Swivutiso Swa Vahlayi

◼ Xana i vutlhari eka Mukriste loyi munghana wakwe wa vukati a feke ku titshamela yexe hi ntshembo wa ku tlhela va hlanganisiwa enkarhini lowu taka?

I swinene swonghasi leswi Mukriste a faneleke ku titwa a ri na rirhandzu eka munghana wakwe wa vukati hambi ku ri endzhaku ka loko yoloye a file! Van’wana lava nga eka xiyimo lexi va titshamele va ri voxe, hayi hikwalaho ka ku anerisiwa hi ku titshamela-voxe, kambe hi mintshembo yo tlhela va tekana endzhaku ka ku pfuxiwa ka vafi. Hambi loko hi khathalela mintlhaveko ya vanhu lava nga ni mintshembo yoleyo, hi khutaza vanhu vo tano ku xiyisisa tinhla tin’wana ta Bibele.

Hi xikombiso, lawa ya seketelaka mhaka leyi i marito ya muapostola Pawulo lama nge: “Wansati u bohiwile eka nuna wa yena loko nuna a ha hanya; kambe loko nuna wa yena a fa, u ntshunxekile, a nga ha tekiwa hi loyi a lavaka ku tekiwa hi yena, kambe a swi fambe hi laha hosi yi swi rhandzaka ha kona. Hambi swi ri tano, a swi ta antswa eka yena loko a titshamela ntsena a nga tekiwi.” (1 Vakorinto 7:39, 40) Leswi swi komba leswaku xiboho xa vukati xa hela loko munghana wa munhu a fa. A ku ri vunene eka Xikwembu ku tivisa Vakriste hi leswi, hikuva xisweswo tinoni ni lava feriweke hi vavasati va nga pima swilaveko swa vona swa mintlhaveko ni swin’wana eku kunguhateni ka loko va fanele ku tlhela va tekiwa kumbe ku teka; a va boheleriwanga eka loyi a feke.—1 Vakorinto 7:8, 9.

Hambi swi ri tano, xana Bibele ya kombisa loko vanhu lava va pfuxiweke va ta swi kota ku tekana kumbe ku tlhela va hlakulela vukati lebya khale lebyi hetiweke hi rifu? Mhaka yin’wana yi vonaka yi veka vumbhoni eka xivutiso lexi. Yi katse Vasaduki lava, hambi leswi a va nga pfumeli eku pfuxiweni ka vafi, va teke eka Yesu va ringeta ku n’wi phasa. Va andlale xiphiqo lexi katsaka ku teka nsati wa buti va ku: “A ku ri ni vamakwavo va xinuna va 7; lowa hosi, a teka nsati, kutani a fa a nga ri na vana. Lowa vumbirhi a teka nsati loyi, na lowa vunharhu a endla sweswo;a swi ta va tano ni ka hinkwavo va 7, va fa, va nga siyanga vana. Eku heteleleni, na yena wansati a fa. Hi siku ra ku pfuka eku feni, xana u ta va nsati wa mani eka vona xana?”—Luka 20:27-33; Matewu 22:23-28.

Vakriste a va le hansi ka Nawu, kambe xihinga lexi fanaka xi nga tlhontlhiwa mayelana na vona. Hi xikombiso: Makwerhu wa xinuna na Makwerhu wa xisati C—— a va tekanile naswona a va ri na vana vambirhi. Endzhaku u file. Makwerhu wa xisati C—— u n’wi rhandzile naswona a n’wi navela ngopfu, kambe u vone xilaveko xa munghana, nseketelo wa swa timali, xikombiso xa rimbewu ni mpfuno wa vana. Kutani u tekane na Makwerhu M—— ku hlangana loku a ku ri ka Matsalwa ku fana ni loko sungula. Endzhaku u vabyile ivi a fa. Loko khale ka vanghana va vukati va pfuxiwa naswona vukati byi koteka, a a ta tekana na mani?

Xiya nhlamulo ya Yesu eka Vasaduki: “Vanhu va minkarhi leyi, va teka ni ku tekiwa, lava nga ta nyikiwa ku vona minkarhi leyi taka ni ku pfuka eku feni, a va nga ha teki kumbe ku tekiwa; va nga ka va nga fi, hikuva va fana ni tintsumi, va hundzuke vana va Xikwembu, hi mhaka ya leswi va nga pfuxiwa eku feni. Loko ku ri ku pfuka ka vafi, Muxe na yena u tiyisile . . . a vula leswaku [Yehova] i Xikwembu xa Abrahama, ni Xikwembu xa Isaka, ni Xikwembu xa Yakobo. Hikokwalaho a hi Xikwembu xa lava feke, kambe i xa lava hanyaka; hikuva, eka xona, hinkwavo va hanya.”—Luka 20:34-38; Matewu 22:29-32.

Van’wana va vone onge Yesu laha a a kombetela eka ku pfuxiwa ka vafi ka le tilweni, kambe ku na swivangelo swo pfumela leswaku nhlamulo yakwe a yi vulavula hi ku pfuxiwa ka vafi ka laha misaveni eka “mafambiselo ya swilo” lama taka. Hi swihi swivangelo leswi tiyisaka langutelo leri? Lavaya a va konanisa Yesu a va nga pfumeli eka yena kumbe ku tiva hi ta ku pfuxiwa ka vafi ka le tilweni. Va vutise hi ta ndyangu wa Vayuda ehansi ka Nawu. Loko a hlamula Yesu u kombetele eka Abrahama, Isaka na Yakobo, vavanuna lava languteleke vutomi nakambe emisaveni. (Genesa 42:38; Yobo 14:13-15; ringanisa Vaheveru 11:19.) Vapatriarka volavo, ni timiliyoni ta van’wana, lava pfuxeriwaka emisaveni ni lava kombisaka ku tshembeka va ta “fana ni tintsumi.” Hambi leswi va faka, va nga ka va nga ha fi loko Xikwembu xi va vule lava lulameleke vutomi lebyi nga heriki.

Minsusumeto ya vanhu namuntlha yi nga ha endla leswi makumu yo nonon’hwa ku ma amukela. Kambe swi fanele ku xiyiwa leswaku ku hava laha Bibele yi vulaka leswaku ku pfuxa ka Xikwembu vanhu lava tshembekaka swi vula ku pfuxeta swiyimo swa vukati bya vona. Kutani, ku hava la pfumelaka leswaku loko Akwila na Prisila va kume vutomi bya le tilweni, va tlhele va hlakulela vukati bya vona. (Mintirho 18:2) Naswona Yosefa na Mariya entiyisweni va ta hanya eka vulawuri lebyi hambaneke—yena emisaveni naswona [Mariya] etilweni. (Yohane 19:26; Mintirho 1:13, 14) Tanihi leswi ku nga hava ni un’we wa hina loyi a hanyeke etilweni, hi nga ka hi nga vuli leswaku Akwila, Prisila na Mariya va nga ha va ni mintlhaveko yihi kwale, kambe hi nga tiyiseka hi ku kuma ka vona ku aneriseka loku teleke entirhweni wa vona wa le tilweni.

Hi ku fanana, a hi si tshama hi hanya tanihi vanhu lava hetisekeke. Xisweswo hi nga ka hi nga tiyiseki hi ndlela leyi hi nga ta titwa ha yona ehenhleni ka swinakulobye leswi hundzeke loko hi kuma vutomi lebyi hetisekeke bya vanhu eparadeyisini. I swinene eka hina ku tsundzuka leswaku loko Yesu a endle nhlamuselo yoleyo a a ri munhu la hetisekeke naswona hikwalaho a a ri eka xiyimo lexi antswaka ku tlula hina lerova a nga tlangela mintlhaveko ya lava va ‘hlawuleriweke ku kuma mafambiselo wolawo ya swilo.’ Nakambe xisweswo hi nga tshemba leswaku Yesu wa swi kota ku ‘twela ku tsana ka hina ka sweswi vusiwana.’ (Vaheveru 4:15) Kutani loko Mukriste a kuma swi nonon’hwa ku amukela makumu ya leswaku vanhu lava pfuxiweke va nga ka va nga tekani, a nga tiyiseka leswaku Xikwembu na Kriste va swi twisisa. Naswona a nga ha rindzela ku vona leswi nga ta humelela.

Ku hava xivangelo sweswi xo kandziyisisa ngopfu mhaka leyi. Mupisalema u tsarile a ku: “Mi pfumela leŝaku yena Yehova i Šikwembu! Hi yena l’a nga hi endla, a hi hina; hi tiko ra yena, ni ntlhambi lowu a wu risaka . . . ṅwi ḍuniseni, mi v̌onga v̌ito ra yena. Hikuv̌a u ni tinṭwalo.” (Psalma 100:3-5) Xikwembu xa hina lexinene hakunene xi ta hi lunghiselela swilaveko swa hina swa ntiyiso loko hi ‘vuriwa lava fanelaka ku kuma mafambiselo ya swilo.’—Yobo 34:10-12; Psalma 104:28; 107:9.

Vunene bya Xikwembu nakambe bya kombisiwa eku hi tiviseni ka xona leswaku ku fa ka munghana wa vukati ku tsema vukati. (Varhoma 7:2) Xisweswo un’wana ni un’wana loyi a lahlekeriweke hi munghana wa vukati a nga swi tiva leswaku u ntshunxekile ku tlhela a teka kumbe ku tekiwa sweswi loko sweswo swi vonaka swi laveka kumbe swi antswa. Van’wana va tlhele va teka kumbe ku tekiwa, kwalaho va pfuneta ku hetisisa swilaveko swa vona vini swa sweswi ni leswiya swa ndyangu wa vona. (1 Vakorinto 7:36-38; Vaefesa 6:1-4) Entiyisweni, Mukriste loyi munghana wakwe wa vukati a feke a nga fanelanga ku titwa a bohekile ku titshamela a ri hava munghana wa vukati sweswi hikwalaho ka ku langutela leswaku vanghana vo sungula va vukati va ta tlhela va hlanganisiwa na yena eku pfuxiweni ka vafi evuton’wini laha misaveni eka mafambiselo lama taka.

[Nhlamuselo ya le hansi]