Dyondzo 2

Xikwembu I Mani?

Xikwembu xa ntiyiso i mani, naswona i mani vito ra xona? (1, 2)

Xana xi ni miri wa muxaka muni? (3)

Xana hi tihi timfanelo ta xona leti xiyekaka? (4)

Xana hi nga tirhisa swifaniso ni mimfungho eku xi gandzeleni? (5)

Xana hi tihi tindlela timbirhi leti hi nga dyondzaka hi Xikwembu ha tona? (6)

1. Vanhu va gandzela swilo swo tala. Kambe Bibele yi hi byela leswaku ku ni Xikwembu xin’we ntsena xa NTIYISO. Xi tumbuluxe swilo hinkwaswo etilweni ni le misaveni. Hikwalaho ka leswi xi hi nyikeke vutomi, hi xona ntsena lexi hi faneleke ku xi gandzela.—1 Vakorinto 8:5, 6; Nhlavutelo 4:11.

2. Xikwembu xi ni swithopo swo tala kambe xi ni vito rin’we ntsena ra ntiyiso. Vito rolero i YEHOVHA. ETibibeleni to tala, vito ra Xikwembu ri susiwile naswona ri siviwe hi swithopo swo tanihi HOSI kumbe XIKWEMBU. Kambe loko ku tsariwa Bibele, vito leri nge Yehovha a ri humelela minkarhi ya 7 000!—Eksoda 3:15; Pisalema 83:18.

3. Yehovha u ni miri, kambe a wu fani ni wa hina. “Xikwembu i moya,” ku vula Bibele. (Yohane 4:24) Moya i xivumbeko xa vutomi lebyi tlakukeke swinene eka bya hina. A ku na munhu la tshameke a vona Xikwembu. Yehovha u tshama etilweni, kambe u kota ku vona swilo hinkwaswo. (Pisalema 11:4, 5; Yohane 1:18) Kahle-kahle moya lowo kwetsima i yini? A hi munhu ku fana ni Xikwembu. Kambe, i matimba ya Xikwembu lama tirhaka.—Pisalema 104:30.

4. Bibele yi hi paluxela vumunhu bya Yehovha. Yi kombisa leswaku timfanelo ta yena letikulu i rirhandzu, vululami, vutlhari ni matimba. (Deteronoma 32:4; Yobo 12:13; Esaya 40:26; 1 Yohane 4:8) Bibele yi tlhela yi hi byela leswaku u ni musa, tintswalo, wa rivalela, wa hanana naswona u lehisa mbilu. Hina, ku fana ni vana lava yingisaka, hi fanele ku ringeta ku n’wi tekelela.—Vaefesa 5:1, 2.

5. Xana hi fanele ku nkhinsamela kumbe ku khongela swifaniso, swinepe kumbe mimfungho evugandzerini bya hina? E-e! (Eksoda 20:4, 5) Yehovha u ri hi fanele ku gandzela yena ntsena. A nga ka a nga avelani ku kwetsima ka yena ni munhu un’wana kumbe xilo xo karhi. Swifaniso a swi na matimba yo hi pfuna.—Pisalema 115:4-8; Esaya 42:8.

6. Xana hi nga xi tiva njhani Xikwembu ku antswa? Ndlela yin’wana i ku xiyisisa swilo leswi xi nga swi tumbuluxa ni ku anakanya hi vuenti malunghana nileswi swi hi byelaka swona. Hi vona leswaku Xikwembu xi ni matimba lamakulu ni vutlhari entumbulukweni wa xona. Hi vona rirhandzu ra xona eka swilo hinkwaswo leswi xi nga swi endla. (Pisalema 19:1-6; Varhoma 1:20) Ndlela yin’wana leyi hi nga tivaka Xikwembu ha yona i ku dyondza Bibele. Eka yona xi hi byela leswaku xona i Xikwembu xa muxaka muni. Xi tlhela xi hi byela hi xikongomelo xa xona nileswi xi lavaka leswaku hi swi endla.—Amosi 3:7; 2 Timotiya 3:16, 17.

[Swifaniso leswi nga eka tluka 5]

Hi dyondza hi ta Xikwembu entumbulukweni wa xona ni le Bibeleni