Swivutiso Swa Vahlayi

◼ EIsrayeleni ya khale ndzhendzeleko wa malembe ya 49 a wu landzeriwa hi lembe ra Yubile (lembe ra vu-50). Xana Yubile yoleyo yi fambelana ni nkarhi lowu landzeleke vhiki ra Xikwembu ro tumbuluxa ra malembe ya 49 000?

Leswi nhlayo ya 49 yi humelelaka etimhakeni ha timbirhi, swa vonaka leswaku Yubile a ri ta komba nkarhi lowu landzelaka ku hela ka vhiki ro tumbuluxa ra malembe ya 49 000. Kambe eka vanhu hinkwavo lava kumeke ku amukeleka eka Xikwembu, leswi endlekeke eka Yubile ya Israyele swi fambisana swinene ni leswi swi nga ta endleka hi nkarhi wa Gidi ra Malembe, malembe yo hetelela ya gidi ya vhiki ro tano ro tumbuluxa, ku nga ri leswi landzeleke endzhaku ka vhiki rero. Xiya xisekelo xa leswi:

Xo sungula, Nawu wa Muxe wu lave leswaku lembe rin’wana ni rin’wana ra vunkombo ri va savata ya tiko; mavele a ya nga ta byariwa, ku nga rimiwi, kumbe ku tshovela. Endzhaku ka lembe ra vunkombo ra Savata (Iembe ra vu-49), ku te lembe ro hlawuleka ra Yubile, lembe ra vu-50. A ku ri savata laha tiko a ri fanele ku tlhela ri wisa kona. Lexi nga xa nkoka ngopfu, a ku twarisiwa ntshunxeko. Vaheveru lava a va tixavise evuhlongeni a va ntshunxiwa enandzwini na le vuhlongeni. Nakambe, tiko leri kumiweke tanihi ndzhaka a ri tlheriseriwa eka mindyangu leyi sindzisiweke ku ri xavisa. Kutani ke Yubile a ku ri nkarhi wa ku ntshunxeka ni ku vuyeteriwa eka Vaisrayele.—Levitika 25:1-46.

Xa vumbirhi, dyondzo ya ku hetiseka ka vuprofeta bya Bibele ni xivandla xa hina eku fambeni ka nkarhi swi komba hi matimba leswaku rin’wana ni rin’wana ra masiku ya ku tumbuluxa (Genesa, ndzima 1) i 7 000 wa malembe hi ku leha. Swa twisiseka leswaku ku fuma ka Kriste ka gidi ra malembe ku ta pfala ‘siku ra ku wisa’ ra Xikwembu ra 7 000 wa malembe, ‘siku’ ro hetelela ra vhiki ro tumbuluxa. (Nhlavutelo 20:6; Genesa 2:2, 3) Hi ku seketeriwa hi xivangelo lexi, vhiki hinkwaro ro tumbuluxa a ri ta va malembe ya 49 000 hi ku leha.

Hi ku xiya ku fana ka tinhlayo, van’wana va ringanise malembe ya 49 ya ndzhendzeleko wa Yubile ya khale ni malembe ya 49 000 ya vhiki ro tumbuluxa. Hi ku anakanya hi ndlela leyi, va ehlekete leswaku Yubile ya Israyele ya lembe ra (vu-50) yi fanele yi yimela, kumbe ku fanekisela leswi nga ta ta endzhaku ka ku hela ka vhiki ro tumbuluxa.

Hambi swi ri tano, tsundzuka leswaku Yubile ngopfu-ngopfu a ku ri lembe ra ku ntshunxiwa ni ku vuyeteriwa ka vanhu. Hi mpimo lowukulu vhiki ro tumbuluxa ri yelana ni Misava ya planete ni ku humelela ka yona. Kambe malunghana ni ku hetiseka ka xikongomelo xa Xikwembu eka vanhu emisaveni, xirhendzevutana hi xoxe a xi xavisiwanga evuhlongeni naswona xisweswo a xi le ku laveni ka ntshunxeko. I vanhu lava lavaka sweswo, naswona vanhu a va vanga kona hi malembe ya 49 000, kambe ku ringana 6 000 wa malembe. Bibele yi komba leswaku nkarhi wun’wana endzhaku ka loko Adamu na Evha va vumbiwile, va tiarisile ka Xikwembu, xisweswo va va mahlonga ya xidyoho, ku nga hetiseki ni rifu. Hi ku ya hi Varhoma 8:20, 21, Yehova Xikwembu u kongomele ku ntshunxa vanhu lava pfumelaka eka vuhlonga lebyi. Hikwalaho ke, vagandzeri va ntiyiso emisaveni ‘va ta ntshunxiwa na vona evuhlongeni bya leswo bola, ku ta amukela ku ntshunxeka loko kwetsima loku nga ka vana va Xikwembu.’—Nakambe vona Varhoma 6:23.

Hambi leswi ntlawa lowuntsongo lowu hlawuleriweke ku tekeriwa etilweni wu rivaleriweke swidyoho swa wona ku sukela hi Pentekosta ya 33 C.E. ku ya emahlweni kutani xisweswo va se va tsakele Yubile, Matsalwa ya komba leswaku ntshunxeko wa vanhu lava pfumelaka wu ta humelela eka ku Fuma ka Kriste ka Gidi ra Malembe. Sweswo swi ta va loko a tirhisa mimpfuno ya gandzelo ra yena ra nkutsulo eka vanhu. Hi ku hela ka Gidi ra Malembe, vanhu va ta va va yisiwe eku hetisekeni ka vumunhu, va ntshunxeke hi laha ku heleleke eka xidyoho na rifu leswi kumekeke tanihi ndzhaka. Xisweswo loko a herisile nala wo hetelela (rifu leri hundziseriweke ri huma eka Adamu), Kriste u ta tlherisela Mfumo eka Tata wa yena eku heleni ka lembe ra vu-49 000 ra vhiki ro tumbuluxa.—1 Vakorinto 15:24-26.

Hikwalaho ka sweswo, eka vanhu lava pfumelaka lava nga ni ku langutela ka la misaveni, ntshunxeko ni ku vuyetela leswi fungheke lembe ra Yubile eIsrayeleni wa khale swi ta kuma ku ringana loku fanelaka eka Savata leyi taka ya Gidi ra Malembe. Manuku ku ntshunxeka ni ku vuyeteriwa swi ta voniwa. Sweswo swi ta va ehansi ka vuhosi bya Kriste, “hikuva N’wana-wa-Munhu i Hosi ya Savata.”—Matewu 12:8.