Ndzima 78

Tshamani Mi Tilunghisile!

ENDZHAKU ka ku tsundzuxa mintshungu ehenhleni ka makwanga, ni ku tsundzuxa vadyondzisiwa va yena mayelana ni ku nyika nkhathalelo lowu tlurisaka eka swilo leswi vonekaka, Yesu wa khutaza a ku: “U nga chavi wee ntlhambinyana, hikuva Tata wa n’wina u tsakele ku mi nyika mfumo.” Xisweswo u hlavutela leswaku ko va nhlayo yintsongo ntsena (leyi endzhakunyana yi hlamuseriweke tanihi 144 000) leyi nga ta va eMfun’weni wa le tilweni. Vunyingi bya vanhu lava kumaka vutomi lebyi nga heriki byi ta va bya vafumiwa va la misaveni va Mfumo.

Mawaku nyiko leyi hlamarisaka swonghasi, “mfumo”! Loko a hlamusela ku amukela lokunene loku vadyondzisiwa va faneleke ku va na kona leswaku va wu kuma, Yesu wa va khutaza a ku: “Xavisani leswi mi swi fuweke, mi nyika swisiwana.” Ina, va fanele ku tirhisa xuma xa vona leswaku va pfuna van’wana emoyeni, kutani xisweswo va aka “xuma lexi nga heriki ematilweni.”

Ku ya emahlweni Yesu u tsundzuxa vadyondzisiwa va yena ku tshama va tilunghisele ku vuya kakwe. U ri: “A ku tsimbiwe swisuti swa n’wina, ni timboningo ta n’wina a ti lumekiwe. Kotisani vanhu lava langutelaka n’wini wa vona, siku a vuyaka enkhubyeni wa vukati, leswaku loko a fika ni loko a gongondza, va ta hatlisa va n’wi pfulela. Ku katekile malandza lawa, ku nga ta ku loko n’wini wa wona a fika, a nga ta ma kuma ma hitekile! Ndzi tiyisile ndzi ri ka n’wina: Ú ta titsimba xisuti, a ma tshamisisa eswakudyeni, a ma phamela.”

Exifanisweni lexi, ku tilunghisela ka malandza ku vuya ka n’wini wa wona ku kombisiwa hi ku koka ka wona tingoti ta wona to leha kutani ya ti boha ehansi ka swisuti swa wona; ni ku hambeta ka wona ya khathalela mintirho ya wona ku fikela nivusiku hi ku voninga ka timboni leti nga ni mafurha lama ringaneke. Yesu wa hlamusela: ‘Ni loko n’wini a fika nivusiku enkarhini wa vumbirhi [ku sukela kwalomu ka kaye ni madyambu ku ya exikarhi ka vusiku], hambi ku ri wa vunharhu [ku sukela exikarhi ka vusiku ku ya kwalomu ka nharhu nimixo], naswona a ma kuma ma tilunghisile, ma katekile!’

N’wini u hakela malandza ya yena hi ndlela leyi nga tolovelekangiki. U va tshamisise etafuleni kutani a sungula ku va phamela. U hanyisana na vona, tanihi vanghana lavo tshembeka, kambe hayi tanihi mahlonga. Mayana hakelo leyinene swonghasi ya ku hambeta ka vona va tirhela n’wini wa vona vusiku hinkwabyo loko va ha yimele ku vuya ka yena! Yesu u hetelela hi ku: “Na n’wina, tshamani mi tilunghisile, hikuva N’wana-wa-Munhu u ta ta hi nkarhi lowu mi nga wu ehleketiki.”

Kutani Petro wa vutisa: “Hosi, xana u kongoma hina hi xifaniso lexi, kumbe xana u kongoma vanhu hinkwavo ke?”

Ematshan’wini ya ku hlamula hi ku kongoma, Yesu u nyikela xikombiso xin’wana. “Kasi xana mulanguteri lowo tshembeka, lowa vutlhari i mani xana,” wa vutisa, “yena loyi n’wini wa yena a nga ta n’wi veka ku va mulanguteri wa malandza ya yena, leswaku a ma pimela swakudya a ma nyika hi nkarhi wa kona ke? Ú katekile nandza loyi, ku nga ta ku loko n’wini wa yena a fika, a nga ta n’wi kuma a endlisa sweswo. Ndza mi byela ndzi tiyisile: Ú ta n’wi veka ku va mulanguteri wa hinkwaswo leswi a swi fuweke.”

Swi le rivaleni leswaku “n’wini” i Yesu Kriste. “Mulanguteri” u fanekisela “ntlhambinyana” wa vadyondzisiwa tanihi ntlawa wun’we, naswona “malandza” ya vula ntlawa lowu fanaka wa 144 000 lowu kumaka Mfumo wa le tilweni, kambe xiga lexi xi kandziyisa ntirho wa vona tanihi vanhu. “Leswi a swi fuweke” leswi mulanguteri lowo tshembeka a vekiweke ku swi khathalela i timhaka ta n’wini ta vuhosi emisaveni, leti katsaka vafumiwa va Mfumo va la misaveni.

Loko a ya emahlweni ni xifaniso, Yesu u komba ku koteka ka leswaku a hi swirho hinkwaswo swa mulanguteri yoloye, kumbe ntlawa wa nandza leswi nga ta tshembeka, u hlamusela a ku: “Loko nandza yoloye a ehleketa embilwini ya yena, a ku: ‘N’wini wa mina wa hlwela ku fika,’ kutani a sungula ku ba malandza ya xinuna ni ya xisati, a dya, a nwa, a pyopyiwa, hi kona loko n’wini wa nandza loyi a nga ta fika, hi siku leri nandza a nga n’wi langutelangiki ha rona . . . , kutani n’wini u ta ba nandza loyi swinene.”

Yesu u vula leswaku ku ta ka yena ku tise nkarhi wo vava eka Vayuda, tanihi leswi van’wana va amukelaka naswona van’wana va alaka tidyondzo ta yena. Ku tlula malembe manharhu lama hundzeke, u khuvuriwile ematini, kambe sweswi ku khuvuriwa ka yena eku feni ku tshinelela makumu, naswona tanihi laha a vulaka ha kona a ku: “Ndzi le ku karhatekeni lokukulu, ku kondza loko nkhuvulo lowu wu hetiseka!”

Endzhaku ka ku kongomisa switsundzuxo leswi eka vadyondzisiwa va yena, Yesu u tlhela a vulavula ni mintshungu. U karhatiwa hi ku ala ka vona ko tiomisa tinhloko ku amukela vumbhoni lebyi nga erivaleni bya nhlamuselo ya yena ni nkoka wa yona. “Loko mi vona papa ri huma evupeladyambu,” wa xiya, “mi hatla mi ku: ‘Mpfula yi ta na!’; kutani swi va tano. Ni loko moya wu hunga wu ta hi le dzongeni, mi ri: ‘ku ta hisa!’; kutani swi va tano. Vakanganyisi ndzin’wina! Mi tiva ku xiya nghohe ya tilo ni ya misava; xana hikwalaho ka yini mi nga koti ku twisisa nkarhi lowu mi nga eka wona ke?” Luka 12:32-59.

▪ I vangani lava vumbaka “ntlhambinyana,” naswona va kuma yini?

▪ Yesu u xi tiyisa njhani xilaveko xa leswaku malandza ya yena ma tilunghisa?

▪ Exifanisweni xa Yesu, i mani “n’wini,” “mulanguteri,” “malandza” ni “leswi a swi fuweke”?