Ndzima 104

Rito Ra Xikwembu Ri Twiwa Ra Vunharhu

LOKO a ha ri etempeleni, Yesu a a ri karhi a phofula ku vaviseka hi rifu leri a a ta langutana na rona ku nga ri khale. Xivilelo xa yena lexikulu i ndlela leyi vito ra Tata wa yena ri nga ta khumbeka ha yona, kutani wa khongela: “Tatana, dzunisa vito ra wena!”

Kutani, ku twakala rito ra matimba leri humaka ematilweni ri ku: “Ndzi ri dzunisile, ndzi ta engeta ndzi ri dzunisa.”

Ntshungu lowu yimeke kwalaho wu tshukisiwile. Van’wana va sungula ku: “Ntsumi yi vulavurile na yena.” Van’wana va vula leswaku ri dzindzile. Kambe, entiyisweni i Yehova Xikwembu la vulavuleke! Hambi swi ri tano, lowu a hi nkarhi wo sungula rito ra Xikwembu ri twiwa mayelana na Yesu.

Eku khuvuriweni ka Yesu, malembe manharhu na hafu emahlweninyana, Yohane Mukhuvuri u twe Xikwembu xi vula leswi ha Yesu: “Loyi i N’wananga, la rhandzekaka, loyi ndzi n’wi tsakelaka.” Kutani, nkarhi wun’wana endzhaku ka Paseka leyi hundzeke, loko Yesu a hundzuriwile emahlweni ka vona, Yakobo, Yohane na Petro va twe Xikwembu xi ku: “Loyi i N’wananga, la rhandzekaka, loyi ndzi n’wi tsakelaka, n’wi yingiseni!” Kutani sweswi, ra vunharhu, hi Nisan 10, mune wa masiku emahlweni ka rifu ra Yesu, rito ra Xikwembu ri twiwa hi vanhu nakambe. Kambe enkarhini lowu Yehova u vulavula leswaku mintshungu yi ta kota ku swi twa!

Yesu wa hlamusela: “Rito leri a ri nga endleli mina loko ri twala, kambe ri endlela n’wina.” Ri nyika xikombiso xa leswaku Yesu i N’wana wa Xikwembu hakunene, Mesiya la tshembisiweke. “Misava leyi sweswi ya karhi ya avanyisiwa,” Yesu u ya emahlweni, “kutani mufumi wa misava leyi ú ta hlongoriwa sweswi.” Entiyisweni, vutomi bya Yesu bya ku tshembeka, byi tiyisa leswaku Sathana Diyavulosi, mufumi wa misava, u fanela hi ku “hlongoriwa,” a herisiwa.

Loko a kombetela eka mimbuyelo ya rifu ra yena leri ri tshinelaka, Yesu u ri: “Kambe mina, loko ndzi ta va ndzi tlakuseriwele henhla ndzi suka emisaveni, ndzi ta kokela vanhu hinkwavo eka mina.” Rifu ra yena a hi ku hluleka, hikuva hikwalaho ka rona, u ta kokela van’wana eka yena leswaku va ta tsakela vutomi lebyi nga heriki.

Kambe ntshungu wa hlamula: “Hi twile eNawini leswaku Mesiya ú ta hanya hi laha ku nga heriki; u nga vurisa ku yini wena, leswi u nge: ‘N’wana-wa-Munhu ú fanele ku tlakusiwa’, xana? I mani N’wana-wa-Munhu loyi xana?”

Ku nga khathariseki vumbhoni hinkwabyo, ku katsa ni ku twa rito ra Xikwembu hi xoxe, vunyingi a byi pfumeli leswaku Yesu i N’wana wa munhu wa ntiyiso, Mesiya la tshembisiweke. Hambi swi rito tano, hi laha a endleke ha kona etin’hwetini ta tsevu emahlweninyana eNkhubyeni wa Mintsonga, Yesu nakambe u vulavula hi yena n’wini tanihi “ku vonakala” naswona u khutaza vayingiseri va yena a ku: “Loko ma ha ri ni ku vonakala, pfumelani eka ku vonakala, leswaku mi hundzuka vana va ku vonakala.” Endzhaku ko vula leswi, Yesu wa suka a ya tifihla, entiyisweni hi mhaka ya leswi vutomi bya yena byi nga ekhombyeni.

Ku pfumala ka Vayuda ka ripfumelo eka Yesu ku hetisisa marito ya Esaya ehenhleni ka ‘mahlo ya vanhu lama pfariwaka ni timbilu ta vona ti tlanyarisiwa leswaku va nga hundzuki, va ta hanyisiwa.’ Esaya u vone tihuvo ta Yehova ta le matilweni exivonweni, ku katsa ni ku kwetsima ka Yesu a nga si va munhu a ri na Yehova. Hambi swi ri tano, eku hetisiseni ka leswi Esaya a swi tsaleke, Vayuda hi ku tinonon’hwisa va ale vumbhoni bya leswaku Loyi i Mukutsuri wa vona la tshembisiweke.

Hi tlhelo rin’wana, vanhu vo tala hambi va ri vafumi (kumbexana swirho swa huvo leyikulu ya Vayuda, ya Sanedri) kahle-kahle va veke ripfumelo eka Yesu. Nikodema na Yosefa wa Arimatiya hi van’wana vambirhi va vafumi lava. Kambe vafumi, sweswi va hluleka ku kombisa ripfumelo ra vona, hi ku chava ku hlongoriwa eka swiyimo swa vona esinagogeni. Vanhu vo tano va lahlekeriwile swinene!

Yesu u ya emahlweni a hlamusela: “Loyi a pfumelaka eka mina, a nga pfumeri eka mina ntsena kambe ú pfumela ni le ka Loyi a ndzi rhumeke; ni loyi a ndzi vonaka, ú vona Loyi a ndzi rhumeke. . . . Un’wana ni un’wana la twaka marito ya mina, kambe a nga ma hlayisi, a ndzi n’wi avanyisi, hikuva a ndzi telanga ku avanyisa misava, kambe ku ponisa misava. . . . I marito lawa ndzi ma vulaka lawa ma nga ta n’wi avanyisa hi siku ra makumu.”

Rirhandzu ra Yehova hi misava ya vanhu ri n’wi susumetele ku rhumela Yesu leswaku lava va vekaka ripfumelo eka yena va ta ponisiwa. Leswaku vanhu va ponisiwa swi ta tiyisiwa hi loko va amukela swilo leswi Xikwembu xi leriseke Yesu ku swi vula. Ku avanyisa ku ta va kona “hi siku ra makumu,” enkarhini wa ku Fuma ka Kriste ka Gidi ra Malembe.

Yesu u hetelela hi ku: “Hikuva a ndzi vulavulanga hi ku tisungulela swa mina, kambe Loyi a ndzi rhumeke, yena Tatana hi xiviri xa yena, ú ndzi lerisile leswi ndzi faneleke ku swi tivisa ni ku swi vula; kutani ndzi tiva leswaku ku lerisa ka yena i vutomi lebyi nga heriki; sweswi, leswi ndzi swi vulaka, ndzi swi vula hi laha Tatana a ndzi byeleke ha kona.” Yohane 12:28-50; 19:38, 39; Matewu 3:17; 17:5; Esaya 6:1, 8-10.

▪ Hi le ka minkarhi yihi yinharhu laha rito ra Xikwembu ri twiweke mayelana na Yesu?

▪ Muprofeta Esaya u ku vonise ku yini ku kwetsima ka Yesu?

▪ Hi vahi vafumi lava vekeke ripfumelo eka Yesu, kambe hikwalaho ka yini va nga n’wi kombisi?

▪ “Siku ra makumu” i yini, naswona hi le ka xisekelo xihi lexi vanhu va nga ta avanyisiwa hi nkarhi wolowo?