Xikombiso Lexinene—Asafa

Asafa a a langutane ni xiyimo xo tika evuton’wini bya yena. A a vona vanhu va tlula milawu ya Xikwembu naswona va nga xupuriwi. Hikwalaho ka sweswo u tivutisile leswaku swi pfuna yini ku tsakisa Xikwembu. U te: “Hakunene ndzi yi basisele swa hava mbilu ya mina nileswi ndzi hlambeke mavoko hikwalaho ka ku pfumala nandzu.” Kambe endzhaku ko anakanyisisa hi mhaka leyi, Asafa u sungule ku anakanya hi ndlela yin’wana. U swi xiyile leswaku ntsako wa lavo homboloka a wu nga ta tlhaveriwa hi dyambu. Xana u dyondze yini? U yimbelele Yehovha risimu a ku: “Handle ka wena a ku na un’wana la ndzi tsakisaka emisaveni.”—Pisalema 73:3, 13, 16, 25, 27.

Kumbexana na wena u pfa u navela onge u nga tlula milawu ya Xikwembu. Kambe, ku fana na Asafa, u nga xisiwi hi ntsako wa xinkarhana lowu vanhu vo homboloka va tiphinaka ha wona. Anakanyisisa hi lava va honisaka milawu ya Yehovha. Xana va tsakile hakunene? Xana ku ni swo karhi leswi va tiphinaka ha swona leswi lava gandzelaka Xikwembu va swi kayelaka? Endzhaku ko anakanyisisa hi mhaka leyi, a swi kanakanisi leswaku na wena u ta titwa hi ndlela leyi Asafa a titweke ha yona loko a ku: “Ku tshinela eka Xikwembu i swinene eka mina.”—Pisalema 73:28.