Wa Rhambiwa eMintsombanweni Ya Muganga Ya “Vululami Bya Xikwembu”

MAWAKU Munyiki Lonene swonghasi loyi Yehova Xikwembu, Muvumbi wa hina wa rirhandzu a nga yena! Entiyisweni, “nyiko yin’wana ni yin’wana leyo saseka ni ku ha hinkwako loku hetisekeke” swi huma eka yena. (Yakobo 1:17) Hi laha ku fanelaka, eka Psalma 136 hi hlaya ka 26 xivulwa lexi nge: “Hikuv̌a tintŝalo ta yena hi le’ti nga heriki.”

Exikarhi ka malunghiselelo ya yena yo tala ya moya ya vanhu vakwe va khale a ku ri na minkhuvo minharhu ya lembe na lembe: Paseka ni Nkhuvo wa Swinkwa leswo ke Comela; Nkhuvo wa Mavhiki, kumbe Pentekosta; ni Nkhuvo wa Mitsonga, kumbe ku Hlengeleta. Minkhuvo leyi minharhu a yi tshama yi languteriwile hi mahlo-ngati, hikuva a yi aka emoyeni ni ku va minkarhi ya ntsako lowukulu.—Levitika 23:40-43.

Eminkarhini ya manguva lawa, hi ku fanana Yehova Xikwembu u veke etimbilwini ta malandza ya yena ku va ni minkhuvo minharhu ya moya lembe na lembe: Siku ra nhlengeletano leyi hlawulekeke, nhlengeletano ya xifundza ya masiku mambirhi ni ntsombano wa muganga wa masiku manharhu kumbe mune. Leswi na swona swi tirha tanihi minkarhi ya ku akeka emoyeni ni ku hlangana loku tsakisaka. Hi ku ya hi swiviko leswi amukeriweke enkarhini wa ku tsala loku, 6 128 388 va ve kona eka Mintsombano ya Muganga ya “Tshemba Yehova” leyi sunguleke hi June 1987, naswona 85 091 va khuvuriwile. Nan’waka mbhoni yin’wana ni yin’wana yi langutele ku va kona eka Ntsombano wa Muganga wa “Vululami Bya Xikwembu.”

Mayana nhloko-mhaka leyinene ni ya nkoka swonghasi leyi “Vululami Bya Xikwembu” yi nga yona! Phela, hambi va ri vanhu lava nga hetisekangiki va wu seketela hi nomo nkoka wa vululami. Hi yona mhaka leyi vavumbi va Buku ya Milawu ya United States 200 wa malembe lama hundzeke va lunghiseleleke hayi marhavi ya vulawuri ni ya milawu ya hulumendhe ntsena kambe ni ya vuavanyisi leswaku xivangelo xa vululami xi ta hetiseka. Hambi swi ri tano, malembe xidzana yo tala emahlweni ka sweswo, Yehova Xikwembu hi byakwe u lunghiselele swiphemu swinharhu swa hulumendhe, leswi hinkwaswo swi nga eka yena. Xisweswo, eka Esaya 33:22 ha hlaya: “Yehova i muav̌anyisi wa hina; Yehova i mulawuri wa hina; Yehova i hosi ya hina.”

Entiyisweni, hi byeriwa leswaku vululami i mahetelelo, i pakani, kumbe xikongomelo xa hulumendhe. Kambe loko ku xiyiwa nawu lowu wunene, loko swi ta eku wu tirhiseni, vona ku kayivela konghasi loku vanhu va vutianakanyi ni lava nga hetisekangiki va vaka na kona! Swivumbeko hinkwaswo swa rivengo ra rixaka, vutiko ni vukhongeri ko va swikombiso leswo tala swa ku onhiwa ka vululami. Naswona swi tano hi ku tirhisiwa hinkwako ka matimba hi ndlela yo biha, hambi ku nga ha va ku endliwa hi tihulumendhe, mavandla, tihuvo ta vukhongeri, kumbe vanhu.

I ku nkhensa muni konghasi loku hi nga vaka na kona leswi Rito ra Xikwembu ri hi tiyisekisaka hi ku hlula loku heleleke ka vululami ni vunene, hikuva Yehova i Xikwembu xa vululami hi laha ku hlawulekeke! Hi yona mhaka leyi Muxe a yimbeleleke ha yena: “Yehova i Ribye le’ro tiya; mitiro ya yena yi hetisekile; hikuv̌a tindlela hikwato ta yena ti hetisekile. I Šikwembu šo ṭhembeka, ši nga ri na nanḍu.” (Deuteronoma 32:4) Yehova Xikwembu u ni ku xixima ko tano ka vululami lerova a nyikela n’wana wakwe la nga un’we tanihi gandzelo leswaku A ta nyika vutomi lebyi nga heriki eka vanhu lava yingisaka. (Varhoma 3:25, 26) Hi laha ku faneleke, Yehova u tsakela lava va nga varhandzi va vululami ni vunene, tanihi leswi hi hlayaka eka Psalma 11:7: “Yehova o lulamile, o ranḍa mitiro ya ku lulama. V̌anhu la’v̌a lulameke v̌a ta hlalela ngohe ya yena.” Hi ku ya hi ku hundzuluxela kun’wana, u “lulamile naswona u rhandza ku tirhisana hi ku lulama.”—The New English Bible.a

Ntsombano wa hina wa Muganga wa “Vululami Bya Xikwembu” wu ta tiyisa ripfumelo ra hina hi ku hlula loku heleleke ka vunene. Wu ta tlhela wu tiyisa ku tiyimisela ka hina hi minkarhi hinkwayo ni le hansi ka swiyimo hinkwaswo ku hlayisa xileriso lexi nga eka Mikea 6:8 xo “endla le’ŝi lulameke.” Leyi i mphikamakaneta ya xiviri hikwalaho ka mimboyamelo ya hina ya vutianakanyi bya ndzhaka ni miringo ya misava ya vutianakanyi leyi hi rhendzeleke.

Etindhawini to tala, ntsombano wu ta sungula hi Ravumune nindzhenga, naswona siku rin’wana ni rin’wana ri ta kombisa nhloko-mhaka leyi faneleke, xihloko xa siku ro sungula ku ta va lexi nge ‘Ku Katekile Lava Hlayisaka Vululami,’ lexi seketeriweke eka Psalma 106:3. Nkulumo-nkulu yi ta kandziyisa leswaku vululami byi fungha tindlela hinkwato ta Xikwembu, naswona yi ta landzeriwa hi swiviko leswi humaka eka vaxiyi va nkarhi lowu teleke va vululami, tanihi varhumiwa lava humaka ematikweni mambe.

‘Amukela Dyondzo Leyi Nyikaka Vutlhari’ (leyi seketeriweke eka Swivuriso 1:3) i nhloko-mhaka ya Ravuntlhanu. Hi siku leri, tinkulumo timbirhi ti ta kandziyisa nkoka wa ku laya ni wa ku amukela ndzayo. Drama ya manguva lawa, “Ku Fungheriwa Ku Hlayiseka,” yi ta tshikilela xilaveko xa ku tikomba tanihi un’wana wa malandza ya Yehova. Nongonoko wa siku wu ta hetelela hi ndzayo yin’wana leyinene ya ku ‘Tshemba Yehova Leswaku U Kuma Vutlhari.’

Leyi tiyisekisaka i nhloko-mhaka ya siku ra vunharhu, hi Mugqivela: ‘Ku Avanyisa Ka Xona I Ka Ntiyiso Naswona Ku Lulamile,’ leyi tekiweke eka Nhlavutelo 19:2. Leyi nga ta nyikeriwa nimixo i nkulumo leyi nge “Nkhuvulo Lowu Yisaka Eku Avanyiseni Lokunene.” Nongonoko wa nindzhenga wu ta sungula hi nxaxamelo lowu nga ta laya vakulu ku ‘Tirhela Vululami Hi Byoxe.’ Leswi swi ta landzeriwa hi nxaxamelo wun’wana, lowu nge “Nkarhi Lowu Vekiweke Wu Kusuhi,” lowu nga ta vulavula hi vuprofeta bya Matsalwa ya Vukriste ya Xigriki lama vhumbaka ku hlula ka vululami.

Sonto, siku ra vumune ni ro hetelela ra ntsombano, ri na nhloko-mhaka ya rona leyi nge ‘Vululami—U Fanele Ku Landzelela Ku Lulama.’ (Deuteronoma 16:20) Lexi hlawulekeke enongonokweni nimixo ku ta va drama ya Bibele leyi tsakisaka ni leyi nga enkarhini “Ku Avanyisa Ka Yehova Eka Vanhu Lavo Biha.” Mahungu lama chavelelaka hakunene eka varhandzi hinkwavo va ku lulama ya kumeka eka nkulumo ya le rivaleni ya nindzhenga, “Vululami Eka Hinkwavo Hi Muavanyisi Wa Xikwembu La Vekiweke.” Hinkwavo va ta kuma mpfuno lowu engetelekeke eka nkulumo leyi loko va rhanga hi ku titolovelanisa na Mintirho ndzima 17. Hi laha ku fanelaka, eka nkulumo yo dlayelela, hinkwavo lava nga kona va ta tsundzuxiwa, “Hambetani Mi Landzelela Vululami Loko Makumu Ma Tshinela.”

Entiyisweni, nkhuvo wa moya lowu fuweke wu yimele hinkwavo lava nga ta va kona eka wun’wana wa Mintsombano ya Muganga ya “Vululami Bya Xikwembu.” Kutani tana u ri na ku navela lokunene ka moya, u khathalela swinene xilaveko xa wena xa moya. Kombisa ku tlangela loku fanaka ka tafula ra Yehova loku u ku kombaka loko u hlanganyela minhlangano ya bandlha ra ka n’wina—hi ndlela leyi u tilunghisaka ha yona, hi ku fika hi nkarhi emahlweni ka ku sungula ka nongonoko, ivi kutani u rindzela xikhongelo xo hetelela xa siku rin’wana ni rin’wana. Yingisela swinene eka xiphemu xin’wana ni xin’wana lexi nga enongonokweni. Tsala tinhla; leswi a swi nga ku nyiki nchumu wo tsundzuka ntsombano hi wona ntsena kambe swi ta ku pfuna ku veka miehleketo ya wena eka nkulumo loko yi ri karhi yi nyikeriwa.

Naswona hi nga honisi nawu lowu hlamuseriweke hi Yesu ivi wu rhekhodiwa eka Mintirho 20:35: “Ku nyika i nkateko lowu tlulaka ku nyikiwa.” Kutani endla xiyenge xa wena ku pfuna ntsombano leswaku wu tirha hi ku olova na hi ku hleleka. Naswona tshama u xalamukele minkarhi ya vumbhoni bya xitshuketa. Ngopfu-ngopfu tikarhateli leswi, hikuva ku hava nkarhi lowu vekeriweke etlhelo wa vumbhoni bya yindlu na yindlu hi nkarhi wa ntsombano. Hi tindlela to tano hinkwato, u nga kombisa leswaku hakunene u muxiyi la tsakeke wa vululami.

U nga vulavula ni Timbhoni ta Yehova ta kwalaho hi ndhawu ya ntsombano ya le kusuhi na wena

[Nhlamuselo ya le hansi]