Yesu A Nyika Ndzayo Hi Rifuwo

Loko Yesu a ri eku dyeni endlwini ya Mufarisi, magidi ya vanhu va hlengeletana ehandle va n’wi rindzela. Mitshungu ya le Galeliya na yona yi endle leswi fanaka. (Marka 1:33; 2:2; 3:9) Sweswi vanhu vo tala laha Yudiya va lava ku n’wi vona ni ku n’wi twa naswona a va fani ni Vafarisi va laha a rhambiweke ku ya dya kona.

Mhaka leyi Yesu a rhangaka a lemukisa vadyondzisiwa vakwe hayona i ya nkoka eka vona kutani u ri: “Tivoneleni eka comela xa Vafarisi, ku nga vukanganyisi.” Yesu u tshame a va lemukisa hi swona kambe leswi a swi vonaka loko va ri eku dyeni, swi kombisa ndlela leyi swi nga swa xihatla hayona ku va nyika xitsundzuxo lexi. (Luka 12:1; Marka 8:15) Vafarisi va ringeta ku tumbeta vuhomboloki bya vona hi ku tiendla onge va ni ntwelavusiwana kambe va ni khombo swinene naswona sweswo swi fanele swi paluxiwa. Yesu u hlamusela a ku: “A ku na nchumu lowu tumbetiweke lowu nga ta ka wu nga paluxiwi, naswona a ku na xihundla lexi nga ta ka xi nga tiviwi.”—Luka 12:2.

Swi nga endleka vo tala va vanhu lava hlengeletaneke laha Yesu a nga kona va ri vanhu va le Yudiya lava nga n’wi twangiki loko a dyondzisa eGaleliya. Hikwalaho, u phindha timhaka ta nkoka leti a ti boxeke eku sunguleni. U byela hinkwavo lava yingiseke a ku: “Mi nga va chavi lava dlayaka miri kambe va tsandzeka ku endla swo tlula sweswo.” (Luka 12:4) U byela valandzeri vakwe hi nkoka wo tshemba leswaku Xikwembu xi ta va hlayisa hilaha a vuleke hakona eku sunguleni. Nakambe, va fanele va tiveka ehansi ka N’wana wa munhu ni ku tlhela va xiya leswaku Xikwembu xi nga va pfuna.—Matewu 10:19, 20, 26-33; 12:31, 32.

Kutani wanuna loyi a nga exikarhi ka ntshungu u vula leswi n’wi karhataka, u ri: “Mudyondzisi, byela makwerhu a ndzi avela rifuwo leri siyiweke hi tatana.” (Luka 12:13) Nawu wu vula leswaku n’wana wa jaha wa mativula u averiwa swiphemu swimbirhi swa ndzhaka leswaku ku nga vi na nkwetlembetano. (Deteronoma 21:17) Swi vonaka onge jaha leri ri lava ku averiwa swo tala ku tlula leswi a ri fanele ri averiwa swona hi ku ya hi nawu. Hi vutlhari, Yesu u ala ku teka tlhelo ro karhi emhakeni leyi. Kutani a vutisa a ku: “Munhu ndziwena, i mani loyi a nga ndzi veka ku va muavanyisi kumbe ku mi avela rifuwo ra n’wina?”—Luka 12:14.

Yesu u va tsundzuxa hinkwavo a ku: “Tshamani mi pfule matihlo, mi tivonela eka mixaka hinkwayo ya makwanga, hikuva hambiloko munhu a ri ni swilo swo tala, vutomi byakwe a byi humi eka swona.” (Luka 12:15) Hambiloko munhu o va ni rifuwo ro tala, xana siku rin’wana a nge fi a siya hinkwaswo? Yesu u kandziyisa yinhla yoleyo hi xifaniso lexi nga rivalekiki lexi tlhelaka xi komba nkoka wo tiendlela vito lerinene ni Xikwembu.

U ri: “Nsimu ya wanuna un’wana la fumeke a yi humesa swakudya swo tala. Hiloko a sungula ku anakanya, a ku, ‘Leswi ndzi nga ha riki na ndhawu yo veka leswi ndzi swi tshoveleke, ndzi nga endla yini?’ Kutani a ku, ‘Ndzi ta endla leswi: Ndzi ta hirimuxa switlati swa mina ndzi aka leswikulu, kutani ndzi ta veka mavele ni nhundzu ya mina hinkwayo kwalaho, ndzi ku: “Ndzi ni swilo swo tala leswinene leswi nga ta tshama malembe yo tala; ndzi ta wisa, ndzi dya, ndzi nwa, ndzi tiphina.”’ Kambe Xikwembu xi ku eka yena, ‘Wena loyi a nga anakanyiki, va lava ku ku dlaya vusiku bya namuntlha. I mani loyi a nga ta sala a kuma swilo hinkwaswo leswi u swi hlengeleteke?’ Swi tano hi munhu loyi a tihlengeletelaka xuma kambe a nga fuwanga eka Xikwembu.”—Luka 12:16-21.

Vadyondzisiwa va Yesu ni vanhu van’wana lava n’wi yingiseleke, va nga phasiwa hi ku lava rifuwo kumbe ku ri hlengeleta. Nakambe, va nga ha kavanyetiwa hi swilo swa ku tihanyisa ivi va nga ha n’wi tirheli Yehovha. Hikwalaho, Yesu u phindha ndzayo leyinene leyi a yi nyikeke kwalomu ka lembe ni hafu leri hundzeke eDyondzweni yakwe ya le Ntshaveni.

U ri: “Tshikani ku vilela hi vutomi bya n’wina ni hi leswi mi nga ta swi dya, kumbe ku vilela hi mimiri ya n’wina leswaku mi ta ambala yini. . . . Anakanyani hi mawukuwuku: A ma byali mbewu kumbe ku tshovela; a ma na dulu kumbe xitlati; kambe Xikwembu xa ma wundla. Xana a mi va nkoka ku tlula swinyenyana? . . . Anakanyani hi ndlela leyi makhon’wa ma kulaka ha yona: A ma tirhi naswona a ma rhungi swiambalo; kambe ndza mi byela leswaku hambi ku ri Solomoni eku vangameni kakwe hinkwako, a nga ambalanga ku fana na wona. . . . Tshikani ku vilela hi leswi mi nga ta dya swona ni leswi mi nga ta nwa swona, naswona tshikani ku tshama mi ri karhi mi vilela . . . Tata wa n’wina wa swi tiva leswaku ma swi lava swilo leswi. . . . Yanani emahlweni mi lava Mfumo wa yena, kutani swilo leswin’wana mi ta nyikiwa swona.”—Luka 12:22-31; Matewu 6:25-33.

I vamani lava nga ta lavisisa Mfumo wa Xikwembu? Yesu u vula leswaku nhlayo leyitsongo, ku nga “ntlhambinyana,” wa vanhu lava tshembekaka yi ta wu lavisisa. Hi ku famba ka nkarhi, swi ta va erivaleni leswaku nhlayo ya vona i 144 000 ntsena. Xana va ta nyikiwa yini? Yesu u va tiyisekisa a ku: “Tata wa n’wina u tsakele ku mi nyika Mfumo.” Vanhu lava a va nge hlongorisi xuma laha misaveni, lexi makhamba ma nga xi yivaka. Ku ri na sweswo, timbilu ta vona ti ta va eka ‘xuma lexi nga heriki ematilweni,’ laha va nga ta fuma na Kreste kona.—Luka 12:32-34.