I Mani La Nga Ta Amukeriwa Hi Yehova Xana?
“Tirhelani ku ponisiwa ka n’wina . . . ; hikuva i Xikwembu lexi tirhaka eka n’wina, lexi endlaka leswaku mi tsakela ni ku yingisa ku rhandza ka xona.”—VAFILIPIYA 2:12, 13.
1, 2. Hi le ka xiyimo xihi laha Yesu a amukeleke marito ya ku amukeriwa hi Xikwembu, naswona ha yini leswi swi fanele ku hi tsakisa?
A KU ri yinhla yo hundzuka evurungurwini. Yohane Mukhuvuri a a ri karhi a chumayela rungula ra Xikwembu ni ku nghenisa vanhu lava hundzukeke ematini. Manuku wanuna un’wana loyi Yohane a a n’wi tiva a lulamile u tile; a a ri Yesu. A a ri hava xidyoho lexi a a fanele ku hundzuka eka xona, kambe u kombele ku khuvuriwa leswaku a ‘hetisisa leswo lulama hinkwaswo.’—Matewu 3:1-15
2 Endzhaku ka loko Yohane a pfumerile hi ku titsongahata, ni loko Yesu a humile ematini, “matilo ma pfuleka, a vona Moya wa Xikwembu wu xika tanihi tuva.” Ku tlula sweswo, “ku twakala rito leri humaka etilweni, ri ku: ‘Loyi i N’wananga la rhandzekaka, loyi ndzi n’wi [amukeleke].’” (Matewu 3:16, 17; Marka 1:11) Mawaku xitiviso lexonghasi! Hinkwerhu ka hina ha tiphina hi ku tsakisa un’wana loyi hi n’wi xiximaka. (Mintirho 6:3-6; 16:1, 2; Vafilipiya 2:19-22; Matewu 25:21) Manuku ke, anakanya ndlela leyi a wu ta titwa ha yona loko Xikwembu xa matimba hinkwawo xi tivisile xi ku, ‘ndzi ku amukerile!’
3. Xana hi fanele hi karhatekela yini malunghana ni ku amukeriwa hi Xikwembu?
3 Xana swa koteka leswaku munhu a va la amukeriweke hi Xikwembu namuntlha ke? Hi xikombiso, teka munhu loyi ‘a nga riki na ntshembo naswona a nga ri na Xikwembu emisaveni,’ a nga ri “na ku averiwa evutomini bya Xikwembu.” (Vaefesa 2:12; 4:18) Xana a nga suka eka xiyimo xexo a ya exivandleni lexi katekisiweke xa ku amukeriwa hi Yehova? Loko swi ri tano, hi ndlela yihi ke? A hi voneni.
Xana Marito Yakwe A Ma Vula Yini?
4. (a) Xana hi wihi mongo wa rito ra Xigriki leri vulaka ‘ku amukeriwa’ emaritweni ya Xikwembu? (b) Ha yini ku tirhisiwa ka rona emhakeni leyi ku ri loku tsakisaka hi laha ku hlawulekeke?
4 Tirhekhodo ta Evangeli ta marito ya Xikwembu lama nge “ndzi amukele [Yesu]” ti huma eka riendli ra Xigriki eu·do·keʹo. (Matewu 3:17; Marka 1:11; Luka 3:22, NW) Ri vula “ku tsakisiwa swinene, ku languta hi ndlela leyinene, ku tsakela,” naswona xivumbeko xa rona xa riviti xi na mianakanyo ya “nkateko, ntsako lowunene, tintswalo, ku navelela le swinene, ku navela.” Eu·do·keʹo a ri hikeriwanga eka ku amukeriwa hi Xikwembu. Hi xikombiso, Vakrise va le Makedoniya ‘a va tsakile’ ku avelana timali ni van’wana. (Varhoma 10:1; 15:26; 2 Vakorinto 5:8; 1 Vatesalonika 2:8; 3:1) Hambi swi ri tano, ku amukeriwa loku Yesu a ku kumeke ku phofuriwile hi Xikwembu, hayi hi vanhu. Rito leri ri tirhisiwa hi ku kombetela eka Yesu ntsena endzhaku ka loko a khuvuriwile. (Matewu 17:5; 2 Petro 1:17) Lexi tsakisaka, Luka 2:52 yi tirhisa rito leri hambaneke—khaʹris—loko yi vulavula hi Yesu tanihi muntshwa la nga khuvuriwangiki loyi a amukeleke “tintswalo” eka Xikwembu ni vanhu.
5. (a) Swi vonakisa ku yini leswaku vanhu lava nga hetisekangiki va nga amukeriwa hi Xikwembu? (b) I vamani ‘vanhu lava tsakeriwaka’ ke?
5 Xana swa koteka leswaku na vanhu lava nga hetisekangiki ku fana na hina va amukeriwa hi Xikwembu? Lexi tsakisaka, nhlamulo i ina. Loko Yesu a velekiwile, tintsumi ti tivisile ti ku: “Ku kwetsima a ku ve eka Xikwembu ematilweni ya le henhla, ku rhula a ku ve emisaveni eka vanhu lava xi va tsakelaka [eu·do·kiʹas].” (Luka 2:14) Hi Xigriki xa xiviri, tintsumi a ti ri karhi ti yimbelela nkateko lowu taka eka “vanhu va mianakanyo leyinene” kumbe “vanhu lava Xikwembu xi va amukelaka.”a Profesa Hans Bietenhard u tsala hi matirhisele yakwe ya en an·throʹpois eu·do·kiʹas a ku: “Xiga lexi xi vula vanhu va ntsako lowunene wa Xikwembu . . . Hikwalaho, laha a hi vulavuli hi ku tsakeriwa ka vanhu . . . Hi vulavula hi ku rhandza ka Xikwembu ka mafumele ni musa, loku ku tihlawulelaka vanhu leswaku va ponisiwa.” Xisweswo, tanihi laha Timbhoni ta Yehova ti hlamuseleke khale ha kona, Luka 2:14 yi kombisa leswaku hi ku tinyiketa ni ku khuvuriwa, swa koteka leswaku vanhu lava nga hetisekangiki va va vanhu lava tsakeriwaka, vanhu lava amukeriweke hi Xikwembu!b
6. I yini lexi ha ha xi lavaka leswaku hi dyondza hi ku amukeriwa hi Xikwembu ke?
6 Hambi swi ri tano, u nga ha xiya ku hambana loku nga kona exikarhi ka ‘valala va Xikwembu lava nga ni miehleketo leyi nga emintirhweni leyo biha’ ni ku va lava amukeriweke tanihi vanghana va Xikwembu xa hina lexo lulama ni lexi tlhariheke. (Vakolosa 1:21; Psalma 15:1-5) Hikwalaho, hambi leswi u nga ha ntshunxekaka ku twa leswaku vanhu va nga amukeriwa, u nga ha lava ku tiva leswi katsekaka. Hi nga dyondza swo tala ehenhleni ka leswi eka ku tirhisana loku hundzeke ka Xikwembu.
U Amukele Vanhu
7. Eksoda 12:38 yi nyika xikombiso xihi mayelana ni langutelo ra Xikwembu?
7 Hi malembe xidzana yo tala emahlweni ka xitiviso xa Luka 2:14, Yehova u amukele vanhu leswaku va ta va ta n’wi gandzela. Kavula, Xikwembu a xi tirhisana ntsena ni tiko ra Israyele, leri a ri tinyiketele eka xona. (Eksoda 19:5-8; 31:16, 17) Kambe, tsundzuka leswaku loko Israyele ri mache ri huma evuhlongeni bya Egipta, “la’v̌o tala v̌a matiko v̌a [suke] na v̌ona.” (Eksoda 12:38) Vanhu lava lava va nga riki Vaisrayele lava va nga ha vaka va ve ni ku tirhisana ni vanhu va Xikwembu ni ku vona makhombo aEgipta manuku va hlawule ku famba na Israyele. Van’wana kumbexana va ve vaproselita lava taleke.
8. I tinxaka tihi timbirhi ta valuveri lava tshameke eIsrayele, naswona ha yini a ku ri ni ku hambana eka ndlela leyi Vaisrayele a va va khoma ha yona?
8 Ntwanano wa Nawu wu amukele xiyimo xa vanhu lava nga riki Vaisrayele mayelana ni Xikwembu ni vanhu va xona. Valuveri van’wana a va ri vahlapfa lava a va lo titshamela ntsena etikweni ra Israyele, laha a va fanele ku yingisa milawu ya xisekelo, yo tanihi leyi lwisanaka ni ku dlaya ni leyi lavaka ku hlayisiwa ka Savata. (Nehemia 13:16-21) Ematshan’wini yo khoma vahlapfa lava tanihi vamakwerhu, Muisrayele u kombise ku tivonela lokunene loko a vulavula kumbe ku hanyisana na vona, hikuva a va nga si va xiphemu xa tiko ra Xikwembu. Hi xikombiso, hambi leswi Muisrayele a a nga pfumeleriwi ku xava kumbe ku dya ntsumbu wa xiharhi lexi nga humangiki ngati lexi feke hi xoxe, vamatiko vo tano lava a va nga ri vaproselita a va ta endla tano. (Deuteronoma 14:21; Ezekiel 4:14) Hi nkarhi lowu faneleke van’wana va vaaki lava vamatiko a va nga ha landzela ndlela ya vamatiko lava veke vaproselita lava yimbisiweke. Hi kona a va ta khomiwa tanihi vamakwerhu evugandzerini bya ntiyiso, va boheka ku hlayisa Nawu hinkwawo. (Levitika 16:29; 17:10; 19:33, 34; 24:22) Ruti, Mumoab, na Naaman, munhu wa nhlokonho wa Muasiriya, a va ri lava va nga riki Vaisrayele lava Xikwembu xi va amukeleke.—Matewu 1:5; Luka 4:27.
9. Xana Solomoni u tiyise langutelo ra Xikwembu eka valuveri hi ndlela yihi?
9 Emasikwini ya Hosi Solomoni, hi tlhela hi vona langutelo ra Xikwembu ro amukela eka lava nga riki Vaisrayele. Loko a khangula tempele, Solomoni u khongerile a ku: “Muluv̌eri l’a nga riki wa tiko ra wena ra Israel, kambe a ta a sukile tikweni le’ri nge kule hikwalaho ka v̌ito ra wena, . . . kungaku loko a ta khongela e Ndlwini leyi: Wena, yingisa u ri matilweni, . . . leŝaku matiko hikwawo ya misav̌a ma tiv̌a v̌ito ra wena, ma ku tšhav̌a kukotisa tiko ra wena ra Israel.” (1 Tihosi 8:41-43) Ina, Yehova u amukele swikhongelo swa vahlapfa lavanene lava va n’wi laveke. Kumbexana na vona lava a va ta dyondza milawu yakwe, va titsongahatela nawu wa ku yimba, ivi va va swirho leswi amukeriweke swa vanhu vakwe lava katekisiweke.
10. Xana Vayuda ingi va hanyisane hi ndlela yihi ni mutsheniwa wa Muetiyopiya, naswona ha yini ku yimbisiwa ku n’wi pfunile?
10 Wanuna un’wana loyi a endleke leswi eminkarhini ya khale a ku ri mulanguteri wa timali wa Nkosikazi Kandake wa le Etiyopiya ra le kule. Kumbexana, loko a twe hi Vayuda ni vugandzeri bya vona ro sungula, mahanyelo kumbe tindlela ta yena ta vukhongeri a swi nga amukeleki eka Yehova. Kutani Vayuda a va fanele va kombisile ku tiyisela lokukulu loko wanuna loyi wa muluveri loyi a a ri xikarhi ka vona a ri karhi a dyondza Nawu leswaku a tiva swilaveko swa Xikwembu. Entiyisweni u endle nhluvuko ivi a endla ku hundzuka loku lavekaka leswaku a fanelekela ku yimba. Mintirho 8:27 yi hi byela leswaku “a a tile Yerusalema ku ta gandzela kona.” (Eksoda 12:48, 49) Leswi a swi ta kombisa leswaku hi nkarhi wolowo a a ri muproselita la heleleke. Xisweswo a a ri exiyin’weni xo amukela Mesiya ivi a va mudyondzisiwa wakwe la khuvuriweke, kutani a ta eku pfumelelaneni ni ku rhandza ka Xikwembu loku yaka emahlweni.
Lava Nga Pfumeriki Ni Bandlha Ra Vukriste
11, 12. (a) I ku hundzuka kwihi kun’wana loku humeleleke loko Muetiyopiya a khuvuriwile? (b) Leswi a swi twanana na Vafilipiya 2:12, 13 hi ndlela yihi ke?
11 Yesu u byele vadyondzisiwa vakwe a ku: “Yanani ha kona, mi ya hundzula vamatiko hinkwawo leswaku va va vadyondzisiwa va mina, mi va khuvula hi vito ra Tatana, ni ra N’wana, ni ra Moya lowo Kwetsima, mi va dyondzisa ku hlayisa hinkwaswo leswi ndzi mi leriseke swona.” (Matewu 28:19, 20) Muproselita wa Muetiyopiya loyi a ha ku vuriwaka ana se a a ri ni vutivi bya Yehova ni bya moya lowo kwetsima. Kutani kute loko Filipi a n’wi pfune ku twisisa ni ku amukela Yesu tanihi N’wana wa Xikwembu wa vumesiya, u kotile ku khuvuriwa. Xisweswo a a ta va xirho lexi amukelekaka xa vanhu va Yehova lava a va landzelela Kriste. Hi ntumbuluko, a a ta tihlamulela eka Xikwembu, a laveka ‘ku hlayisa swilo hinkwaswo leswi lerisiweke’ Vakriste. Kambe ku te ku langutela loku hlamarisaka ni vutihlamuleri lebyi: ku ponisiwa!
12 Endzhakunyana, Pawulo u tsale leswaku Vakriste hinkwavo va fanele ku ‘tirhela ku ponisiwa ka vona hi ku chava ni ku rhurhumela.’ Kambe ke, a swi koteka ku endla sweswo, ‘hikuva i Xikwembu lexi hikwalaho ka ku tsaka ka xona lokunene [eu·do·kiʹas], xi tirhaka endzeni ka n’wina leswaku mi tsaka ni ku yingisa.’—Vafilipiya 2:12, 13.
13. Xana Vakriste, va nga ha va va hanyisane hi ndlela yihi ni lava a va nga hatliseli ku khuvuriwa ku fana na mutsheniwa wa Muetiyopiya?
13 A hi hinkwavo lava hlanganeke ni Vakriste va ntiyiso lava a va tiyimiserile ni ku faneleka tanihi Muetiyopiya yoloye leswaku va hatlisela eku khuvuriweni. Van’wana, lava nga riki Vayuda kumbe vaproselita, a va ri hava vutivi bya Yehova ni tindlela takwe; naswona mahanyelo ya vona a ma nga kongomisiwi hi mimpimanyeto ya yena. Xana a ku ta hanyisaniwa na vona hi ndlela yihi ke? Vakriste a va fanele ku landzela xikombiso xa Yesu. Entiyisweni a nga khutazanga kumbe hambi ku ri ku amukela xidyoho. (Yohane 5:14) Hambi swi ri tano, a a tiyiselela vadyohi lava a va tshinetiwe eka yena ni lava a va navela ku twananisa tindlela ta vona ni letiya ta Xikwembu.—Luka 15:1-7.
14, 15. Handle ka Vakriste lava totiweke, i tinxaka tihi ta vanhu leti veke kona eminhlanganweni ya le Korinto, naswona xana va nga ha va va hambanise ku yini malunghana ni nhluvuko wa moya?
14 Leswaku Vakriste va hanyisane hi ku tiyisela ni lava a va ri ku dyondzeni hi ta Xikwembu swi le rivaleni eka marito ya Pawulo malunghana ni minhlangano ya le Korinto. Loko a vulavula hi ku tirhisiwa ka tinyiko ta masingita ta moya leti eku sunguleni ti fungheke Vukriste tanihi lebyi katekisiweke hi Xikwembu, Pawulo u boxe “vapfumeri” ni “lava nga riki vapfumeri.” (1 Vakorinto 14:22) “Vapfumeri” a ku ri lava va amukeleke Kriste ni lava khuvuriweke. (Mintirho 8:13; 16:31-34) “Vakorinto lavo tala, loko va twa Rito, va pfumela, va va va khuvuriwa.”—Mintirho 18:8.
15 Hi ku ya hi 1 Vakorinto 14:24, ‘lava nga riki vapfumeri kumbe vanhu lava tolovelekeke’ na vona va tile eminhlanganweni eKorinto naswona a va amukeriwa kona.c Kumbexana, a va hambana loko ku tiwa eka nhluvuko wa vona eku dyondzeni ni ku tirhisa Rito ra Xikwembu. Van’wana va nga ha va va ve va ha endla xidyoho. Van’wana va nga ha va va kume ripfumelo lerikulu, ana se va endle ku hundzuka evuton’wini bya vona, ivi, hambi ku ri emahlweni ka ku khuvuriwa, va sungule ku byela van’wana leswi va swi dyondzeke.
16. Xana vanhu vo tano a va ta pfunekisa ku yini hi ku va exikarhi ka Vakriste eminhlanganweni ya bandlha?
16 Kavula, ku hava ni un’we wa vanhu vo tano lava nga khuvuriwangiki loyi a a ri “eHosini.” (1 Vakorinto 7:39, BX) Loko ku ri leswaku nkarhi wa vona lowu hundzeke a wu katsa swihoxo leswikulu swa mahanyelo ni swa moya, swa twisiseka leswaku a swi ta va swi va tekele nkarhi ku tixaxameta ni mimpimanyeto ya Xikwembu. Sweswi, ntsendze loko va nga ringetanga hi ku kanganyisa ku dlaya ripfumelo ni ku tenga ka bandlha, a va amukeriwa. Leswi va swi voneke ni ku swi twa eminhlanganweni a swi ta va ‘tshinya’ loko ‘swihundla swa timbilu ta vona swi humeseriwa erivaleni.’—1 Vakorinto 14:23-25; 2 Vakorinto 6:14.
Ku Tshama U Amukeriwe Hi Xikwembu Leswaku U Ponisiwa
17. Luka 2:14 yi ve ni ku hetiseka kwihi eka lembe xidzana ro sungula?
17 Hi ku chumayela ka le rivaleni ka Vakriste lava khuvuriweke eka lembe xidzana ro sungula, magidi ma twe mahungu lamanene. Va veke ripfumelo eka leswi va swi tweke, va hundzuka endleleni ya vona leyi hundzeke, ivi va khuvuriwa, va ‘vula hi nomu leswaku va ta ponisiwa.’ (Varhoma 10:10-15; Mintirho 2:41-44; 5:14; Vakolosa 1:23) A ku nga ri na ku kanakana leswaku vanhu lava khuvuriweke enkarhini wolowo a va amukeriwe hi Yehova, hikuva u va totile hi moya lowo kwetsima, a va amukela tanihi vana va moya. Muapostola Pawulo u tsarile a ku: “Xi lulamisile khale leswaku, ha Yesu Kriste, xi ta hi tshineta kusuhi na xona, xi hi endla vana va xona. leswi, a ku ri ku rhandza ka xona [eu·do·kiʹan] ni makungu ya xona.” (Vaefesa 1:5) Xisweswo, exikarhi ka lembe xidzana rero leswi a swi vhumbiwile hi tintsumi eku velekiweni ka Yesu swi sungule ku tikombisa swi ri ntiyiso: ‘Ku rhula ku ve xikarhi ka vanhu lava katekeke [kumbe, vanhu lava amukeriwaka hi Xikwembu].’—Luka 2:14.
18. Ha yini Vakriste lava totiweke va nga xi honisanga xiyimo xa vona lexi amukeriwaka na Xikwembu?
18 Ku hlayisa ku rhula koloko, a swi laveka eka ‘vanhu volavo va katekeke’ leswaku va ‘tirhela ku ponisiwa [ka vona] hi ku chava ni ku rhurhumela.’ (Vafilipiya 2:12) Sweswo a swi nga olovi, hikuva a va ha ri vanhu lava nga hetisekangiki. A va ta kongomana ni miringo ni mintshikilelo yo endla swo biha. Loko va tinyiketele eku endleni ka leswo biha, a va ta lahlekeriwa hi ku amukeriwa hi Xikwembu. Xisweswo, hi rirhandzu Yehova u lunghiselele varisi va moya lava a va ta pfuna ni ku sirhelela mabandlha.—1 Petro 5:2, 3.
19, 20. I malunghiselelo wahi lawa Xikwembu xi ma endleke leswaku Vakriste lava khuvuriweke va ta hambeta va va malandza ya xona lama amukeriweke?
19 Vakulu vo tano va mabandlha a va ta nghenisa xitsundzuxo xa Pawulo embilwini lexi nge: “Loko un’wana a kumiwa a ri karhi a endla xihoxo, n’wina lava mi nga va Moya, n’wi vuyiseni hi moya wa musa. Tivonele leswaku na wena u nga ringiwi.” (Vagalatiya 6:1) Hi laha hi nga swi twisisaka ha kona, munhu loyi a tekeke goza ra nkoka ro khuvuriwa a a ta va ni vutihlamuleri lebyikulu, ku fana ni leswi a swi ri tano hi muluveri loyi a veke muproselita loyi a yimbisiweke eIsrayele. Hambi swi ri tano, loko Mukriste la khuvuriweke a endle xidyoho, a a ta kuma mpfuno wa rirhandzu exikarhi ka bandlha.
20 Ntlawa wa vakulu ebandlheni a wu ta nyikela mpfuno eka munhu loyi a weleke eku dyoheni lokukulu. Yuda u tsarile a ku: “Tsetselelani lava kanakanaka. Ponisani van’wana hi ku va vutla endzilweni; van’wana mi va tsetselela mi ri ni ku tivonela: Mi fanele ku venga hambi yi ri nguvu ya vona ntsena, leyi nyamisiweke hi swa misava leyi.” (Yuda 22, 23) Xirho lexi khuvuriweke xa bandlha lexi pfuniweke hi ndlela leyi a xi ta hambeta xi tsakela ku amukeriwa hi Yehova ni ku rhula loku tintsumi ti vulavuleke ha kona eku velekiweni ka Yesu.
21, 22. Xana a ku ta humelela yini loko un’wana a va mudyohi la nga hundzukiki, naswona swirho leswi tshembekaka swa bandlha a swi ta endlisa ku yini ke?
21 Hambi leswi a swi nga talanga, a ku ri ni timhaka tin’wana leti mudyohi a a nga hundziki eka tona. Manuku vakulu a va fanele va n’wi hlongola leswaku va sirhelela bandlha leri tengeke eku thyakisiweni. Sweswo swi endlekile eka munhu la khuvuriweke eKorinto loyi a phikeleleke evuxakeni bya vunghwavava. Pawulo u tsundzuxile bandlha a ku: “Mi nga tolovelani ni vaoswi, a ndzi nga vuli ni kuntsongo ku hambana na vanhu va misava leyi lava nga vaoswi, kumbe lava nga ni makwanga, kumbe vaxisi, kumbe lava phahlaka swikwembu swa hava; e-e, hikuva loko mi endle sweswo, a swi ta vula leswaku mi rhurha emisaveni leyi. Leswi a ndzi mi tsalela swona hi leswaku mi nga tolovelani ni loyi a vuriwaka “makwerhu” kasi i muoswi, kumbe i munhu wa makwanga, kumbe i muphahli wa swikwembu swa hava, kumbe i murhukani, kumbe i xidakwa, kumbe i muxisi; munhu lowu tallo, hambi ku ri ku dya mi nga dyi na yena.”—1 Vakorinto 5:9-11.
22 Leswi wanuna wa le Korinto a a tekile goza ra nkoka ro khuvuriwa, a va la amukeriweke hi Xikwembu ni ku va xirho xa bandlha, ku hlongoriwa kakwe a ku ri mhaka leyikulu. Pawulo u kombise leswaku Vakriste a va nga fanelanga ku tolovelana na yena, hikuva u lahle xiyimo xakwe lexi amukeriweke na Xikwembu. (Ringanisa 2 Yohane 10, 11.) Petro u tsale hi vanhu vo tano lava hlongoriweke a ku: “A swi ta va swi va antswerile loko va nga tivanga ndlela ya ku lulama, ku ri na loko va yi tivile kutani va tlhelela ndzhaku va tshika nawu lowo hlawuleka lowu va nyikiweke wona. Swi va humelele hi laha xivuriso xa ntiyiso xi vuleke ha kona xi ku: ‘Mbyana yi vuyela emahlanteni ya yona.’”—2 Petro 2:21, 22.
23. Eka lembe xidzana ro sungula a ku ri xiyimo xihi lexi tolovelekeke exikarhi ka Vakriste malunghana ni ku kuma ku amukeriwa hi Xikwembu?
23 Swi le rivaleni leswaku Yehova a a nga ha ta languta vanhu vo tano tanihi lava amukeriweke, hikuva a va hlongoleriwe ku va vadyohi lava va nga hundzukiki. (Vaheveru 10:38; ringanisa 1 Vakorinto 10:5.) Entiyisweni, i vantsongo ntsena lava a va tsemiwa. Vo tala lava kumeke ‘tintswalo ni ku rhula loku nga fanelangiki leswi humaka eka Xikwembu’ kutani va ‘amukeriwa tanihi vana hi ku ya hi ntsako lowunene wa ku rhandza ka yena’ va tshame va tshembekile.—Vaefesa 1:2, 5, 8-10.
24. I mhaka yihi ya dyondzo leyi leyi yi lavaka nyingiso wun’wana wa hina?
24 Leswi kahle-kahle swi tano ni le nkarhini wa hina. Kambe, a hi xiyeni ndlela leyi ‘lava nga riki vapfumeri kumbe vanhu lava tolovelekeke’ va nga pfuniwaka ha yona leswaku va amukeriwa hi Xikwembu namuntlha na leswi swi nga endliwaka ku va pfuna loko va dyoha nkarhi wun’wana. Xihloko lexi landzelaka xi ta hlamusela timhaka leti.
[Tinhlamuselo ta le hansi]
a Ringanisa “vanhu lava xi va amukelaka,” New Testament; hi George Swann; “vanhu lava xi tsakisiwaka hi vona,” The Revised Standard Version.
b Vona Xihondzo xo Rindza xa Xinghezi xa October 15, 1964, matluka 629-33.
c “ἄπιστος (apistos, ‘la nga riki mupfumeri’) na ιδιώτης (idiōtēs, ‘munhu loyi a nga riki na ku twisisa,’ ‘mulavisisi’) lawa hinkwawo ya le ka ntlawa wa lava nga riki vapfumeri ku hambana ni lava ponisiweke va kereke ya Vukriste.”—The Expositor’s Bible Commentary, vholumo 10, tluka 275.
Wa Tsundzuka Xana?
◻ Hi ku ya hi Matsalwa, i ku sukela rini naswona hi ndlela yihi laha vanhu va nga amukeriwaka hi Xikwembu?
◻ A ku ri rihi langutelo ra Xikwembu hi valuveri lava a va ri xikarhi ka vanhu va xona, kambe ha yini Vaisrayele a va fanele ku ringanisa ku tivonela ni ku tiyisela?
◻ Xana hi nga heta hi ku yini eka mhaka ya leswaku “lava nga riki vapfumeri” va te eminhlanganweni ya Vukriste eKorinto ke?
◻ Xikwembu xi endle lunghiselelo ro pfuna Vakriste lava khuvuriweke leswaku va tshama va ri malandza ya xona lama amukeriweke hi ndlela yihi?