Xiyenge 12

Kombisa Leswaku U Ni Ripfumelo Ra Xiviri!

XIKWEMBU xi byela malandza ya xona leswaku ma langutela ku ringiwa ripfumelo. Rito ra xona ri ri: “Mi hiteka. Xirha xa n’wina, Diyavulosi, xa famba-famba ku fana ni nghala leyi vombaka, yi lava wa ku n’wi dya.” (1 Petro 5:8) Sathana a nga ringeta njhani ku hlasela ripfumelo ra wena?

Sathana a nga ha tirhisa hambi ku ri lava u va rhandzaka leswaku va ku kucetela ku tshika ku hlaya Matsalwa yo Kwetsima. Emhakeni leyi, Yesu u te: “Valala va munhu ku ta va vanhu va ndyangu wa yena.” (Matewu 10:36) Swi nga ha endleka swirho swa ndyangu ni vanghana lava nga ni xikongomelo lexinene, va nga wu xiyi ntiyiso lowu kumekaka eka Rito ra Xikwembu. Kumbe va nga ha chava vanhu leswaku va ta ku yini. Hambiswiritano, Matsalwa ma ri: “Ku chava vanhu swi veka ntlhamu, kambe loyi a tshembaka Yehovha u ta sirheleriwa.” (Swivuriso 29:25) Loko u tshika ku dyondza Matsalwa hikwalaho ko lava ku tsakisa vanhu, xana sweswo swi ta xi tsakisa Xikwembu? Nikatsongo! Loko hi kombisa ripfumelo ra xiviri, Xikwembu xi ta hi pfuna. “Hina a hi muxaka wa vanhu lava tlhelelaka endzhaku eku lovisiweni, kambe hi muxaka lowu nga ni ripfumelo eku londzovotiweni ka moya-xiviri wu hanya.”—Vaheveru 10:39.

Tsundzuka ntokoto wa Dumas, loyi hi vulavuleke hi yena eku sunguleni. Nsati wakwe a a n’wi vungunya hikwalaho ka ripfumelo rakwe. Kambe endzhakunyana u hlanganyele na Dumas eku dyondzeni ka Rito ra Xikwembu. Hilaha ku fanaka, loko u hambeta u endla leswinene, u nga kucetela vanghana va wena ni lava u va rhandzaka ku endla leswi fanaka. Hakanyingi, xirho xa ndyangu lexi nga swi tsakeriki ku dyondza Matsalwa xi ‘kokiwe handle ka rito hi ku tikhoma loku tengeke’ ni “xichavo lexi enteke” xa loyi a kombisaka ripfumelo ra xiviri.—1 Petro 3:1, 2.

Nakambe Sathana u ringeta ku endla vanhu va anakanya leswaku a va na wona nkarhi wo hlaya Matsalwa. U lava leswaku swiphiqo swa vutomi leswi katsaka mali “swi kamanyeta rito” leswaku ripfumelo ra wena “ri nga veki mihandzu.” (Marka 4:19) Papalata mavonelo wolawo lama nga riki manene! Matsalwa ma ri: “Leswi swi vula vutomi lebyi nga heriki, ku nghenisa ka vona vutivi ha wena, Xikwembu xi ri xin’we xa ntiyiso, ni loyi u n’wi rhumeke, Yesu Kreste.” (Yohane 17:3) Ku hambeta u dyondza leswi engetelekeke hi Xikwembu na Yesu la nga Mesiya, i swa nkoka leswaku u kuma vutomi lebyi nga heriki eParadeyisini!

Anakanya hi Muxe loyi a a ri xirho xa ndyangu wa le vuhosini aEgipta. A a ta va a hlawule ku va ni rifuwo, ndhuma ni vulawuri. Kambe Muxe u hlawule “ku xaniseka ni vanhu va Xikwembu ku ri ni ku tiphina hi xidyoho swa nkarhinyana.” Ha yini? “A a hambeta a tserhama onge hiloko a vona Loyi a nga vonakiki.” (Vaheveru 11:24, 25, 27) Hakunene, Muxe a a ri ni ripfumelo leri tiyeke eka Xikwembu. A a rhangisa ku endla ku rhandza Xikwembu naswona xi n’wi katekisile swinene. Kutani loko u endla leswi fanaka, Xikwembu xi ta ku katekisa na wena.

Sathana a nga ringeta ku ku hlasela hi tindlela to hambana-hambana. Kambe u nga n’wi pfumeleli. Rito ra Xikwembu ra hi khutaza ri ku: “Mi kaneta Diyavulosi, kutani u ta mi balekela.” (Yakobo 4:7) U nga n’wi kaneta njhani?

Hambeta u hlaya Matsalwa yo Kwetsima. Hlaya Rito ra Xikwembu siku na siku. Dyondza tidyondzo ta rona u tlhela u ti tirhisa. Hi ku endla tano, u ta va u ‘ambala mahavelo hinkwawo lama humaka eka Xikwembu,’ leswi nga ta endla leswaku u kaneta minhlaselo ya Sathana.—Vaefesa 6:13.

Tihlanganise ni vanhu lava nga ni ripfumelo ra xiviri. Lavisisa van’wana lava dyondzaka va tlhela va hanya hi Matsalwa yo Kwetsima. Vanhu vo tano va ‘khathalelana leswaku va khutazana erirhandzwini ni le mintirhweni leyinene ni ku khutazana.’ Va ta ku pfuna leswaku u tiya eripfumelweni.— Vaheveru 10:24, 25.

Tshinela eka Yehovha. Khongelela mpfuno wa Xikwembu u tlhela u xi tshemba. U nga tshuki u rivala leswaku Xikwembu xi lava ku ku pfuna. ‘Lahlela ku vilela hinkwako eka [Xikwembu], hikuva xa ku khathalela.’ (1 Petro 5:6, 7) “Xikwembu xa tshembeka, a xi nge mi tshiki mi ringiwa hi ndlela leyi tlulaka leswi mi nga swi tiyiselaka, kambe loko mi ringiwa xi ta mi nyika ndlela yo huma, leswaku mi kota ku swi tiyisela.”—1 Vakorinto 10:13.

Sathana u tlhontlhe Xikwembu hi ku vula leswaku a ku na munhu la nga hambetaka a xi gandzela loko sweswo swi ta endla leswaku a langutana ni miringo. Kambe u ni nkarhi wo kombisa leswaku Sathana i muhembi! Xikwembu xi ri: “N’wananga, tlhariha u tsakisa mbilu yanga, leswaku ndzi ta angula loyi a ndzi tlhontlhaka.” (Swivuriso 27:11) Hambeta u kombisa leswaku u ni ripfumelo ra xiviri!

U Nga Hlamula Njhani?

• Sathana a nga ringeta ku ri tsanisa njhani ripfumelo ra wena?

• Muxe u ri kombise njhani ripfumelo ra xiviri?

• U nga tiyisela njhani loko u ringiwa ripfumelo?

[Xifaniso lexi nga eka tluka 28]

Xana u tshame u langutana ni nkaneto wa muxaka lowu?

[Xifaniso lexi nga eka tluka 28]

Khongelela mpfuno wa Xikwembu

[Xifaniso lexi nga eka tluka 28, 29]

Tihlanganise ni van’wana lava nga ni ripfumelo