Nkambisiso Wa Mahungu
Xitsundzuxo Xa Khombo
“Emasikwini yo sungula ya thelevhixini, vukari a byi nga talanga naswona a byi nga bihanga ku fana ni leswi byi bihiseke swona namuntlha,” ku vula Dr. Paul Wilson wa Huvo ya Vugevenga eAustralia. Kambe, eku hlamuseleni ka leswi a swi tekeke tanihi xitsundzuxo xa khombo ra ntirhisano ni mpfilumpfilu, Wilson wa engetela: “Sweswi, ngati yi byabyama eka maphokolo ya miri naswona maxangu ya rifu ya kumeka eka nkitsinkitsi wa wona. . . . Vantshwa va phapheriwa ku fa ivi va dlawa hi ku nonoka hi ku xindliwa tinhamu naswona ku kolola ka vona ka rifu ku tekiwa hi ntsako hi khamera.”
Eka xihloko xakwe lexi humelelaka eka The Sydney Morning Herald, Dr. Wilson u hlamusele ku nonon’hwa loku vaviki va mahungu va ku tokoteke eku lunghiseleleni ka leswi tsakeriweke hi vanhu va Australia ehenhleni ka ku vutliwa ka vuhosi ehandle ka ngati eFiji leyi nga kusuhi. Xivangelo i yini? “Vukari i mfungho wa ku tirivatisa ka manguva lawa,” ku vula Wilson. Mahungu lama haxiwaka hi TV ni phepha ra mahungu ma pakanisa, ma hleriwe hi rixaladza, naswona i ya ntiyiso, kambe a ku ri hava “swifaniso swa thelevhixini leswi tshukatshukaka swa vukari na tindzimana ta maphepha-hungu lama hlamuselaka switereko,” ku hlamusela yena.
Ku tlakuka loku ka ku navela ko tsakisiwa hi vukari ku yi fanela swonghasi nhlamuselo ya Bibele ya lava hanyaka “emasikwini ya makumu” ya mafambiselo lama nga kona ya swilo! Eka rixaka leri ro hetelela lero biha, vanhu va hlamuseriwa tanihi “lava nga tikotiki, lavo leva, lava vengaka leswo lulama.”—2 Timotiya 3:1, 3.
Nsati Un’we Kumbe Tshengwe?
Xana kereke yi fanele ku amukela swirho leswi nga ni vanghana va vukati lava tlulaka un’we? Ku tlhantlha xivutiso lexi, Anglican Church eUganda yi hlawule ntlawa ku dyondza mhaka leyi nge “tshengwe ni ndyangu wa Vukriste.” Ecumenical Press Service yi vika leswaku, hi ku landza xirho xin’wana xa ntlawa wa dyondzo, Bixopo Christopher Senyonjo, ku va ni vasati vo tala a swo amukeleka ntsena kambe swi tlhela swi pfuna. Ha yini a swi vona hi ndlela yoleyo? Vukati bya tshengwe, hi ku vula ka yena, byi nga pfuna ku sivela ku hangalasiwa ka vuvabyi bya AIDS. Ku tlula kwalaho, u vula leswaku tshengwe a ri bohi eka Vakriste, a ku Kriste u ta “hundzuluxa vukati bya hina lebyo homboloka byi va vhinyo leyo tsokombela, ku nga khathariseki leswaku i bya nsati un’we kumbe tshengwe.”
Kambe, Bibele yi komba hi ku twakala leswaku Yehova Xikwembu, Musunguri wa vukati bya nsati un’we, a nga pfumeli. U huhutele muapostola Pawulo ku tsala a ku: “Wanuna un’wana ni un’wana a a ve ni nsati loyi a nga wa yena, ni wansati un’wana ni un’wana a a ve ni nuna loyi a nga wa yena.” (1 Vakorinto 7:2) Hi ku twakala, Pawulo endzhakunyana u tsale ehenhleni ka timfanelo ta lava risaka ntlhambi a ku: “Mufambisi ú fanele ku va munhu la nga riki na xisandzu, a teka nsati un’we ntsena.”—1 Timotiya 3:2.
Kutani ke, Vakriste va ntiyiso eAfrika, tanihi kun’wana, va languta tshengwe hi laha ri nga xiswona—ku dyohela nawu wa Xikwembu.
Ku Chumayelela Hakelo
Vaprista va Kereke ya Lutere ya le Sweden a va tsakisiwanga hi ticheke ta miholo ya vona hikuva, hi laha swi vikiweke ha kona, miholo ya vona yi le “hansi loko yi ringanisiwa ni leyi holeriwaka mintirho ya tidyondzo ta le hansi kumbe vuleteri lebyi tluriwaka hi bya vona.” Hambi swi ri tano, hi ku landza ntirho wa mahungu wa Huvo ya Tikereke ta Misava, sweswi swilo swa antswa. Endzhaku ka “tsima ro leha lero nonon’hwa,” vaprista va ha ku kuma mavhiki ya ntirho ya maawara ya 40. Kambe ku vuriwa yini hi loko vanhu va le Sweden va lava mpfuno wa muprista endzhaku ka maawara ya ku tirha ke? Ku pfumelelana ka ntirho lowuntshwa nakambe ku tiyisa hakelo ya mahovha eka awara rin’wana ni rin’wana ro engetela ra nkhathalo wa vurisi. Hakelo yo tano ya mahovha yi languteriwa ku tlakusa miholo ya vona ya lembe hi tiphesente ta 10 ku ya ka 12.
Ku hambana ni ku karhateka loku nga exikarhi ka vaprista va le Sweden hi tihakelo leti antswaka ta mintirho ya vona, loko Yesu a rhume vadyondzisiwa vakwe leswaku va ya chumayela, u te: “Mi nyikiwile ntsena; na n’wina, nyikani ntsena. Mi nga longi mali ya nsuku kumbe ya silvere kumbe ya koporo eswikhwameni swa n’wina.” (Matewu 10:8, 9) A a vula yini xana? Mahungu lamanene ya Mfumo a ma nga fanelanga ku endliwa ya bindzu, naswona a ma nga fanelanga ku tirhiseriwa ku vuyeriwa ka vutianakanyi ka munhu hi xiyexe. Vadyondzisiwa va namarhele xiletelo xa Yesu, naswona vutirheli bya vona byi endliwile. Ha yini ke? Hikuva Xikwembu xi va hlayisile evutirhelini.