Yesu U Rhuma Vadyondzisiwa Va 70 Ku Ya Chumayela

Se swi endla kwalomu ka malembe manharhu Yesu a khuvuriwile naswona sweswi lembe ra 32 C.E. ri kusuhi ni ku hela. Yena ni vadyondzisiwa vakwe a va ri eNkhubyeni wa Titabernakela eYerusalema. Kumbexana va ha ri ekusuhi ni kwalaho. (Luka 10:38; Yohane 11:1) Entiyisweni, Yesu u heta nkarhi wo tala hi tin’hweti ta tsevu leti saleke ta ntirho wakwe eYudiya kumbe entsungeni wa Nambu wa Yordani exifundzheni xa Periya. Ku fanele ku chumayeriwa ni le tindhawini leti.

Emahlweninyana endzhaku ka Paseka ya 30 C.E., Yesu u hete tin’hweti to hlayanyana a ri karhi a chumayela eYudiya ni le Samariya. Loko ku fika nkarhi wa Paseka ya 31 C.E., Vayuda eYerusalema va ringete ku n’wi dlaya. Eka lembe rin’we ni hafu leri landzeleke, Yesu u dyondzise ngopfu en’walungwini wa Galeliya. Hi nkarhi wolowo, vo tala va ve valandzeri vakwe. Loko a ri eGaleliya, Yesu u letele vaapostola vakwe kutani a va lerisa a ku: “Chumayelani, mi ku: ‘Mfumo wa matilo wu tshinele.’” (Matewu 10:5-7) Sweswi u le ku hleleni ka tsima ro ya chumayela eYudiya.

Leswaku a sungula tsima leri, Yesu u hlawula vadyondzisiwa va 70 a va rhuma havambirhimbirhi. Hikwalaho, ku ni mitlawa ya 35 ya vachumayeri va Mfumo laha va chumayelaka kona, kwalaho “ntshovelo i wukulu kambe vatirhi a va talanga.” (Luka 10:2) Mitlawa leyi, yi fanele yi rhanga yi ya tirha etindhawini leti Yesu a nga ta yi landzela eka tona. Lava 70 a va ta horisa ni ku chumayela mahungu lamanene lama fanaka ni lawa Yesu a ma chumayelaka.

Vadyondzisiwa lava a va fanelanga va dyondzisa emasinagogeni. Yesu u va byela leswaku va ya chumayela emakaya ya vanhu. U ri: “Loko mi nghena emutini, rhangani mi ku: ‘Ku rhula a ku ve emutini lowu.’ Loko ku ri ni lava rhandzaka ku rhula, a va ve ni ku rhula.” A va ya chumayela rungula rihi? Yesu u ri: “Mi tlhela mi va byela mi ku: ‘Mfumo wa Xikwembu wu le kusuhi.’”—Luka 10:5-9.

Swiletelo leswi Yesu a swi nyikaka lava 70 swa fana ni leswi a swi nyikeke vaapostola va 12 loko a va rhuma elembeni leri hundzeke. U va lemukisa leswaku a hi vanhu hinkwavo lava nga ta va amukela. Kambe ku tikarhata ka vona a swi ta pfuna vanhu lava tsakelaka leswaku loko Yesu a fika endzhakunyana, va navela ku hlangana ni N’wini ivi va dyondza eka yena.

Swi nga si ya kwihi, mitlawa leya 35 ya vachumayeri va Mfumo yi tlhelela eka Yesu. Yi n’wi byela yi tsakile yi ku: “Hosi, hambi ku ri madimona ma hi yingisa loko hi tirhisa vito ra wena.” Xiviko lexi lexinene xi tsakisa Yesu lerova a ku: “Ndzi vona Sathana a wile hi le tilweni ku fana ni rihati. Vonani! Ndzi mi nyike matimba ya ku kandziyela tinyoka ni swipame.”—Luka 10:17-19.

Hi ndlela yoleyo, Yesu u tiyisekisa valandzeri vakwe leswaku va ta swi kota ku hlula swilo leswi nga ni khombo, hi ndlela yo fanekisela va kandziyela tinyoka ni swipame. Ku tlula kwalaho, va nga tiyiseka leswaku enkarhini lowu taka Sathana u ta wa a suka etilweni. Nakambe Yesu u pfuna lava 70 ku vona leswi nga swa nkoka loko nkarhi wu ri karhi wu ya emahlweni. U ri: “Mi nga tsaki hikwalaho ka leswi madimona ma mi yingisaka, kambe tsakani hikwalaho ka leswi mavito ya n’wina ma tsariweke etilweni.”—Luka 10:20.

Yesu u tsake ngopfu naswona u dzunisa Tata wakwe exikarhi ka vanhu hileswi a tirhisaka malandza yakwe lama titsongahataka hi ndlela ya matimba swinene. Loko a vulavula ni vadyondzisiwa vakwe, u ri: “Va tsaka vanhu lava matihlo ya vona ma vonaka swilo leswi mi swi vonaka. Hikuva ndza mi byela, vaprofeta vo tala ni tihosi a va swi navela ku vona swilo leswi mi swi vonaka kambe a va swi vonanga, hambi ku ri ku twa swilo leswi mi swi twaka kambe a va swi twanga.”—Luka 10:23, 24.