‘Tshamani Mi Nga Ri Na Xivati, Kumbe Xisandzu, Naswona Mi Ri Ni Ku Rhula’
“Chivirikani leswaku Xikwembu xi mi kuma mi nga ri na xivati kumbe xisandzu, naswona mi ri ni ku rhula.”—2 PETRO 3:14.
1, 2. Ku hlawuleka i yini xana?
YEHOVA XIKWEMBU wa kwetsima. N’wana Wakwe, Yesu Kriste, u vulavule na yena hi xikhongelo tanihi “Tatana La Kwetsimaka.” (Yohane 17:1, 11) Naswona swivumbiwa swa moya ematilweni swi hlamuseriwa swi ri karhi swi huwelela swi ku: “Wa kwetsima, wa kwetsima, wa kwetsima, Yehova wa tinyimpi.” (Esaya 6:3) Kambe ku hlawuleka i yini ke?
2 Marito lama nge “ku kwetsima” ni ku “hlawuleka” ya hundzuluxeriwe ya huma eka marito ya Xiheveru lama nga ni nhlamuselo ya matimba ya ‘ku vangama,’ “ku va lontshwa kumbe ku va la phyuphyeke, la tengeke kumbe la baseke” emirini. Hambi swi ri tano, eMatsaIweni, marito lama ngopfu-ngopfu ma tirhisiwe hi ku twisisa ka mahanyelo lamanene kumbe ka moya. Xiheveru xo sungula na xona xi ni miehleketo ya ku hambana, leyi nga katsakanyiki, kumbe ya ku hlawulekisiwa eka Yehova, Xikwembu xo kwetsima. Ematsalweni ya Vukriste ya Xigriki, na kona marito lama hundzuluxeriweke va ku “ku hlawuleka” ni ku “kwetsima” ya vula ku hambana eka Xikwembu. Nakambe ya tirhisiwe ku vula ku hlawuleka tanihi mfanelo ya Yehova, kun’we ni ku tenga kumbe ku hetiseka eka mahanyelo ya munhu hi xiyexe. Kutani ku hlawuleka ku vula ku tenga, ku basa ni ku kwetsima.
Ku Hlawuleka Ka Laveka Eka Vanhu Va Yehova
3. Hikwalaho ka yini Yehova a faneriwa hi vugandzeri lebyi tengeke?
3 Kutani ke, ku vuriwa yini hi ku huwelela ka le tilweni loku nge: “Ya kwetsima, ya kwetsima, ya kwetsima Hosi, Xikwembu xa matimba hinkwawo”? (Nhlavutelo 4:8) Kunene, leswi swi hlamusela ku hlawuleka ni ku tenga eka Xikwembu hi mpimo lowukulu! Hikokwalaho ke, Yehova ‘Loyi a Hlawulekeke,’ u lulameriwa hi vugandzeri lebyi tengeke. (Swivuriso 9:10) Entiyisweni, Yehova Xikwembu u letele muprofeta Muxe ku byela Vaisrayele a ku: “Hlawulekani hikuv̌a nḍi hlawulekile, mina Yehova, Šikwembu ša ṅwina.”—Levitika 19:1, 2.
4. Swi koteka hi ndlela yihi ku gandzela Yehova hi ndlela leyi amukelekaka?
4 Un’wana ni un’wana loyi a tivulaka leswaku u nyikela ntirho lowu amukelekaka eka Yehova kasi u endla swilo leswi nga tengangiki i manyala emahlweni ka yena, hikuva i ku tirhisa vutlhari bya Xikwembu ni ku hlawuleka ntsena laha swi kotekaka ku n’wi gandzela hi ndlela leyi amukelekaka. (Swivuriso 20:25; 21:27) Xisweswo ke, loko Xikwembu xi vhumbe leswaku xi ta pfulela vanhu va xona lava khotsiweke ndlela yo tlhelela eYerusalema va huma eBabilona, xi te: “Gonḍo ri ta v̌a kona, ni ndlela le’yi v̌uriwaka ndlela le’yo kwetsima; a ku na munhu wa thyaka l’a nga ta hunḍa kona.” (Esaya 35:8) Masalela lama vuyeke hi 537 B.C.E. ma endle tano hi minsusumeto yo hlawuleka, leswaku ya pfuxeta vugandzeri bya ntiyiso bya ‘Loyi a Hlawulekeke.’ Kutani Vaisrayele inge va tikombe va hlawulekile hi ku yingisa Xikwembu. Kambe va hlulekile ku tshama va hlawulekile, va ri hava xivati emalangutelweni ya xona.—Ringanisa Yakobo 1:27.
5. Pawulo u kombe leswaku Vaisrayele va moya va fanele ku gandzela Xikwembu hi ku hlawuleka hi ndlela yini?
5 Vaisrayele va moya, kumbe Vakriste lava totiweke, na vona va fanele ku gandzela Yehova hi ku hlawuleka. (Vagalatiya 6:16) Mayelana ni leswi, muapostola Pawulo u khutaze vapfumeri-kulobye ku ‘nyiketa mimiri ya vona yi va mhamba leyi hanyaka, leyi kwetsimaka, leyi amukelekaka eka Xikwembu.’ Ku endla leswi, vapfumeri lava a va fanele ku tiyiseka leswaku va endla ku rhandza ka Xikwembu, hikuva Pawulo u engeterile a ku: “Mi nga landzi hanyelo ra nguva leyi, kambe mi pfumela ku hundzuka mi va vantshwa emiehleketweni ya n’wina, mi ta kota ku twisisa leswi ku rhandza lokunene ka Xikwembu, loku nkhensekaka ni ku hetiseka ku nga swona.”—Varhoma 12:1, 2.
6. Vakriste hinkwavo va fanele ku tihlayisa eka yini?
6 Enkarhini lowu wa ku andza, vo tala lavantshwa va khitikanela enhlengeletanweni ya Yehova. Na vona, va gandzela Yehova hi ku hlawuleka. Va ri tsakela swonghasi langutelo ro pona “nhlomulo lowukulu” ni ra ku tiphina hi vutomi lebyi nga heriki emisaveni ya paradeyisi emafambiselweni lamantshwa yo lulama ya Xikwembu! (Matewu 24:21; Luka 23:43) Kambe lava va nga ni ntshembo wa le tilweni ni “ntshungu lowukulu” lowu nga ni malangutelo ya ku tsakela vutomi lebyi nga heriki, va fanele ku tivonela eka mikhuva leyi thyakisaka kumbe nchumu un’wana ni un’wana lowu Iwisanaka ni mahanyelo lamanene ni dyondzo ya Matsalwa.—Nhlavutelo 7:9, 14.
7. Xana Petro u vule yini lexi kandziyisaka xilaveko xa ku va xikombiso “hi ku hanya vutomi lebyo hlawuleka, bya vukhongeri?
7 Loko a kombetela enkarhini wa hina, muapostola Petro u tsarile a ku: “Kambe siku ra Hosi [Yehova] ri ta ta tanihi khamba, kutani matilo [tihulumendhe ta misava] ma ta hundza hi huwa leyikulu; hinkwaswo swa ntumbuluko [malangutelo ni tindlela ta misava] swi ta hela li ndzilo, kutani misava [vandla ra vanhu lava nga rhandziki Xikwembu] ni mintirho leyi nga ka yona swi ta hisiwa” swi tshwa tanihi “matilo” ni “hinkwaswo” leswi nga ‘endzilweni’ lowu lovisaka wa siku ra Yehova. Kutani Petro u engeterile: “Leswi ku nga ta tshwa swilo leswi hinkwaswo swi hela hi ndlela leyi, xana mi fanele ku va vanhu va rixaka muni? Hi ku hanya vutomi lebyo hlawuleka, bya vukhongeri, mi fanele ku langutela siku ra [Yehova], mi endla leswaku ri hatla ri fika, ku nga siku leri ha rona ku nga ta tshwa matilo ma hela, ni hinkwaswo swa ntumbuluko swi nga ta n’okisiwa hi ndzilo!” Ina, timbhoni hinkwato ta Yehova ti fanele ku va swikombiso “hi ku hanya vutomi lebyo hlawuleka.” Kutani lava va hlayisaka ku kwetsima va nga languta emahlweni eka ndhawu leyi sirheletekeke exikarhi ka ‘matilo lamantshwa ni misava leyintshwa’ yo lulama ya Xikwembu. (2 Petro 3:7, 10-13) Mayana malangutelo lama katekisiweke swonghasi!
8. Xana Mukriste u fanele ku endla yini loko a hambukile endleleni yo hlawuleka?
8 Hambi swi ri tano, ku vuriwa yini loko Mukriste a tirhe kahle entirhweni wa Yehova nkarhi wo leha kutani endzhakunyana a endla mahanyelo lama thyakisaka kumbe a Iwisana ni dyondzo kumbe mahanyelo lamanene ya Bibele? Kutani u hambukile endleleni yo hlawuleka naswona u fanele ku kombisa ku hundzuka ka ntiyiso ivi a teka magoza lama hanyisaka ni lama faneleke. Hi laha Pawulo a byeleke vatotiwa-kulobye ha kona u te: “Vanakulorhi, switshembiso leswi swi nyikiwile hina, hikokwalaho, hi fanele ku tibasisa, hi susa thyaka hinkwaro ra miri ni ra moya, hi ringeta ku hanya vutomi lebyo hlawuleka swinene, exichabyeni xa Xikwembu.” (2 Vakorinto 7:1) Mukriste un’wana ni un’wana loyi a lavaka ku lulamisa ndlela yakwe u ta kuma ndzayo ya Matsalwa ya valanguteri lava nga ni rirhandzu yi ri nkateko hakunene.—Swivuriso 28:13; Yakobo 5:13-20.
9. Hikwalaho ka 2 Petro 3:14, i xivutiso xihi lexi tlakukaka?
9 Endzhaku ka ku kombetela eka mafambiselo lamantshwa yo lulama, Petro u engeterile a ku: “Hikokwalaho, varhandziwa, leswi mi languteleke swilo leswi, chivirikani leswaku Xikwembu xi mi kuma mi nga ri na xivati kumbe xisandzu, na swona mi ri ni ku rhula.” (2 Petro 3:14) Marito wolawo a ma kongomisiwe eka Vakriste lava totiweke, kambe hakunene i yini lexi timbhoni hinkwato ta Yehova ti faneleke ku xi endla leswaku ti kumeka ti nga ‘ri na xivati, kumbe xisandzu, naswona ti ri ni ku rhula’? Kutani ke, hina hi fanele ku endla yini?
‘Ku Pfumala Xivati Ni Xisandzu’
10. Xana lava va “ntshungu lowukulu” va basise “tinguvu” ta vona hi ngati ya Yesu hi ndlela yihi?
10 Hi fanele ku endla hi matimba leswaku hi kumeka hi nga ri na ‘xivati ni xisandzu.’ Lava va “ntshungu lowukulu” va ‘hlantswile tinguvu ta vona hi ngati ya Xinyimpfana.’ Hi nkarhi wun’wana, a va ri xiphemu xa misava leyi ya xidyoho naswona tinguvu ta vona ta ku tikombisa ha tona a ti ri na xivati xa yona, lexi thyakeke emahlweni ka Yehova. Xana va tibasisile njhani tinguvu ta vona ti va leti nga riki na xivati hi “ngati ya Xinyimpfana,” Yesu Kriste? Hi ku kombisa ripfumelo ra vona ra leswaku ‘ku hava ku rivaleriwa loku vaka kona handle ka loko ku chuluriwe ngati’ ni leswaku Yesu i “Xinyimpfana xa Xikwembu lexi susaka swidyoho swa misava.” (Nhlavutelo 7:9, 14; Vaheveru 9:22; Yohane 1:29, 36) Leswi va swi endle hi ku tinyiketela loku nga tiseketelangiki hi swiyimo eka Xikwembu kutani va ku kombisa hi nkhuvulo, ku nghenisiwa loku heleleke ematini. Ku tinyiketela ko tano a ku ta endliwa ha Yesu Kriste na hi ku tiyiseka ka leswaku ngati yakwe leyi halatiweke yi endla leswaku swi koteka eka Xikwembu ku rivalela swidyoho swa vona ni ku va endla leswaku va amukeleka emahlweni ka xona.
11. Tanihi leswi xidyoho xi kavanyetaka ku rhula ka hina na Yehova, hi le ka xiyimo xihi lexi hi faneleke ku tshama eka xona?
11 “Ntshungu lowukulu” wu fanele ku hlayisa “tinguvu” ta wona ti basile hi ku nga vi na xivati xa misava kutani xisweswo va lahlekeriwa hi vumunhu bya Vukriste ni xikombiso xa vona tanihi timbhoni leti amukelekaka ta Yehova. Hakunene, Vakriste hinkwavo va xiviri va fanele ku tshika ku va ni xisandzu hi tindlela ta misava, swiendlo ni malangutelo. Tanihi leswi xidyoho xi kavanyetaka ku rhula ka hina na Yehova, ku tshama exiyin’weni lexi swidyoho swa hina swi nga rivaleriwaka ntsena laha hi nga kumiwaka “eku rhuleni” eku teni ka ‘siku lerikulu ra Yehova.’ Hi fanele ku va hava swivati hikwalaho ka mikhuva ya vukhongeri bya vunwa kumbe vunghwavava bya misava leyi.
12. Xana 2 Petro 2:13 yi nga tirhisiwa hi ndlela yihi exikarhi ka bandlha ra Vukriste?
12 Ku tshama hi nga ri na xivati ni xisandzu swi lava mahanyelo ni malangutelo lamanene eka “vadyondzisi va mavunwa” lava Petro a tsaleke ha vona: “Va kuma swi tsakisa vona ku cina mintlangu, va nwa nhlekanhi hinkwawo. I swivati ni swisandzu evanhwini. Na loko va ri na n’wina emikhubyeni, vona va tsakela ku cina ni ku nwa ngopfu, hi mhaka ya vusopfa bya vona.” (2 Petro 2:1, 13) Ina, hambi ku ri exikarhi ka bandlha, hi fanele ku tivonela eka vadyondzisi va vunwa lava ‘kumaka swi tsakisa vona ku cina mintlangu, va nwa nhlikanhi hinkwawo.’ Enkarhini wa tiawara ta ninhlikanhi, laha ku nga endliwaka swo tala ku pfuna van’wana emoyeni, vanhu lava nga riki va moya va nga ha endla swo biha, ku katsa ni ku rhandza minkhuvo ni swakudya ni ku nwa ku tlula mpimo. Va nga ha ringeta ku hundzula swiendlakalo swo tano swa ntirhisano tanihi minkhuvo ya vukati swi va minkarhi ya vuyimbeleri lebyi pfuxaka nyanyuko, ku cina ka rimbewu, makolo ni ku tinyiketela swinene swakunwa leswi nga ni xihoko. Ku hava ni xin’we xa leswi lexi faneleke ku pfumeleriwa xi humelela exikarhi ka vanhu va Yehova.—Esaya 5:11, 12; vona Xihondzo xo Rindza xa Xinghezi, xa April 15, 1984, matluka 16-22.
13. Xana n’wini wa yindlu a nga endla yini leswaku nkhuvo wu ta va lowu aka emoyeni?
13 N’wini wa yindlu enkhubyeni u ni vutihlamuleri bya leswi swi humelelaka kwalaho. Leswaku xiendlakalo xa kona xi ta va lexi xi akaka emoyeni, i vutlhari ku xi hlayisa xi ri eka mpimo lowu lawulekaka ni ku nga rhambi un’wana ni un’wana loyi a nga ta tisa nkucetelo lowu hombolokeke. Hi laha marito ya Pawulo eka 2 Timotiya 2:20-22 ya kombisaka ha kona, a hi hinkwavo lava hlanganyelaka ni bandlha lava nga vanghana lava rhandzekaka. Kutani ke, n’wini wa muti wa Mukriste a nga boheleriwanga ku rhamba vanhu lava tivekaka va ri lava vulavulaka ngopfu kumbe ku rhandza swakudya kumbe ku nwa ku tlula mpimo. U tsundzuka leswaku ‘hambi ha dya hambi ha nwa kumbe hi endla yini na yini, hi fanele ku endla swilo hinkwaswo ku dzunisa Xikwembu.’—1 Vakorinto 10:31.
14. I xiyimo xihi lexi faneleke ku tekiwa mayelana ni vadyondzisi va vunwa?
14 I vantsongo ntsena lava nga ‘swivati ni swisandzu, lava nghenisaka tidyondzo ta vunwa’ loko va ri karhi va hlanganyela na hina. Kambe valanguteri ni van’wana ebandlheni va fanele ku va ni xivindzi, va sola vadyondzisi vahi na vahi lava nga ha ngungumelaka va nghena ebandlheni swinene kutani va ringeta ku kurisa vunghwavava kumbe dyondzo leyi hoxeke. (Yuda 3, 4) I ku namarhela swinene milawu leyinene ya Xikwembu leswi nga ta endla leswaku swi ta koteka ku hlayisa bandlha ri ri hava xivati ni xisandzu.
Ku Laveka Yini Leswaku U Va ‘Eku Rhuleni’ Xana?
15. (a) Xana munhu a nga fikelela ku rhula ni Xikwembu hi ndlela yihi? (b) Hi fanele ku endla yini leswaku hi kumiwa “eku rhuleni” eku teni ka siku lerikulu ra Yehova?
15 Leswaku va kumeka ‘eku rhuleni,’ vanhu va Yehova va fanele ku hlayisa ku rhula na yena. (2 Petro 3:14) Hi nyikiwe xiyimo lexi ha Yesu Kriste, loyi Pawulo a tsaleke ha yena: “Swi tsakisile Xikwembu leswaku vukwembu hinkwabyo bya xona byi tshama eka yena, ni ku endla leswaku, ha yena, swilo hinkwaswo swi vuyelelana na xona, hikuva hi yena Kriste la tiseke ku rhula hi ku fa ka yena [emhandzini ya nxaniso]; hinkwaswo, hambi la misaveni, hambi le matilweni, swi vuyelelana ni Xikwembu ha yena.” (Vakolosa 1:19, 20) Swidyoho leswikulu swi kavanyeta vuxaka bya munhu na Yehova naswona swi vangela munhu ku himiwa hi ripfalo, xiyimo lexi kavanyetiweke, kasi ku rhula i rifuwo ra lava va hlayisaka milawu ya Xikwembu. (Psalma 38:3; Esaya 48:18) Manuku ke, leswaku hi kumiwa ‘eku rhuleni’ eku teni ka siku lerikulu ra Yehova, hi fanele ku tshama exiyin’weni xa Xikwembu lexi pfumelelaka swidyoho swa hina ku susiwa hi ngati ya Yesu leyi halatiweke emhandzini ya nxaniso.
16. Hi ku ya hi muapostola Pawulo, xana hi nga phikelela ku rhula ni vapfumeri-kulorhi hi ndlela yihi?
16 Nakambe hi fanele ku va eku rhuleni ni vagandzeri van’wana va Yehova. Pawulo u khutazile a ku: “A hi laveni leswi hi pfunaka ku hanya hi ku rhula, ni ku akisana.” Mhaka yi komba leswaku hi fanele ku tivonela leswaku hi nga khunguvanyisi vapfumeri-kulorhi mayelana ni swakudya, swakunwa kumbe nchumu wun’wana ni wun’wana. (Varhoma 14:13-23) Kambe ku na swo tala emhakeni ku tlula sweswo, hikuva Pawulo u byele Vakriste va le Efesa a ku: “Mina . . . ndza mi khongotela ku hanya hi ndlela leyi fambelanaka ni ku vitiwa loku mi vitiweke ha kona. Masiku hinkwawo, titsongahateni, mi va ni musa, ni ku leha mbilu; kombani rirhandzu ra n’wina hi ku yingiselana. Endlani hi matimba ku hlayisa vun’we lebyi nyikiwaka hi Moya, mi hanyisana hi ku rhula.” (Vaefesa 4:1-3) Hakunene, hi lava ku kombisa vun’we bya hina hi ku papalata marito hinkwawo lama kavanyetaka ku rhula ni swiendlo na hi ku yima hi tiyile tanihi vaseketeri va vuhosi bya Yehova.
17. Hi ku ya hi 1 Petro 3:10-12, ku katseka yini eku ‘laveni ka ku rhula’?
17 ‘Ku lava ku rhula’ hakunene ku lava leswaku hi xiyisisa swiendlo swa hina ni marito ya hina, hikuva muapostola Petro u tsarile: “Loyi a navelaka ku hanya vutomi lebyi tsakisaka, ni ku vona masiku lamanene,a a bohe ririmi ra yena ri chava swo biha, ni milomo ya yena yi nga vulavuli mavunwa;a a fularhele leswo biha a endla leswo lulama,a a lave ku rhula a tiyisela endleleni ya kona. Hikuva mahlo ya [Yehova] ya tsakela lavo lulama, ni tindleve ta yena ti pfulekele swikhongelo swa vona, kambe mombo wa [ Yehova] wu fularhela lava endlaka swo biha.” (1 Petro 3:10-12; Psalma 34:12-16) Kutani, hi tindlela to hambana-hambana, malandza lama tshembekaka ya Yehova ya fanele ku hambeta ya “lava ku rhula” loko ya ta kumeka ya ri ‘eku rhuleni.’
Titshege Hi Mpfuno Wa Yehova
18. Xana hi nga endla yini loko tindlela ta misava, swiendlo, kumbe malangutelo swi hi tsakisa?
18 Petro u kombe leswaku “hinkwaswo,” moya wa misava, kumbe malangutelo ni tindlela, swi ta “n’okisiwa,” kumbe ku herisiwa, enkarhini wa “siku ra [Yehova].” (2 Petro 3:7, 10) Kambe xana hi nga endla yini loko tindlela ta misava, swiendlo, kumbe malangutelo swi tsakisa eka hina? Hakunene, hi fanele ku tirhisa malunghiselelo ya moya lama endliweke hi nhlengeletano ya Yehova. Exikarhi ka swilo swin’wana, minkarhi hinkwayo hi fanele ku dyondza Rito ra Xikwembu ni tibuku ta Vukriste leti lunghiseleriwaka hi “nandza lowo tshembeka, lowa vutlhari.” (Matewu 24:45-47) Hi fanele ku tlhela hi komba ku nkhensa loku yaka emahlweni ka lunghiselelo ra nkutsulo, ‘ngati ya nkoka ya Yesu, leyi fanaka ni ya Xinyimpfana lexi nga riki na xisandzu kumbe xivati.’—1 Petro 1:18, 19.
19. Xana xikhongelo xi nga va mpfuno loko malangutelo ya misava ya hi kucetela hi ndlela yihi?
19 Hi fanele ku khongelela mpfuno wa Xikwembu wo ‘lava ku lulama.’ (1 Timotiya 6:11-14) Loko hi swi vona leswaku malangutelo wolawo ya misava ya hi kucetela, kumbe loko mupfumeri-kulorhi un’wana la rhandzekaka a hi tsundzuxa ha swona, byi ta va vutlhari ku va lava kongomeke hi xiphiqo lexi eswikhongelweni swa hina hi ku kombela Yehova ku hi pfuna leswaku hi hlula mimboyamelo leyi. Hakunene, swi ta va swinene ku kombela moya eka Xikwembu ni mpfuno wakwe eku hlakuleleni ka mihandzu ya wona leyi nga faniki ni malangutelo ni tindlela ta misava. (Vagalatiya 5:16-26; Psalma 25:4, 5; 119:27, 35) Yehova a nga hi pfuna ku anakanyisisa hi swilo leswi lulameke, leswi tengeke, leswinene ni leswi nkhensekaka. Kutani swi fanela swonghasi ku n’wi kombela hi matimba leswaku “ku rhula ka Xikwembu” loku nga ringanisiwiki ku ta hlayisa timbilu ni matimba ya hina yo ehleketa! (Vafilipiya 4:6, 7) Kutani mivilelo, miringo ni leswi fanaka, swi nga ka swi nga kuli ku fikela loko swi nga lawuleki. Ku ri na sweswo, vutomi bya hina byi ta funghiwa hi ku rhula loku hi ku nyikiweke hi Xikwembu. Hakunene, “la’v̌a ranḍaka nawu wa [Yehova] v̌a ni ku rula lo’kukulu.”—Psalma 119:165.
Tshamani Mi ‘Nga Ri Na Xivati, Kumbe Xisandzu, Naswona Mi Ri Ni Ku Rhula’
20. Hikwalaho ka yini hi nga vulaka leswaku xiyimo lexi nga riki na xisandzu xa moya xa koteka?
20 Lexi tsakisaka, hinkwavo lava nga endzeni ka nhlengeletano ya Yehova, ku katsa ni lavantshwa lava nghenaka, va nga amukeleka eka Xikwembu. (Mintirho 10:34, 35) Hi mpfuno wa Yehova, swa koteka ku “tshika ku hanya ehandle ka Xikwembu ni ku navela swa misava” ni ku hanya hi laha Vakriste va ntiyiso va faneleke ku hanya ha kona. (Tito 2:11-14) Hambi leswi hi tshameke hi va kule na Yehova, ni leswi miehleketo ya hina a yi ri eka mintirho leyo biha, hi vuyelelane ni Xikwembu hi rifu ra Kriste. Xisweswo xiyimo xa moya lexi nga riki na xisandzu xa koteka, loko ntsena hi hambeta eripfumelweni naswona hi nga hambukisiwi eka ntshembo wa mahungu lamanene.—Vakolosa 1:21-23.
21. Xana eku heteleleni hi nga kumeka hi ‘nga ri na xivati, kumbe xisandzu, naswona hi ri ni ku rhula hi ndlela yihi?
21 Hi mpfuno wa Yehova, Rito rakwe ni nhlengeletano ya yena, hi nga tshama hi nga ri na xivati xa misava naswona hi nga ri na xisandzu hikwalaho ka tindlela ta yona, swiendlo ni malangutelo. Xisweswo hi nga tiva ku rhula ka ntiyiso. Ina, hi ku tiyisela evugandzerini lebyi hlawulekeke bya Yehova, eku heteleleni hi nga kumeka hi ‘nga ri na xivati, kumbe xisandzu, naswona hi ri ni ku rhula.’
U Nga Hlamula Njhani Xana?
◻ Hikwalaho ka yini ku hlawuleka ku laveka eka vanhu va Yehova?
◻ Hi nga tshama hi nga ri na xivati ni xisandzu hi ndlela yihi?
◻ Ku laveka yini ku va ‘eku’ rhuleni’?
◻ I tindlela tihi leti hi nga ha kombisaka ku tiseketela hi mpfuno wa Xikwembu ha tona?
[Swifaniso eka tluka 16, 17]
Timhaka ta ku tshama hi ‘nga ri na xivati, Kumbe xisandzu, naswona mi ri ni ku rhula’
Ku tirhela Xikwembu hi ku tinyiketela hi mbilu hinkwayo
Ku hlakulela vumunhu bya Vukriste
Ku va na xinakulobye lexi akaka emoyeni
Ku lava ku rhula ni Xikwembu hi xikhongelo