko yoleyo?’

“Mati” Lama Kumiwaka Hi Lava Nga Ni Torha

10. I “mati” wahi lawa Yehovha a ma lunghiselelaka, naswona ma yimela yini?

¹⁰ Yehovha hi yexe u ri: “Mani na mani la khomiweke hi torha ndzi ta n’wi nwisa mahala eka nseledyana wa mati ya vutomi.” (Nhlavutelo 21:6b) Leswaku munhu a tima torha rolero, u fanele a khathala hi xilaveko xa yena xa moya naswona a tiyimisela ku amukela ‘mati’ lawa Yehovha a ma lunghiselelaka. (Esaya 55:1; Matewu 5:3) I “mati” ya yini? Yesu u hlamule xivutiso xexo loko a chumayela wansati un’wana etlhelo ka xihlovo xa le Samariya. U te: “Mani na mani la nwaka mati lawa ndzi nga ta n’wi nyika wona a nge he tlheli a twa torha, kambe mati lawa ndzi nga ta n’wi nyika wona ma ta va nseledyana wa mati lama pfelelaka ma nyika vutomi lebyi nga heriki.” “Nseledyana [wolowo] wa mati ya vutomi” wu khuluka wu suka eka Xikwembu ha Kreste tanihi leswi a nga lunghiselelo ra xona ro vuyisela vanhu evuton’wini lebyi hetisekeke. Ku fana ni wansati wa Musamariya, hi fanele hi swi hisekela swinene ku nwa mati lama humaka enseledyaneni wolowo lowu enteke! Naswona ku fana ni wansati yoloye, hi fanele hi tiyimisela hakunene ku tshika swilo leswi nga nyawuriki leswaku hi ta byela van’wana mahungu lamanene!—Yohane 4:14, 15, 28, 29.

Lava Hlulaka

11. Yehovha u tshembisa yini, naswona marito wolawo ma rhanga ma tirha eka vamani?

¹¹ Lava va nwaka “mati” wolawo lama phyuphyisaka va fanele va tlhela va hlula, tanihi leswi Yehovha a yaka emahlweni a ku: “Mani na mani la hlulaka u ta dya ndzhaka ya swilo leswi, kutani ndzi ta va Xikwembu xa yena, yena a va n’wana wa mina.” (Nhlavutelo 21:7) Xitshembiso lexi xa fana ni switshembiso leswi kumekaka eka marungula lama yaka emavandlheni ya nkombo; hikwalaho, marito lawa ma fanele ma rhanga ma tirha eka vadyondzisiwa lava totiweke. (Nhlavutelo 2:7, 11, 17, 26-28; 3:5, 12, 21) Se i makume ya malembe vamakwavo va moya va Kreste va ri langutele hi mahlo-ngati lunghelo ra ku va xiphemu xa Yerusalema Lowuntshwa. Loko va hlula, tanihi leswi Yesu a hluleke, va ta kuma leswi va tshembisiweke swona.—Yohane 16:33.

12. Xitshembiso xa Yehovha lexi nga eka Nhlavutelo 21:7 xi ta hetiseka njhani eka lava ntshungu lowukulu?

¹² Lava ntshungu lowukulu lava humaka eka matiko hinkwawo na vona va langutele xitshembiso lexi. Na vona va fanele va hlula, va tirhela Xikwembu hi ku tshembeka ku kondza va hundza enhlomulweni lowukulu. Kutani va ta nghena endzhakeni ya vona ya laha misaveni, ku nga ‘mfumo lowu va lunghiseriweke wona hi mpfhuka misava yi va kona.’ (Matewu 25:34) Vona swin’we ni van’wana va tinyimpfu ta Hosi ta laha misaveni lava hlulaka ndzingo eku heleni ka gidi ra malembe va vuriwa “vakwetsimi.” (Nhlavutelo 20:9) Va ta va ni vuxaka lebyikulu ni lebyi kwetsimaka swin’we ni Muvumbi wa vona, Yehovha Xikwembu, tanihi swirho swa nhlengeletano ya yena ya vuako hinkwabyo.—Esaya 66:22; Yohane 20:31; Varhoma 8:21.

13, 14. Leswaku hi kuma switshembiso leswikulu swa Xikwembu, i mikhuva yihi leyi hi faneleke hi yi papalata hi ku helela, naswona ha yini?

¹³ Leswi Timbhoni ta Yehovha ti nga ni ntshembo lowu tsakisaka, i swa nkoka swinene leswaku sweswi ti hambeta ti nga nyamisiwi hi swilo swa misava ya Sathana! Hi fanele hi va lava tiyeke, lava tiyimiseleke leswaku Diyavulosi a nga hi hambukisi kutani hi hlayiwa exikarhi ka vanhu lava Yehovha a va hlamuselaka a ku: “Kambe loko ku ri matoya ni lava nga riki na ripfumelo ni lava nyenyetsaka hikwalaho ka thyaka ra vona ni lava dlayaka hi vomu ni timbhisa ni lava tirhisaka vungoma ni vagandzeri va swifaniso swa hava ni vahembi hinkwavo, xiavelo xa vona xi ta va etiveni leri pfurhaka ndzilo ni xivavula. Rona ri vula rifu ra vumbirhi.” (Nhlavutelo 21:8) Ina, loyi a languteleke ku va mudyandzhaka u fanele a papalata mikhuva leyi ya thyaka ya mafambiselo lawa ya khale ya swilo. U fanele a hlula hi ku tshama a tshembekile hambiloko a langutane ni mintshikilelo ni miringo hinkwayo.—Varhoma 8:35-39.

¹⁴ Hambileswi Vujagana byi tivulaka mutekiwa wa Kreste, byi ni mikhuva leyi nyenyetsaka leyi Yohane a yi hlamuselaka laha. Hikwalaho byi ta loviseriwa makumu swin’we ni mfumo hinkwawo wa Babilona Lonkulu. (Nhlavutelo 18:8, 21) Hilaha ku fanaka, un’wana ni un’wana wa vatotiwa kumbe wa lava ntshungu lowukulu loyi a endlaka swilo swoleswo swo biha, kumbe a khutazaka van’wana leswaku va swi endla, u ta loviseriwa makumu. Loko va hambeta ni swiendlo leswi, a va nge swi kumi switshembiso leswi. Naswona emisaveni leyintshwa, un’wana ni un’wana loyi a ringetaka ku sungula mikhuva leyi u ta lovisiwa hi xihatla, a fa rifu ra vumbirhi leri ku nga riki na ntshembo wo pfuxiwa eka rona.—Esaya 65:20.

15. I vamani vahluri lava hlamarisaka, naswona Nhlavutelo yi chaputa hi ndlela leyi hlamarisaka hi ku kombisa xivono xihi?

¹⁵ Vahluri lava hlamarisaka i Xinyimpfana, Yesu Kreste, ni mutekiwa wa xona, ku nga lava 144 000, kumbe Yerusalema Lowuntshwa. Kutani swa fanela leswi Nhlavutelo yi chaputaka hi ndlela yoleyo leyi hlamarisaka hi ku va Yohane a vona Yerusalema Lowuntshwa la hlamarisaka swinene ro hetelela! Sweswi Yohane u hlamusela xivono xin’we xo hetelela.

[Swifaniso leswi nga eka tluka 302]

Vanhu hinkwavo lava nga ta va va hanya emisaveni leyintshwa va ta va ni ntirho lowu tsakisaka naswona va ta va va ri vanghana