Ku Chaveleriwa Hi Rito Ra Xikwembu

YEHOVA i ‘Xikwembu lexi ku chavelela hinkwako ku humaka eka xona; lexi xi hi chavelelaka emaxangwini ya hina.’ (2 Vakorinto 1:3, 4) Hikwalaho ke, hi le ka yena ni Rito rakwe laha hi faneleke ku ya kona ku kuma ku chaveleriwa ka ntiyiso ni ku khongoteriwa eminkarhini ya nhlomulo.—Varhoma 15:4.

Loko hi ri lava tshembekaka eka Xikwembu, manuku ‘xi nga ka xi nga hi cukumeti.’ Hi ntshembo, hi nga ku: “Hosi [Yehova] i mupfuni wa mina, a ndzi nga chavi nchumu; munhu a nga ndzi endla yini xana?” (Vaheveru 13:5, 6; Psalma 37:39, 40; 145:20) Hikwalaho ke, entiyisweni a hi fanelanga ku tshikileriwa kumbe ku hetiwa matimba, hambi loko hi xaniseka swinene.

Tanihi xiphemu xa vuprofeta byakwe lebyikulu lebyi hetisekaka enkarhini wa hina, Yesu u te: “Mi ta nyiketiwa hi vatswari va n’wina, ni vamakwenu, ni maxaka, ni vanakuloni; va ta dlaya van’wana va n’wina; mi ta vengiwa hi vanhu hinkwavo hikwalaho ka vito ra mina.” Kambe endzhakunyana ka sweswo Yesu u engeterile a ku: “Kambe a ku nga lovi hambi wu ri nsisi wun’we wa tinhloko ta n’wina.” (Luka 21:16-18) Xana sweswo a swi ta endlekisa ku yini? Hikwalaho ka ku pfuka ka vafi, wu nga wona ntshembo lowu tiyiseke Pawulo. (Yohane 5:28, 29; 2 Vakorinto 1:9, 10) Xana a hi leswi chavelelaka ku tiva leswaku hambi ri ri rifu hi roxe ri nga ka ri nga hi tekeli ntshembo wa hina lowu hlamarisaka wa vumundzuku?

Anakanya hi ku chavelela loku ntshembo lowu ni switshembiso swa Xikwembu swi nga ku tisaka eka Vakriste lava xanisiwaka lava tiyiselaka ku himeteriwa, eka lava va lamatiweke ni lava va lahlekeleke hi swirho swin’wana swa miri hikwalaho ka tihanyi, eka vavasati lava chavaka Xikwembu lava pfinyiweke, eka vatswari lava damurhutiweke eka vana va vona. Ina, eRitweni ra Xikwembu hi kuma marito yo tala yo chavelela ni xitshembiso lexi nga hi vangelaka ku tsaka loko hi ri enhlomulweni.—Matewu 5:10-12.

Tsundzuka Hakelo

Loko u hlangavetana ni maxangu ni khombo, tsundzuka leswaku ku hava lexi endlekelaka hina lexi nga endlekangiki eka malandza man’wana lama tshembekaka ya Yehova. Hi nga lwisana ni matshalatshala ya Diyavulosi yo hi sivela ku tirhela Yehova loko hi endla leswi muapostola Petro a swi vuleke a ku: “N’wi aleleni [Diyavulosi], mi tiya eku pfumeleni ka n’wina, hi ku tiva leswaku vamakwenu emisaveni hinkwayo va hlangana ni maxangu yo fana ni lawa mi nga na wona.” (1 Petro 5:9) Ee, Vakriste van’wana va tiyisela miringo leyi fanaka hikwalaho ka mahungu lamanene naswona va endla tano handle ko landzula. Hi nga endla tano.

A hi fanelanga ku xiya ntsena lava yimeke va tiyile kambe hi fanele ku tlhela hi xiya tihakelo leti va ti kumeke. Hi xikombiso: Sathana, hi ku lava ku kombisa leswaku Yobo u tirherile Xikwembu hikwalaho ka swivangelo swa vutianakanyi ntsena, u tiserile munhu loyi wa Xikwembu makhombo hi ku landzelelana. Xo sungula swifuwo swakwe swi herile, ku ta malandza ya yena, ivi eku heteleleni ku fa hambi va ri vana va yena. Hi ku ka a nga aneriseki hi sweswo, Sathana u bile Yobo hi “marumba la’yo v̌av̌isa, ku suka mikonḍweni ku fika e nhlokweni.” (Yobo, tindzima 1 na 2) Xana Yobo u tshovile vutshembeki byakwe eka Xikwembu hikwalaho ka makhombo lawa ke?

E-e, a nga swi endlanga. Kambe ku vuriwa yini hi hakelo? Ee, Yehova u pfuxetile rihanyo ra Yobo, a n’wi nyika “kambirhi” hinkwaswo leswi a swi ri swa yena, ivi a n’wi nyika ni vutomi lebyi lehisiweke, lebyi anerisaka. (Yobo 42:10-17) Ku engetela eka tihakelo leti, ku na yin’wana leyi tlulaka hinkwato ya ku pfuka eku feni munhu a ri ni ku langutela ka vutomi lebyi nga heriki emisaveni ya paradeyisi. (Yobo 14:13-15) Kunene, ntokoto wa Yobo wa chavelela ni ku nyika matimba eka Vakriste lava xanisekaka namuntlha.

“Yehova Wa Pfuna”

Sweswi, xiya mhaka ya nsati un’wana wa Mukriste la tiyiseleke malembe yo tala ya ku xaniseka etinkambheni ta nxaniso eJarimani hi nkarhi wa Nyimpi ya Vumbirhi ya Misava. Ku tlhandlekela eka swiyimo swo biha, nxaniso wa tihanyi, ni ku tsoniwa swo tihanyisa a ku ri ni ku hambanisiwa ni nuna ni n’wana wakwe hi nsindziso hi malembe ya ntlhanu, a nga tivi leswaku a va humeleriwa hi yini. Eku heteleleni, endzhaku ka malembe ya ku tiyisela ka vutshembeki u tlhele a hlanganisiwa ni nuna ni n’wana wa yena, naswona hi vanharhu ka vona va tirhele Yehova hi ku tshembeka ku sukela kwalaho. Xiya marito yakwe malunghana ni ntokoto wa yena:

“Malembe ya mina ya le tinkambheni ta nxaniso eJarimani ma ndzi dyondzisile dyondzo leyi hlawulekeke. I ndlela leyi moya wa Yehova wu swi kotaka ha yona swinene ku ku tiyisa loko u ri ehansi ka ndzingo lowukulu! Emahlweni ko va ndzi khomiwa, ndzi hlayile papila ra makwerhu wa xisati loyi a vuleke leswaku ehansi ka ndzingo lowo nonon’hwa moya wa Yehova wu endla leswaku ku rhula ku ku tela. Ndzi ehlekete leswaku a a swi hundzeletanyana. Kambe loko mina hi ndzexe ndzi werile emiringweni, ndzi swi tivile leswaku leswi a swi vuleke a wu ri ntiyiso. Hakunene swi endleka hi ndlela yoleyo. Swa nonon’hwa ku swi anakanya, loko u nga si hlangavetana na swona. Kambe kunene swi ndzi humelerile. Yehova wa pfuna.”

Xana a wu chaveleriwi no tiyisiwa hi marito lawa ke? Hikwalaho ka ku tiyisela kakwe ehansi ka ndzingo, wansati loyi wa Mukriste, kun’we ni ndyangu wakwe, u languta emahlweni eku voneni ka ntshembo wakwe wa vutomi lebyi nga heriki. (Vaheveru 10:39) I hakelo muni leyikulu swonghasi ya vutshembeki!

Endzhaku ko hlangavetana ni miringo hi malembe yo tala, xana Pawulo makwerhu la rhandzekaka u titwise ku yini? U hetiwile matimba? U herile mbilu? U vile ni gome xana? Ni kantsongo! A tiyiseka, a ri na ntshembo, a tsakile leswi a tiyiseleke. Pawulo u te: “Ndzi lwile nyimpi leyinene, ndzi hetile mpfhuka wa mina wa ku tsutsuma, ndzi hlayisile ku pfumela. Leswi saleke, hi leswaku harhi ya vuhluri yi ndzi yimerile, ku nga ku lulama loku Hosi, muavanyisi lowo lulama, yi nga ta ndzi nyika hi siku lerikulu.” (2 Timotiya 4:7, 8) Pawulo u tsutsume handle ko biwa hi mheho naswona u kumile hakelo yakwe ya le matilweni. (Vafilipiya 3:4-14) I mani la nga chaveleriwiki hi xikombiso xo tano lexinene ke? Onge na hina hi ku fanana hi nga tiyisela ku nonon’hwa, hi chaveleriwa hi Matsalwa ivi hi tshama hi tshembekile eka Yehova Xikwembu xa hina xa rirhandzu.

[Xifaniso eka tluka 7]

Ntokoto wa Yobo wu tiyisa Vakriste lava xanisekaka namuntlha