Xiviko Xa Vahuweleri Va Mfumo
Lavantsongo eItaly Va Endla Minkarhi Yo Veka Vumbhoni
LAVA tlangelaka swikongomelo leswi hlamarisaka swa Xikwembu va tsakela ku pfuna van’wana ku dyondza hi ta ntshembo lowu hlamarisaka wa Mfumo. Leswi hakanyingi swi katsa ku tirhisa minkarhi leyi kumekaka, hi laha xiviko lexi landzelaka xo huma eSardinia xi kombaka ha kona.
◻ “Muhuweleri wa malembe ya 12 hi vukhale a a huma entirhweni wa nsimu hi bazi. Nakambe ebazini a ku ri na vafana vambirhi ni wanhwana, hinkwavo va ri kwalomu ka 18 wa malembe hi vukhale. Muhuweleri lontsongo u tshame ekusuhi ni wanhwana loyi ivi a sungula ku hlaya magazini wa Awake!, a ri na ntshembo wo pfuxa ku tsakela kakwe. U vone magazini lowu ivi a vutisa leswaku u hlaya yini. U hlamusele leswaku u hlaya nhloko-mhaka leyi vulavulaka hi murhi wa swiphiqo leswi vantshwa va fanelaka ku langutana na swona. U vule leswaku u pfuneke ngopfu hi mhaka leyi ni leswaku na yena yi nga n’wi pfuna. Hi ntsako u amukele timagazini.
“Hi ku va va yingisele ku vulavurisana ka kona, vantshwa lavan’wana vambirhi va kombele timagazini. Loko va ri karhi va humesa munyikelo wa tona, muchayeri a va byela leswaku va nga tlangi hi mali ya vona eka swilo swo tano leswi nga pfuniki nchumu. Vantshwa va hlamula va ku va t1harihile, naswona timagazini leti ta tsakisa. Hi ku twa sweswo muchayeri wa bazi a hambuka ndlela, a yimisa bazi, kutani a lava ku vona leswaku i yini lexi tsakisaka eka timagazini leti. Na yena u amukele tikopi.
“Mbhoni leyintsongo leyi hlamuseleke ntokoto lowu yi te: ‘Ndza tsaka hakunene leswi ndzi sunguleke ku veka vumbhoni ebazini.’”
◻ Mbhoni yin’wana leyintsongo yi tirhise xiyimo exikolweni. Muntshwa loyi wa hlamusela: “Mudyondzisi wa xikolo xa hina u hi dyondzise mukhuva lowu a wu hambana ni lowu tolovelekeke. Endzhaku ko hlaya mhaka, a hi fanele ku endla nxaxameto lowu katsaka tinhla-nkulu ni tinhla to seketela ivi manuku hi vulavula hi mhaka ya kona hi ri hava maphepha.
“‘Ndzi wu toloverile mukhuva lowu,’ ku vula Mbhoni. ‘Hi wona lowu vuriwaka hi Theocratic Ministry School Guidebook.’ Mudyondzisi u swi xiye hi xihatla leswaku a ku ri mina ntsena loyi a a humelela eku tirhiseni ka mukhuva lowu. U vutisile leswaku ha yini ku ri na ku hambana ko tano exikarhi ka ntirho wa mina ni lowu wa lavan’wana. Ndzi hlamusele leswaku ndzi dyondze mukhuva lowu eka Xikolo xa Vutirheli bya le Tilweni. U tsakisiwe ngopfu ivi a ku ndzi wu komba vana va xikolo, ndzi tirhisa Theocratic Ministry School Guidebook. Ndzi swi endla.
“Loko ndzi ya ekaya, ndzi byele va le kaya leswi humeleleke. Tata wa mina, loyi a nga riki Mbhoni, minkarhi hinkwayo a a vula leswaku ku va un’wana wa Timbhoni ta Yehova i vulema exikolweni, kambe endzhaku ko yingisela ntokoto wa mina, u sindzisiwe ku cinca miehleketo yakwe.”
I lunghelo muni ronghasi leri n’wina lavantsongo, kun’we na n’wina lavakulu mi nga na rona eku seketeleni na le ku tiviseni ka vito ra Yehova!—Psalma 148:12, 13.