Vaevhangeli Va Tshovela Ntshovelo Wa Misava Hinkwayo
“Loko nkarhi wu ri karhi wu kongoma eka Armagedoni, Timbhoni ta Yehova ti andzisa mintirho ya tona leswaku ti ponisa vo tala va hina hi laha swi nga kotekaka ha kona eka ndzoviso wolowo wo chavisa.”—Nyuziphepha ya Ian Boyne eka “The Sunday Gleaner,” March 15, 1987, Kingston, Jamaica.
MUTSARI wa tinyuziphepha la tshahiweke laha henhla u be kona. Timbhoni ta Yehova ti pfumela leswaku Armagedoni, loko Xikwembu xi ta herisa lavo biha, yi kusuhi ni leswaku vanhu va hanya enkarhini wa ku avanyisa ka Xikwembu. (Nhlavutelo 14:6, 7) Kutani, ku na xilaveko xa leswaku vanhu va khathalela rungula ra mahungu lamanene. Yesu Kriste, muevhangeli lonkulu wa munhu, u sungule nhlengeletano leyi vuleke evhangeli “ku ya fika emakun’wini ya misava” eka lembe xidzana ro sungula. (Mintirho 1:8; Vakolosa 1:23) U vhumbele siku ra hina ntirho lowu fanaka wo vula evhangeli. (Matewu 24:14) Nhlengeletano leyi sweswi yi endlaka sweswo yi vumbiwa hi Timbhoni ta Yehova, leti chumayelaka mahungu lamanene ya Mfumo wa Xikwembu hi xihatla ematikweni ni le ka tindhawu ta 210.
Hambi swi ri tano, Timbhoni ta Yehova ti tlula ku va nhlengeletano leyi chumayelaka. Nakambe hi leti dyondzisaka. Yesu u lerise valandzeri vakwe ku ‘hundzula vamatiko hinkwavo leswaku va va vadyondzisiwa, . . . va va dyondzisa ku hlayisa hinkwaswo leswi a va leriseke swona.’ (Matewu 28:19, 20) Hi lava ku mi tivisa vanhu van’wana lava pfunekeke entirhweni wa vona wo chumayela ni ku dyondzisa.
Mexico
Tiva Virginia. U ni malembe ya 110 hi vukhale naswona u lava ku ku byela leswaku “nkarhi wo tiva ni ku tirhela Yehova a wu si hundza.” Tanihi ntombhi, a a tinyiketele ngopfu lerova hi malembe ya mune a a tiambexe nguvu yo hlawuleka ya vukhongeri. U ri: “Kambe xin’wana a xi kayivela.” Ku hava laha a a ta kuma tinhlamulo leti anerisaka ta swivutiso swakwe swa Bibele. Hi xikombiso, loko a vutise vadyondzisi ekerekeni yakwe a ku, “Vito ra Xikwembu i mani?” va te, “Vito ra Xikwembu i Xikwembu.”
Kambe swilo swi hundzukile hi 1983 loko ntukulu wakwe wa nhwanyana a sungule ku dyondza Bibele ni Timbhoni ta Yehova. Ntukulu loyi wa nhwanyana u hlamule xivutiso xa Virginia hi ku vula leswaku Yehova i vito ra Xikwembu. (Psalma 83:18) Leswi swi susumetele Virginia ku va ni dyondzo ya yena n’wini ya Bibele ni Timbhoni. Malembe mambirhi endzhakunyana, hi June 2, 1985, u khuvuriwile a ri na malembe ya 108.
U ri: “Ndzi tsundzuka siku rero hi ku ri rhandza, hikuva hi siku rero ndzi sungule ku hanya. Emalembeni ya mina, ndzi chumayela tiawara ta ntlhanu kumbe ta tsevu hi n’hweti naswona ndzi tirhisa nhonga ku ndzi pfuna ku famba. Ndzi hlawula ku famba hi milenge ku tlula movha. Hi ndlela leyi ndzi tshama ndzi ri exiyin’weni lexinene xa rihanyo.”
India
“A ndzi ri xirhalanganya xa muti ni munhu la nga pfuneki nchumu,” ku vula wanuna loyi a a tshama ekhotsweni hikwalaho ka swidyoho swo tala. “A ndzi ngungumerisa swidzidzirisi, ndzi tlanga mutka (ku gembula), naswona ndzi dzaha tisigarete ta mahala leti nyikeriweke hi vayimeri va mina va le xihundleni hi ku tiyimisela. Nakambe a ku ri na mukhuva wa xihoko—hinkwaswo leswi ku nga khathariseki mhaka ya leswaku a ndzi ri xirho lexi gingiritekaka xa kereke.” Kambe loko un’wana wa Timbhoni ta Yehova a tile endlwini yakwe ivi a sungula ku dyondza Bibele ni ku tirhisa ndzayo ya yona, vutomi byakwe byi cincile. (Swivuriso 2:1-22; 2 Timotiya 3:16) Sweswi yena, nsati wakwe ni vana vambirhi va vanhwanyana va pfuna van’wana ku ntshunxeka eka swidyoho swo tano.
Belgium
Mpatswa lowuntshwa wu hlundzukele Xikwembu ngopfu. Ha yini? N’wana wa vona wo sungula, wa nhwanyana, u file endzhaku ka masiku ya khume loko a velekiwile. N’wana wa vona wa vumbirhi u velekiwe a lamarile. Naswona n’wana wa vona wa vunharhu, loyi a vonakeke a tiyile naswona a hanyile, u file swi nga rindzeriwanga endzhaku ka tin’hweti ta ntlhanu. Mana wa kona a nga swi tshembanga leswaku Xikwembu xa rirhandzu a xi ta pfumelela makhombo yo tano ku humelela eka vona kasi vanhu vo tala lava hanyaka vutomi bya vunghwavava va ni vana lava hanyeke kahle.
Hi ku hatlisa endzhakunyana, un’wana wa Timbhoni ta Yehova a a chumayela hi yindlu na yindlu endhawini ya ka vona ivi a nghena ekaya rakwe. Loko Mbhoni yi vulavula hi switshembiso swa Xikwembu swa vumundzuku lebyi tsakisaka bya vanhu, wansati u lwisane ni mianakanyo ya Xikwembu lexi nga Tatana wa rirhandzu wa le tilweni. (Psalma 37:10, 11) Kambe u pfumerile ku amukela tibuku ta Bibele. Hakantsongo-ntsongo, endzhaku ka maendzo lama phindhiweke ya Mbhoni, rungula ra Bibele ra mahungu lamanene ri olovise mbilu yakwe ivi ri aka ku tshemba ka yena eka Xikwembu. Sweswi yena ni nuna wakwe va ni ntshembo lowu tiyeke hayi leswaku Yehova u ta hanyisa mufana wa vona la lamaleke emisaveni ya Paradeyisi leyi taka ntsena kambe leswaku U ta pfuxa ni vana va vona vambirhi lavan’wana.—Yohane 5:28, 29; Nhlavutelo 21:1-4.
Portugal
Hi Sonto yin’wana nimixo, wansati loyi a rhwaleke nkwama lowu taleke hi tigrosa u yimile a vulavula ni mpatswa lowu tekaneke. Lowu a wu ri nkarhi wo sungula kambe hayi wo hetelela lowu a va ta hlangana. Mpatswa, lowu nga Timbhoni ta Yehova, a wu ri entirhweni wo vula evhangeli. Wu bumabumele muxavi hikwalaho ko khathalela swilaveko swa nyama swa ndyangu wakwe. Kambe, va vutisile va ku i mani loyi a nga swi kotaka ku anerisa swilaveko swa vanhu? Va hlamule xivutiso hi voxe hi ku vula leswaku Xikwembu xi nga swi kota. (Psalma 107:8, 9; Esaya 33:24) “Xana xi na wona murhi wa xiphiqo xa mina?” wansati a vutisela ehenhla. Timbhoni ti hlamule hi ku tiyisa naswona ti rhamberiwe ekaya ra yena, laha dyondzo ya Bibele yi sunguriweke kona. Nuna wakwe, hi ku xiya ku hundzuka loku antswaka eka langutelo ra nsati wakwe, u joyine dyondzo ya Bibele naswona na yena u endle ku hundzuka emahanyelweni yakwe hi nkarhi wo koma.
Endzhakunyana, wansati u byele Timbhoni leswaku emahlweni ko vulavula na vona hi Sonto liya nimixo, a a ringete ku tihinga kambirhi. A a ri na gome ngopfu hikuva yena ni nuna wakwe a va kunguhate ku hambana. Hambi swi ri tano, sweswi, yena, ni nuna wakwe ni vana va vona va endla nhluvuko hi vun’we eku dyondzeni ka mahungu lamanene.
Thailand
Evuton’wini bya yena hinkwabyo, wansati la tshamaka exiyengeni xa n’walungu wa tiko leri a a hlaseriwa hi mademona. Loko a hlangane ni un’wana wa Timbhoni ta Yehova entirhweni wo vula evhangeli, u kume tibuku ta Bibele ivi a amukela dyondzo ya le kaya ya Bibele. Endzhaku ka tin’hweti timbirhi to dyondza, u sungule ku tlangela swivangelo swa Matsalwa swo basisa muti wakwe eka swilo hinkwaswo swa vukhongeri byo hemba, swo fana ni swikwembu swa hava ni ku hlanhla yindlu yakwe leyi rhandziwaka hi mimoya leyi akeriweke ku sirheleta ndyangu wakwe eka mimoya leyo biha. (Mintirho 19:19; 1 Vakorinto 10:21; 1 Yohane 5:21) Sweswi a nga ha ri na yona minhlaselo ya mademona naswona wa swi kota ku anakanyisisa hi ku pfuna van’wana ku dyondza hi ta Yehova, Xikwembu xin’we xa ntiyiso.
Kenya
Loko murhangeri wa ntlawa wa swigevenga a byeriwe leswaku a a xiyiwa a ri la nga ni khombo ngopfu lerova maphorisa a ya lerisiwe ku n’wi balesela loko ya n’wi vona, u swi be hi makatla hi ku hleka. Hambi swi ri tano, hi ku hatlisa endzhakunyana un’wana wa ntlawa wakwe wa vahlaseri a nga endlanga hi ku pfumelelana ni kungu. U tikume a ri yexe, a rhendzeriwe hi ntshungu lowu kariheke lowu tiyimiseleke ku tisa nhlaselo wa vugevenga. Enkarhini wolowo, maphorisa ya n’wi ponisile, va n’wi tekile ivi va n’wi pfalela ekhotsweni a rindzela ku tengisiwa hi huvo.
Muyimeri wakwe u n’wi tsundzuxe hi marhengu yo hambana-hambana yo landzula nandzu. Kambe loko a ri ekhotsweni, u tsundzuke maendzo lama endliweke hi un’wana wa Timbhoni ta Yehova malembe lama hundzeke. U sungule ku sola tindlela takwe leto homboloka kutani a khongela Xikwembu leswaku xi n’wi pfuna. Entiyisweni, u khongele eka Yehova hi vito. (Ringanisa Mintirho 10:1, 2.) Lexi hlamariseke muavanyisi, xigevenga lexi xi amukele nandzu wa xona ekhoto. Kutani muavanyisi u humese xigwevo lexi vonakaka xi ri xa musa; ematshan’wini ya rifu, xigwevo xakwe a ya ri malembe ya khume ekhotsweni lerikulu ra nsirhelelo.
Loko a ri ekhotsweni, u hlaye tibuku ta Bibele hi ku hiseka ivi a khongela eka Xikwembu hi ku phindha-phindha, a kombela leswaku, loko swi koteka, nkarhi wakwe ekhotsweni wu hungutiwa leswaku a ta Xi tirhela. Swi nga rindzeriwanga, u byeriwe leswaku xigwevo xakwe xi hungutiwe hi hafu. Xisweswo, endzhaku ko pfaleriwa malembe ya ntlhanu, u ntshunxiwile ivi hi ku hatlisa a sungula ku dyondza Bibele ni Timbhoni ta Yehova. Hi ku hatlisa endzhakunyana u khuvuriwile, naswona sweswi u tivekele pakani yo vula evhangeli nkarhi hinkwawo.
Leswi nga laha henhla i swikombiso swi nga ri swingani ntsena swa ndlela leyi Timbhoni ta Yehova ti hetisisaka xileriso ni ndzhwalo wa tona wo vula evhangeli ‘ku ya fika emakun’wini ya misava’ ha yona. Mintokoto leyi yi nga andzisiwa hi magidi. Manuku ke, xana u nga kanakana leswaku Timbhoni ta Yehova i vaevhangeli va ntiyiso va namuntlha?