Swivutiso Swa Vahlayi

◼ Yesu a a vula yini loko a ku “mati” lawa a ma avaka a ya ta va “xihlovo xa mati lama pfelelaka, ku yisa evuton’wini lebyi nga heriki”?

Yesu u byele wansati wa Musamariya a ku: “Un’wana ni un’wana la nwaka mati lawa [exihlobyeni xa Yakobo] u ta tlhela a twa torha. Kambe un’wana ni un’wana la nwaka mati lawa ndzi nga ta n’wi nyika wona, a nga ka a nga tlheli a twa torha ni siku ni rin’we; kambe mati lawa ndzi nga ta n’wi nyika wona, ma ta va eka yena xihlovo xa mati lama pfelelaka, ku yisa evuton’wini lebyi nga heriki.”—Yohane 4:13, 14.

Laha ngopfu-ngopfu Yesu u langute mimpfuno ya moya leyi taka eka munhu la amukeleke marito Yakwe ni loyi a veke mudyondzisiwa wa Kriste. Munhu wo tano loyi a hambeteke a amukela vutivi lebyinene bya Yehova Xikwembu na Yesu Kriste ivi a endla hi ku pfumelelana ni leswi hi ripfumelo a a ta va exiyin’weni xo kuma vutomi lebyi nga heriki. (Yohane 17:3) Yesu u kombise nxaxamelo lowu emiehleketweni ni le mbilwini ya munhu tanihi lowu fanaka ni xihlovo lexi pfelelaka mimpfuno, xi hambeta xi tiyisa ripfumelo rakwe ni ku kongomisa magoza ya yena endleleni leyi yaka evuton’wini lebyi nga heriki.

Hambi leswi Yohane 4:14 yi kandziyisaka mimpfuno leyi munhu hi yexe a yi amukelaka, mudyondzisiwa wa Mukriste loyi a nga ni vunyingi bya mati lawa ya moya hi ntumbuluko u navela ku avelana wona ni van’wana handle ka vutianakanyi. U lava leswaku van’wana va twa rungula ra Vukriste kutani va va ni xihlovo lexi pfelelaka mimpfuno yo tano ya moya leyi yisaka evuton’wini lebyi nga heriki eka vona. Ku avelana loku ka rungula ni van’wana ku vonaka ku ri mianakanyo ya leswi Yesu a swi vuleke eka Yohane 7:37-39: “Loko munhu a ri ni torha,a a te ka mina a ta nwa. Hi laha tsalwa ri vuleke ha kona, ‘milambu ya mati lama hanyaka yi ta khuluka yi huma embiIwini ya loyi a pfumelaka eka mina.’ Hi ku vula sweswo,a a ringanisa moya lowu lava pfumeleke eka yena va nga ta nyikiwa wona.”

Va ri karhi va susumetiwa hi matimba ya moya wa Xikwembu, lowu va wu amukeleke ku sukela hi Pentekosta ya 33 C.E. ku ya emahlweni, vaapostola ni vadyondzisiwa va Yesu va endle masingita eku yiseni ka mati lama hanyaka eka vanhu. Moya lowo kwetsima na wona wu endla ntirho wa nkoka eku hlomiseni ni le ku susumeteni ka vadyondzisiwa va Yesu namuntlha, masalela lama totiweke ni “ntshungu lowukulu” wa “tinyimpfu tin’wana,” leswaku va nghenisa mati lama nyikaka vutomi eka vanhu lava nga ni torha, loko va ri karhi va chumayela mahungu lamanene ya Mfumo wa Xikwembu emisaveni hinkwayo. Kutani loyi a nga ni torha u fanele ku ta eka loyi Xikwembu xi n’wi tirhisaka ku ava mati ya ntiyiso lama yisaka evuton’wini lebyi nga heriki.—Matewu 24:14; 28:19, 20; Yohane 7:37; 10:16; Nhlavutelo 7:9.