N’wana Wa Munhu U Ta Paluxiwa

Swi nga endleka leswaku Yesu wa ha ri eSamariya kumbe eGaleliya. Sweswi Vafarisi va n’wi vutisa hi ku ta ka Mfumo hileswi va ehleketaka leswaku ku ta va ni nkhuvo lowukulu. Hambiswiritano, u ri: “Loko Mfumo wa Xikwembu wu ta, vo tala a va nge wu xiyi; naswona vanhu a va nge vuli va ku, ‘Vonani hi lowu,’ kumbe ‘Hi lowuya!’ Hikuva Mfumo wa Xikwembu wu le xikarhi ka n’wina.”—Luka 17:20, 21.

Van’wana va nga ha ehleketa leswaku Yesu u vula leswaku Mfumo wu fuma etimbilwini ta malandza ya Xikwembu. Kambe a swi tano hikuva Mfumo a wu le timbilwini ta Vafarisi lava Yesu a vulavulaka na vona. Nilokoswiritano, wu le xikarhi ka vona hikuva Hosi leyi hlawuriweke ya Mfumo wa Xikwembu ku nga Yesu u le xikarhi ka vona.—Matewu 21:5.

Endzhaku ka loko Vafarisi va fambile, Yesu u byela vadyondzisiwa vakwe vuxokoxoko lebyi engetelekeke hi ku ta ka Mfumo. Loko a hlamusela hi matimba lawa a nga ta va na wona eMfun’weni, Yesu u sungula hi ku lemukisa vadyondzisiwa vakwe a ku: “Ku ta fika nkarhi lowu mi nga ta navela ku va ni N’wana wa munhu, kambe a swi nge koteki.” (Luka 17:22) Yesu u kombisa leswaku ku fuma ka N’wana wa munhu eMfun’weni i ka nkarhi lowu taka. Loko nkarhi wolowo wu nga si fika, van’wana va vadyondzisiwa va nga ha navela leswaku wu hatla wu fika kambe va ta boheka ku ya emahlweni va rindza ku fikela nkarhi lowu Xikwembu xi wu vekeke wa ku vuya ka n’wana wa munhu.

Yesu u ya emahlweni a ku: “Vanhu va ta ku, ‘Vonani hi luya,’ kumbe, ‘Vonani hi loyi!’ Mi nga yi kumbe ku va landzelela. Ku fana ni rihati leri hatimaka ku suka eka tlhelo rin’wana ra tilo ku ya eka tlhelo lerin’wana, swi ta va tano hi N’wana wa munhu hi nkarhi wolowo.” (Luka 17:23, 24) Xana vadyondzisiwa va Yesu va ta sirheleriwa njhani leswaku va nga landzeleli lava tivulaka mesiya? Yesu u vula leswaku ku ta ka Mesiya wa ntiyiso ku ta fana ni rihati leri voniwaka endhawini leyikulu. Vumbhoni bya vukona byakwe byi ta voniwa kahle hi mani na mani loko se a ri ni matimba eMfun’weni.

Yesu u tirhise swiendlakalo swa khale ku kombisa ndlela leyi vanhu a va ta va hayona enkarhini lowu taka, hi ku vula a ku: “Hilaha swi endlekeke hakona enkarhini wa Nowa, swi ta va tano ni hi nkarhi wa N’wana wa munhu . . . Hilaha ku fanaka, swi ve tano enkarhini wa Lota: a va dya, va nwa, va xava, va xavisa, va byala, va aka. Kambe hi siku leri Lota a humeke ha rona eSodoma, ku ne ndzilo ni xivavula swi huma etilweni, swi va lovisa hinkwavo. Swi ta va tano ni hi siku leri N’wana wa munhu a nga ta tikomba ha rona eka vanhu.”—Luka 17:26-30.

Yesu a nga vuli swona leswaku vanhu va le nkarhini wa Nowa ni wa Lota va lovisiwe hikwalaho ko rhangisa swilo leswi tolovelekeke swo tanihi ku dya, ku nwa, ku xava, ku xavisa, ku byala ni ku aka. Phela Nowa na Lota ni mindyangu ya vona va swi endlile swin’wana swa swilo sweswo. Kambe vanhu van’wana a va endla leswi fanaka va nga ri na mhaka ni ku rhandza ka Xikwembu naswona a va wu ba hi makatla nkarhi lowu a va hanya eka wona. Hikwalaho, Yesu u lerisa vadyondzisiwa va yena ku rhangisa ku endla ku rhandza ka Xikwembu ni ku tikarhatela ku hanya hi ku pfumelelana na kona. U va komba ndlela yo pona, ku nga ndlela leyi nga va pfunaka leswaku va ya emahlweni va hanya loko Xikwembu xi herisa misava leyi enkarhini lowu taka.

Vadyondzisiwa va fanele va papalata ku kavanyetiwa hi swilo swa misava leyi leswaku va nga “tlheleli” eka swilo swa le ndzhaku. Yesu u ri: “Hi siku rero munhu loyi a nga ehenhla ka yindlu, loyi nhundzu yakwe yi nga endlwini a nga xiki a ya yi teka, naswona loyi a nga emasin’wini, na yena a nga tlheleli ekaya. Tsundzukani nsati wa Lota.” (Luka 17:31, 32) U hundzuke tshuka ra munyu.

Loko a ya emahlweni a hlamusela leswaku swi ta va njhani loko n’wana wa munhu a fuma tanihi Hosi, Yesu u byela vadyondzisiwa vakwe a ku: “Evusikwini byebyo vanhu vambirhi va ta va va etlele swin’we; un’wana u ta tekiwa kambe lowun’wana u ta siyiwa.” (Luka 17:34) Van’wana va ta ponisiwa, kasi van’wana va ta lovisiwa.

Hiloko vadyondzisiwa va vutisa va ku: “Xana swi ta endleka kwihi, we Hosi?” Yesu u va hlamula a ku: “Laha ntsumbu wu nga kona, hi laha ni magama ma nga ta hlengeletana kona.” (Luka 17:37) Ina, van’wana va ta fana ni magama lama nga voniki kahle. Vadyondzisiwa lava va ta hlengeletiwa eka N’wana wa munhu ku nga Kreste. Enkarhini wolowo lowu taka, Yesu u ta byela vadyondzisiwa vakwe ntiyiso lowu nga ta ponisa lava nga ni ripfumelo.