I Vamani Lava Xikwembu Xi Va Rhambelaka Eswakudyeni?

Yesu wa ha ri ekaya ra Mufarisi endzhaku ko horisa wanuna loyi a khomiweke hi vuvabyi byo pfimba miri. Yesu u vona vaendzi van’wana va ri karhi va hlawula switulu swa le mahlweni loko va ri eswakudyeni naswona u tirhisa nkarhi wolowo leswaku a dyondzisa hi mhaka ya ku titsongahata.

Yesu u ri: “Loko u rhambiwile emucatweni, u nga tshami exitulwini lexi hlawulekeke. Swi nga ha endleka ku rhambiwe ni un’wana loyi a xiximekaka ngopfu ku tlula wena. Kutani loyi a mi rhambeke u ta ta eka wena a ku, ‘Suka ku tshama munhu loyi.’ Hikwalaho u ta suka u ri ni tingana u ya tshama exitulwini xa le ndzhaku.”—Luka 14:8, 9.

Yesu u ya emahlweni a ku: “Kambe loko u rhambiwile, tshama exitulwini xa le ndzhaku, leswaku loko loyi a ku rhambeke a ta, a fika a ku, ‘Munghana, tana u ta tshama haleno mahlweni.’ Vaendzi lavan’wana va ta ku xixima.” Leswi swi kahle ku tlula ku va ni mahanyelo lamanene ntsena. Yesu u hlamusela a ku: “Hikuva un’wana ni un’wana loyi a titlakusaka u ta tsongahatiwa kasi loyi a titsongahataka u ta tlakusiwa.” (Luka 14:10, 11) Ina, u khutaza vayingiseri vakwe leswaku va tikarhatela ku titsongahata.

Yesu u hlamusela dyondzo yin’wana eka Mufarisi loyi a n’wi rhambeke, ku nga ndlela yo lunghiselela swakudya swa nimadyambu hi ndlela leyi amukelekaka eka Xikwembu. U ri: “Loko u sweka swakudya swa dina kumbe swo lalela, u nga rhambi vanghana va wena kumbe vamakwenu kumbe maxaka ya wena kumbe vaakelani va wena lava fuweke. Na vona va nga tlhela va ku rhamba hikwalaho ka leswi u va rhambeke, yoleyo ku ta va ku ri hakelo ya wena. Kambe loko u endla nkhuvo, rhamba swisiwana, lava lamaleke, lava khwitaka ni lava feke matihlo; kutani u ta tsaka, hikuva vona a va na nchumu xo ku hakela ha xona.”—Luka 14:12-14.

Swi tolovelekile ku rhamba vanghana, maxaka kumbe vaakelani eswakudyeni naswona Yesu a nga vuli swona leswaku sweswo swi hoxile. Ku ri na sweswo, u kandziyisa leswaku ku nyika swisiwana, lava lamaleke kumbe mabofu swakudya, swi nga tisa nkateko lowukulu. Yesu u hlamusela loyi a n’wi rhambeke a ku: “Kambe Xikwembu xi ta ku hakela loko xi pfuxa lava lulameke.” Hiloko muendzi un’wana, a ku: “Wa tsaka loyi a dyaka eMfun’weni wa Xikwembu.” (Luka 14:15) Wa swi xiya leswaku hakunene lowu a wu ta va nkateko lowukulu. Hambiswiritano, a hi vanhu hinkwavo lava kombisaka ku tlangela, hilaha Yesu a yaka emahlweni a hlamusela hakona, u ri:

“Wanuna un’wana a a endle nkhuvo lowukulu, ivi a rhamba vanhu vo tala. U rhume nandza wakwe . . . leswaku a ya vitana lava rhambiweke a ku, ‘Tanani, hikuva swakudya se swi lunghile.’ Kambe hinkwavo va sungula ku ala va vula swivangelo swo hambanahambana. Lowo sungula a ku, ‘Ndzi xave nsimu kutani ndzi fanele ndzi ya yi vona; ndzi khomele a ndzi nge swi koti.’ Un’wana a ku, ‘Ndzi xave tihomu ta khume, ndzi lava ku ya ti vona; ndzi khomele a ndzi nge swi koti.’ Un’wanyana a ku, ‘Ndza ha ku teka nsati, hikwalaho a ndzi nge ti.’”—Luka 14:16-20.

Sweswo i swivangelo leswi nga twaliki! Hi ntolovelo, wanuna u kambisisa nsimu kumbe swifuwo a nga si swi xava kutani a swi bohi ku swi languta hi xihatla endzhaku ka sweswo. Wanuna wa vunharhu a nga lunghiseleli ku cata. Se u catile, kutani sweswo a swi n’wi siveli leswaku a amukela xirhambo lexi xa nkoka. Loko n’wini a twa swivangelo leswi, wa kariha ivi a byela nandza wakwe a ku:

“Hatlisa u ya eswitarateni leswikulu ni le swindlelanini swa muti, u ya vitana swisiwana, lava lamaleke, lava feke mahlo ni lava khwitaka.” Endzhaku ka loko nandza a endle sweswo, ka ha ri ni ndhawu leyi saleke. N’wini u byela nandza wakwe a ku: “Yana etindleleni ni le swindlelanini, u ya kombela lava u nga ta va kuma leswaku va ta, leswaku yindlu ya mina yi ta tala. Hikuva ndza mi byela, lava rhambiweke a va nge dyi swakudya swa mina swo lalela.”—Luka 14:21-24.

Leswi Yesu a swi vuleke swi yi hlamusela kahle ndlela leyi Yehovha Xikwembu a byeleke Yesu Kreste leswaku a rhamba vanhu ku lava Mfumo wa matilo. Vayuda, ngopfungopfu varhangeri va vukhongeri, hi vona vo sungula ku rhambiwa. Enkarhini wa ntirho wakwe hinkwawo wo chumayela, vo tala a va xi amukelanga xirhambo xakwe. Kambe a ku nga ta rhambiwa vona ntsena. Swi le rivaleni leswaku Yesu u ringanyeta leswaku enkarhini lowu taka, xirhambo xa vumbirhi xi nyikiwa vanhu va xiyimo xa le hansi va tiko ra Yuda ni vaproselita. Endzhaku ka sweswo, a ku ta va ni xirhambo xa vunharhu ni xo hetelela lexi yaka eka vanhu lava Vayuda a va va teka va nga faneleki emahlweni ka Xikwembu.—Mitirho 10:28-48.

I ntiyiso leswaku leswi Yesu a swi vulaka swi komba ntiyiso wa marito lama vuriweke hi muendzi un’wana, loyi a nga te: “Wa tsaka loyi a dyaka eMfun’weni wa Xikwembu.”