Yesu Kreste U Dlayiwile

ENDZHAKU ka malembe manharhu ni hafu Yesu a ri karhi a chumayela ni ku dyondzisa, a a swi tiva leswaku nkarhi wa yena wo va laha emisaveni a wu ri kusuhi ni ku hela. Varhangeri va vukhongeri va Vayuda a va ri karhi va endla kungu ro n’wi dlaya, kambe a va chava leswaku ku nga pfuka hasahasa eka vanhu lava a va tshemba leswaku Yesu i muprofeta. Hi nkarhi wolowo Sathana u kucetele un’wana wa vaapostola va 12 va Yesu, ku nga Yudasi Iskariyota, leswaku a n’wi xenga. Varhangeri va vukhongeri va nyike Yudasi swiphemu swa silivhere swa 30 leswaku a xenga Yesu.

Hi vusiku bya yena byo hetelela, Yesu u hlengelete vaapostola va yena leswaku va tlangela Paseka. Endzhaku ka loko Yesu a hlongole Yudasi, u sungule nkhuvo lowuntshwa lowu vuriwaka Xilalelo xa Hosi. U teke xinkwa, a nkhensa ivi a nyika vaapostola va yena va 11 lava saleke. Hiloko a ku: “Leswi swi vula miri wa mina lowu nga ta nyikeriwa hikwalaho ka n’wina. Tshamani mi ri karhi mi endla leswi leswaku mi ndzi tsundzuka.” U endle leswi fanaka ni hi xinwelo, u te: “Xinwelo lexi xi vula ntwanano lowuntshwa hikwalaho ka ngati ya mina.”—Luka 22:19, 20.

Yesu a a ri ni swo tala leswi a a fanele a swi byela vaapostola va yena hi vusiku byebyo. U va nyike xileriso lexintshwa, xa leswaku va rhandzana hi ndlela leyi nga riki na vutianakanyi. U te: “Hinkwavo va ta tiva leswaku mi vadyondzisiwa va mina, loko mi rhandzana.” (Yohane 13:34, 35) U tlhele a va khutaza leswaku va nga karhateki hikwalaho ka swiendlakalo leswi chavisaka leswi a swi ta humelela ku nga ri khale. Yesu u va khongelele hi mbilu hinkwayo. Va yimbelele swidzuniso ivi va huma va kongoma entangeni wa Getsemani nivusiku.

Loko va ri entangeni wa Getsemani, Yesu u nkhinsamile naswona a khongela eka Xikwembu hi mbilu hinkwayo. Ku nga ri khale ku fike ntshungu wa masocha lama hlomeke, vaprista ni van’wana leswaku va ta n’wi khoma. Yudasi u ye eka Yesu a fika a n’wi ntswontswa ku endlela leswaku masocha wolawo ma ta tiva loyi a nga Yesu. Loko masocha ma ri karhi ma boha Yesu, vaapostola va balekile.

Loko Yesu a ri emahlweni ka huvo leyi tlakukeke ya Vayuda u vule leswaku yena i N’wana wa Xikwembu. Huvo yi vule leswaku u ni nandzu wo sandza naswona u faneriwa hi ku fa. Endzhaku ka sweswo Yesu u yisiwe eka Ndhuna-nkulu ya Murhoma, ku nga Pontiyo Pilato. Hambileswi Pilato a nga n’wi kumangiki a ri na nandzu Yesu, u nyikete Yesu eka ntshungu wa vapfukeri lowu a wu ri karhi wu huwelela leswaku a dlayiwa.

Yesu u yisiwe eGologota laha masocha ya Varhoma ma n’wi beleleke emhandzini. Hi singita ku vonakala ka ninhlikanhi ku hundzuke munyama. Endzhakunyana hi ndzhenga wolowo, Yesu u file, hiloko ku va ni ku tsekatseka lokukulu ka misava. Ntsumbu wa yena wu latiwe eka sirha leri a ri kovotliwe eribyeni. Hi siku leri tlhandlamaka vaprista va pfale sirha-bako rero ivi va veka murindzi. Xana ntsumbu wa Yesu a wu ta tshama kwalaho esirheni? Doo! Ku nga ri khale a ku ta endleka singita lerikulu swinene.

—Xi sekeriwe eka Matewu ndzima 26 na ndzima 27; Marka ndzima 14 na ndzima 15; Luka ndzima 22 na ndzima 23; Yohane ndzima 12 ku ya eka ndzima 19.