Vutomi Ni Vutirheli Bya Yesu

Dyondzo Yin’wana eHenhleni Ka Siku Ra Vunkombo

SIKU ro hetelela ra Nkhuvo wa Mitsonga, siku ra vunkombo, ra ha ya emahlweni. Yesu u dyondzisa eka xiyenge xa tempele lexi vuriwaka “swibye swa nhlengo.” Lexi kahle-kahle xi le ndhawini leyi vuriwaka Nyangwa ya Vavasati laha ku nga na swibye leswi vanhu va nghenisaka minyikelo ya vona eka swona.

Vusiku byin’wana ni byin’wana hi nkarhi wa nkhuvo, ku na swo voninga swo hlawuleka leswi vekiwaka endhawini leyi ya tempele. Swikhoma-makhandlela swa mune leswikulu ngopfu swi tlhomiwe la, xin’wana ni xin’wana ni minkambana ya mune leyikulu yi tate hi mafurha. Ku vonakala loku humaka eka minkambana leyi ya 16 ya mafurha lama tshwaka ku na matimba swinene ku voninga tindhawu eka mpfhuka lowukulu nivusiku. Leswi Yesu sweswi a swi vulaka swi nga ha tsundzuxa vayingiseri vakwe hi xikombiso lexi. “Hi mina ku vonakala ka misava,” ku vula Yesu. “Loyi a ndzi landzelelaka a nga ka a nga fambi emunyameni ni siku ni rin’we, kambe ú ta va ni ku vonakala ka vutomi.”

Vafarisi va kaneta: “U tihumesela vumbhoni! Vumbhoni bya wena a byi tiyanga.”

Loko a hlamula Yesu u ri: “Na loko ndzi tihumesela vumbhoni, vumbhoni bya mina byi tiyile, hikuva ndzi tiva lomu ndzi humaka kona, ni lomu ndzi yaka kona; kambe n’wina a mi tivi lomu ndzi humaka kona, ni lomu ndzi yaka kona.” Wa engetela: “Hi mina la tihumeselaka vumbhoni, kutani na yena Tatana, loyi a ndzi rhumeke, ú humesa vumbhoni ehenhla ka mina.”

“Tata wa wena ú kwihi?” Vafarisi va lava ku tiva.

“A mi ndzi tivi, hambi a ri Tata wa mina a mi n’wi tivi,” ku hlamula Yesu. “Loko onge mi ndzi tivile, ingi mi tivile na Tata wa mina.” Hambi leswi Vafarisi va lavaka leswaku Yesu a khomiwa, ku hava ni un’we la n’wi khumbaka.

“Ndza famba,” Yesu u vula nakambe. “Laha ndzi yaka kona, mi nga ka mi nga ti.”

Hikwalaho ka leswi Vayuda va sungula ku hlamala: “Xana ú ta tidlaya, leswi a nge: ‘Laha ndzi yaka kona, mi nga ka mi nga ti’, xana?”

“N’wina mi huma kwala hansi,” Yesu wa hlamusela. “Mina ndzi huma le henhla; n’wina mi va misava leyi; mina a ndzi wa misava leyi.” Kutani wa engetela: “Loko mi nga pfumeri leswaku ‘Mina ndzi yena’, mi ta fela eswidyohweni swa n’wina.”

Yesu, kavula, u kombetela eka vukona byakwe a nga si va munhu ni mhaka ya leswaku i Mesiya la tshembisiweke, kumbe Kriste. Hambi swi ri tano, va vutisa, handle ko kanakana hi ku sola lokukulu: “Hi wena mani?”

Loko va ala, Yesu wa hlamula: “Ndzi ni mhaka yihi ku tiya ndza ha vulavula na n’wina xana?” Kambe u ya emahlweni a ku: “Loyi a ndzi rhumeke i ntiyiso wa xiviri; kutani leswi ndzi swi tweke eka yena, ndzi swi tivisa misava.” Yesu u ya emahlweni: “Loko mi ta va mi tlakusile N’wana-wa-Munhu, hi kona mi nga ta tiva leswaku ‘Mina ndzi yena’. Na swona mi ta tiva leswaku a ndzi endli nchumu hi ku tirhandzela ka mina, kambe ndzi vula swilo leswi hi laha Tatana a ndzi dyondziseke ha kona. Loyi a ndzi rhumeke, ú na mina; a nga ndzi tshikanga ndzi ri ndzexe, hikuva masiku hinkwawo ndzi endla leswi swi n’wi tsakisaka.’”

Loko Yesu a vula swilo leswi, lavo tala va pfumela eka yena. Hikwalaho ka sweswo u ri: “Loko mi tiyisela eritweni ra mina, mi vadyondzisiwa va mina hakunene; na swona mi ta tiva ntiyiso, kutani ntiyiso wu ta mi ntshunxa.”

“Hi vatukulu va Abrahama,” vakaneti vakwe va kavanyeta, “a hi si va mahlonga ya munhu ni siku ni rin’we. Xana u nga vurisa ku yini u ku: ‘Mi ta va lava ntshunxiweke’, xana?”

Hambi leswi Vayuda hakanyingi a va ri ehansi ka mfumo wumbe, a va amukeli muxanisi wihi na wihi tanihi n’wini wa vona. Va ala ku vuriwa mahlonga. Kambe Yesu u komba leswaku hakunene i mahlonga. Hi ndlela yihi? “Ndzi tiyisisile ndzi ri ka n’wina,” ku vula Yesu, “un’wana ni un’wana la endlaka xidyoho, i hlonga ra xidyoho.”

Ku ala ku amukela vuhlonga bya vona eka xidyoho swi veka Vayuda eka xiyimo xa khombo. “Hlonga a ri tshameli makumu ekaya,” ku hlamusela Yesu. “La tshamelaka makumu i n’wana wa laha kaya.” Tanihi leswi hlonga ri nga riki na timfanelo ta ndzhaka, ri nga ha va ekhombyeni ro hlongoriwa nkarhi wihi na wihi. I n’wana ngopfu-ngopfu kumbe la wundliweke ntsena a nga tshamelaka “makumu” ekaya, hi leswaku, loko ntsena a ha hanya.

“Hikokwalaho ke, loko N’wana a mi ntshunxa,” Yesu u ya emahlweni, “mi ta va lava ntshunxekeke hakunene.” Xisweswo, ntiyiso lowu ntshunxaka vanhu i ntiyiso malunghana ni N’wana, Yesu Kriste. I ntsena hi gandzelo ra vutomi bya yena bya munhu la hetisekeke laha un’wana ni un’wana a nga ntshunxiwaka eka xidyoho lexi dlayaka. Yohane 8:12-36.

◆ Yesu u dyondzisa kwihi hi siku ra vunkombo? Ku humelela yini kwalaho nivusiku, naswona leswi swi yelana njhani ni dyondzo ya Yesu?

◆ Yesu u ri yini hi ta masungulo yakwe, naswona leswi swi fanela ku veka vumbhoni bya vukona byakwe hi ndlela yihi?

◆ Vayuda i mahlonga hi ndlela yihi, kambe i ntiyiso wihi wu nga ta va ntshunxa?