Xana Wa Swi Lava Ku Kuma Tinhlamulo Ta Swivutiso Swa Nkoka Swinene eVuton’wini?

KUMBEXANA u tshama u tivutisa swivutiso swo fana ni leswi:

• Xana Xikwembu xa hi rhandza hakunene?

• Xana tinyimpi ni ku xaniseka swi ta kala swi hela?

• Xana ku endleka yini ha hina loko hi fa?

• Xana ku ta endleka yini hi varhandziwa va hina lava feke?

• Ndzi fanele ndzi khongela hi ndlela yihi leswaku Xikwembu xi yingisa xikhongelo xa mina?

• Ndzi nga wu kuma njhani ntsako evuton’wini?

Xana u nga ti kuma kwihi tinhlamulo ta swivutiso leswi? Loko wo ya etilayiburari kumbe eswitolo leswi xavisaka tibuku, u ta kuma tibuku to tala ngopfu leti ku vuriwaka leswaku ti tamele tinhlamulo. Kambe, ko tala leswi ti swi vulaka a swi pfumelelani. Tin’wana ti vonaka ti pfuna hi nkarhi wolowo kambe ti hatla ti heleriwa hi nkarhi kutani swi boha leswaku ti pfuxetiwa kumbe ti siviwa hi tin’wana.

Ku ni buku yin’wana leyi tameleke tinhlamulo leti nga tshembiwaka. Buku leyi yi tamele ntiyiso. Yesu Kreste u khongele eka Xikwembu a ku: “Rito ra wena i ntiyiso.” (Yohane 17:17) Rito rero i Bibele yo Kwetsima. Eka matluka lama landzelaka, u ta kuma tinhlamulo leti nga ntiyiso ni leti twisisekaka ta swivutiso leswi vutisiweke laha henhla.

Xana Xikwembu Xa Hi Rhandza Hakunene?

LEXI ENDLAKA VANHU VA VUTISA: Hi hanya emisaveni leyi taleke hi vanhu lava nga ni tihanyi ni vuhomboloki. Vukhongeri byo tala byi dyondzisa leswaku ku xaniseka loku nga kona i ku rhandza ka Xikwembu.

LESWI BIBELE YI SWI DYONDZISAKA: Xikwembu a xi si tshama xi vanga vuhomboloki. Yobo 34:10 yi ri: “A swi ve ekule swinene ni Xikwembu xa ntiyiso leswaku xi endla hilaha ku hombolokeke, ni Lowa Matimba Hinkwawo ku endla hilaha ku nga lulamangiki!” Xikwembu xi tiyimisele ku endlela vanhu leswinene. Hi yona mhaka leyi Yesu a hi dyondziseke leswaku hi khongela hi ku: “Tata wa hina la nge matilweni, . . . Mfumo wa wena a wu te. Ku rhandza ka wena a ku endleke emisaveni, hilaha ku endlekaka hakona etilweni.” (Matewu 6:9, 10) Xikwembu xi hi rhandza hi mbilu hinkwayo lerova xi kale xi nyikela hi N’wana wa xona leswaku ku ta hetiseka xikongomelo xa xona.—Yohane 3:16.

Nakambe hlaya Genesa 1:26-28; Yakobo 1:13; na 1 Petro 5:6, 7.

Xana Tinyimpi Ni Ku Xaniseka Swi Ta Kala Swi Hela?

LEXI ENDLAKA VANHU VA VUTISA: Tinyimpi ti mbumburhela timiliyoni ta vanhu. Hinkwerhu ha karhateka loko hi vona vanhu va xaniseka.

LESWI BIBELE YI SWI DYONDZISAKA: Xikwembu xi vule leswaku ku ta fika nkarhi lowu xi nga ta tisa ku rhula emisaveni hinkwayo. Loko Mfumo wa xona se wu fuma, vanhu a va nge he “dyondzi nyimpi.” Kambe va ta “fula mabanga ya vona ma va swikomu.” (Esaya 2:4) Xikwembu xi ta herisa vuhomboloki hinkwabyo ni ku xaniseka. Bibele yi ri: “[Xikwembu] xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula [ku katsa ni vuhomboloki ni ku xaniseka swi ta va] swi hundzile.”—Nhlavutelo 21:3, 4.

Nakambe hlaya Pisalema 37:10, 11; 46:9; na Mikiya 4:1-4.

Xana Ku Endleka Yini Ha Hina Loko Hi Fa?

LEXI ENDLAKA VANHU VA VUTISA: Vukhongeri byo tala emisaveni byi dyondzisa leswaku moya wa munhu wu ya emahlweni wu hanya loko a file. Kasi byin’wana byi vula leswaku vafi va nga vavisa lava hanyaka kumbe leswaku Xikwembu xi xupula lavo homboloka hi ku va hisa endzilweni wa tihele.

LESWI BIBELE YI SWI DYONDZISAKA: Loko vanhu va fa a va yi emahlweni va hanya. Eklesiasta 9:5 yi ri: “Lava feke, a va tivi nchumu nikatsongo.” Tanihi leswi vafi va nga tiviki nchumu, va nga kotiki ku twa kumbe ku endla swo karhi, a va nge swi koti ku vavisa lava hanyaka kumbe ku va pfuna.—Pisalema 146:3, 4.

Nakambe hlaya Genesa 3:19; na Eklesiasta 9:6, 10.

Xana Ku Ta Endleka Yini Hi Varhandziwa Va Hina Lava Feke?

LEXI ENDLAKA VANHU VA VUTISA: Hinkwerhu hi lava ku hanya naswona hi lava ku tiphina hi vutomi ni varhandziwa va hina. Kutani swi fanerile leswaku hi navela ku vona varhandziwa va hina lava feke va hanya nakambe..

LESWI BIBELE YI SWI DYONDZISAKA: Vanhu vo tala lava feke va ta pfuxiwa. Yesu u tshembise leswaku lava nga eka ‘masirha-bako ya xitsundzuxo va ta huma.’ (Yohane 5:28, 29) Hi ku pfumelelana ni xikongomelo xa Xikwembu xa le ku sunguleni, lava nga ta pfuxiwa va ri vanhu va nyama va ta hanya emisaveni leyi nga ta va yi ri paradeyisi. (Luka 23:43) Vanhu lava yingisaka va ta va ni rihanyo leri hetisekeke va tlhela va hanya hilaha ku nga heriki. Bibele yi ri: “Lavo lulama va ta dya ndzhaka ya misava, va ta tshama eka yona hi masiku.”—Pisalema 37:29.

Nakambe hlaya Yobo 14:14, 15; Luka 7:11-17; na Mintirho 24:15.

Ndzi Fanele Ndzi Khongela Hi Ndlela Yihi Leswaku Xikwembu Xi Yingisa Xikhongelo Xa Mina?

LEXI ENDLAKA VANHU VA VUTISA: Vanhu etikerekeni to hambana-hambana va khongela. Kambe vo tala va vona onge swikhongelo swa vona a swi hlamuriwi.

LESWI BIBELE YI SWI DYONDZISAKA: Yesu u hi dyondzise leswaku hi papalata ku phindha-phindha marito lama fanaka loko hi khongela. U te: “Loko u khongela, u nga vuli swilo leswi fanaka hi ku phindha-phindha.” (Matewu 6:7) Loko hi lava leswaku Xikwembu xi yingisa swikhongelo swa hina, hi fanele hi khongela hi ndlela leyi amukelekaka eka xona. Leswaku hi kota ku endla tano, hi fanele hi dyondza leswi nga ku rhandza ka Xikwembu kutani hi khongela hi ku pfumelelana na kona. Yohane wo Sungula 5:14 yi ri: “Ku nga khathariseki leswaku i yini lexi hi xi kombelaka hi ku ya hi ku rhandza ka xona, xa hi twa.”

Nakambe hlaya Pisalema 65:2; Yohane 14:6, 14; na 1 Yohane 3:22.

Ndzi Nga Wu Kuma Njhani Ntsako eVuton’wini?

LEXI ENDLAKA VANHU VA VUTISA: Vanhu vo tala va ehleketa leswaku mali, ndhuma kumbe vumbhuri swi ta va endla leswaku va tsaka. Hikwalaho va lwela ku va ni swilo leswi kambe a va wu kumi ntsako lowu va wu lavaka.

LESWI BIBELE YI SWI DYONDZISAKA: Yesu u vule ndlela leyi ntsako wu nga kumekaka ha yona loko a ku: “Va tsaka lava khathalaka hi xilaveko xa vona xa moya.” (Matewu 5:3) Hi nga kuma ntsako wa xiviri loko hi teka magoza yo enerisa xilaveko lexikulu lexi hi nga na xona, ku nga ku lava ku tiva Xikwembu ni xikongomelo xa xona. Vutivi byolebyo byi kumeka eBibeleni ntsena. Byi ta hi pfuna leswaku hi tiva leswi hakunene swi nga swa nkoka ni leswi nga riki swa nkoka. Loko hi pfumelela Bibele yi hi kongomisa eka swiboho leswi hi swi endlaka ni mahanyelo ya hina hi ta hanya vutomi lebyi nga ni xikongomelo.​—Luka 11:28.

Nakambe hlaya Swivuriso 3:5, 6, 13-18; na 1 Timotiya 6:9, 10.

Hi lo kambisisa tinhlamulo ta Bibele eka swivutiso swa tsevu ntsena. Xana ku ni swivutiso swin’wana leswi u lavaka ku kuma tinhlamulo ta swona? Loko ku ri leswaku wa ‘khathala hi xilaveko xa wena xa moya,’ a swi kanakanisi leswaku u na swona. Swi nga ha endleka leswaku u tivutisa swivutiso swo kota leswi nge: ‘Loko ku ri leswaku Xikwembu xa hi rhandza hakunene, ha yini xi pfumelela vubihi byo tala swonghasi ni ku xaniseka ematin’wini ya vanhu? Xana ndzi nga endla yini leswaku ndyangu wa mina wu va lowu tsakeke?’ Bibele yi hlamula swivutiso leswi ni swin’wana swo tala naswona tinhlamulo ta yona ta enerisa.

Hambiswiritano, vanhu vo tala namuntlha va kanakana ku hlaya Bibele. Va yi teka yi ri buku yo leha leyi minkarhi yin’wana swi tikaka ku yi twisisa. Xana u nga tsakela ku pfuniwa leswaku u kuma tinhlamulo eBibeleni? Timbhoni ta Yehovha ti ni swilo swimbirhi leswi nga ku pfunaka.

Xo sungula i buku leyi nge Xana Bibele Yi Dyondzisa Yini Hakunene? leyi endliweke hi xikongomelo xo pfuna vanhu lava tshamaka va khomekile leswaku va kota ku kambisisa tinhlamulo ta Bibele ta swivutiso swa nkoka. Xa vumbirhi i dyondzo ya mahala ya Bibele. Mbhoni ya Yehovha yi nga ku endzela ekaya ra wena kumbe endhawini leyi wena u nga ta yi hlawula, leswaku yi ta dyondza na wena Bibele mahala, hi nkarhi wo koma vhiki rin’wana ni rin’wana. Vanhu va timiliyoni emisaveni hinkwayo va pfunekile hi ku dyondzeriwa Bibele mahala. Vo tala va vona va gimete hi ku vula va ku: “Ndzi kume tinhlamulo ta swivutiso swa nkoka leswi a ndzi tivutisa swona.”

A xi kona xuma lexi nga pimanisiwaka ni dyondzo leyi. Bibele yi hi ntshunxa eka vukholwa-hava, ku pfilunganyeka ni le ka ku chava lokukulu. Yi endla leswaku hi va ni ntshembo, xikongomelo ni ntsako. Yesu u te: “Mi ta tiva ntiyiso, kutani ntiyiso wu ta mi ntshunxa.”—Yohane 8:32.